Gado en bunfasi e hari yu kon?
YU ABI wan heri bun mati? Efu dati de so, yu ben go prakseri oyti wan dey, san ben hari yu go na a sma dati? A ben de na fasi fa a tan na dorosey? A ben de fu di unu alatu ben lobi den srefi sani? Ofu a ben de moro dipi eygifasi soleki switifasi ofu koni? Efu bunfasi ben de na ’sani di ben tay’ yu matifasi, dan yu abi trutru wan diri matifasi. Trutru bunfasi no de fu feni furu na ini na ten disi, bika na moro bigi pisi fu libisma de „sondro lobi gi san bun”. — 2 Timoteyus 3:3.
Gi wan kresten na moro prenspari matifasi ini na libi no de nanga wan tra sma, ma nanga Gado. Sobun te yu e go denki fu na matifasi disi, yu ben aksi yu srefi oyti: ’Sortu eygifasi fu Gado e hari mi moro furu go na Gado?’
Den moro prenspari eygifasi fu Gado
Te yu luku en bun, na beybri e taki fu furu aparti eygifasi fu Gado. Den fo di moro furu den e poti krakti na tapu, na en lobi, en geregteghèyt, en koni, èn en almakti krakti (Deuteronomium 32:4; Job 12:13; Psalm 147:5; 1 Yohanes 4:8). Efu wi ben sa musu teki a mindri den fo aparti eygifasi disi, dan kande wi ben sa taki taki na lobi fu Gado e hari wi moro furu. Ma na eygifasi di tay krosibey na en lobi na en bunfasi di e psa ala sani. Beybri skrifiman ben skrifi nanga overtoygi fu disi èn so wan bunfasi kan tyari sma go so fara fu bow wan tranga, switi matifasi nanga den Mekiman.
Na so fu eksenpre, na a kba fu na di fu siksi yarihondro bifo G.T. na profeyti Sakariya ben bari taki fu Yehovah: „O bigi en bunfasi de, èn o bigi en moyfasi de!” (Sakariya 9:17) Furu yari bifo Sakariya, Yesaya ben prèyse Yehovah so srefi di a ben skrifi: „Den lobi bunfasi fu Yehovah mi sa fruteri, . . . iya, na bunfasi psamarki gi na oso fu Israèl, di a sori den.” — Yesaya 63:7.
Dri yarihondro na fesi dan kownu David ben skrifi fu Gado bunfasi na wan fasi di e seki na ati. David ben skrifi fu ondrofeni, fu di en heri libi langa a ben nyanbun fu na bunfasi disi. Gado ben bun psamarki gi David, spesrutu baka den seryusu sondu fu en nanga na tori fu Batseyba nanga en masra Uriya, di Gado ben sori en sari-atifasi (2 Samuel 12:9, 13). Na ini Psalm 31:19 David ben fruklari nanga furu warderi: „Fa na bunfasi fu yu de psamarki, di yu kibri poti leki wan gudu gi den wan di e frede yu!”
Yu abi netso furu warderi gi Gado bunfasi soleki den fositen anbegiman dati fu owruten? Efu dati de so, dan yu sa ondrofeni na trutru „vrede fu Gado, di e psa ala prakseri” èn so srefi yu ati sa buweygi yu na wan kraktifasi fu du alaten na wani fu Gado (Filipi sma 4:7). Meki wi luku now pikinso san de alamala Gado bunfasi èn fa na bigi di a bigi de wan fruwondru sani. Disi sa meki wi warderi gi wi lobi heymel Tta seyker kon moro bigi.