Na tru religie e poti frede a doro. — Fa?

YU BEN sa abi na dekati fu drai baka gi ogri-yeye fudi yu o poti bijgeloof a wan sei? A de tru dati den ogri-yeye abi makti. Ma bakadi na apostel ben sori dati wi mu teki efu wi sa dini Yehovah Gado ofu den ogri-yeye, a ben aksi: „Wi moro tranga sonte leki [Yehovah]?” (1 Korinte 10:21, 22) Nono, dati wi no de, ma prakseri dati Satan nanga en ogri-yeye e „beifi” fudi den frede Yehovah (Yakobus 2:19). Ma na Almakti Gado e gi yu a kibri fu en efu yu aksi fu dati. Na bijbelskrifiman Yakobus ben taki moro fara: „Saka yusrefi fu dat’ede ondro Gado, ma kakafutu gi Didibri èn a so lon gwe fu yu” (Yakobus 4:7).

Dusundusun sma na tapu na heri grontapu di wan dei ben e libi in frede èn ini katibo fu bijgeloof gwenti, kan kotoigi fu dati now. Didibri lon gwe fu den! Fa dati ben psa? Prakseri dati na feianti fu bijgeloof frede na sabi. Professor Rudolph Brasch, wan sabiman fu na bigin fu bijgelovigheden, e ferklari: „A de wan afersi fu leri — dati wani taki dati omoro den sma e kisi leri, omoro mendri den e de bijgelovig.”

Dati ben de so nanga wan uma di ben nen Henriette. Di a ben teki na kari fu Yehovah Kotoigi fu bigin wan nanga wan gratis bijbelstudie, dan a ben si den triki fu den ogri-yeye. Den titei fu bijgeloof di ben frekti en ben lasi a makti fu den. A uma disi, èn dusundusun trawan nanga en, ben feni na waarheidsgetrowfasi fu den wortu fu Hebrewsma 2:15. Drape na apostel Paulus ben e taki dati Yesus „sa fri ala den sma di fu frede ede fu dede den heri libi langa ben de ondro katibo”. Net soleki na mamanten son fu den tropen e meki na hebi dow fu na busi gwe leki dampu, na so na leti fu na bijbelwaarheid e puru ala bijgeloof frede gwe.

Now bun furu sma di ben de fosten ’srafu fu frede’ ben puru den tapu fu en neki èn den titei fu den skin èn fu den pikin fu den di ben de leki wan kibri. Now den e prakseri netleki wan 68-yari fosten obiaman fu Zuid-Afrika di ben nen Isaac. Bakadi a ben studeri bijbel nanga Yehovah Kotoigi a ben taki: „Mi e firi misrefi kefarlek koloku èn fri fudi mi no e go bukundun moro na ondro na frede fu ogri-yeye.” O tru den wortu fu Yesus de: „Yu sa sabi na waarheid èn na waarheid sa meki yu kon fri”! — Yohannes 8:32.

Iya, na tru fasi fu anbegi e puru frede!