Doe ala san wi kan, foe meki a boen njoensoe bekenti
„Doe ala san joe kan foe pristeri joesrefi na so wan fasi na Gado, dati a feni joe boen leki wan wrokoman di no a foe sjen foe noti.” — 2 TIMÓTEUS 2:15.
1, 2. Sortoe gro na ini a groepoe foe foeroeten bediari joe ben si? San ben meki disi doe kon?
„WANTOE jari psa kaba foeroe foe wi ben denki dati soso den sma di ben de na ini spesroetoe omstandigheid ben kan pionier”, na so wan pionier, ofoe foeroeten bedinari ini Japan ben skrifi. „A gersi dati wi ben fowtoe. Wi ben kon si dati soso den sma, di de ini spesroetoe omstandigheid, no kan pionier”.
2 Na positief loekoe disi ini den jari di no psa so langa ete ben tjari wan kefarlek bigi gro kon na ini na groepoe foe foeroeten bedinari na mindri Jehovah Kotoigi. Ini a ten disi a de so dati na ini Japan toe tapoe féfi kownoekondreprékiman e wroko na ini wan ofoe tra pisi foe na foeroetendienst. Ma na jeje foe faja no de wawan na Japan. Ini a dienstjari di psa na nomroe foe prékiman na a heri grontapoe ben gro nanga 5 procent ma na nomroe foe foeroeten bedinari nanga 22%. A de krin dati Jehovah pipel ben teki den wortoe foe na apostel Paulus na ati: „Doe ala san joe kan foe pristeri joesrefi na sowan fasi na Gado dati a feni joe boen leki wan wrokoman di no a foe sjen foe noti” (2 Timóteus 2:15). Joe e doe disi?
„Disi wani taki na lobi gi Gado”
3. Sortoe krakti di e boewégi sma de a baka na gro disi?
3 Te den e aksi pionier foe san-ede den ben teki na foeroetendieniwroko na tapoe den, dan nanga faja den e piki dati den doe disi foe lobi ede gi Jehovah Gado (Mattéus 22:37, 38). A no de foe taki dati so a moesoe de, bika sondro lobi leki na joisti boewégi foe ati dan ibri moeiti ben sa de foe soso (1 Korinte 13:1-3). A de troetroe wan sani foe prijse dati someni foe wi kompe kristen — te joe loekoe en boen gemiddeld moro leki sébi prékiman ini ibri geneente ini heri grontapoe — na ini a libi foe den ben meki presi foe sori na tapoe a fasi disi a lobi foe den gi Gado.
4. Fa a doe kon dati wi ben go lobi Gado? (Romeini 5:8)
4 A no de foe taki dati wi alamala di gi wi libi abra na Jehovah, ben doe disi foe di wi lobi en. Di wi ben kon sabi o foeroe Jehovah nanga en Manpikin, Jezus Kristus lobi wi èn di wi ben jere foe den wondroe blesi di Gado kownoekondre sa tjari kon, dan lobi ben kon na ini wi ati. Na apostel Johannes ben tjari disi kon ondro wortoe na a fasi disi: „Wi ben lobi foedi en ben lobi wi fosi” (1 Johannes 4:19). Disi na wan natuurlijk fasi foe doe foe wi sé foe di na so wi meki kaba. Ma na waran firi disi na ini wi ati de na wan enkri sani di de ini a lobi gi Gado?
5. San de ini a tori na ini a lobi foe Gado? (1 Johannes 2:5)
5 Nono, lobi gi Gado wani taki moro. Na apostel Johannes e ferteri wi: „Disi wani taki na lobi gi Gado, dati wi e hori en gebod; èn tokoe den gebod foe en no de wan lai di e pers wi” (1 Johannes 5:3). Ija, net soleki troe bribi na so troe lobi kon a fesi nanga doe (Teki gersi nanga 2 Korinte 8:24.) Troe lobi wani plisi na sma na soema na lobi dati e go èn kisi na boen-ati foe en. Fa den sma di teki na foeroeten diniwroko tapoe den ben ferkisi wan toemsi moi fasi foe sori dati deen lobi Jehovah nanga Jezus Kristus!
6. (a) Sortoe sma ben tron pionier? Nanga san den ben kan teki a pionierdienst na tapoe den? (b) Joe sabi wan ofoe moro foe den eksempre disi?
