„Prisiri Nyunsu” fu na Apocalyps

„Mi ben si wan tra engel e frei na mindrisei fu hemel, èn a ben abi têgo bun nyunsu fu meki bekènti leki prisiri nyunsu gi den sma di e libi na grontapu.”—OPENBARING 14:6.

1. Ala di Yehovah Kotoigi e bribi taki a buku Apocalyps skrifi nanga yepi fu Gado en santa yeye, dan fu san ede den a no wan „sekte di e fruklari soso taki wan bigi rampu o kon”?

KONTRARI den lei di sma e taki fu Yehovah Kotoigi, den a no wan „sekte di e fruklari soso taki wan bigi rampu o kon”, noso den a no wan „krutudei sekte”. Ma den e bribi taki na Apocalyps, noso a buku Openbaring, de wan pisi fu Gado Wortu di a meki sma skrifi nanga yepi fu en santa yeye. A tru taki Openbaring abi krutuboskopu di e krutu den godelowsusma. Ma te den futuboi fu Gado e gi kotoigi na publiki, dan den e poti prakseri na a kefalek moi howpu di skrifi na ini Bijbel, so srefi na ini na Apocalyps, noso Openbaring. So bun, den no e poti noti moro na ini a profeiti wortu, noso e puru wan sani fu en.—Openbaring 22:18, 19.

Sma Di E Meki Prisiri Nyunsu Bekènti

2. San na wan tu bijbeltekst di Yehovah Kotoigi e gebroiki furutron na ini den preikiwroko?

² Wan bijbeltekst di Yehovah Kotoigi gebroiki furutron leki fondamenti fu a publiki diniwroko fu den, na a fruklari fu Yesus: „A bun nyunsu disi fu a kownukondre sa meki bekènti na heri grontapu pe sma e libi, leki wan kotoigi gi ala nâsi, èn dan a kaba sa kon” (Mateus 24:14, futuwortu). Èn san na „a bun nyunsu disi fu a kownukondre”? Furu Kotoigi ben o piki nanga den tekst fu Openbaring kapitel 20 nanga 21 di e taki fu a Dusun Yari Tiri fu Krestes èn fu en Kownukondre tiri èn a libimakandra fu libisma, pe dede, sari nanga pen „no sa de moro”.—Openbaring 20:6; 21:1, 4.

3. Nanga sortu wroko a publiki diniwroko fu Yehovah Kotoigi e kruderi?

³ Leki sma di e meki den prisiri nyunsu disi bekènti, Yehovah Kotoigi de trutru a mofo fu na agersi boskopuman fu hemel di kisi a wroko di skrifi so srefi na ini Openbaring. „Mi ben si wan tra engel e frei na mindrisei fu hemel, èn a ben abi têgo bun nyunsu fu meki bekènti leki prisiri nyunsu gi den sma di e libi na grontapu, èn gi ibri nâsi nanga lo nanga tongo nanga pipel” (Openbaring 14:6). A „têgo bun nyunsu” na so srefi a sani di meki bekènti taki „a kownukondre [noso tirimakti] fu grontapu” „tron a kownukondre fu wi Masra èn fu en Krestes” èn taki a „fasti ten” fu Yehovah kon „fu pori den wan di e pori grontapu” (Openbaring 11:15, 17, 18). ¿Dati a no bun nyunsu trutru?

San Openbaring Abi gi Wi

4. (a) Fu sortu prenspari waarheid kapitel 1 fu Openbaring e taki? (b) San den sma musu du di wani kisi wini fu den prisiri nyunsu?

⁴ A fosi kapitel fu a buku Openbaring e kari Yehovah „[na] Alfa nanga na Omega, . . . a Sma di de èn di ben de èn di e kon, na Almaktiwan”. Èn a e kari en Manpikin Yesus Krestes, „a Getrow Kotoigi”, „a fosi geborewan di opo baka na dede”, èn „a Tiriman fu den kownu fu grontapu”. A e kari Yesus so srefi „en di lobi wi èn di ben frulusu wi fu den sondu fu wi nanga yepi fu en eigi brudu” (Openbaring 1:5, 8). So bun, na a bigin kaba na Openbaring e gi prenspari waarheid di kan kibri sma libi. „Den sma di e libi na grontapu” no sa kisi wini fu a prisiri nyunsu di tyari kon gi den, boiti efu den e erken taki Yehovah abi ala makti, èn efu den e bribi na ini a brudu di Yesus trowe, èn efu den e bribi taki Yehovah gi en wan opobaka èn taki Krestes de now a sma di Gado poti leki tiriman fu grontapu.—Psalm 2:6-8.

