Na tyalansi fu waka na ini en futumarki

„Bika Kristus ben pina gi yu èn ben libi gi yu wan eksempre, sodati yu ben sa waka na ini en futumarki.” — 1 PETRUS 2:21, Phillips.

1, 2. (a) San kan de wan trutru tyalansi, èn fu san-ede kristensma sa abi belang na ini disi? (b) Sortu aksi e tyari kon dya a fesi?

NA MODEL fu futumarki fu wan sma di ben waka fosi yu tapu wan watrasei ofu wan snewveld, ben hori yu prakseri? Yu ben teki kande srefi wan lo futumarki fu pruberi pikinso so soifri leki a kan fu poti yu futu ini den futumarki dati? Efu dati ben de so, dan yu ben si dati a no ben de makriki. Fu go soifri ini den futumarki fu wan tra sma — efu a de letterlek efu na agersi fasi de srefi wan trutru tyalansi. Èn toku, te wi e kari wisrefi kristensma dan wi e sori nanga dati, taki disi yoisti de wi winsi, fu go soifri ini den futumarki fu Kristus.

² Yu de klari fu du na muiti di de fanowdu fu kaka futu nanga bun winimarki gi na tyalansi dati? Moro leki dati, yu teki na fasti bosroiti fu du dati, san mag fu psa tu? Efu dati de so, dan wan ferstan dorodoro fu den muilekheid fu na go na ini letterlek futumarki sa yepi yu moro bun fu go na ini den agersi futumarki fu Kristus.

Leri fu fiti yusrefi

3. Fu san-ede a de biginbigin onnatuurlek fu go ini na futumarki fu wan tra sma?

³ Ibriwan sma abi wan aparti fasi fu waka. Na langa fu a poti fu en futu e kenki fu a wan sma go na a tra sma, èn dati de ooktu gi na uku di a sma e poti en futu. En futu-finga kan sori leti go a fesi, ma na ondro wan bepaalde uku den kan sori go na inisei ofu go na dorosei, wan uku di na na wan futu de moro soifri leki na wan trawan. Yu e si pe na tyalansi didon? Fu go soifri na ini den futumarki fu wan tra sma, dan yu mu luku na langa fu na futu fu en di a e iti èn na fasi fa en futu e fiti na di fu en. Na ini a bigin disi sa gersi onnatuurlek, ma a musu. Nowan tra mogelijkheid de.

4. Fu san-ede na go na ini Yesus futumarki de wan spesrutu tyalansi?

⁴ Na fasi fa Yesus e waka, fu taki en na agersifasi, ben de aparti, bika a mindri den sma fu en ten en wawan ben de wan volmaakti libisma ofu wan sma „di no ben sabi sondu” (2 Korinte 5:21). Fu di sma fu nature de onvolmaakti sondari, dan na go ini Yesus futumarki no de na gewoonfasi fu waka. Paulus ben memre kristen na ini Korinte na disi nanga den wortu: „Bika unu de ete na metifasi. Bika di dyarusu nanga trobi de a mindri unu, unu no de dan na skin fasi èn un no e waka leki libisma?” Fasi fu dyarusu nanga trobi, „wroko fu na meti”, de gewoon gi onvolmaakti libisma, ma Yesus ben waka na pasi fu lobi èn „lobi no e dyarusu. . . no e kisi atibron”. Go ini Kristus futumarki de sobun wan moro bigi tyalansi leki te den ben sa aksi soso fu wi go ini den futumarki fu wan onvolmaakti libisma. — 1 Korinte 3:3; 13:4, 5; Galacia 5:19, 20; luku ooktu Efese 5:2, 8.

5, 6. (a) Fu san-ede furu sma misi fu go ini Kristus futumarki, èn sortu rai Paulus ben gi fu dat’ede? (b) Fa sma ini a ten disi e kisi dek’ati fu waka ini Kristus futumarki, èn sortu bakapisi dati abi gi den?

⁵ Na sei onvolmaaktifasi, dan a no sabi fu na wani fu Gado kan tapu wan sma fu waka na ini Kristus futumarki. Paulus ben fermane den kristen na ini Efese fu dat’ede „fu no tan waka moro langa soleki den naatsi e waka na ini na sondu froktu libi fu den denki, dungru leki den de ini den ferstan èn vervreemd fu na libi di de fu Gado, na no sabi fu sani di de na ini den, fu na tranga fasi fu na ati fu den”. — Efese 4:17, 18.

