San a srepi nanga fisi wani taki gi joe?
„Na oenoe kisi a grani foe froestan den santa kibritori foe a kownoekondre foe hemel.” — MATEUS 13:11.
1, 2. Foe san ede wi sa kan abi belangstelling ini den agersitori foe Jesus?
JOE abi prisiri foe sabi wan kibritori noso foe loesoe wan raitori? Fa joe ben o feni en efoe disi ben sa jepi joe foe kisi wan moro krin froestan foe a ròl foe joe ini Gado seti? Kolokoe taki joe kan kisi so wan inzicht, di de wan grani, nanga jepi foe wan agersitori di Jesus ben gi. A ben broeja foeroe sma di ben jere en èn sensi a ten dati a ben broeja someni trawan di joe no man teri, ma joe kan froestan en.
2 Loekoe san Jesus ben taki na Mateus kapitel 13 foe a gebroiki di en ben gebroiki agersitori. Den disipel foe en ben aksi: „Foe san ede joe e taki nanga den nanga jepi foe agersitori?” (Mateus 13:10). Ija, foe san ede Jesus ben gebroiki agersitori, di moro foeroe sma no ben sa froestan? Na vers 11 te nanga 13 a ben piki: „Na oenoe kisi a grani foe froestan den santa kibritori foe a kownoekondre foe hemel, ma den sma dati no kisi a grani . . . Dati meki mi e taki nanga den nanga jepi foe agersitori, foe di, awansi den e loekoe, den e loekoe foe soso, èn awansi den e jere, den e jere foe soso, èn den no e froestan.”
3. Fa a kon froestan foe den agersitori foe Jesus e tjari wini gi wi?
3 Baka dati Jesus ben gebroiki Jesaja 6:9, 10, di e taki foe wan pipel di dofoe èn breni na jeje fasi. Ma, wi no abi foe de so. Efoe wi e froestan èn e doe wan sani akroederi den agersitori foe en, wi man de kolokoe srefisrefi — now èn te na ini a tamara di no abi wan kaba. Jesus e pristeri wi a waran djaranti disi: „Kolokoe den ai foe oenoe bika den e si èn den jesi foe oenoe bika den e jere” (Mateus 13:16). A djaranti dati de gi ala den agersitori foe Jesus, ma meki wi poti now spesroetoe prakseri tapoe a sjatoe agersitori, foe a srepi, di skrifi na Mateus 13:47-50.
Wan agersitori di abi wan dipi inibere
4. San Jesus ben froeteri nanga jepi foe agersitori, so leki skrifi na Mateus 13:47-50?
4 „A kownoekondre foe hemel de leki wan srepi di den trowe na ini se èn di e hari ala sortoe fisi konmakandra. Di a ben kon foeroe, den ben hari en na sjoro èn ala di den ben sidon, den ben tjari den toemoesi boen fisi konmakandra na ini bari, ma den wan di no ben boen den ben trowe gowe. Na so a sa go na a kaba foe a seti foe sani: den engel sa go èn prati den ogriwan foe den regtfardikiwan èn den sa trowe den go na ini a faja onfoe. Drape den sa barikrei èn kaw den tifi.”
5. Sortoe aksi e kon ini a tori foe san na agersitori foe a srepi wani taki?
5 Kande joe ben si man e fisi nanga wan nèt, awansi fa no fa, na kino noso na televisi, so boen a no de wan moeilek sani foe si na agersitori foe Jesus na joe fesi. Ma fa a de nanga den pikin pisi èn san a wani taki? Jesus ben taki foe eksempel, taki na agersitori disi abi foe doe nanga „a kownoekondre foe den hemel”. Tokoe, seiker a no ben wani taki, dati „ala sortoe” sma, den toemoesi boen wan èn den wan di no ben boen, noso den ogriwan, sa de ini a Kownoekondre. Èn so srefi, soema e doe a fisiwroko? A fisiwroko nanga a pratiwroko disi, ben feni presi ini den dei foe Jesus, noso a de soso gi a ten foe wi, „a bosroiti foe a seti foe sani”? Joe e si joesrefi ini na agersitori disi? Fa joe kan tan farawe foe no kon de na mindri den wan di e barikrei èn e kaw den tifi?
6. (a) Foe san ede wi moesoe abi foeroe belangstelling foe froestan na agersitori foe a srepi? (b) San na a sroto foe froestan en?