6 Wi moe hori na ini prakseri dati omstandigheden e kenki foe wan sma go na a tra sma. Ma te wi hori na ini prakseri den sma di de na ini na foeroetendienst dan wi si dati a mindri den joe abi sma di de na ini ibri sortoe foe situatie di kan de — jongoe nanga owroe sma, sma di no trow, èn sma di trow èn sma nanga wan boen gesontoe èn sma nanga wan swaki gesontoe, sma di de nanga ofoe sondro frantwortoe foe wan osofamiri. Na difrenti de na ini disi dati den sma disi net soleki na apostel Paulus no e gi pasi dati den sani disi poti moeilijkheid a tapoe den pasi, ma dati den leri foe koti psa den moeilijkheid disi ofoe foe libi nanga den (2 Korinte 11:29, 30; 12:7). Loekoe foe eksempre wan gewoon osofamiri pikinso.
Eiji de wan owroeman ini wan gemeente. En nanga en oema e pionier makandra twarfoe jari now, aladi den abi ooktoe na sorgoe foe na kweki foe dri pikin, Fa den ben man foe doe disi? „Wi ben moesoe foe libi wan moro eenvoudig libi”, Eiji e taki. Srefi den pikin e leri foe teki dati nono e taki tapoe foeroe foe den sani di den ben wani sote. „Aladi sontron wi abi en moeilijk, tokoe Jehovah alaten ben sorgoe na ini san wi abi fanowdoe.”
Ala den offer disi de warti a moeiti? „Ibri neti bifo wi kiri den faja dan mi e si fa mi oema e skrifi en prékiwroko bericht foe a de dati”, Eiji e taki. „Te mi e si fa mi osofamiri tapoe a fasi disi e poti jeje belang tapoe na fosi presi, dan mi abi na firi dati ala sani de soleki a moesoe doe en dati mi ben doe wan sani. Mi no kan tjari kon ini prakseri dati wi no ben sa pionier makandra.” Fa en oema e denki foe a tori? „Eiji e sorgoe heri boen gi wi”, a oema e taki. „Te mi si en de bezig nanga jeje afersi, na inisé mi e firi wan dipi firi foe tevredefasi. Mi howpoe dati wi kan hora doro.”
Sortoe krakti disi abi tapoe pikin dati papa nanga mama ibri dé gi someni ten na a prékiwroko? Na moro owroe manpikin e wroko now tapoe wan fo jari bowprojekt tapoe a bijkantoro foe na Wachttorengenootschap. Na oemapikin de ini na gewone pionierdienst èn na manpikin di e go ete na skoro poti na en fesi foe tron wan speciale pionier. Den alamala bréti dati den papa nanga mama de pionier.
7. (a) Gi eksempre foe sma di joe sabi èn di ben wini moeilijkheid foe kan go ini a foeroetendienst? (b) Sortoe bijbelrai den ben teki na ati?
7 Den sortoe osofamiri disi joe kan feni na mindri Jehovah Kotoigi na ala sé foe a grontapoe. Den e span densrefi troetroe foe gebroiki den omstandigheden foe den so boen leki a kan foe go ini na foeroetendienst, èn foe hori doro na ini dati. Nanga den doe den e meki sma si san a lobi gi Gado wani taki troetroe gi den. Den e poti praksri troetroe tapoe na dekati foe Paulus: „Doe ala san joe kan foe pristeri joesrefi na so wan fasi na Gado dati a feni joe boen leki wan wrokoman di no a foe sjen foe noti.” — 2 Timóteus 2:15.
„Wan wrokman di no a foe sjen foe noti
8. Foe san-ede Paulus ben gi Timóteus dek’ati foe doe ’ala san a kan’, èn san dati wani taki?
8 Di Paulus ben skrifi den wortoe disi sowan 65 jari G.T. gi Timóteus, Timóteus ben dini kaba ini wan toemsi frantwortoe positie ini na kristen gemeente. Paulus ben kari en „wan toemsi boen sroedati foe Kristus Jezus” èn ben memre en alaten baka na èn frantwortoe foe leri tra sma èn foe gi den leri (2 Timóteus 2:3, 14, 25; 4:2). Tokoe a ben moe gi Timóteus tranga foe san e kon: „Doe ala san joe kan foe pristeri joesrefi na so wan fasi na Gado dati a feni joe boen”. Den wortoe „Doe ala san joe kan” de wan vertaling foe wan Griki wortoe di wani taki „meki esi”. (Loekoe Kingdom Interleniar Translation.) Foe taki en nanga tra wortoe, Paulus ben ferteri Timóteus, dati en, efoe en ben wani kisi a boen-ati foe Gado, ben moe doe moro awinsi a ben tjari wan hebi lai foe frantwortoe kaba. Nanga sortoe marki? Sodati a ben kan de ’wan wrokoman di no a foe sjen foe noti’.