⁶ Nanga yepi fu na kownukondre preikiwroko den e aksi now fu sma fu no waka moro langa den gewoon fasi fu den, ini a no sabi fu den prakseri fu Gado, de ini dungru na ferstanfasi, nanga wan ati di no e firi sani es’esi èn di e feti na baka marki di no e tyari froktu kon. Den e kisi dek’ati fu fiti densrefi na a volmaakti eksempre fu Kristus, „fu waka ini wanfasi nanga en” èn na sofasi ’fu tyari ibri prakseri kon ini katibo fu den gi yesi na Kristus’ (Kolosse 2:6, 7; 2 Korinte 10:5). Sma di de klari fu teki na tyalansi disi, e kisi stabiliteit ini a bribi fu den. Omoro den e kon gwenti fu waka tapu a fasi dati di Yesus ben waka, dan omoro a e de makriki gi den.

7. Sortu dyaranti wi abi dati, aladi nofotron a de wan tyalansi, toku a de mogelek fu go ini Kristus Yesus futumarki?

⁷ Ma nofotron a de wan tyalansi. Na difrenti mindri wan volmaakti èn wan onvolmaakti libisma bigi. Onvolmaakti mekisani mu tyari bigi kenki kon fu pruberi fu waka na baka wan volmaakti eksempre. Son sma, kande fu erfelijkheid ofu na kontren pe den e libi ede, abi moro muiti fu fiti densrefi na wan kristen libifasi leki tra sma. Ma Yehovah e dyaranti wi dati ibriwan sma di de klari trutru fu span ensrefi sa man. „Gi ala sani wi abi na tranga nanga yepi fu en di e gi wi krakti”, na apostel Paulus ben taki (Filippi 4:13; luku ooktu 2 Korinte 4:7; 12:9). Asrefi de gi ala kristen.

Poti prakseri

8, 9. (a) Fu san-ede prakseri di no prati èn di poti srefi krinkrin a tapu sani de fanowdu te wi e go ini a futumarki fu wan tra sma? (b) Na waka na baka sortu bijbelrai sa tapu wi fu komoto fu Yesus futustap?

⁸ Wi no kan go na ini letterlek futumarki sondro fu luku bun pe wi e poti wi futu. Efu wi e meki wi ai waka go na tra sani — fudi wi o poti prakseri a tapu san e psa lontu wi ofu tapu tra sani — dan seiker fruku ofu lati wi sa meki fowtu stap. Efu wi no e poti ala prakseri èn no e span wisrefi srefsrefi, dan wi sa drifi komoto fu den futumarki di wi mu waka na den baka. Fu dat’ede wan doronomo fanowdu de fu luku bun spesrutu te wantewante babari ofu tra onfruwakti sani e puru wi prakseri fu na wroko di de fu du. — Teki gersi Yob 18:10, 11.

⁹ Fu taki en na agersifasi, dan disi de ooktu gi den sma di e go na ini Yesus futumarki. Yesus ben warskow en bakaman fu poti prakseri bun a densrefi sodati na ati fu den no „kon hebi nanga nyan pasa marki èn dringi pasa marki èn den broko-ede fu na libi” (Lukas 21:34). Satan e gebroiki den aladei sani disi di e kori wi fu puru wi ai fu den futumarki fu Yesus. A de es’esi drape fu meki wi skreki fudi a e meki gebroiki fu onferwakti omstandigheden soleki gens, siki ofu moniproblema. Fu sorgu dati „noiti wi drifi gwe”, dan wi mu „poti moro leki gewoon prakseri na den sani di wi ben yere”, nanga tra wortu hori wi ai moro soifri tapu Kristus futumarki, leki oiti na fesi. — Hebrewsma 2:1; luku ooktu 1 Yohannes 2:15-17.

No drifi gwe

10. (a) Sortu kefar de te difrenti futumarki e kroisi makandra? (b) Fu san-ede na ini yeyefasi den bakapisi fu na waka na baka fowtu futumarki de seryusu?

