Bekwaam raiman — Wan blesi gi den brada foe den
„Mi wani tjari kroetoeman kon baka gi oenoe soleki fosten, èn raiman gi oenoe soleki ini a bigin.” — JESAJA 1:26.
1, 2. (a) Fa e kon a krin na ini Odo 12:15 nanga 19:20 na waarde foe rai? (b) San de fosi fanowdoe efoe wi wani taki rai èn sortoe ondrofeni e sori disi?
TERRI de na oemapikin foe kristen papa nanga mama. Na skoro a ben abi wan meisje leki mati di ben de ooktoe „ini na waarheid”. Ma Terri ben si dati a mati foe en di a ben kon ini na laatste klas foe lagiskoro no ben so nanga faja moro gi na bribi foe en leki fosten. Di den ben de makandra na na middelbare skoro, dan na mati foe en no ben fisiti alaten moro den kriten komakandra èn ben bigin feni fowtoe na tapoe na Wachttoren Genootschap èn na gemeente. Ma Terri ben begi fajafaja foe na boen foe na mati foe en èn e gi en alaten na rai foe tan tranga leki kristen. Te foe kaba na moeiti foe Terri ben waka boen. Na a di foe fo jari foe na middelbare skoro na mati foe en ben go baka na komakandra èn te foe kaba a ben teki dopoe. Fa dati ben de wan paiman gi a getrow mati foe en Terri!
2 Wan sma kan degedege te a loekoe na ondrofenitori disi dati kristensma ten na ten moe gi makandra lobi rai? A bijbel e gi wi tranga: „Arki na rai èn teki tranga leri, sodati joe kan de koni na ini a ten di e kon” (Odo 19:20; 12:15). Na mati foe Terri ben gi jesi na a rai dati. Ma efoe Terri now no ben abi na lobi, a horidoro, nanga a dek’ati foe tan gi na ini ala den jari dati na jepi foe en? Ija, efi wan sma foe wi ’wani arki na rai’, dan wan raiman moe de. Soema de dati?
Rai — soema kan gi dati?
3. Jehovah sorgoe foe soema ini a gi foe biten rai ini na kristen gemeente?
3 Jehovah Gado ben pramisi na ini wi ten foe gi raiman na en pipel. A ben taki: ’Mi wani tjari raiman kon baka gi oenoe soleki na ini a bigin’ (Jesaja 1:26). Na pramisi disi moro foeroe ben kon troe ini den owroeman di den poti ini na kristen gemeente. Na gi foe rai, na wan fasi foe leri èn spesroetoe den owroeman de „bekwaam foe gi leri” (1 Timóteus 3:2). Kande na apostel Paulus ben prakseri moro foeroe na den owroeman di a ben taki: „Srefi awinsi wan sma doe wan fowtoe stap bifo a kisi ensrefi, dan oenoe di abi jejefasi, moe proeberi foe tjari sowan sma kon baka na ini na jeje foe safrifasi” (Galacia 6:1). Ma na den owroeman nomo de den wan enkriwan di kan gi rai?
4, 5. (a) San de wantoe bijbel eksempre di e sori dati owroeman no de den wan enkriwan di kan gi rai? (b) San de wantoe aparti disiten situwasi ini san kristen di no de owroeman e gi rai?
4 Terri no ben de wan owroeman, ma a rai foe en te foe kaba ben tjari boen bakapisi kon. Prakseri pikinso na a legre edeman Naäman foe Syriakondre. A ben doe positief stap baka di a ben kisi toemsi moi bodoi foe wan jongoe Israël meisje, èn bakaten a ben waka ooktoe baka na rai foe en dinari. David ben kisi jepi foe di a ben teki na rai di ben kon biten foe Abigaïl, na oema foe Nabal, foe no tjari broedoepaiman kon na tapoe ensrefi. Èn na jongoe man Elíhu ben sabi foe gi Job nanga en dri trowstoe-man heri boen koni rai. — 1 Samuël 25:23-35; 2 Kownoe 5:1-4, 13, 14; Job 32:1-6.
5 Na so a gi foe rai na ini a ten disi no de wan spesroetoe grani soso foe owroeman. Papa nanga mama e gi den pikin foe den geregeld rai. Jongoesma leki Terri nofotron e si boen winimarki na ini a gi foe rai na den mati foe den foe asrefi jari. Èn na bijbel e gi dekati na lepi sisa ’foe leri san de boen’, spesroetoe na den moro jongoe oema ini a gemeente. (Titus 2:3-5). Te joe loekoe en boen dan ini algemeen de a tapoe wi alamala na ferplekti foe jepi makandra na ini a pistori disi. Na apostel Paulus ben taki: „Tan trowstoe makandra foe dat’ede èn bow makandra soleki, te joe loekoe en boen, oenoe e doe kaba.” — 1 Thessalonica 5:11.