9. Sortoe agersitori foe Jezus kan jepi wi foe ferstan san Paulus ben bedoel di a ben taki foe „wan wrokoman di no a foe sjen foe noti”?
9 Na lasti wortoe disi e meki oen denki foe den dri srafoe foe Jezus agersitori foe den talenti soleki dati skrifi na ini Mattéus 25:14-30. Di na masra ben drai kon baka, dan a ten ben doro gi den foe sori a wroko foe den na a meester foe feni en boen. Den srafoe na soema den féfi nanga toe talenti ben gi, na meester ben prijse den foe san den ben doe nanga na sani san den ben gi den foe sorgoe. Den ben kisi a kari ’foe go na ini na prisiri foe a masra foe den’. Ma na srafoe di den ben gi wan talenti, ben sori taki a ben misi. San a ben abi den ben teki poeroe foe en èn leki wan sjen gi en den ben iti en go na ini na doengroe na dorosé.
10. Foe san-ede a srafoe di ben kisi wán talenti ben kisi sjen èn strafoe?
10 Den toe fosi srafoe ben wroko tranga èn ben sorgoe dati a masra foe den ben wini wan sani. Den ben de troetroe wrokoman ’di no ben a foe sjen foe noti’. Ma foe san-ede na di foe dri srafoe ben kisi sjen èn strafoe, aladi a ben abi ete na sani di den ben gi en? Foedi a no ben doe noti positief nanga en. Soleki a meester ben tjari kon na ini en prakseri, dan a ben kan poti na moni na bank. Ma na fowtoe ben de dati a no ben abi troetroe lobi gi en meester. ’Mi ben kon frede èn mi ben go beri na talenti foe joe na ini a gron’, a ben ferteri na meester (Mattéus 25:25; teki gersi nanga 1 Johannes 4:18). A ben si en masra leki wan tranga-ati man, „wan sma di e aksi foeroe” èn a ben si a wroko di a ben kisi leki wan hebi. A ben doe so pikinso leki a kan sodati a ben kan psa ete, na presi foe ben doe „ala san a kan” foe kisi na boen-ati foe en meester.
11. Foe sortoe belang na agersitori dati de gi wi ini a ten disi?
11 Na agersitori dati e kon troe na ini a ten disi. Na meester, Jezus Kristus, drai kon baka èn e ondrosoekoe a wroko foe den memre foe en „srafoe-klasse èn foe den kompe foe den, na „bigi ipi” foe sma di joe kan teki gersi nanga skapoe (Mattéus 24:45-47; Openbaring 7:9, 15). San na meester e kisi foe si? Efoe wi de tevrede nanga wan symbolis ofoe agersi dienst di kan psa net ete, dan wan dé wi kan go de a mindri den sma di sa kisi sjen èn di den sa trowe go „na ini na doengroe na dorosé”. Efoe wi na a tra sé ’doe ala san wi kan’, dati wani taki ’meki esi’ nanga wi wroko foe na tranga fanowdoe foe a ten, dan den sa feni wi boen leki ’wrokoman di no a foe sjen foe noti’ èn wi sa teki prati na ini na ’prisiri foe wi meester’.
Tranga leri nanga offer joesrefi fanowdoe
12. Sortoe sani ben meki dati wan bigi percentage foe prékiman ini Japan ben go ini na foeroetendienst?
12 Na gro di e feni presi doronomo na ini a wan kondre baka a trawan ini na heri grontapoe ini den groepoe foe den pionier, de wan boewijsi dati heri a pipel foe Jehovah ’e doe ala san den kan’ foe sori taki den de ’wrokoman di no a foe sjen foe noti’. Ma joe ben aksi joesrefi oiti foe san-ede na ini bepaalde kondre foeroe moro foe wi brada man foe teki na foeroeten dienst a tapoe den leki na ini tra kondre? Na moi aksi disi den ben aksi wantoe foe den pionier na ini Japan. Loekoe djaso pikinso den piki di e kon:
”Mi no denki dati a wani taki dati a bribi, ofoe na lobi, foe den Kotoigi foe Japan de moro bigi leki di foe den brada foe den na ini tra kondre”, wan Bethelwrokoman di de sowan dritentin jari na ini na foeroetendienst ben taki. „Ma mi denki dati na fasi foe na Japan pipel seker abi foe doe nanga dati. Te joe loekoe en ini algemeen dan Japansma e gi jesi; den e teki es’esi a dek’ati di den e kisi.”