¹⁰ Tapu wan druk watrasei dan ini na nati santi difrenti futumarki kan de; èn son futumarki kan kroisi abra di wi mu waka! Bun furu futumarki èn kande de frafra kan gersi tapu makandra. O prenspari a de, kande dati wi de seiker dati wi e waka na baka na bun futumarki! Noso sani kan kori wi fu go na wan heri tra sei. Na ini yeyefasi disi ben kan abi seryusu bakapisi. Na kefar fu waka na baka futumarki di gersi den bun wan ma di te yu e luku en bun no de dati, e de fu si a ini a Odo di e warskow: „Wan pasi de di de leti na fesi na ai fu wan man, ma den pasi fu dede de baka dati na kaba.” — Odo 16:25.

11. Sortu warskow Paulus ben gi fosten kristen èn suma a ben gi wan eksempre ini a ten disi nanga dati?

¹¹ Fu na trutru kefar disi ede meki Paulus ben firi fu warskow na fosten kristen gemeente: „A e ferwondru mi dati so es’esi yu e meki den kori yu puru fu na sma di ben kari yu kon nanga na noferdini bunfasi fu Kristus èn drai go na wan tra sortu fu bun nyunsu. . .. Seiker sma de di e tyari kesekese kon a mindri unu èn wani drai a bun nyunsu fu Kristus. . . Suma a de ooktu di e taki wan sani leki bun nyunsu na yu boiti san yu ben teki kaba, a mu kisi fluktu” (Galacia 1:6-9). Ini akruderi nanga na eksempre fu Paulus na Tiri Skin fu Yehovah Kotoigi e warskow wi ini a ten disi fu sma di fadon komoto fu na bribi èn fu falsi brada di te yu e luku en bun e poti wan falsi futumarki. Tru kristen no wani drifi komoto fu na pasi di Yesus ben poti gi den leki fa Gado ben sori. — Psalm 44:18.

12. (a) Fa 2 Timóteus 1:13 kan yepi wi fu tan farawe dati wi meki sani kori wi èn waka na baka falsi futumarki? (b) San na den marki fu tra sortu fu bun nyunsu?

¹² Te wi e poti bun prakseri na den marki fu sabi Kristus futumarki, dan wi kan tan farawe fu sani kori wi. Soifri sabi di e go fu Yesus, en leri èn a fasi fa na kristen gemeente e wroko, e yepi wi „fu kon sabi na patron fu gesontu wortu” di e kibri wi teige den sma di ’e drai na bun nyunsu fu Kristus’ (2 Timóteus 1:13). Tra sortu fu sokari bun nyunsu — te yu e luku en bun falsi futumarki — no fiti na ini na patron fu waarheid. Den e verdraai dati, e meki na prenki fu en kon dungru. Na presi fu meki gron waarheid nanga gronprakseri kon krin dan den e taki kontra disi. Na presi fu den gi wi dek’ati fu du moro bigi wroko ini Yehovah dienst, den e taki fu du en safrisafri. A boskopu fu den no de positief èn no e gi grani na Yehovah nen nanga organisatie. A de negatief, fu suku sani fini èn fu feni fowtu. Disi seiker no de den futumarki di wi wani fu waka na den baka.

Hori na yoisti tempo

13. Fa na tempo fu waka abi fu du nanga na go ini wan sma futumarki?

¹³ Te wi e waka, dan na langa fu na futu di wi e iti go na fesi fu wan pisi na tempo di wi e waka e bepaal en. Ini algemeen na futu fu wi di wi e iti go na fesi de moro langa omoro wi e waka moro esi, e de moro syatu efu wi e waka moro safri. A sa de fu dat’ede moro makriki gi wi fu go ini wan sma letterlek futumarki efu wi fiti na esi di wi e waka na di fu en. Na so fasi efu wi wani go na wan bun fasi na ini den agersi futumarki fu wi Tiriman Yesus Kristus, dan wi mu hori en tempo.

14. (a) Sortu tu fasi de di kande wi no e hori a srefi futu nanga Yesus? (b) Fu san-ede a de wan law sani fu pruberi fu go moro esi leki na „getrow èn koni srafu”?

