Jezus libi nanga diniwroko
Den hémemrewan èn den mendriwan
BAKADI Jezus ben taki foe den boen wroko foe Johannes a Dopoeman, a e poti na prakseri tapoe den hémemre sma ini en birti di lobi kenki. „Na geslagti” disi, so ai ferklari, „gersi jongoe pikin di sidon na den wowojo èn e bari gi den mati foe den èn e taki gi den: ’Wi ben pré tapoe na froiti gi oenoe, ma oenoe no ben dansi; wi ben kré, ma oenoe no ben kon sari.’”
San Jezus e bedoel? Ai tjari kon a krin: „Johannes kon, a no e njan a no e dringi, èn tokoe sma e taki: ’A abi wan ogri-jeje na en tapoe’; na Manpikin foe libisma kon, èn e njan èn e dringi, èn ete sma e taki: ’Loekoe! wan sma di de wan tapala èn di de wan srafoe foe a dringi foe win, wan mati foe belastingman nanga sondari.’”
A de wan sani di no de mogelek foe kan plisi wan sma. Noiti den de tevrede, Johannes ben libi wan libi leki Nazireeër pe a ben hori ensrefi tranga na a no dringi foe sopi nanga so morofara ini akroederi nanga na ferklari foe na engel di ben taki: „A no mag dringi win nanga sopi srefsrefi.” Èn tokoe den sma e taki dati a abi ogri-jeje na en tapoe. Jezus na a trasé libi leki ala tra sma sondro foe hori ensrefi tranga na sani leki a no dringi foe win èn den e kragi en taki a e gi ensrefi abra na den sani dati.
Fa den sma moeilek foe joe plisi den! Den de netleki son pikin di e pré, di no wani dansi te tra pikin e pré froiti gi den ofoe di e wégri foe sari efoe den prémati foe den e sari. Ma tokoe ete, so Jezus e taki, „na koni e kon regtvaardiki nanga den wroko foe en”. Ija, den bewijsi — den wroko — e meki kon na krin taki den kragi di ben taki tapoe Johannes nanga Jezus ben taki somaar.
Dan Jezus e bigin foe kroetoe den foto Chorazin, Bethsaëda nanga Kapernaüm, pe a moro bigi pisi foe den moro krakti wroko foe en ben doe. Efoe a ben doe den na ini den foto Tyrus nanga Sidon, foe Fenicië, so Jezus e taki, dan den foto disi ben sa abi berow ini saka nanga asisi. Jezus kroetoe Kapernaüm, di ini a heri ten foe en prékiwroko a de krin ben de en libipe nanga den wortoe: „A sa de gi den kondre foe Sodom wan sani di den sa man foe tjari moro tapoe na kroetoedé leki gi oenoe.”
San Jezus e bedoel nanga dati? A de krin dati a e meki kon na krin dati gi den hémemre sma foe Kapernaüm, te den sa kisi wan opobaka komoto foe dede na ini na ten foe na kroetoedé, a sa de moro moeilek gi den foe piki dati den ben fowtoe èn foe teki Jezus leki a sa de gi den sma foe Sodom foe owroeten di sa opo komoto foe dede foe abi nanga sakafasi berow èn foe leri regtvaardikifasi.
Dan Jezus e prijse en hemel Tata na fesi foe ala sma. Sani e poesoe en foe doe disi foedi Gado ben kibri diri jeje waarheid gi den koniwan nanga sma di abi kabesa, ma ben tjari den moi sani disi kon na krin gi den mendriwan, gi pikinnengre te joe loekoe en boen.
Te foe kaba Jezus e gi kari na ala sma di e arki na en: „Kon na mi, ala sma di e naki skin èn di abi hebi na den tapoe. Teki oen tjatjari tapoe oenoe èn leri foe mi, bikasi mi de nanga safri-ati èn sakafasi foe ati, èn oen sa feni kowroe-ati gi oen sili. Bika mi tjatjari safoe èn mi lai lekti.”
Fa Jezus e gi kowroe-ati? Dati a e doe foe di a e sorgoe foe ferloesoe foe na katibo na den overlevering ondro san den kerki tiriman e meki a pipel go boekoendoe, soleki foe eksempre den regel foe hori na sabbat di e skotoe sma. Ooktoe ai sori na pasi foe leti na den sma di e ondrofeni wan lai di e masi den foe na basi di den politiek makti e basi den èn gi den sma di e go boekoendoe na ondro foe na hebi foe den sondoe foe den foe di den konsensi e trobi den. Ai tjari kon a krin gi den sortoe sma disi di sani e trobi den fa den sondoe kan kisi pardon èn fa den kan abi wan diri matifasi nanga Gado.
Na safoe tjatjari di Jezus e pristeri, de wan tjatjari foe gi joesrefi ini a dini foe Gado krinkrin, sodati wi man foe dini wi sari-ati hemel Tata di e firi nanga sma. Èn na lekti lai di Jezus e pristeri den sma di e kon na en de a lai foe gi jesi na den wet foe Gado foe kisi libi, en gebod di te joe loekoe en boen no de wan lai srefsrefi. Mattéus 11:16-30; Lukas 1:51; 7:31-35; 1 Johannes 5:3.
◆ Na sortoe fasi den sma foe Jezus ben de leki pikinnengre?
◆ Foe san-ede a sa de wan sani di Sodom sa man tari moro leki gi Kapernaüm?
◆ Sma e go boekoendoe ondro sortoe sani èn sortoe lekti foe lai Jezus e pristeri?