6 Den sortoe aksi disi e sori, te joe e loekoe en boen, taki na agersitori disi no makriki. Ma no frigiti wan sani: „Kolokoe oen ai . . . bika den e si èn oen jesi bika den e jere.” Meki wi go loekoe efoe wi kan ondrosoekoe san na agersitori wani taki, so taki den jesi foe wi èn den ai foe wi no tapoe gi a prensparifasi foe en. Foe taki en leti, dan wi abi wan prenspari tapoe kaba foe si san na agersitori disi wani taki. Na artikel a fesi ben taki fa Jesus ben kari fisiman foe Galilea foe libi a wroko dati èn teki wan wroko na jeje fasi leki „fisiman foe libisma” (Markus 1:17). A ben taigi den: „Bigin foe now oenoe sa kisi libisma libilibi.” — Lukas 5:10.
7. San Jesus ben agersi di a ben taki foe fisi?
7 Ini akroederi nanga dati, dan den fisi ini na agersitori disi e agersi libisma. Foe dati ede, te vers 49 e taki, dati den e prati den ogriwan foe den regtfardikiwan, dan a no e sori tapoe den regtfardiki noso ogri meti foe a se, ma tapoe regtfardiki noso ogri sma. Na a srefi fasi, vers 50 no moesoe meki wi go denki foe se-meti di e krei noso e kaw den tifi. Nôno. Na agersitori disi abi foe doe nanga a tjari kon na wan foe libisma èn a prati di den e prati den baka ten, san de troetroe serjoesoe, so leki fa a bakapisi e sori.
8. (a) San wi kan leri foe san o pasa nanga den fisi di no boen? (b) Na sortoe bosroiti wi kan kon ini a tori foe a Kownoekondre, te wi e loekoe san ben taki foe fisi di no boen?
8 Loekoe toe taki den fisi di no boen, dati na den ogrisma, den sa trowe den go na ini a faja onfoe, pe den sa krei èn kaw den tifi. Na wan tra presi, Jesus ben tjari so wan krei nanga a kaw tifi kon ini a tori foe sma di de na dorosei foe a Kownoekondre (Mateus 8:12; 13:41, 42). Na Mateus 5:22 èn 18:9, a e taki srefi foe a „faja Gehena”, èn ben e sori tapoe wan pori di e tan. Disi no e sori o prenspari a de foe kon froestan san na agersitori disi wani taki, èn foe handri akroederi dati? Wi alamala sabi taki ogrisma no de èn no sa de ini Gado Kownoekondre. Foe dati ede, di Jesus ben taki, dati „a kownoekondre foe hemel de leki wan srepi”, a ben moesoe abi na prakseri taki ini a tori foe Gado Kownoekondre, wan pisi de di gersi wan nèt di den e trowe foe tjari difrenti sortoe fisi kon na wan.
9. Fa engel de ini a tori foe na agersitori foe a srepi?
9 Baka di den ben trowe a srepi èn ben tjari den fisi kon na wan, wan pratiwroko ben o de. Soema Jesus ben taki ben abi foe doe nanga dati? Mateus 13:49 e meki sma kon sabi den fisiman disi, di ben de den pratiman, leki engel. So boen, Jesus ben froeteri wi foe engel di ben sa abi na den ondro wan wrokosani na grontapoe, di den e gebroiki foe kan sabi sma — sonwan di boen èn di fiti gi a Kownoekondre foe hemel èn trawan di e sori taki den no boen gi a kari dati.
A fisiwroko — Oten?
10. Nanga jepi foe sortoe fasi foe denki wi kan abi a fasti bosroiti taki a fisiwroko e doe wan heri pisi ten kaba?
10 A kontekst e jepi wi foe si oten disi e pasa. Leti bifo disi, Jesus ben gi wan agersitori foe a sai foe boen siri, ma dan takroe wiwiri ben sai baka na tapoe a gron, di e prenki grontapoe. Na Mateus 13:38 a ben tjari kon a krin, taki a boen siri e prenki „den manpikin foe a kownoekondre”, ma taki a takroe wiwiri na „den manpikin foe na ogriwan.” Den toe disi ben gro sei na sei foeroe hondrohondro jari langa te na a kotiwroko na a kaba foe a seti foe sani. Dan den ben prati a takroe wiwiri èn ben bron en baka dati. Te wi e agersi disi nanga na agersistori foe a srepi, dan wi e si taki a tjari kon makandra foe mekisani na ini a srepi ben o teki wan langa pisi ten. — Mateus 13:36-43.