¹⁴ Te wi no e hori asrefi futu nanga Kristus dan disi kan wani taki tu sani. Ofu wi e pruberi fu go moro esi, e waka a fesi a „getrow èn koni srafu” di Yesus e gebroiki fu du Yehovah prakseri, ofu wi e tan a baka ini a waka baka den sani di a „srafu” e sori (Mattéus 24:45-47). Leki wan eksempre na fosi sani disi: Son kristen ini a ten di psa ben lasi pasensi ini a tori fu leri nanga organisatoris kenki ofu a fini fu sani di leki fa den e denki ben de fanowdu èn langaten kaba ben mu psa. Den no ben de tevrede fudi den ben feni dati a no ben go so esi nofo, meki safrisafri den ben hari densrefi puru fu Yehovah pipel. Fa dati ben de wan don sani èn wan syatu luku fu sani! Nofotron bakaten precies na sani di ben meki den lasi densrefi ben kenki — tapu Yehovah faste ten. — Odo 19:2; Preikiman 7:8, 9.

15. Fa kownu David nanga Yesus ben de bun eksempre di ben sabi fu hori asrefi futu?

¹⁵ Na ferstan libifasi de fu wakti te leki Yehovah handri na presi fu pruberi yusrefi fu taki nanga sortu tempo den sani mu psa. Kownu David ini owruten ben gi wan yoisti eksempre na ini disi, A ben weigri fu span anu teige kownu Saul ini wan muiti fu teki na kownuwroko bifo Yehovah faste ten ben doro fu gi en dati (1 Samuël 24:1-15). Na so tu „na manpikin fu David”, Yesus, ben ferstan dati a ben sa musu wakti bifo a ben go trutru moro na ini en hemel kownukondre. A ben sabi na profeititaki di ben abi fu du nanga en: „Sidon na mi reti-anusei, te leki mi sa poti yu feyanti leki wan futubangi gi yu futu. Di fu dat’ede wan grupi dyu ben wani „grabu en fu meki en tron kownu”, meki a ben hari gwe es’esi (Mattéus 21:9 Psalm 110:1; Yohannes 6:15). Sowan 30 yari a baka, na so kon a krin na ini Hebrewsma 10:12, 13, Yesus ben wakti te na ten dati ete tapu en kownuwroko. A ben wakti srefi pikinmoro tinaneigi hondro yari bifo Gado ben poti en leki na reti kownu fu Gado Kownukondre na a opo fu na kownukondre dati na ini 1914.

16. (a) Gi wan eksempre fa wi ben sa kan go moro safri leki wi musu go. (b) San na a marki fu Yehovah pasensi èn fa wi tan farawe fu gebroiki tapu wan fowtu fasi na pasensi dati?

¹⁶ Ma efu wan sma e misi fu hori na yoisti tempo, dan a ben sa kan wani taki fu lasi tempo, fu tan a baka. Te a Wortu fu Gado e sori dati wi mu tyari kenki kon na ini wi libi, wi e handri dan sondro draidrai? Ofu wi e taki dati fudi Gado abi pasensi wi kan tan poti den kenki dati moro fara te bakaten, ini na howpu dati kande a sa go moro makriki? A de tru dati Yehovah abi pasensi. Ma dati no de so sodati wi de nanga mi-no-kefasi ini a tyari fu fanowdu kenki, ma presi fu dati a abi „pasensi nanga wi, fudi a no wani dati wan sma go pori, ma a wani dati ala sma kon kisi berow” (2 Petrus 3:9, 15). Omoro bun a de dan fu du leki na Psalm singiman di ben taki: „Mi ben hasti misrefi èn mi no ben draidrai fu hori yu gebod.” — Psalm 119:60.

17. San na hori fu wan yoisti tempo fu waka abi fu du nanga na preikiwroko?

¹⁷ Tan a baka ben sa kan abi fu du nanga na Kownukondrepreiki wroko, Leki fa Mattéus 25 e taki dan Yesus na a momenti disi bezig fu krutu na libismafamiri, te a e prati den „skapu” fu den „bokoboko”. Disi fu a moro bigi pisi e kon nanga yepi fu na preiki fu na bun nyunsu disi fu na kownukondre” (Mattéus 24:14; 25:31-33; Openbaring 14:6, 7). A ten di e poti na wan sei fu du na preikiwroko, skotu noodzakelijkerwijs (Mattéus 24:34). Omoro na ten di de e kon na wan kaba, dan wi kan ferwakti dati Yesus o meki a wroko psa moro esi. Nanga dati a e handri leki wan wrokosani fu Gado, di te a e taki fu na tyari kon makandrawroko, e pramisi: „Misrefi, Yehovah, sa meki a psa es’esi na en reti ten” (Yesaya 60:22). Wi de leki den kompe wrokoman fu Gado, di e go soifri ini den futumarki fu en Manpikin, e meki na tempo fu wi ini na kownukondre preikiwroko kon moro hei ini a marki di na skin situatie fu wi èn wi bijbelfrantwortu e gi pasi fu disi? Velddienstbericht e sori taki milyunmilyun Kotoigi fu Yehovah e du disi!

