Wan pipel di e waka na ini Yesus futumarki
„Wi no ben waka na ini nasrefi yeye èn ini densrefi futumarki?” — 2 KORINTE 12:18.
1. Fu san-ede nofotron a no de muilek fu kon sabi wan Kotoigi fu Yehovah?
„LEKI grupu den abi maniri, den e sori na firi fu frantwortu èn den e kisi bun cijfer na skoro. Disi no kan taki fu tra grupu.” Na so na edeman fu wan lagi skoro ini den Verenigde Staten ben taki. Fu suma a ben abi en? Den pikin fu Yehovah Kotoigi di ben de studenti tapu en skoro èn fu tru a de so taki furu sma ben si dati Yehovah Kotoigi, èn ooktu den pikin fu den, nofotron na bepaalde fasi gersi tra Kotoigi. Ini den yari di psa a ben kon moromoro a krin dati ini wan aparti fasi den de wán ini bribi èn ini waka nanga libi. Den Kotoigi sobun no de muilek fu kon sabi den.
2. San ben de wan apartifasi fu na fosi kristen gemeente, èn san Paulus ben abi fu taki fu dati?
2 Na wanfasi fu Yehovah Kotoigi de wan ongewoon sani na ini a grontapu disi di prati. Ma a no de muilek fu ferstan te wi e prakseri dati den alamala e du muiti fu waka na ini Yesus futumarki (1 Petrus 2:21). Sowan sortu wanfasi ben de ooktu wan marki fu den fosi yarhondro kristen. Na wan bepaalde okasi Paulus ben sori na gemeente Korinte: „Now mi e fermane un, brada, nanga na nen fu wi Masra Yesus Kristus, dati wi alamala taki ini kruderi nanga makandra, èn dati pratifasi no mu de na un mindri, ma dati unu de krosbei ini wanfasi ini nasrefi yeye èn ini asrefi fasi fu denki” (1 Korinte 1:10). Paulus ben gi na rai di ben kon fu santa yeye fa wan sma mu handri nanga sma di no ben de klari fu kibri na kristen wanfasi. — Luku Romeini 16:17; 2 Thessalonika 3:6.
3, 4. Fa Paulus e taki fu na wanfasi a mindri ensrefi nanga Titus, èn san ben de na fundamenti fu a wanfasi dati?
3 Na wan sani fu 55 G.T. Paulus ben seni Titus go na Korinte fu asisteri ini wan tyari fu sani kon makandra fu mofina brada ini Yudea èn kande ooktu fu si fa na gemeente ben teki na rai fu Paulus. Di Paulus bakaten ben skrifi den Korintesma, a ben sori na a fisiti no so langa psa kaba di Titus ben tyari èn a ben aksi: „Titus kwetkweti no ben suku wini tog leki lasi gi unu? Wi no ben waka na ini nasrefi yeye, ini densrefi futumarki?” (2 Korinte 12:18). San Paulus ben bedoel nanga den wortu fu en dati den ben „waka ini asrefi yeye èn na ini den srefi futumarki”?
4 A ben tyari kon ondro wortu sortu wanfasi ben de mindri en nanga Titus. Titus ben de wan kompe fu Paulus ten na ten tapu en reis èn nanga dati sondro degedege ben leri furu fu Paulus. Ma na wanfasi di ben de a mindri den tu dati, ben abi wan moro tranga fundamenti. A ben abi leki fundamenti na tumsi moi matifasi fu den nanga Yehovah èn dati den ala tu ben go na ini den futumarki fu Kristus. Titus ben waka na baka Paulus, soleki Paulus ben waka baka Kristus (Lukas 6:40; 1 Korinte 11:1). A ben de sobun na yeye fu Yesus èn a ben de Yesus futumarki di den ben waka na ini.
5. San wi kan ferwakti fu sma na ini a ten disi fu sma di e waka na baka Paulus nanga Titus fudi den e waka na „ini nasrefi yeye” èn na „ini densrefi futumarki”?
5 A no de fu dat’ede wan vreemde sani dati kristen na ini na di fu twenti yarhondro di e waka na ini „nasrefi yeye” nanga den „srefi futumarki” leki Paulus nanga Titus e nyan bun fu a wanfasi di no abi speri. Na mankeri fu wanfasi a mindri meki-kristen e sori te yu luku en bun dati den de falsi kristen, di no o waka na ini den futumarki fu na tiriman fu den di den e taki taki den e waka na en baka (Lukas 11:17). Na tumsi moi difrenti disi a mindri tru kristen èn den di de dati ini nen nomo, wi kan sori na ini difrenti eksempre. Meki wi kari fo fu den.