11. Fa na fisiwroko ben bigin doe na heri grontapoe ini a fosi jarihondro?
11 So leki fa na agersitori foe Jesus e sori, dan fisi ben o tjari kon makandra sondro foe libi trawan na doro, dati wani taki a srepi ben teki den toemoesi boen fisi èn den fisi di no ben boen. Di den apostel ben de na libi, den engel di ben tiri a fisiwroko di ben doe, ben gebroiki a kresten organisâsi foe Gado foe kisi „fisi” di ben tron salfoe kresten. Joe ben kan taki, dati bifo a Pinksterfesa foe 33 G.T., a fisi di Jesus ben fisi foe kisi libisma ben meki a kisi so wan 120 disipel (Tori foe den Apostel 1:15). Ma di a gemeente foe salfoe kresten ben opo kaba, dan a fisiwroko nanga jepi foe a srepi-wrokosani ben bigin, èn den ben kisi doesoendoesoen toemoesi boen fisi. Foe sensi 36 G.T., a fisiwroko ben panja go na watra na a heri grontapoe, di hèidensma ben hari kon na a krestendom èn ben tron memre foe a salfoe gemeente foe Krestes. — Tori foe den Apostel 10:1, 2, 23-48.
12. San ben opo ede baka a dede foe den apostel?
12 Ini den jarihondro baka di den apostel no ben de moro, wan toe getrow kresten ben tan e doe moeiti foe feni èn hori a waarheid foe Gado. Awansi fa no fa, Gado ben feni wan toe foe den boen, èn a ben salfoe den nanga santa jeje. Tokoe, a dede foe den apostel poeroe wan krakti di ben tapoe kroektoe leri foe no kon na ini, so taki wan fadon komoto na bribi ben opo ede kon na ala sei (2 Tesalonikasma 2:7, 8). Wan organisâsi ben gro kon di ben taki, dati den ben de a gemeente foe Gado sondro foe den ben warti dati. Na wan falsi fasi den ben taki, dati den na a santa nâsi di salfoe nanga Gado jeje foe tiri nanga Jesus.
13. Foe san ede wi kan taki, dati a krestenhèit ben plèi wan ròl ini a wroko nanga a srepi?
13 Joe e denki taki kerkisma foe a krestenhèit di no de getrow, ben plèi wan ròl ini na agersitori foe a srepi? We, wi abi ala reide foe piki na aksi dati nanga ija. A simbôlis srepi ben abi na ini so srefi a krestenhèit. A troe, taki foeroe hondrohondro jari lomsoe kerki ben proeberi foe no meki a gewoon pipel kisi bijbel ini den anoe. Ma tokoe memre foe a krestenhèit ben plèi wan bigi ròl ini a vertaal, a skrifi abra èn a prati foe Gado Wortoe. Baka ten den kerki ben opo èn ben horibaka gi bijbel genootschap, di ben vertaal bijbel na ini tongo foe farawe kondre. Den ben seni datra zendeling nanga leriman go na doro toe, di ben meki aleisi-kresten. Den disi ben tjari bigi nomroe foe fisi, di no ben boen, kon makandra, di Gado no ben feni boen. Ma tokoe a ben meki miljoenmiljoen sma di no ben de kresten kon sabi bijbel èn wan fasi foe krestendom, ala di disi ben kroektoe.
14. Fa a kisi foe toemoesi boen fisi ben kisi jepi nanga wan toe foe den wroko di den kerki foe a krestenhèit ben doe?
14 Ala a ten dati, dan den getrow sma, di ben panja na ala sei, ben hori densrefi na Gado wortoe, so boen leki den ben kan. Awansi sortoe ten toe, den ben de Gado en troe salfoe gemeente na grontapoe. Èn wi kan de seiker taki den toe ben e kisi fisi, noso libisma, di, foeroe foe den, Gado ben sa si leki toemoesi boen èn di a ben sa salfoe nanga a jeje foe en (Romesma 8:14-17). Den toemoesi boen bakaman disi foe a krestendom ben man foe tjari bijbel waarheid, go na foeroe sma di ben tron aleisi-kresten noso di ben kisi wan pikinso bijbel-sabi foe den santa Boekoe, di den bijbel genootschap foe a krestenhèit ben vertaal na ini den tongo foe den. A troe, taki a tjari kon makandra foe toemoesi boen fisi ben go doro, srefi di moro foeroe foe den di ben tjari kon makandra nanga jepi foe a krestenhèit no ben de boen ini Gado ai.
15. Foe taki leki fa a de, dan san na agersitori foe a srepi e prenki?
15 So boen a srepi e prenki wan grontapoe wrokosani di e taki, dati den de a gemeente foe Gado èn di e tjari fisi kon makandra. A abi na ini en a krestenhèit èn so srefi a gemeente foe den salfoe kresten, den lastiwan di wi kari ben go doro foe tjari toemoesi boen fisi kon makandra, ondro a tiri foe den engel di wi no kan si, ini akroederi nanga Mateus 13:49.
