Den ogri jeje e lei, taki den dedewan de a libi

Bijbel e taki, dati Satan „e kori na heri grontapoe pe sma e libi” (Openbaring 12:9). Satan nanga en ogri jeje no wani foe wi bribi a Wortoe foe Gado, bijbel. Den e proeberi foe meki sma bribi taki den dedewan de a libi na wan presi na ini a jejekondre. Meki wi go loekoe fa den e doe dati.

Falsi fasi foe anbegi

Foeroe fasi foe anbegi e leri taki ibri libisma abi wan sili di e go na a jejekondre, baka te a skin foe doti dede. Den e taki, dati a skin e dede ma a sili no e dede. Boiti dati, den e froeteri taki a sili no man dede.

Ma a Wortoe foe Gado no e leri dati. Bijbel e sori taki a sili na a sma, a no wan sani di de na ini wan sma. Foe eksempel, te bijbel e froeteri fa Gado ben meki Adam, a e taki: „Èn Jehovah Gado ben go moro fara foe meki libisma foe a doti foe a gron èn foe bro a libibro na ini en noso-olo, èn libisma ben tron wan libi sili” (Genesis 2:7). So boen, Adam no ben kisi wan sili; a ben de wan sili.

Meti den e kari sili toe. — Genesis 1:20, 21, 24, 30.

Foe di a bijbel wortoe „sili” wani taki a sma srefi, meki a no moesoe froewondroe wi foe jere taki sili kan dede èn e dede. Den Boekoe e taki:

• „A sili di e sondoe, na dati sa dede.” — Ezekièl 18:4.

• „Èn Simson ben go moro fara foe taki: ’Meki mi sili dede nanga den Filistijnsma.’” — Kroetoebakra 16:30.

• „A de reti foe doe tapoe sabadei wan boen sani noso foe doe wan ogri sani, foe froeloesoe noso foe kiri wan sili?” — Markus 3:4.

Tra tekst e sori taki den kan wai sili poeroe (Genesis 17:14), kan kiri sili nanga feti-owroe (Josua 10:37), kan stek sili (Job 7:15) èn taki sili kan dede na watra (Jona 2:5). So boen, a sili e dede.

Efoe joe leisi bijbel foe a bigin te na a kaba, dan noiti joe sa feni den wortoe „a sili di no e dede”. A libisma sili a no wan jeje. A leri foe a sili di no e dede a no wan leri foe bijbel. Na wan leri foe Satan nanga en ogri jeje. Ala lei foe fasi foe anbegi, na sani di Jehovah no man foe si na ai. — Odo 6:16-19; 1 Timoteus 4:1, 2.

Sma di de leki asi foe den jeje

Wan tra fasi fa Satan e kori sma de nanga jepi foe sma di de leki asi foe den jeje. Wan sma di de leki wan asi foe den jeje na wan sma di man foe kisi boskopoe langalanga foe a jejekondre. Boen foeroe sma, den sma di de leki asi foe den jeje toe, e bribi taki den boskopoe disi e kon foe jeje foe den dedewan. Ma so leki fa wi si ini bijbel, dan disi no kan. — Preikiman 9:5, 6, 10.

Foe soema dan, den boskopoe disi e komoto? Foe den ogri jeje srefi! Den ogri jeje man foe si wan sma te a de a libi; den sabi fa a sma ben taki, fa a ben tan, san a ben doe èn san a ben sabi. Foe dati ede a de wan makriki sani gi den foe doe leki a sma di dede. — 1 Samuèl 28:3-19.

Tori di no de troe

Wan tra fasi fa Satan e panja a lei, di e go foe den dedesma, de nanga jepi foe tori di no de troe. Den sortoe tori disi foeroe tron e drai sma poeroe foe a bijbel waarheid. — 2 Timoteus 4:4.