Den marki di na gi foe kristen rai abi na ini prakseri
6. San na wantoe marki di kristen abi na ini prakseri?
6 San de wantoe marki di na gi foe kristen rai abi ini prakseri? Wan foe den de foe jepi wan sma foe go na fesi èn foe tan waka na joisti pasi, loesoe problema, wini moeilekheid èn kande drai komoto foe wan fowtoe libifasi. Wantoe fasi foe gi rai wi e feni na ini a dekati di Paulus ben gi Timoteus foe ’gi pirai, foe gi warskow, foe fermane, nanga ala pasensi èn koni foe leri sma’ (2 Timóteus 4:1, 2). A de troetroe wan koni foe gi wan sma na sowan fasi rai dati a kan ferstan dati sondro foe mandi.
7, 8. San na wantoe situwasi ini na kristen gemeente na ini san de e ferwakti rai? (b) Ini sortoe okasi a kan de dati wan kristen no e ferwakti rai ma pe a abi dati wèl fanowdoe?
7 Oten wi moe gi rai? Papa nanga mama geregeld abi réde foe gi den pikin foe den rai èn den pikin e ferwakti disi toe (Odo 6:20; Efese 6:4). Ini na gemeente wan studenti e ferwakti rai te a hori wan lezing tapoe na theokratis diniwrokoskoro. Èn wan njoen kownoekondre prékiman e ferwakti jepi èn rai te ai go a fesi na tapoe na fasi foe kon lepi leki kristen bedinari (1 Timóteus 4:15). Sontron sma di e soekoe jepi nanga rai e go na owroeman ofoe trawan na ini na gemeente.
8 Ma wawantron a kan psa taki rai moe gi na den sma di no e ferwakti ofoe winsi disi. Kande wan sma lasi en faja na ini Jehovah dienst, ’e drifi gowe’, soleki a mati foe Terri (Hebrewsma 2:1). Ooktoe wan sma kan abi wan serjoesoe problema nanga wan tra sma na ini na gemeente (Filipi 4:2). Ofoe kande wan sma abi jepi fanowdoe ini na afersi foe na joisti fasi foe sorgoe ensrefi na dorosé ofoe krosi, ofoe na a teki foe mati ofoe pokoe. — 1 Korinte 15:33; 1 Timóteus 2:9.
9, 10. (a) Foe san-ede na gi foe kristen rai e aksi dekati? (b) Foe san-ede wan kristen moe gi rai efoe disi de fanowdoe?
9 Di na proféti Hanani ben gi rai na kownoe Asa foe Juda, dan Asa ati ben bron sote dati a ’ben poti en na ini na oso foe na blok’! (2 Kronieken 16:7-10) Ini den dé dati wan sma ben moe abi dekati foe gi wan kownoe rai. Ini a ten disi raiman kande moe abi ooktoe dekati, foedi rai di e gi kan wiki atibron kon. Wan kristen nanga ondrofeni ben hori ensrefi foe no gi na fanowdoe rai na wan moro jongoe kompe. Na réde? A ben ferklari: „Wi de tapoe na momenti disi boen mati èn mi wani hori en so!” Ma te joe loekoe en boen dan wan sma no e sori dati a de wan boen mati te a hori ensrefi foe no gi a fanowdoe jepi. — Odo 27:6; teki gersi nanga Jakobus 4:17.
10 Te joe loekoe en boen dan na ondrofeni ben sori dati efoe wan raiman de bekwaam, dan mandi sa de wan sani di sa de pikinso èn na marki di a rai abi na ini prakseri nofotron kan doro en stan. San de fanowdoe foe de wan bekwaam raiman? Meki wi go loekoe leki wan piki tapoe den aksi disi foe eksempre, wan boen èn wan takroe wan.
Paulus — wan bekwaam raiman
11. Foe san-ede a moro bigi pisi foe den Korintesma ben teki a rai foe Paulus, awinsi a ben taki foeroetron fri èn sondro foe kibri wan sani?
