Yu de klari klari fu arki na Gado?

EFU wi e leysi na beybri, dan wi e frustan esi-esi kba taki na situwâsi fu den sma na ini na fosi yarihondro na furu fasi ben kruderi nanga di fu wi na ini na ten disi. Furu hurudu nanga bidrigifasi ben de, spesrutu a mindri den sma di ben libi na den birti kondre fu Israèl di ben gi den srefi abra na yayolibi, èn di hurudu nofotron ben de wan pisi fu na fasi fu anbegi. Gi pôti sma na libi ben de onseyker èn politik problema ben de. Di na yari 66 G.T. ben kon, dan Israèl nanga Rome ben de na ini wan bigi feti. Neleki na a ten disi na so den sma na ini na ten dati ben abi yepi fanowdu.

Na a sey fu kerki yu abi furu sani na ini den dey dati di e kruderi nanga wi ten. Den dyu kerki tiriman ben de hoygriman (Mateyus 23:15; Lukas 20:46, 47). Na ini na no-dyu grontapu den kerki firi ben waka psa na heri tori fu na sondro syen meki spotu nanga a opregtifasi fu tra sma te doro kruktu bribi èn fanatik faya gi fasi fu bribi (Teki gersi nanga Tori fu den Apostru 14:8-13; 19:27, 28.) Srefi na ini na kresten gemeente di ben de nyun te yu sa teki en gersi nanga tra owru fasi fu bribi dan ala sani no ben go so leki a ben musu. Na a kba fu na yari hondro na apostru Yohanes ben warskow: „Furu bidrigiman ben go na ini na grontapu” (2 Yohanes 7). Iya, so srefi tu na ini na ten disi furu ray gi di no bun èn di e go fu a tori fu fasi fu anbegi. Toku bun yepi ben de fu kisi.

Yu ben sa arki Yeyses?

Yeyses ben gi ini na ten dati bun ray. Disi ben de sò nanga overtoygi, taki na krakti di a ben abi ben kon na a fasi disi na fesi: „Den ipi sma ben . . . fruwondru fu en fasi fu leri sma” (Mateyus 7:28). Ma pikinso sma a mindri den ipi sma dati ben arki tru tru na san Yeyses ben taki. Yeyses ben du wondru wroko èn ben gi wan tumusi moy eksenpre tapu a kontren fu wan libifasi nanga waka nanga libi ini a gi fu en srefi na a dini fu Gado. Toku den sokari tiriman di ben kisi moro betre skoro ben weygri srefi fu frustan na waarde fu san a ben taki. Fa dati ben du kon?

Gi wan bigi pisi a ben de wan afersi fu krutu wan sani fosi yu yere en. Son sma ben wisiwasi Yeyses fu di a ben kon fu Nasarèt. Trawan ben trowe en fu di a no ben stuka na wan fu den skoro fu den èn a no ben abi koneksi nanga na grupu sma di ben e tiri (Yohanes 1:46; 7:12, 15, 47, 48). Boyti fu dati, Yeyses no ben taki ala ten san den sma ben wani yere sote. A ben taki soso na waarheid, èn den Fariseyman fu eksenpre nofotron ati ben bron nanga en wortu (Mateyus 15:12-14). Iya, baka di a ben preyki dri nanga afu yari, dan den dyu kerki tiriman ben meki den kiri en (Lukas 23:20-35). Fa den ben meki wan tumusi moy okasi psa, fu di Yeyses ben abi „wortu fu têgo libi”! — Yohanes 6:68.

Efu yu ben libi na a ten dati na ini Yerusalen, yu ben sa waka dan baka den kerki tiriman nanga tra sma fu na bigi ipi sma? Ofu yu ben sa de wan sma di e opo yu frustan fu frustan san Yeyses ben taki? Efu dat ben de so, dan yu ben sa de leki wan aparti uma di Yeyses ben miti tapu en waka.

Wan sma di ben arki

A ben miti na uma disi di a ben waka psa Samariya. Di a ben teki bro na wan peti, na uma ben kon fu kisi watra. Wi no sabi fa a ben nen ma a beybri e fruteri taki Yeyses ala di a ben weri, ben teki na okasi fu taki nanga en fu a fasi fu bribi. — Yohanes 4:5-15.

