Jezus libi nanga diniwroko

Kisi blesi nanga jepi foe moro leri

DEN discipel ben kisi net wan ferklari foe na agersitori foe na saiman. Ma now den wani leri moro. „Ferklari wi”, so den e aksi, „na agersitori foe na takroe wiwiri tapoe a gron.”

Fa den discipel abi wan heri tra fasi leki a tra pisi foe na ipi foe sma tapoe na sjoro! Den sma dati e misi na opregti lostie foe leri sabi na moro dipi betekenis foe na agersitori èn ben de tevrede wawan foe jere foe san den e go. Jezus e teki den discipel foe en di gridi foe sabi sani gersi nanga den arkiman dati na a sjoro foe na bigi watra pe a e taki:

„Nanga na marki di joe e marki sani, den sa marki joe, ija, moro joe sa kisi a tapoe. Den discipel ben abi opregti belangstelling nanga prakseri foe san Jezus ben taki èn ben wani go moro dipi a tapoe. Foe dat’ede den ben kisi blesi foe moro leri. Leki piki tapoe a aksi foe en discipel Jezus e tjari foe dat’ede kon a krin:

Na saiman foe na moro boen siri na a Amnpikin foe libisma; na gron na a grontapoe; na toemsi boen siri, dati na den manpikin foe na kownoekondre; ma na takroe wiwiri de den manpikin foe na goddelowsoewan èn a feanti di ben sai en na Didibri. Na kotiwroko na wan bosroitifoe wan seti foe sani, èn den kotiman na engel.”

Bakadi Jezus ben sori san ibri pisi foe en agersitori wani taki, a e ferteri foe na bakapisi di e kon te foe kaba. Na ini a bosroiti foe na seti foe sani, so ai taki, den „kotiman”, ofoe den engel, sa meki dati den falsi kristen di joe kan teki gersi nanga takroe wiwiri sa prati foe den troe „manpikin foe a kownoekondre”. Den „manpikin foe na goddelowsoewan” sa kisi a marki foe go na ini pori, ma den manpikin foe na kownoekondre foe Gado, „den regtvaardikiwan”, sa go skijn moro krin ini a kownoekondre foe na Tata foe den.

Dan Jezus e blesi den discipel foe en di gridi foe leri sani nanga dri agersitori moro. Fosi Jezus e taki: „Na kownoekondre foe hemel de leki wan goedoe, di kibri na ini wan gron, di wan sma ben feni èn ben kibri en; èn ini a prisiri foe en ai go èn ai seri ala san a abi èn a e bai a gron dati.”

„Agen”, so Jezus e go moro fara, „na koenoekondre foe hemel de leki wan koopman di e reis èn di e soekoe boen moi péri. Di a feni wán péri foe bigi waarde a gwe èn seri wantewante ala san a ben abi èn bai en.”

Jezus srefi de leki a man di ben feni wan goedoe di ben kibri èn leki na koopman di feni wan péri foe bigi waarde. A ben seri te joe loekoe en boen ala sani foedi a ben gwe libi en grani positsi na hemel foe tron wan sakafasi libisma. Leki libisma a grontapoe a e ondrofeni den sjen nanga takroe ferfolgoe, so dati ai sori taki a de warti foe tron a tiriman foe Gado kownoekondre.

Den bakaman foe Jezus ooktoe ben kon tanapoe na baka na tjalansi foe seri ala sani foe kisi wan toemsi bigi paiman, di wani tai dati den sa de ofoe wan kompe tiriman nanga Kristus ofoe wan grontapoe onderdaan foe a Kownoekondre. Wi sa si na grani foe abi wan prati na a kownoekondre foe Gado leki wan moro warti sani leki ala tra sani ini a libi, ija, leki wan diri goedoe ofoe wan péri foe bigi waarde?

Te foe kaba Jezus eteki „a kownoekondre foe hemel” gersi nanga wan srepi na ini san difrenti sortoe fisi e tjari kon makandra. Efoe den fisi e teki poti aparti na sortoe dan den wan di no boen e trowe gwe baka, ma den boenwan e tjari kon nawan. Na so leki fa Jezus e sori a sa go ini a bosroiti foe sani; den engel sa prati den goddelowsoe sma foe den regtvaardikiwan èn den goddelowsoewan sa kibri gi na pori.

Jezus srefi e bigin nanga a fisi-wroko disi èn a e kari en fosi discipel foe tron „fisiman foe libisma”. Na ondro na ai foe engel den fisiwroko e feni presi psa den jarhondro go doro. Te foe kaba a ten e doro foe tjari na „srepi”, wan symbool foe den organisatie na grontapoe di e taki dati den de kristen.

Aladi den fisi di no boen e trowe gwe foe kisi pori, tokoe ai meki wi de nanga tangi foe den kan teri wi leki den „boen fisi” di sa tan kibri. Te wi sa sori net sowan opregti lostoe foe kisi moro sabi nanga froestan leki Jezus discipel, dan wi no sa kisi wawan na blesi foe moro leri ma ooktoe a blesi foe Gado foe tego libi. Mattéus 13:36-52; 4:19; Markus 4:24, 25.

◆ Fa den discipel e sori wan heri tra fasi leki den ipi sma tapoe a sjoro?

◆ Soema ofoe san na saiman, na gron, na boen siri, na feanti, na kotiwroko, èn den kotiman e agersi?

◆ Sortoe dri tra agersitori Jezus ben gi ete èn san den e leri oenoe?