Na santafasi fu brudu
6, 7. (a) Sortu yoisti luku ini a tori fu brudu de ini a waka na ini Yesus futumarki? (b) San na difrenti a mindri Yehovah Kotoigi èn tra sma di e weigri ini a ten disi brudutransfusie?
6 Na a yari 49 G.T. na tiriskin fu na fosi-yarhondro gemeente ben seni wan brifi go di ben gi piki tapu na aksi: Sma di no ben de kristen ben mu gi yesi na a wet fu Moses? Na brifi ben taki disi: „Santa yeye èn wi ben feni bun fu no poti moro hebi tapu unu leki den fanowdu sani disi: fu tan farawe fu sani di ben tyari leki ofrandi gi kruktu gado, èn brudu èn ala sani di ben verstik èn fu hurudu” (Tori fu den Apostel 15:28, 29). Luku dati wan fu den „fanowdu sani” ben de fu tan farawe fu brudu. Fu waka na ini Yesus futumarki ben sa wani taki fu no teki ini na mofo èn ooktu a nowan tra fasi brudu na ini na skin.
7 Na kristenheid ben pasa tapu wan fasi di de krin fu si na gron prakseri disi nanga na du fu a gi fu brudutransfusie. A de tru dati ini den yari di no psa langa ete wan nomru fu sma go ferstan dati brudutransfusie abi risiko gi na gesontu, èn fu datra reide ede e weigri dati. Disi de spesrutu so sensi furu sma ben kisi AIDS fu wan brudu transfusie. Ma suma fu respeki ede fu a wet fu Gado e hori na wet fu Gado fu santafasi fu brudu hei èn e du dati leki grupu? Efu wan sikiman e weigri fu den gi en wan brudutransfusie, dan leki sortu sma na datra e si en dan automatis? Na datra no e taki gewoonlek: „Yu musu de wan sma fu Yehovah Kotoigi?”
8. Fa wan Kotoigi na ini Italië ben kisi blesi fu na faste bosroiti fu en fu hori ensrefi na Gado wet ini a pistori disi?
8 Antonietta e libi na ini Italië. Sowan aiti yari kaba a ben siki srefsrefi, èn a ben abi sowan lagi brudu gehalte dati datra ben hori nomo dati brudutranfusie ben de fanowdu fu meki a tan a libi. A ben weigri èn den datra èn famirman ben de teige en. Srefi en tu manpikin ben begi: „Mama, efu yu lobi wi trutru, teki brudu dan.” Ma Antonietta ben teki a faste bosroiti fu tan getrow èn koloku dati a no dede. Toku na toestand fu en ben de so seryusu dati wan datra ben taki: „Mi no kan ferklari fu san-ede a de ete na libi.” Ma di den ben bigin kaba nanga wan behandeling pe bezwaar no ben de teige, dan a ben go so esi na fesi dati wan tra datra ben taki: „Mi no kan bribi disi — yu no ben sa kan kon betre ini sowan syatu ten, srefi efu 24 yuru ini wan dei wi ben gi yu brudu.” Tapu a momenti disi a de ini na gewone pioniersdienst, èn den tu manpikin fu en di de now 12 nanga 14 yari e go moi a fesi ina na waarheid. Antonietta na wan dek’atifasi ben poti prakseri tapu san ben taki de wan fu den „fanowdu sani”, na santa fasi fu brudu. Ala Kotoigi fu Yehovah e hori na srefi luku disi fudi den e waka na ini Yesus futumarki.
Hei moreel markitiki
9. San na wan tra „wan fu den fanowdu sani” di wi mu poti prakseri a tapu te wi e go na ini Yesus futumarki, èn san e psa nanga den sma di no e du disi?
9 Wan fu den tra „fanowdu sani” di na brifi fu na fosi yarhondro tiriskin ben poti krakti na tapu, ben de „tan farawe fu hurudu”. Ini en fosi brifi gi den Korintesma Paulus ben go moro dipi tapu disi nanga den wortu: „No den huruduman, no den kruktu gado diniman, no den sutaduman, no den man di fudi teigen natuurlek marki ede den e hori den, no den man di e didon na man. . . sa kisi Gado Kownukondre” (1 Korinte 6:9, 10). Kristensma e yepi sma di wani dini Yehovah, di wani kon fri fu den doti libifasi. Srefi memre fu na gemeente di e fadon na ini dati e kisi yepi fu krin densrefi èn fu den drai densrefi èn abi berow (Yakobus 5:13). Ma efu wan kristen fadon go ini den sortu doti fasi disi fu libi èn e weigri fu abi berow, dan tapu dati wan bijbel wet di de krin fu dati. Santa yeye fu Gado ben pusu Paulus fu komanderi ’fu no de moro langa ini kompani fu wan sma di nen wan brada, di de wan huruman. Puru na goddelowsu man na unu mindri.’ — 1 Korinte 5:11, 13.