We, furu reyde ben de fu san-ede na uma disi ben kan poti a fasi fa Yeyses ben luku sani na wan sey. A ben abi wan tra fasi fu anbegi — na Samariya fasi fu anbegi ben kenki fu di fu den dyu. So srefi tu a ben de so taki den dyu ben wisiwasi den Samariya sma èn ben weygri fu abi demakandra nanga den. Èn dyaso e kon ooktu disi taki dyu mansma no ben abi a gwenti fu no taki nanga umasma di ben de freymde sma gi den (Yohanes 4:9, 27). Boyti fu dati na Samariya uma ben libi wan hurulibi, èn en ati ben kan kon bron efu fowtu ben feni a tapu en ofu efu en sondu ben tyari kon a krin. — Yohanes 4:18.

Ma a no ben du na a fasi dati. Moro furu a ben aksi reydelek aksi leki wan piki tapu Yeyses fasi fu taki di ben de nanga taktik èn ben wiki belangstelling. Di a takimakandra ben go moro fara, a ben prefuru fu go tapu wan muylek kontren fu di a tyari kon na fesi na kerki pratifasi di ben de a mindri dyu nanga Samariya sma. Yeyses ben piki nanga switifasi, ma toku a go leti tapu a tori fu di a taygi a uma: „Unu e anbegi san unu no sabi; wi e anbegi san wi sabi” (Yohanes 4:19-22). Ma en ati no ben bron nanga dati. Na frustan fu en di ben opo fu leri sani ben de klari klari fu arki moro ete.

Yeyses ben taki fu dati-ede moro fara wan prenspari sani: „Ma a yuru e kon èn a de now kba, pe den tru anbegiman sa anbegi na Tta nanga yeye èn waarheid, iya, bika na Tta e suku den sortu sma disi fu anbegi en. Gado na wan Yeye, èn na sma di e anbegi en, musu anbegi en nanga yeye èn waarheid” (Yohanes 4:23, 24). Bakaten na uma disi di ben opo en frustan ben sori warderi fu di nanga faya a ben fruteri tra sma fu san a ben leri. Den sma fu den sey baka ben pruberi fu kon sabi moro sani fu di den go arki den wortu fu Yeyses. — Yohanes 4:39-42.

San wi kan leri fu disi? We, efu wi e libi ini wan kontren pe na wan krakti fasi sma e krutu sani a fesi bifo den yere den ini a tori fu ras, nationaliteit ofu fasi fu anbegi, fa wi e du dan efu wan sma fu wan tra ras, wan tra nationaliteit ofu wan tra fasi fu anbegi e kon taki nanga wi? Wi e tapu wi frustan te sani e taki di ben sa kan sori taki wi no abi leti? Ofu wi de klari neleki na Samariya uma fu taki?

Yu ben sa arki Paulus?

Ete wan sma di ben gi tumusi moy ray ben de na apostru Paulus. Wan dey Paulus tu ben abi wan frustan di opo fu leri sani. A ben piki: „Fositen [mi ben de] wan leyman fu pori sma nen èn wan frufolgu man èn wan sma sondro e firi syen . . . Ma toku ete mi ben kisi sari-ati fu di mi no ben sabi moro bun èn ben handri sondro fu abi bribi” (1 Timoteyus 1:13) Ma a ben teki na waarheid di e go fu Yeyses Krestes èn a ben poti a krutu fu sani a fesi sondro fu yere den na wan sey. En eksenpre e sori taki na beybri waarheid kan yepi fu ’trowe’ „tranga skotu sani” na ini a ati ’na gron’ efu den sani disi e du a tanbun fu wi ogri. — 2 Korente sma 10:4.

Di Paulus ben wan kresten kba, a ben go doro nanga deki-ati fu panya na bun nyunsu di a ben leri. En so leki yu ben kan fruwakti, a ben kisi fu du nanga na srefi yeyefasi pe sma e tapu den frustan so leki en srefi ben du wan dey — ala di disi no ben de ala ten so nanga den. Na ini Bereya, noordsey fu Grikikondre, a ben miti nanga wan tu safri-ati sma di tapu wan tumusi moy fasi ben meki sma si fa sma musu arki ray. Den ben herken na sten fu na waarheid na ini Paulus wortu. Fu dati-ede „den ben teki na wortu nanga na moro bigi de klari di den frustan ben de klari”. Ma den ben de sma di no ben krutu sani a fesi bifo den ben yere den, no e bribi nomo ala sani. Den „ben ondrosuku ala dey den Buku soyfri ofu den sani disi ben de so” (Tori fu den Apostru 17:11). Ala di den ben feni san den ben yere moy, toku den ben go luku baka nanga yepi fu na beybri efu a ben de tru bifo den ben teki en krin krin.