A ten foe wi de spesroetoe
16, 17. Foe san ede a ten pe wi e libi na ini de so prenspari ini a kontroe foe Jesus agersitori foe a srepi?
16 Meki wi poti prakseri now na pisitori, ten. Hondrohondro jari langa a srepi wrokosani ben tjari toemoesi boen fisi konmakandra èn so srefi foeroe fisi di no ben boen, noso ogrisma. Dan a ten ben doro taki den engel ben kon ini a tori foe doe wan toemoesi prenspari pratiwroko. Oten? We, vers 49 e taki krin taki disi e pasa na ini a „ten foe a kaba foe a seti foe sani”. Disi e kroederi nanga san Jesus ben taki ini na agersitori foe den skapoe nanga den bokoboko: „Te a Manpikin foe libisma sa doro ini en glori, èn ala den engel nanga en, dan a sa sidon na tapoe en glori kownoestoeroe. Èn ala den nâsi sa tjari kon na wan na fesi foe en, èn a sa prati den sma foe makandra, so leki wan skapoeman e prati den skapoe foe den bokoboko.” — Mateus 25:31, 32.
17 Foe dati ede, ini akroederi nanga Mateus 13:47-50 wan toemoesi prenspari pratiwroko, ondro a tiri foe den engel, ben go a fesi foe sensi „a ten foe a kaba foe a seti foe sani” ben bigin na ini 1914. Disi ben kon na krin spesroetoe baka 1919, di a fikapisi foe salfoewan ben kon fri foe katibo, noso strafoe, di ben de gi wan sjatoe pisi ten nomo, èn den ben tron wan moro boen wrokosani foe doe a fisiwroko.
18. Fa den toemoesi boen fisi ben tjari kon makandra na ini den bari?
18 San ben moesoe pasa nanga den toemoesi boen fisi di den ben prati? Vers 48 e taki, dati den engel, di ben de leki fisiman èn pratiman, „ben tjari den toemoesi boen [fisi] kon makandra na ini bari, ma den wan di no ben boen den ben trowe gowe”. Den bari na bari di e gi kibri èn pe den e poti den toemoesi boen fisi na ini. Disi ben pasa ini a ten foe wi? Seiker? Te den kisi den simbôlis toemoesi boen fisi libilibi, den ben tjari den kon makandra na ini den gemeente foe den troe kresten. Den gemeente disi, di sma kan teki gresi nanga bari, e jepi foe kibri den èn poti den aparti gi a wroko foe Gado, joe no e agri nanga dati? Tokoe wan sma ben kan denki: ’Ala den sani disi moi èn boen, ma san a abi foe doe nanga a libi di mi e libi now èn a tamara foe mi?’
19, 20. (a) Foe san ede a de prenspari ini a ten disi foe froestan san na agersitori disi wani taki? (b) Sortoe prenspari fisiwroko ben doe sensi 1919?
19 A kon troe foe san wi ben agersi djaso, no ben de nomo gi den jarihondro na mindri a ten foe den apostel èn 1914. Ini a pisi ten dati, a srepi wrokosani, ben tjari konmakandra falsi èn troe bakaman foe a krestendom. Ija, a ben tjari kon na wan fisi di no ben boen èn so srefi toemoesi boen fisi. Boiti dati, a pratiwroko di den engel ben doe no ben kon na wan kaba ini den ten foe 1919. Kwetikweti. Na ini son pisi na agersitori disi foe a srepi e fiti te na ini wi ten. Wi de toe na ini a tori èn so toe a krosibei tamara foe wi. Wi moesoe foe kon froestan fa èn foe san ede dati de so efoe wi wani taki den wortoe disi e fiti wi: „Kolokoe den ai foe oenoe bika den e si, èn den jesi foe oenoe bika den e jere”. — Mateus 13:16.
20 Kande joe sabi taki baka 1919, a salfoe fikapisi ben kon kisi foeroe foe doe na ini a preikiwroko makandra nanga den engel, di ben tan gebroiki na agersi srepi foe hari fisi kon a sjoro, foe prati den toemoesi boen fisi foe den wan di no boen. Tori foe a pisi ten dati e sori taki a kisi di den ben kisi toemoesi boen fisi foe sma di ben sa salfoe nanga a jeje foe Gado ben go doro te leki den ben tjari den lasti wan foe den 144.000 kon makandra nanga a simbôlis srepi (Openbaring 7:1-4). Ma na mindri foe den jari 1930 dan a tjari kon makandra foe den toemoesi boen fisi di ben moesoe kisi salfoe nanga santa jeje, pikinmoro ben kon na wan kaba. A gemeente foe a salfoe fikapisi ben moesoe poti a srepi now na wan sei, foe taki en so, èn go sidon e doe noti, foe wakti a paiman foe den? Kwetikweti!