Tan farawe fu wan tumsi bigi fertrow, feti nanga lasati

18. Fu san-ede wan sma ben sa kan kisi tumsi furu fertrow, èn fa na bijbel e warskow fu na kefar disi?

¹⁸ Omoro wi e hori doro fu go ini den futumarki fu wan tra sma, omoro a fasi fu waka fu en sa tron wan kewon sani gi wi. Ma efu wi de tevrede, dan fruku ofu lati wi sa poti fowtu futu. Na so ooktu te wi mu go ini den agersi futumarki fu Kristus dan wi mu si a kefar fu kisi tumsi furu fertrow èn bow na tapu wi eigi krakti èn bekwaamfasi, ini a meine dati wi abi en volmaakti fasi fu waka nanga libi kaba. Na ondrofeni fu Petrus di skrifi na ini Lukas 22:54-62, na wan warskow di e fiti bun. A e poti krakti na tapu na waarheid ooktu fu 1 Korinte 10:12, pe tanapu: „A sma di denki dati a tanapu, mu luku bun dati a no fadon.”

19. (a) San e psa te na ten nanga ibri kristen? (Yakobus 3:2) (b) Fa wi mu ferstan Paulus wortu na ini Romeini 7:19, 24?

¹⁹ Fu onvolmaakti fasi ede meki ibri kristen te na ten sa meki fowtu stap. Na drifi komoto kan de pikin èn gi tra sma no de fu si srefi awinsi kande so krin dati ala sma e si en. Fa a kan de ooktu, fa na eerlek sani di Paulus e memre wi de leki wan trowstu: „Bika na bun sani di mi winsi, mi no e du, ma na takru sani di mi no e winsi, na dati mi e du. Ellendig libisma di mi de!” (Romeini 7:19, 24). A no de fu taki dati den wortu disi no musu fu si leki wan pardon fu du san fowtu. Ma presi fu dati ben de wan dek’ati di kristensma gi densrefi na ini na nen fu Gado èn di e feti tege onvolmaaktifasi, èn e yepi den fu hori doro ini a muiti fu den fu kakafutu gi na tyalansi fu go ini Yesus volmaakti futumarki.

20. (a) Fa Odo 24:16 e yepi wi ini wi streilon fu a libi? (b) Sortu faste bosroiti wi mu teki?

²⁰ „Na regtvaardikiwan kan fadon srefi seibitron èn seiker a kan opo baka”, Odo 24:16 e taki. Ini wi streilon fu na libi nowan sma mu firi fu hari ensrefi puru. Na streilon disi gersi wan marathon, wan lon fu horidoro; a no de wan syatu lon esesi. Na moro pikin fowtu stap di wan sma e du di e lon syatu na ala seikerfasi sa kostu en na streilon. Ma na marathon lonman abi srefi efi a e fadon, ten ete fu kon kisi ensrefi èn fu lon na heri streilon. Sobun te wan ofu tra persoonlek fowtu stap e meki yu bari: „Ellendig libisma di mi de!” dan yu mu go prakseri dati yu abi ten ete fu kisi yusrefi. Yu abi te now ete na okasi fu kon baka ini na tempo nanga yu Tiriman Yesus Kristus. Nowan reide de fu lasi howpu! Nowan reide fu lasi ati! Teki na faste bosroiti fu kakafutu nanga yepi fu Gado tapu wan bun bun fasi na a tyalansi fu go soifri na ini Yesus futumarki, — 1 Petrus 2:21.

Fu san-ede kristensma mu

◻ leri fu fiti densrefi?

◻ poti prakseri bun?

◻ hori na patron fu waarheid ini prakseri?

◻ hori wan yoisti tempo fu waka?

◻ tan farawe fu abi wan tumsi bigi fertrow?

◻ feti nanga las’ati?

[Prenki na tapu bladzijde 5]

Fudi a e hori en ai leti tapu na marki meki na regtvaardikiwan sa opo tanapu