Na ini Afrika joe abi foeroe tori di e taki foe sma di den ben si libilibi, baka di den ben dede kaba. Wan aparti sani foe den sani disi di sma taki den si, de, taki den ben sori densrefi farawe foe pe a sma ben e libi. Ma aksi joesrefi: ’Efoe wan sma ben abi a makti foe drai kon baka foe dede, a ben sa de wan reti sani taki a drai go na wan presi, di de farawe foe en famiri nanga mati?’

Boiti dati, a no ben kan de so, taki a sma di den ben si ben gersi nomo a sma di ben dede? Foe eksempel, toe kresten preikiman di ben e preiki na wan boitipresi ben si wan owroe man di ben waka wan toe joeroe na den baka. Di den ben aksi en foe san ede a ben doe dati, den ben kon jere taki a man ben prakseri taki wan foe den preikiman ben de en brada di ben dede wan toe jari a fesi. A no de foe taki, dati a no ben abi leti, ma a ben weigri foe bribi taki a no ben abi leti. Go prakseri pikinso sortoe tori na owroe man ben froeteri en mati nanga birti baka ten!

Fisjoen, dren nanga sten

A no de foe taki, dati joe jere foe dangra sani di sma si, jere noso dren. Den sortoe ondrofeni disi di no de foe a grontapoe disi nofo tron e frede den sma di ben abi foe doe nanga den. Marein, di ben libi na West-Afrika, doronomo ben jere a sten foe en dede granmama di ben e kari en na neti. Marein di ben kon frede srefisrefi ben e bari, so taki a ben e wiki en heri osofamiri. Te foe kaba a ben lasi en froestan.

Now, efoe den dedewan troetroe ben de a libi, a ben sa de wan reti sani taki den ben sa tapoeskreki gi den lobiwan foe den? Kwetikweti. Na presi pe den sortoe takroe boskopoe disi e komoto, na den ogri jeje.

Ma fa a de nanga boskopoe di gersi taki den e jepi èn e trowstoe sma? Foe eksempel, Gbassay foe Sierra Leone ben siki. A ben kisi wan dren pe a dede papa foe en ben sori ensrefi na en. A ben taigi en foe go na wan seiker bon, teki wan wiwiri, moksi en nanga watra èn dringi en. A no ben moesoe taki nanga no wan sma bifo a ben doe so. A ben doe disi èn a ben kon betre.

Wan tra oema ben taki, dati wan neti en masra, di ben dede, ben sori ensrefi na en. A ben taki, dati a masra ben moi srefisrefi èn a ben weri moi krosi.

Den sortoe boskopoe nanga fisjoen disi gersi leki den boen èn leki den e jepi sma. Ma den komoto na Gado? Nôno, den no komoto na Gado. Jehovah na „a Gado foe waarheid” (Psalm 31:5). Noiti a sa agri foe bidrigi noso kori wi. Soso den ogri jeje e doe dati.

Ma ogri jeje de di boen? Nôno. Ala di son tron a kan gersi taki den e jepi sma, tokoe den alamala ogri. Di Didibri ben taki nanga Eva, a ben gersi leki a ben abi switifasi (Genesis 3:1). Ma sortoe bakapisi a ben abi gi Eva, baka di a ben arki Didibri èn ben doe san a ben taki? Eva ben dede.

Joe sabi taki a de wan sani di e pasa foeroe, taki wan ogri sma e sori switifasi gi sma di a wani kori ofoe bidrigi. „Weti tifi, blaka ati”, wan Afrikan odo e taki. Èn a Wortoe foe Gado e taki: „Satan srefi e tan kenki ensrefi ini wan engel foe leti.” — 2 Korentesma 11:14.

Gado no e taki nanga sma na grontapoe nanga jepi foe dren, fisjoen noso sten foe a jejekondre. A e tjari èn e leri den nanga jepi foe bijbel, di kan meki wan sma „kon de srekasreka dorodoro gi ibri boen wroko.” — 2 Timoteus 3:17.

So boen, te Jehovah e warskow wi gi den triki foe Didibri, dan a e doe disi foe di a lobi wi. A sabi taki den ogri jeje na kefarlek feanti.