„Foedi someni pionier de na ini pikinmoro ibri gemeente” na so a commentaar foe wan owroeman ben de, „meki na algemene denki de dati ibriwan sma kan pionier.” Japansma nanga ala prisiri e doe sani ini groepoe. Den abi wan toemsi boen teamgeest.
Den wortoe disi seker de wortoe foe go denki, èn efi wi e brok’ede wi ede dati wi dienst gi Jehovah moe kenki, dan wantoe moi punt di e kon a fesi de di wi moe go loekoe finifini foe a sé foe wi.
13. Fa wi kan abi wini foe en te wi go loekoe na afersi foe ji jesi èn opo doe wan sani es’esi tapoe dek’ati?
13 Ma meki wi go loekoe fosi na afersi foe a gi jesi èn foe teki dek’ati es’esi. Efoe na tiri nanga dek’ati e kon foe na joisti fonten, dan a de soso wan joisti sani foe opo doe wan sani sondro draidrai tapoe wan joisti fasi. Na presi foe si den égifasi disi foe dat’ede leki soso a fasi foe wan pipel, meki wi hori den wortoe foe Jezus na ini prakseri: „Mi skapoe e jere mi sten èn mi sabi den èn den e waka na mi baka” (Johannes 10:27). Wi e memre ooktoe dati „de klari foe gi jesi” de wan marki foe „na koni foe tapsé” (Jakobus 3:17). Ala kristensma e kisi a dek’ati foe weri den égifasi disi. A kande dati son sma foe na kweki ede foe den e go moro na wan onafhankelijke denki nanga tranga-ede leki trawan. Kande disi de wan kontren tapoe san wi moe gi wisrefi tranga leri èn ’moesoe kenki wi jeje’ sodati wi kan si moro krin san na „wani foe Gado” de. — Romeini 12:2.
14. Sortoe kari ala kristen di gi densrefi abra e kisi èn san de ini a tori?
14 Leki kristensma di gi densrefi abra wi ben teki na kari foe Jezus: „Efoe wan sma wani kon a mi baka, dan a no moe ke foe ensrefi èn moe teki en pina-oedoe èn waka doronomo na mi baka” (Mattéus 16:24). „No-ke-foe wisrefi”, wani taki letterlijk ’poti ibri eigendomreti tapoe wisrefi a wan sé’ èn foe teki morofara nanga wi heri ati dati Jehovah Gado nanga Jezus Kristus e teki wi ini eigendom èn now e meki den de basi foe wi libi èn dati den e pristeri san wi moe doe èn san wi no moe doe. Fa wi ben sa kan sori moro betre dati wi no ke foe wisrefi dan foe waka a baka Jezus foetoestapoe leki foeroetendinari?
15. (a) Fa tevredefasi nanga moro mendri sani tapoe a kontren foe sani na skinfasi abi foe doe nanga na waka na baka Jezus? (b) Fa den fosten disipel foe Jezus ben doe tapoe a kari foe en foe waka na en baka?
15 Dan na afersi de foe de tevrede nanga mendri sani na skinfasi. Disi e go krinkrin kontrari na algemene firi di de na ini a grontapoe, pe ala sani de a tapoe dati wan sma gi ensrefi abra na „a lostoe foe a skin èn na lostoe foe den ai èn na prodo nanga den sani di wan sma abi foe tan a libi” (1 Johannes 2:16). Ma nanga krakti Jezus ben taki: „Joe kan de foe dat’ede seker foe en dati no wan sma foe joe kan de mi discipel, efoe a no gi adjosi na ala en goedoe” (Lukas 14:33). Foe san-ede disi de so? Foedi a de foe wan discipel wani taki moro leki soso a de foe wan bribiman. Di Jezus na ini a di foe toe jari foe en diniwroko ben kari Andreas, Petrus, Jakobus, Johannes nanga den trawan foe de en discipel, a ben go moro fara leki foe aksi den nomo foe bribi na ini en leki na Messias. Bakaten a ben kari den foe waka na en baka èn foe doe a wroko di a ben doe, dati wani taki a wroko foe wan foeroetenwrkoman. Fa den ben doe? „Wantewante den ben libi den srepi foe den èn ben waka na en baka.” Jakobus nanga Johannes „ben libi srefi den papa Zebedéus nanga den wrokoman ini a boto èn den ben waka go na en baka” (Markus 1:16-20). Den ben libi a bdrijf foe den nanga den fosten kompe foe den èn den ben tron foeroeten prékiman.