11 Na apostel Paulus nofotron ben abi réde foe gi rai èn sontron a ben moesoe taki hebi tori (1 Korinte 1:10-13; 3:1-4; Galacia 1:6; 3:1). Ma ete en rai ben doro a marki foe di den sma di a ben taki a rai gi ben sabi taki Paulus ben lobi den. Soleki a ben taigi den Korintesma: „Nanga foeroe benawtoe èn span foe ati mi ben skrifi oenoe na ondro foeroe watra-ai, no foe meki oenoe sari, ma sodati oenoe ben sa sabi na lobi di mi abi srefsrefi gi oenoe” (2 Korinte 2:4). A moro bigi pisi foe den korintesma ben teki na rai foe Paulus foe di den ben sabi dati disi ben gi sondro bewégi foe ati pe a ben prakseri ensrefi nomo, foe di ’lobi no e soekoe en égi belang’. Den ben abi ooktoe na fertrow dati a no ben taki foe di persoonlek a ben firi ferferi, bika „lobi no e kisi atibron”. A no e teri ogri. — 1 Korinte 13:4, 5.
12. Sortoe égifasi sa meki en moro makriki gi wan kristen raiman foe kisi boen bakapisi? Tjari disi kon a krin.
12 Ooktoe na ini a ten disi a de foeroetron moro makriki foe teki srefi krakti rai efoe wi sabi dati a sma di e gi wi a rai lobi wi, dati a no e taki foedi persoonlek en ati e bron èn dati a no abi boewégi foe ati pe ai prakseri ensrefi nomo. Efoe foe eksempre wan owroeman e taki soso nanga den tini na ini na gemeente te a abi wan sani foe taki foe den, dan a kan de psamakriki dati den jongoesma disi e feni taki a e sidon nomo tapoe den. Ma efoe na owroeman abi now wan boen banti nanga den tini? Efoe ai teki den go na ini na velddienst, den kan go a en ini na kownoekondrezaal èn e gi den dek’ati foe taki nanga en foe den problema foe den, foe ferwakti foe a ten di e kon èn foe taki foe sani di den e degedege na ini èn (nanga primisi foe den papa nanga mama foe den) wawantron srefi e kari den kon na en oso? Dan den tini, te a moe gi den rai, moro esi sa teki a rai dati, foe di den sabi dati dati kon foe wan mati.
Safri-atifasi èn sakafasi
13. (a) Kristen rai moe abi te foe kaba sortoe fundamenti? (b) Den sma di e gi na kristen gemeente rai moe tan farawe foe dat’ede foe san?
13 Ete wan réde de foe san Paulus rai ben abi winimarki. A ben fertrow tapoe na koni foe Gado; no tapoe en égi méne. Na ini a tori disi a ben memre raiman Timóteus na san e kon now: „Ala den Boekoe ben skrifi nanga jepi foe a jeje foe Gado èn den de boen foe leri sma foe gi pirai, foe poti sani reti, foe gi trangaleri ini regtvaardikifasi.” (2 Timóteus 3:16; teki gersi nanga 1 Korinte 2:1, 2). Na netso kristen raiman na ini a ten disi e meki den sani di den e taki abi leki fundament na bijbel. A de troe dati papa nanga mama ini a osofamiri no alatron e teki na bijbel te den e gi den pikin foe den rai. Ma ete a moe de so dati alaten wan bijbelgron moe de foe san kristen papa nanga mama e taki, efoe den e gi dekati foe gi jesi, abi krin libi, foe sori brok’ede gi tra sma, foe de stipt ofoe sortoe tra égifasi ooktoe (Efese 6:1; 2 Korinte 7:1; Mattéus 7:12; Prékiman 3:1-8). Ini na gemeente wi moe loekoe boen finifini dati wi no proeberi foe dwengi trawan foe teki wi persoonlek fasi fa wi si sani ofoe wi persoonlek tesi. Èn owroeman moe soekoe foe no boigi na bijbel sodati ai gersi leki na bijbel e hori baka gi den na ini wan ofoe tra prakseri, ini san den de leki fesiman foe en. (Teki gersi nanga Mattéus 4:5, 6.) A rai di den e gi, alaten moe abi troetroe a bijbel leki fundamenti. — Psalm 119:105.
14, 15. (a) Kari ete wan égifasi di e meki en moro makriki foe teki rai? (b) Foe san-de a de so prenspari dati wan raiman kweki na égifasi disi?
14 Rai de ooktoe moro boen te ai gi na ini na jeje foe safri-atifasi. Paulus ben sabi dati. Di Paulus ben taki foe na sma di ben doe wan fowtoe stap bifo a ben prakseri ensrefi a ben gi dekati na bekwaam sma foe dat’ede „foe tjari sowan sma kon baka ini wan jeje foe safri-atifasi” (Galacia 6:1). Ooktoe a ben gi Titus a rai foe memre tra sma, „foe no taki takroe foe nowan sma, foe no lobi foe stré, foe de rédelek èn foe sori ala safri-atifasi gi ala sma”. — Titus 3:1, 2; 1 Timóteus 6:11.
