Yesus libi nanga diniwroko

Yesus — „Na tru brede fu hemel”

A BEN de trutru wan dei nanga furu sani di psa. Yesus ben gi nyanyan na dusundusun sma nanga yepi fu wan wondru èn moro fara a ben lon komoto gi na muiti fu den fu meki a tron kownu. Na neti dati nanga futu a ben waka abra na se fu Galiléa di ben abi wan bigi winti, ben yepi Petrus, di ben bigin fu sungu di a ben waka abra na watra di na bigi winti ben wipi go na tapu èn a ben bedari den skwala fu yepi den disipel fu en fu a boto no ben sungu.

Na tra dei den sma di Yesus ben gi nyanyan nanga yepi fu na wondru na a noordoostusei fu a se fu Galiléa e feni en ini a birti fu Kapernaüm. Nanga wan ferweiti fasi Yesus e taigi den dati den e kon na on fu di den e ferwakti baka wan nyanyan fu soso. A e gi den tranga no fu wroko gi a nyanyan di e lasi gwe, ma gi a nyanyan di e tan gi a tego libi. Fu dat’ede meki den sma e aksi: „San wi sa du fu den wroko fu Gado?”

Yesus e kari soso wán wroko di abi trutru waarde. „Disi na a wroko fu Gado,” so a e tyari kon na krin, „dati yu o sori bribi ini en di en ben seni kon.”

Ma den sma no e sori bribi ini Yesus, aladi den ben si ala wondru di a ben du. A dei a fesi nanga yepi fu wan wondru a ben gi nyanyan na feifi dusun man èn ooktu uma nanga pikinnengre makandra èn toku, a no ben de wan sani di yu kan bribi, dan den e aksi now: „San yu e du dan leki marki, sodati wi kan si èn kan bribi na ini yu? Sortu wroko yu e du? Den fosten tata fu wi ben nyan na manna ini na sabana, soleki fa ben skrifi: ’A ben gi den brede fu hemel fu nyan.’”

Leki wan piki tapu na aksi fu den fu wan marki dan Yesus e meki kon a krin suma de a fonten fu wondru sani di seti fu di a e taki: „A no Mozes ben gi unu a brede di ben fadon komoto fu hemel, ma mi Tata e gi unu na tru brede fu hemel. Bika a brede fu Gado de a sma di e saka komoto fu hemel èn e gi libi na a grontapu.”

„Masra”, den sma e taki, „gi un alaten a brede disi.”

„Mi de a brede fu libi”, Yesus e tyari kon a krin. „A sma di e kon na mi, no sa kisi angri moro, èn a sma di sa bribi ini mi noiti no sa dreiwatra moro. Ma mi ben taigi unu: Unu ben si mi èn toku unu no e bribi. Ala san a Tata o gi mi sa kon na mi, èn a sma di e kon na mi, kwetkweti mi sa yagi en gwe; bika mi no ben saka komoto fu hemel fu du mi wani, ma na wani fu en di ben seni mi kon. Disi na a wani fu en di ben seni mi kon, dati mi no meki noti lasi gwe fu ala san a ben gi mi, ma dati mi wiki en komoto fu dede na a laste dei. Bikasi disi na a wani fu mi Tata, dati ibri wan sma di e si na manpikin èn e sori bribi na ini en, mag abi tego libi.”

Tapu disi den dyu e bigin knoru teige Yesus, fu di a ben taki: „Mi de a brede di saka komoto fu hemel.” Den no e si noti moro na ini en leki wan manpikin fu libisma papa nanga mama èn den e taki tranga fu dat’ede tapu asrefi fasi leki den sma ini Nazareth ben du: „A no disi na Yesus, na manpikin fu Yosef, fu suma en papa nanga mama wi sabi? Fa a kan taki dan now: ’Mi saka komoto fu hemel’?”

„Tapu fu knoru a mindri makandra”, Yesus e piki. „Nowan sma kan kon na mi efu na Tata, di ben seni mi kon, e hari en kon; èn mi sa wiki en komoto fu dede na a laste dei. Buku skrifi ini den profeiti: ’Èn den alamala sa kisi leri fu Yehovah.’ Ibriwan sma di ben yere en fu a Tata èn ben leri en, e kon na mi. No dati wan sma ben si na Tata, boiti en di ben komoto fu Gado; en dati ben si a Tata. Futru mi e taigi unu: A sma di e bribi, abi tego libi.”

Moro fara Yesus e taki ete wantron: „Mi de a brede fu libi. Den fosten tata fu unu ben nyan na manna ini a sabana èn toku den ben dede. Disi na a brede di e saka komoto fu hemel, sodati ibri wan sma kan nyan fu en èn no sa dede. Mi de a libi brede di saka komoto fu hemel; efu wan sma nyan fu a brede disi a sa libi fu tego.” Iya, fudi den sma e sori bribi na ini Yesus, na sma di Gado ben seni kon, dan den kan abi tego libi. Nowan manna, ofu sortu tra brede tu kan du dati!

Na takmakandra fu na brede fu hemel ben bigin syatu baka di den sma ben feni Yesus ini a birti fu Kapernaüm. Ma a takmakandra e go doro èn ai doro bakaten wan heimarki di Yesus ben e gi leri na ini wan dyu kerki na ini Kapernaüm. Yohannes 6:26-51, 59; Psalm 78:24; Yesaya 54:13; Mattéus 13:55-57.

◆ Sortu sani ben waka a fesi na a takmakandra fu Yesus di ben go fu brede fu hemel?

◆ Fu san-ede te yu luku san Yesus ben du pas, meki na aksi fu wan marki ben de wan sani di no ben fiti?

◆ Fu san-ede den dyu e knoru teige Yesus san a taki dati a de a tru brede fu hemel?

◆ Pe na takmakandra di ben go fu a brede fu hemel ben feni presi?