10, 11. (a) Suma mu tyari na frantwortu fu na lagi moreel markitiki na ini na kristenheid èn fu san-ede? (b) Fa na ondrofeni fu wan man tapu den Filippijnen e sori taki Yehovah Kotoigi leki grupu e hori hei moreel markitiki?
10 Aladi a leri disi de krin toku na kristenheid lai nanga hurudu. Kerki fesiman di e watra den markitiki fu Gado, de frantwortu fu na situatie disi èn ooktu den sma di e buwijsi mofodienst na bijbel markitiki ma ben libi en na wan sei fu hori densrefi na wan dek’atifasi na ini den gemeente fu den na disi. Ma ete Yehovah Kotoigi leki pipel e waka ooktu na ini disi na ini Yesus futumarki.
11 Teki Yosé, fu den Filipijnen. Tapu na libimarki fu tinaseibi yari den ben sabi en kaba leki wan trobiman èn wan dobbelman. Nofotron a ben drungu èn ben libi wan hurudulibi. Èn furutron a ben kon ini straf’oso fu fufuru ede. Ne a ben kon ini kontakti nanga Yehovah Kotoigi. „A studie fu na bijbel ben kenki mi libi krinkrin” a e taki. „Mi no e dringi èn smoko moro èn mi ben leri fu dwengi mi atibron. Mi abi now wan soifri konsensi, di mi abi soso wán uma. Mi wini ooktu na respeki fu mi birtisma di ben kari mi fosten ’Yosé, na ogriman’ èn ’Yosé, na spuku’. Now den e kari mi ’Yosé, na Kotoigi fu Yehovah’. Mi manpikin èn mi neef na dinari ini na diniwroko na ini a gemeente pe mi de na a momenti disi leki owruman èn gewone pionier.” Yosé èn milyunmilyun tra kristen Kotoigi fu Yehovah e waka ini Yesus futumarki leki moreei krin kristen.
Neutraliteit
12. Tapu sortu fasi fu tru kristen Kristus Yesus ben poti krakti na ini en begi di skrifi na ini Yohannes kapitel 17?
12 Ini na langa begi di Yesus ben seni go tapu na laatste neti di a ben de makandra nanga en disipel, a ben kari ete wan fasi fa en bakaman ben sa waka na ini ’en futumarki’. Te a. e taki fu en disipel dan a e taki: „Den no de wan pisi fu na grontapu net soleki mi no de wan pisi fu na grontapu” (Yohannes 17:16). Disi wani taki dati kristensma de neutraal. Na presi fu abi wan prati na politiek ofu na den trobi a mindri den natie, den e ferteri tra sma fu Gado Kownukondre, na wan enkri lusu fu den problema fu na grontapu disi. — Mattéus 6:9, 10; Yohannes 18:36.
13, 14. (a) Fa na kristenheid kenki fu Yehovah Kotoigi ini na fersi fu neutraliteit? (b) Fa na hori fu politiek neutraliteit na a sei fu Yehovah Kotoigi na ini Yapan ben waka bun gi na heri bradafasi?
13 Na a gronprakseri disi fu neutrallteit na moro bigi pisi fu den memre fu na kristenheid no e denki na en kwetkweti moro, gi suma nationaliteit gewoonlek de moro prenspari leki na tai fu den na wan kerki. Na koranti skrifiman Mike Royko, di furu sma e leisi fu en e sori na tapu dati „kristen” noiti „mu de nanga safu ati fu feti oorlog nanga tra kristen”, èn a e taki morofara: „Efu den ben sa de dati, dan den moro takru feti na ini Europa fu a moro bigi pisi noiti ben sa feni presi.” Dati Yehovah Kotoigi e hori wan soifri kristen neutraliteit ini den feti, de wan sani di ala sma sabi. Ma leki sma di e go na ini den futumarki fu Yesus, den de ooktu neutraal ini a tori fu sociaal nanga politiek afersi. Tapu a fasi disi nowan sani e trobi na kefarlek moi wanfasi fu den na a heri grontapu. — 1 Petrus 2:17.