15 Foe san-ede safri-atifasi de fanowdoe? Foe di firi di wan sma no kan dwengi e gi faja na tra sani. Atibron wortoe e kari atibron wortoe, èn a de moeilek foe taki na wan fasi foe tak-go-tak-kon te firi doro a marki foe koekoe leki faja watra. Awinsi a sma di e kisi rai e teki en nanga atibron, dan disi no de wan réde gi na raiman ete foe doe asrefi. Moro foeroe na safri-atifasi foe na raiman kan tjari srefi a tori kon so fara dati na afersi tjari kon ini wan moro safri watra. „Wan safri piki e drai atibron poeroe” (Odo 15:1). Disi a wan sani di e wroko alaten, ofoe na raiman de now wan papa ofoe mama, wan owroeman ofoe wan tra sma.
16. Foe sanede wan sma moe sori alaten respeki te ai gi rai?
16 Loekoe te foe kaba san Paulus ben taki gi na moro jongoe owroeman Timóteus: „No krasi wan grani sma. Kontrari foe dati, taki nanga en nanga tranga leki wan papa, moro jongoeman leki brada, moro owroe oema leki mama, moro jongoe oema leki sisa nanga ala krinfasi” (1 Timóteus 5:1, 2). Fa disi de wan toemsi moi rai! Go prakseri pikinso fa wan moro owroe oema ben sa firi ensrefi efoe wan moro jongoe owroeman kande jongoe nofo foe de en égi manpikin ben sa gi en rai tapoe wan toemsi krasi èn no-respeki fasi. A ben sa de moro boen efoe na raiman ben sa teki pikinso a ten foe go prakseri a sani disi: ’San ben sa de a moro lobi èn boenfasi foe gi rai foe a punt disi te oen loekoe na sortoe sma di a de èn a libimarki foe a sma disi? Èn efoe mi ben de na ini en presi, fa mi ben sa wani wan sma kon taki nanga mi?’ — Lukas 6:31; Kolosse 4:6.
Na rai foe den Fariséman
17, 18. San ben de wan réde foe san-ede a rai di den farisésma ben gi no ben jepi?
17 Meki wi djompo komoto foe na boen eksempre foe Paulus èn go loekoe wan takroe eksempre, a di foe den djoe kerki fesiman ini Jezus ten. Den ben gi foeroe rai, ma gewoonlek na naatsi no ben abi wini foe dati. Foe san-ede?
18 Foe foeroe réde ede. Prakseri foe eksempre pikinso a tron di den Fariséman ben krasi Jezus foe di den discipel foe en no ben wasi den anoe bifo den ben go njan. A no de foe taki dati a moro bigi pisi foe den papa nanga mama e gi den pikin foe den na rai foe wasi den anoe bifo den njan, èn foe krinfasi ede foeroe sani de foe taki foe dati. Ma den Fariséman no ben broko den ede na ini a fosi presi foe krin libi ede. Gi den a wasi foe den anoe ben de wan gwenti, èn den ben broeja foe di Jezus discipel no ben waka na baka na gwenti disi. Ma soleki Jezus ben sori moro fara, dan foeroe moro bigi problema ben de na ini Israël na san den ben moe poti prakseri. Son sma ben gebroiki den overlevering foe den Fariséman foe eksempre leki wan djakti foe trangajesi na di foe féfi foe den Tin Komando: „Respeki joe papa nanga mama” (Exodus 20:12; Mattéus 15:1-11). A ben de wan sari sani dati den meester foe wet èn den Fariséman ben abi so foeroe foe doe nanga den afersi di no ben de so prenspari èn dati den no ben poti prakseri tapoe den moro „prenspari sani foe na Wet dati wani taki geregtigheid èn sari-ati getrowfasi”. — Mattéus 23:23.
19. Fa kristensma na ini a ten disi kan tan farawe foe fadon go ini a trapoe foe taki soso foe den égi sani di den lobi moro?
19 Raiman na ini a ten disi moe loekoe boen srefsrefi foe no meki asrefi fowtoe. Den moe tan farawe te joe loekoe en boen foe go wroko nomo nanga a sani di densrefi lobi, foe go abi so foeroe foe doe nanga pikinpikin tori, sodati den e frigiti „den moro prenspari afersi”. Ini a tori foe pikinpikin sani den e kisi dekati ’foe tan ferdrage makandra’ (Kolosse 3:12, 13). Na koni foe kan si te wan sma moe libi en foe meki wan sani de wan punt foe taki èn oten a de troetroe fanowdoe foe gi rai, de foe eksempre wan sani san e jepi dati wan sma abi „jeje ègifasi”. — Galacia 6:1.