16. Na ini san wi moe investeer wi ten nanga wi krakti leki kristen di gi densrefi abra? (Odo 3:9)
16 Foe dat’ede a de makriki foe ferstan foe san-ede foe de tevrede nanga moro mendri de so wan prenspari sani ini den moeiti foe wi foe doe ala san wi kan ini Jehovah dienst. Efoe wi e tjari na hebi foe foeroe sani ofoe ferplekti na skinfasi, dan wi ben sa kan de leki na goedoe tiriman di ben trowe na kari foe Jezus foe de en bakaman, no foedi a no ben man foe waka a baka Jezus, ma foedi a no ben de klari foe libi den „foeroe goedoe” foe en (Mattéus 19:16-22; Lukas 18:18-23). Soboen na presi foe wi pori wi ten nanga krakti nanga a feti a baka sani di heri esi sa psa gwe, meki wi wani investeer den warti sani disi foe den tjari tego tanboen gi wi. — 1 Johannes 2:16, 17.
17. Nanga ofara wan teamgeest kan abi wan positief wroko?
17 Dan leki lasti na afersi de foe wan teamgeest. Andreas, Petrus, Jakobus nanga Johannes sondro degedege ben abi krakti tapoe makandra ini a bosroiti foe den foe teki na kari foe Jezus foe waka na en baka (Johannes 1:40, 41). Na asrefi fasi a moesoe de dati foedi someni brada nanga sisa kan meki presi ini a druk libi foe den gi na foeroetendienst, dati dat moe boewégi wi go denki serjoesoe foe wi égi situatie. Na a tra sé, den sma a mindri wi di e prisiri kaba ini a grani disi, kan prati den prisiri ondrofeni foe den nanga trawan èn gi en dek’ati nanga dati foe moksi densrefi na den. Èn a no de foe taki dati foeroeten bedinari kan jepi makandra foe na boen foe den alamala. — Romeini 1:12.
18. Fa wi alamala kan doe wan sani foe na pionierprakseri go na fesi?
18 Szefi den sma di foe den disiten omstandigheden foe den no kan gi densrefi pasi foe teki na foeroetendiniwroko a tapoe den, kan doe foeroe foe meki na pionierprakseri go a fesi.Fa so? Foe hori baka èn gi dek’ati na den di e pionier, foe sori actief belangstelling gi den di ini a ten di e kon o go pionier kande, foe seti sani dati a moro pikinso memre foe na osofamiri foe den kan pionier, foe abi wan prati na jepi-pionierwroko na ibri okasi di kan èn foe wroko srefi na en foe teki so esi leki a kan a foeroetendienst tapoe den. Na so fasi wi alamala kan doe ala san wi kan foe dini Jehovah ofoe na a momenti disi wi skrifi wi nen ofoe no skrifi wi nen leki wan foeroetendinari.
Doe ala san wi kan nanga hori-doro
19. Te wi loekoe a ten dan san moe de wi faste bosroiti?
19 Ija, aladi Jehovah e meki a wroko go a fesi tokoe a de gi wi now ’foe doe ala san wi kan’ foe de ’wrokoman di no a foe sjen foe noti’. Leki toemsi boen sroedati foe Jezus Kristus a de ooktoe fanowdoe foe hori wisrefi farawe foe ala hebi di no de fanowdoe, sodati wi kan de toemsi boen èn kan kisi en boenati (2 Timóteus 2:3-5). Aladi wi e wroko tranga foe meki a prati foe wi na ini a kownoekondre dienst kon moro bigi, wi kan de seker foe en dati den moeiti foe wi sa kisi pai foeroe (Hebrewsma 6:10; 2 Korinte 9:6). Soboen na presi foe wi loekoe na afersi foe farawe, meki wi doe ala san wi kan nanga hori-doro foe préki a boen njoensoe, leki wan piki na tapoe na kari foe na psalmsingiman: „Dini Jehovah nanga prisiri. Kon na en fesi nanga prisiri babari.” — Psalm 100:2.
Kon wi loekoe san wi ben leri
◻ San de ini a tori foe na lobi gi Gado?
◻ San ben de troetroe a problema nanga na di foe dri srafoe ini Jezus agersitori foe den talenti?
◻ San a wani taki foe no-ke foe wisrefi?
◻ Foe san-ede bakaman foe Jezus gi adjosi a den goedoe foe den na skinfasi?
◻ Fa wi alamala kan doe wan sani foe meki a pionierwroko go a fesi?
[Prenki na tapoe bladzijde 8]
’Trowe na srafoe di no warti noti na doro’