14 Na neutraliteit fu den e gi wi sontron onfruwakti bun bakapisi. Ini na Tsoegaroe-district ini na noordsei fu Yapan den e teki verkiezing na wan seryusufasi, Ma Tosjio, adjunctedeman fu na Afdeling fu Moniafersi fu na bureau fu na tiri fu a kondre ini a presi dati, ben weigri fu konsensi bezwaar ede fu abi fu du nanga na verkiezing kampagne fu na burgemeester (districtscommissaris). A bakapisi be de dati den ben saka en ini en wroko fu go na wan moro lagi rang na a dienst riolering. Wan yari a baka skowtu ben kisi na burgemeester èn den ben dwengi en fu saka en wroko fu bedrigidu ede. Wan nyun burgemeester den ben verkiese. Di a ben yere fu na saka di den ben saka Tosjio ini en wroko, a ben gi en agen wan hei presi fu a tiri èn disi ben tyari blesi kon gi Tosjio kristen brada nanga sisa. Fa so? Tosjio e tyari kon a krin dati a de tumsi muilek fu kisi primisi fu kisi sportzaal fu gebroiki gi wan tra sani leki sportevenement. Ma ini a positie di Tosjio abi now, „Yehovah ben kan gebroiki mi” — so Tosjio eigi wortu e taki — „fu klsi den sortu sportpresi gi dri districtscongres èn fo kringkonmakandra”. A e tapu: „Efu wi tan getrow, dan Yehovah sa opo a pasi di yu no kan prakseri fu gebroiki unu”.
Na oso
15. Fa Yesus ini a tori fu osofamiri afersi ben libi wan model a baka gi den sma di e go na ini en futumarki?
15 Wan tra kontren pe kristensma e go na „ini Yesus futumarki” de na oso, Na bijbel e tyari kon a krin dati Yesus eksempre mu de a model gi na matifasi na oso te a e taki na ini disi: „Saka na ondro makandra na ini na frede fu Kristus. Meki uma saka a den man ondro leki na Masra, bika na man na a ede fu en uma, netleki fa Kristus de na ede fu na gemeente . . . soleki a gemeente e saka na ondro na Kristus, a so ooktu uma mu saka na den man ondro, na ini ala sani. Man, tan lobi un uma, net soleki Kristus ben lobi en gemeente, èn ben gi ensrefi abra gi en.” — Efese 5:21-25.
16, 17. (a) Sortu takru situatie de ini na kristenheid ini a tori fu osofamiri marifasi kan kon moro bun, soelki na ondrofeni tori fu wan trowpaar ini Brasion e sori?
16 A moro bigi pisi fu na disiten kristenheid poti a rai disi na wan sei èn fu dat’ede den de furfuru nanga osofamiri di komoto na skrufu. A de wan gewoon sani efu papa nanga mama no de moro na mwkandra èn trobi a mindri papa nanga mama èn pikin furutron de seryusu srefsrefi. „A osofamiri e fadon panya”, wan hei leriman ini na psychologie ben taki wantu yari psa kaba. Pikinnengre psychologe, trowraiman, nanga senwedatra abi pikinso winimarki ini a hori na wan fu na osofamiri di de ini kefar. Ma Yehovah Kotoigi e du den muiti fu poti bijbel gronprakseri ini den libi èn sma sabi den osofamiri matifasi di de moro bun leki a gemiddelde.
17 Aldemar fu eksempre ben de luitenant na a Brasion srudatiskowtu èn ben abi osofamiri problema. En uma ben gwe libi en en èn a ben de bezig fu kisi wan prati fu tafra nanga bedi. A ben bigin fu dringi hebi èn ben du srefi sani fu kiri ensrefi. Bakaten en famiri di ben de Yehovah Kotoigi ben taki nanga en fu na bijbel. San a ben yere a ben lobi èn a ben bigin fu studeri. Fudi a ben wani tyari en libi kon ini akruderi nanga neutraliteit di ala sma sabi Yehovh Kotoigi leki dati, meki a ben aksi ontslag fu na legre. Aldemar nanga en uma ben lusu den trowproblema fu den fudi Aldemar ben poti den bijbelgronprakseri di a ben leri na ini en libi. Nownow den e go na ini den futu marki fu Yesus, èn e dini Yehovah makandra leki gewone pionier.