20. Foe san-ede wan boen persoonlek eksempre de so prenspari ini na afersi foe gi rai?
20 Ete wan sani ben de di ben meki a wroko foe den kerki raiman dati no ben de boen. Den ben waka na baka wan „doe akroederi mi wortoe èn no akroederi mi doe”-fasi. Jezus ben taki foe den: „Heloe foe oenoe toe di sabi na wet boen-boen, ma oen e poti na tapoe den sma lai di de moeilek foe tjari, ma srefi oenoe no e teki den lai nanga wan foe oen finga!” (Lukas 11:46) Fa dati ben de wan fasi di no ben sori lobi! Ini a ten disi papa nanga mama, owroeman ofoe trawan di e gi rai loekoe heri boen a tapoe dati densrefi e doe san den e taigi trawan foe doe. Fa wi kan gi trawan dekati foe abi foeroe foe doe ini a velddienst efoe wi no e gi na joisti eksempre? Ofoe fa wi kan warskow foe na lobi foe goedoe efoe goedoe na skinfasi e teki wan bigi presi na ini wi égi libi? — Romeini 2:21, 22; Hebrewsma 13:7.
21. (a) Fa den Fariséman ben tapoe skreki gi den sma? (b) Fa den taktik foe den Fariséman moe de leki wan warskow gi kristen raiman?
21 Den djoe tiriman ben misi toe leki raiman foe di den ben e gebroiki taktik foe tapoe skreki gi sma. Na wan bepaalde okasi den ben seni man go kisi Jezus. Di den man disi, ben drai kon baka sondro en foe di den ben de troetroe ondro na indruk foe na fasi fa Jezus ben leri sma, dan den Fariséman ben krasi den èn ben taki: „Den kori oenoe ooktoe sonte? Wan foe den tiriman ofoe Fariséman sonte ben poti bribi na ini en toe? Ma den ipi sma disi, di no sabi a wet, floekoe moe de a den tapoe” (Johannes 7:45-49). Disi ben de wan joisti fasi foe pirai gi wan sma, foe behandel en nanga tranga tapoe a gron foe makti èn na gebroiki foe skempi wortoe? Meki a de so dati kristen raiman no meki a fowtoe foe gebroiki so wan sortoe fasi foe gi rai! Den moe loekoe boen foe tan farawe foe tapoe skreki gi trawan ofoe e meki a indruk kon tapoe den foe: ’Joe moesoe arki na mi foe di mi de wan owroeman!’ Ofoe te den e taki nanga wan sisa meki den no taki ini kibri wortoe: ’Joe moe arki na mi foe di mi de wan brada.’
22. (a) Fa èn foe san-ede kristensma gi rai? (b) Sortoe tra aksi wi moe taki foe en?
22 Na gi foe rai de wan doe foe lobi di wi alamala, spesroetoe den owroeman di den poti foe doe wroko, ten na ten abi na frantwortoe foe kompe kristensma. Rai no moe gi te a fiti boen èn te a no fiti boen. Ma te rai de fanowdoe dan disi moe gi nanga dekati. Rai moe abi wan fundamenti na ini bijbel èn na ini wan jeje foe safri-ati a moe gi. Boiti foe dati a de foeroetron moro makriki foe teki rai foe sma di lobi wi. Ma sontron a kan de moeilek foe sabi san wi moe taki precies te wi e gi rai. Fa wi moe gi rai soboen tapoe wan fasi di sa doro en marki? Disi wi sa loekoe na ini na tra artikel di e kon.
Joe kan tjari kon a krin san e kon now?
◻ Soema a grani èn na frantwortoe foe gi kristen rai?
◻ Foe san-ede dekati de fanowdoe foe gi rai?
◻ Foe san-ede a ben de moro makriki gi den kristen foe Korinte foe teki a rai foe Paulus foe di Paulus ben lobi den?
◻ Foe san-ede wan kristen raiman moe de nanga safri-atifasi èn sakafasi?
◻ Fa wan kristen kan tan farawe foe a gi foe rai di e kwinsi trawan?
[Prenki na tapoe bladzijde 3]
Paulus ben gi Titus dekati foe memre trawan foe „de rédelek èn sori ala safri-atifasi gi ala sma”