„Overtoygi yu srefi fu ala sani”

Na ini na ten disi Yehovah Kotoygi e du furu muyti fu prati na bun nyunsu fu na Kownukondre nanga tra sma di de fu wan tra fasi fu anbegi. Fa sma e teki na wroko disi fu Yehovah Kotoygi? Furu sma nanga switifasi e teki den nanga prisiri na den oso. Ma trawan e weygri fu du disi, ala di son sma e kisi atibron srefi te den Kotoygi e fisiti den.

Disi na wan sari sani, bika na sani di Yehovah Kotoygi wani taki fu en, beybri e kari ’bun nyunsu’ (Mateyus 24:14). Boyti fu dati, den e gi den sma deki-ati fu abi na fasi fu na apostru Paulus, di ben taki: „Overtoygi yu fu ala sani, hori tranga na san de tumusi bun” (1 Tesalonika sma 5:21). Awinsi wan sma abi wan krakti overtoygi, dan seyker a musu de nanga wan opo frustan fu taki nanga tra sma fu Gado, neleki den Bereya sma nanga den Samarya uma.

Fu san-ede yu musu de nanga wan op frustan?

Koloku taki ibri yari hondro dusun dusun sma de klari fu du disi. Furu sma e go frustan na koni di de na ini beybri, èn leki bakapisi fu dati den e tyari tru tru kenki kon di e tan na ini den libi. Son wan fu den ben de fositen neleki Janet, wan yongu uma, nanga wan langa historiya fu na fowtu kobroyki fu drug nanga sopi di te fu kba ben kon so fara taki a ben du wan muyti fu kiri en srefi. Now now Janet de wan koloku kresten. A stuka fu en fu a beybri yepi en fu kisi na fanowdu krakti fu libi ini kruderi nanga Paulus ray: „Meki wi krin wi srefi fu ibri doti fu skin nanga yeye.” — 2 Korente sma 7:1.

Vernon ben de wan sopiman di en trowlibi ben de so fara fu panya. Ma fu di a teki beybri ray meki a ben kan wini na takru gwenti disi èn na banti mindri en nanga en uma ben kon baka (1 Korente sma 6:11). Debra ben firi tranga rasfiri fu krutu sma a fesi. Ma beybri stuka nanga demakandra di a ben abi nanga kresten sma yepi en fu kenki en denki. (Tori fu den Apostru 10:34, 35). En suma ben sa kan prakseri taki a ben kan di wan yongu huru-uma na ini Bakrakondre ben tyari kenki kon na ini en libi di a ben agri wan dey fu stuka na beybri nanga Yehovah Kotoygi? A no ben teki langa ofu a ben de wan kresten di dopu èn di e libi wan krin libi èn a ben sorgu bun gi en pikin.

Den sortu ondrofenitori disi e feni presi furu tron baka te sma e arki san na beybri e taki. Na kwaliteit fu na libi fu den e kon moro bun ini fasi di furu fu den noyti ben denki taki a kan. San de moro prenspari ete, den e kon na ini wan bun matifasi nanga Gado, so taki den kan taki opregti nanga en na ini begi leki „wi Tta na ini heymel” (Mateyus 6:9). En den e kisi wan seyker howpu di no kan broko gi na ten di e kon te den e ondrofeni na waarheid fu Yeyses wortu: „Disi wani taki têgo libi, taki den e teki doronomo sabi na ini den fu yu, na wan enkri tru Gado, èn fu en di yu ben seni kon, Yeyses Krestes.” — Yohanes 17:3.

Den sortu tori disi Yehovah Kotoygi wani taki te den e du na diniwroko fu den èn e fisiti tra sma. A de seyker taki heri esi den sa kon baka na yu na yu doro. Yu sa de nanga wan opo frustan di de nofo fu arki den?

[Prenki na tapu bladzijde 11]

Na Samariya uma no ben meki a krutu fu sani bifo yu yere den tapu en fu arki Yeyses. Yu de netso nanga wan opo frustan?