Fa joe abi foe doe nanga a fisiwroko
21. Sortoe tra fisiwroko feni presi ini a ten foe wi? (Lukas 23:43)
21 Na agersitori foe Jesus foe a srepi ben taki spesroetoe foe toemoesi boen fisi di ben sa kisi wan presi na ini a kownoekondre foe hemel leki paiman. Tokoe, boiti na agersitori dati, tra simbôlis fisiwroko e feni presi na wan bigi marki, neleki fa den ben agersi ini na artikel a fesi. A fisiwroko disi a no foe kisi den toemoesi boen salfoe fisi di wi ben kari na ini Jesus agersitori, ma na foe kisi agersi fisi libilibi èn foe gi den a toemoesi moi howpoe foe libi na wan paradijs grontapoe. — Openbaring 7:9, 10; teki gersi Mateus 25:31-46.
22. Sortoe kolokoe baka pisi wi kan ondrofeni, èn sortoe tra sani wi kan ondrofeni toe?
22 Efoe joe abi a howpoe dati, dan joe kan prisiri taki Jehovah ben gi pasi taki wan fisiwroko di e froeloesoe sma, e go doro te now. Disi meki taki joe man foe kisi wan toemoesi moi howpoe. Howpoe? Ija, dati na a joisti wortoe foe gebroiki, bika a bakapisi sa de ini akroederi nanga a tan di wi e tan de getrow na a Sma di e tiri den moeiti foe a fisiwroko di e go doro (Sefania 2:3). Memre foe na agersitori taki a no ala den fisi di den e hari kon na tapoe nanga a srepi e ondrofeni wan boen bakapisi. Jesus ben taki, dati den sa prati den wan di no boen, noso den ogrisma, foe den regtfardikiwan. Nanga sortoe marki? Na Mateus 13:50, Jesus ben froeteri foe a serjoesoe bakapisi gi den fisi di no boen, noso den ogrisma. Den sa iti den sma disi na ini a faja onfoe, dati wani taki têgo pori. — Openbaring 21:8.
23. San e meki a fisiwroko ini a ten disi so prenspari?
23 Gi den toemoesi boen fisi di salfoe, so srefi gi den agersi fisi di kan libi foe têgo na grontapoe, wan glori tamara e kon. Foe wan boen reide ede, so boen den engel e sorgoe taki nownow de, wan fisiwroko di abi boen bakapisi e doe kaba na heri grontapoe. Èn fa den e kisi foeroe agersi fisi! Joe ben sa abi leti te joe e taki, dati na en fasi, a de wan froewondroe kisi, neleki den troetroe fisi di den apostel ben njanboen foe den di den ben trowe den nèt foe den na ini a se drape pe Jesus ben sori den.
24. San wi sa wani foe doe ini a tori foe a fisiwroko na jeje fasi?
24 Joe abi wan fajafaja prati leki fa joe man na ini a fisiwroko disi na jeje fasi di e froeloesoe libi? Awansi o bigi wi eigi prati ben de te now, ibriwan foe wi kan abi wini te wi e loekoe san sma e doe na heri grontapoe ini a bigi fisiwroko di e froeloesoe libi, ala di a e go na fesi now. Te wi e doe disi, dan a sa poesoe wi foe abi wan moro bigi faja ete ini a trowe di wi e trowe den nèt foe kisi fisi na jeje fasi ini den dei di de leti a wi fesi. — Teki gersi Mateus 13:23; 1 Tesalonikasma 4:1.
Joe e memre den penti disi?
◻ San den toe sortoe fisi foe Jesus agersitori foe a srepi e prenki?
◻ Na sortoe fasi den kerki foe a krestenhèit ben abi wan sani foe doe nanga a wroko nanga a srepi?
◻ Foe san ede a fisiwroko di feni presi ini a ten foe wi de so tranga fanowdoe?
◻ Na agersitori foe a srepi moesoe meki ibriwan foe wi doe sortoe ondrosoekoe na wisrefi?
[Prenki na tapoe bladzijde 24]
Hondrohondro jari langa a doe foe fisiwroko feni presi na a Se foe Galilea
[Sma di abi a reti foe a prenki]
Pictorial Archive (Near Eastern History) Est.