Gi yesi fu lobi ede
18. (a) Fu san-ede Yehovah Kotoigi na ini a ten disi e kisi blesi na yeyefasi? (b) Fa Yesaya 2:2-4 e kontru now?
18 A de krin dati Yehovah Kotoig ini wanfasi e waka na ini na yeye èn ini den futumarki fu Yesus Kristus. Leki aparti sma èn leki grupu disi e tyari blesi gi den (Psalm 133:1-3). Den krin sori fu na blesi fu Gado tapu den, ben gi bigi nomru opregti sma dek’ati fu handri na ini akruderi nanga na profeititori na ini Yesaya 2:2-4. Soso kaba na ini na yari di psa dan 987.828 sma ben du den fanowdu stap fu gi den libi abra èn bakadati ben pristeri densrefi gi na dopu na ini watra. Tapu wan lobifasi Yehovah no ben poti wan somaar skotu na a nomru fu sma di kan du disi bifo na bigi „benawtu” broko kon! — Openbaring 7:9, 14.
19. (a) San de winimarki di de fu si èn di e kon fu a dini fu Yehovah, èn fa wi mu si den? (b) San na wi moro prenspari reide fu gi yesi na Yehovah gebod?
19 Soleki den ondrofenitori di ben kari dya na fesi ben sori, dan den yeye blesi di a pipel fu Gado e nyan bun fu den, e go nofotron makandra nanga winimarki di yu kan si. Fudi den e hori densrefi farawe fu smoko, fudi den e libi wan krin libi èn fudi den e respeki na santafasi fu brudu, meki fu eksempre den kan tan farawe fu kisi bepaalde siki. Fudi den e libi ini akruderi nanga na waarheid, meki tapu economia, sociaal ofu oso libi kontren den abi wini nanga dati. Ala den sortu wini disi yu kan si den leki blesi fu Yehovah, èn den e buweisi dati Yehovah wet de praktis. Ma na mogelijkheid fu kisi den sortu praktis wini disi tapu ensrefi no de na moro prenspari reide fu gi yesi na a wet fu Gado. Tru kristen e gi yesi na den wet fu Yehovah fudi den lobi en, fudi a warti na anbegi fu den èn fudi a du fu en wani de a wan enkri yoisti sani (1 Yohannes 5:2, 3; Openbaring 4:11). Satan e taki yoisti datl sma e dini Gado wawan fu eigi wini ede. — Luku Job 1:9-11; 2:4, 5.
20. Fa Yehovah Kotoigi e waka na ini nasrefi yeye leki den dri getrow Hebrew Kotoigi na ini owruten?
20 Den disiten Kotoigi fu Yehovah e waka na ini nasrefi yeye leki den dri getrow yongu Hebrew Kotoigi ini Daniel ten. Di den disi ben tanapu na fesi na kefar fu den ben trowe den go na ini wan faya ati onfu, den ben taki: „Efu a mu de so, dan wi Gado di wi e dini, kan ferlusu wi. Komoto fu na ati faya onfu èn fu yu anu, o kownu, a sa ferlusu wi. Ma efu a no de so [dati wani taki srefi efu a meki wi dede] a mu de bekenti na yu, o kownu, dati wi no sa dini den gado fu yu, èn na gowtu popki di yu ben opo seiker wi no sa anbegi” (Daniël 3:17, 18). Lusu fu den winimarki di de fu si wantewante ofu den bakapisi dan toku Yehovah Kotoigi sa go doro soifri na ini Yesus futumarki, aladi den sabi dati tego libi na ini Gado nyun grontapu de wan seiker sani! Leki wan pipel di tyari kon na wan den sa tan waka na ini asrefi „yeye” èn na ini nasrefi „futumarki”, san sa psa ooktu!
Yu kan tyari kon na krin
◻ fu san-ede Yehovah Kotoigi abi wanfasi?
◻ na ini sortu fasi Yehovah Kotoigi kenki fu ini nenkristen?
◻ san de na moro prenspari reide fu san-ede tru kristen e dini Yehovah?
◻ fa a pipel fu Gado e si den winimarki di e kon na a gi yesi na Yehovah?
[Prenki na tapu bladzijde 7]
Te wan sikiman e weigri fu teki wan brudutransfusie, dan gewoonlek den e si en leki wan sma fu Yehovah Kotoigi
[Prenki na tapu bladzijde 8]
Furu sma di e kari densrefi kristen no de nanga safu ati fu feti nanga makandra — nanga na blesi fu den kerkifesiman fu den