Bun nyunsu gi na heri libismafamiri!
„MI BEN si wan tra engel e frey na ini na mindri fu heymel, èn a ben abi têgo bun nyunsu fu meki dati bekenti leki prisiri ten na den sma di e libi na grontapu, èn na ibri nâsi èn lo èn tongo èn pipri” (Openbaring 14:6). Nanga den wortu dati na grani apostru Yohanes ben fruteri fu na fisyun fu en di a ben kisi ondro krakti fu santa yeye, wan fisyun di e kon tru na ini wi ten. Fa a de wan kowru-ati fu sabi taki bun nyunsu de na ini na pisiten disi pe ogri, a doti di sma e doti loktu, watra nanga gron, terrorisme, feti èn na alape onseykerfasi na economiya sey e kon moro furu! Ma sortu nyunsu ben kan de so bun, taki wan engel musu bariwroko fu en? Sortu ten ben kan de so prisiri, taki a warti fu ben meki bekenti na ibri nâsi nanga lo nanga tongo nanga pipri?
Wi kan feni a piki efu wi e denki baka na wan tra okasi pe wan engel en srefi ben bariwroko fu bun nyunsu. Disi ben de na a kba fu na fosi yarihondro bifo G.T., pikinmoro wán hondro yari bifo Yohanes ben si en fisyun. Skapuman ben de nanga den ipi meti fu den na den gron krosibey fu Betlehem, èn wan engel ben sori en srefi èn bariwroko fu na kobortu fu Yeyses, nanga den wortu: „Luku! mi e meki bun nyunsu bekenti fu wan bigi prisiri di na heri pipri sa abi, bika tide wan Frulusuman ben koboru di de Krestes na Masra, na ini David foto.” — Lukas 2:10, 11.
Na kobortu fu Yeyses ben de trutru „bun nyunsu fu wan bigi prisiri”. A ben gro kon tron wan bigisma fu de na pramisi Krestes nanga Frulusuman, a wan di ben gi en volmaakti libisma libi, so taki reti-ati bribiman ben sa kan kisi libi. Moro leki dati, a ben sa tron Kownu fu Gado kownukondre, na „Kownu fu Vrede”, di ondro na tiri fu en, geregtigheid nanga vrede te fu kba ben sa kon gi na libismafamiri (Yesaya 9:6; Lukas 1:33). Fu tru, a kobortu fu en ben de bun nyunsu di ben warti fu wan engel bariwroko fu en!
Yeyses na Kownu
Na ini na ten dati fu na fosi yarihondro, Yeyses ben meki furu fu den prakseri di Gado ben abi nanga en kon tru, ma den no ben poti en na a ten dati tapu a troon leki Kownu fu Gado kownukondre. So leki na tijdschrift disi furutron ben sori, dan dati no ben feni presi te leki 1914. So leki na kontru fu beybri profeytitori e sori krin, dan Gado kownukondre ben opo ini a yari dati na ini heymel (Openbaring 12:10, 12). Ala di bun takru nyunsu ben de na ini 1914 — na bigin fu na Fosi Grontapufeti — toku na kobortu fu Gado kownukondre ben de na moro bun nyunsu. Fu dati-ede meki Yeyses ben kan taki a fesi fu na ten fu wi: „Na bun nyunsu disi fu na kownukondre sa preyki na a heri grontapu pe libisma e libi leki wan kotoygi gi ala nâsi.” — Mateyus 24:14.
Na profeytitori fu Yeyses e kon tru? Na piki de iya! Èn na profeyti fisyun fu Yohanes so srefi e kon tru. A de tru taki wi no kan si na engel, di no de fu si, èn di Yohanes ben si. Ma Yehovah Kotoygi de fu si srefisrefi te den e meki na bun nyunsu fu na engel bekenti „na ibri nâsi nanga lo nanga tongo nanga pipri”. Na ini 212 kondre nanga eylanti fu se den sten fu den de fu yere. Èn bigi ipi sma e teki a tori na wan bun fasi. Den odrofenitori fu son wan fu den sma disi sa sori o bun na nyunsu fu Gado kownukondre de trutru.