5. Sortu rol Krestes abi na ini Openbaring kapitel 2 nanga 3?

⁵ Den tu tra kapitel e kari Krestes Yesus a lobi-ati hemel Opziener fu den gemeente fu den disipel fu en na grontapu. A bukulolo di ben taki fu wan spesrutu grupu fu seibi Kresten gemeente di ben de na ini Pikin Asia na ini a fosi yarihondro G.T., ben abi deki-ati nanga seryusu rai na ini, di e fiti na ini a ten disi ete. Den boskopu di ben seni go na den gemeente, nofotron e bigin nanga den wortu soleki „Mi sabi den du fu yu” noso ’Mi sabi a banawtu fu yu’ (Openbaring 2:2, 9). Iya, Krestes ben sabi soifri san ben pasa na ini den gemeente fu den disipel fu en. A ben prèise wan tu fu den fu a lobi fu den, a bribi fu den, a wroko di den ben wroko tranga na ini a diniwroko, a hori di den ben e horidoro, èn a getrowfasi fu den gi a nen fu en èn gi a wortu fu en. Trawan a ben gi piri-ai bika den ben meki taki a lobi di den ben lobi Yehovah nanga en Manpikin ben kon kowru, noso fu di den ben go du seks hurudu, den ben anbegi kruktu gado, noso fu di den ben fadon komoto na bribi fu go na ini sekte.

6. San a fisyun di skrifi na ini kapitel 4 e yepi sma fu frustan?

⁶ Kapitel 4 e gi wan kefalek moi fisyun fu a hemel kownusturu fu Yehovah Gado. A e meki wi si wan pikin pisi fu a glori fu Yehovah en denoya èn fu a hemel tiri strukturu di a sa gebroiki. Den tiriman di tron kownu, èn di abi kownusturu e tanapu lontu a moro prenspari kownusturu fu na universum, e anbegi Yehovah èn den e meki bekènti: „Yu, Yehovah, iya wi Gado, warti fu kisi a glori nanga a grani nanga a krakti, bika yu ben kria ala sani, èn fu yu wani ede den ben de èn yu ben kria den.”—Openbaring 4:11.

7. (a) San na engel e komanderi den sma di e libi na grontapu fu du? (b) San na wan prenspari pisi fu wi leriwroko?

⁷ ¿Disi wani taki wan sani gi sma na ini a ten disi? Seiker a wani taki wan sani. Efu den wani libi na ondro a Dusun Yari Kownukondre, dan den musu arki san na „engel [di] e frei na mindrisei fu hemel” e meki bekènti: „Frede Gado èn gi en glori, bika a yuru doro te a sa tyari krutu kon” (Openbaring 14:6, 7). Wan fu den moro prenspari sani di meki taki Yehovah Kotoigi e gi bijbel-leri na fu yepi „den wan di e libi na grontapu” fu kon sabi èn fu kon anbegi Yehovah, fu erken taki en na a Kriaman, èn fu den musu wani saka densrefi na ondro a regtfardiki soevereiniteit fu en.

A Pikin Skapu Warti fu Kisi Grani

8. (a) San kapitel 5 nanga 6 e taki fu Krestes? (b) San ala sma di e arki den prisiri nyunsu kan leri fu a fisyun disi?

⁸ Den tu tra kapitel, 5 nanga 6, e kari Yesus Krestes wan Pikin Skapu di warti fu opo wan bukulolo di abi seibi lakstampu, èn na so fasi disi e sori nanga agersi wortu san sa pasa na ini a ten fu wi. (Teki gersi Yohanes 1:29.) Hemel sten e taigi na agersi Pikin Skapu disi: „Yu warti fu teki a bukulolo èn fu opo den lakstampu fu en, bika na yu den ben kiri èn nanga a brudu fu yu, yu ben bai gi Gado sma fu ibri lo nanga tongo nanga pipel nanga nâsi, èn yu ben meki den kon tron wan kownukondre nanga priester gi wi Gado, èn den sa tiri grontapu leki kownu” (Openbaring 5:9, 10). A fisyun disi e leri wi taki na tapu gron fu a brudu di Krestes trowe, sma fu ala sortu presi e kisi kari fu de nanga en na hemel èn fu „tiri grontapu leki kownu”. (Teki gersi Openbaring 1:5, 6.) A fasti nomru fu den kari baka ten na ini a buku Openbaring.

9. San kapitel 6 e taki fu Krestes?

⁹ Na ini a srefi fisyun disi, den e taki fu Krestes so srefi leki wan rèiman di poti leki kownu èn di e rèi na tapu wan weti asi, èn a e go „leki winiman èn fu kaba a wini fu en”. A de wan prisiri taki a sa puru den takru bakapisi di den e agersi nanga den dri asi-rèiman fu na Apocalyps, èn a fayafaya fasi fa den e rèi tyari orloku, angriten, nanga dede kon gi libisma fu sensi a tumusi prenspari yari 1914 (Openbaring 6:1-8). A spesrutu rol fu Krestes, a Pikin Skapu fu Gado, fu frulusu libisma èn fu du den tumusi moi prakseri fu Yehovah, na wan prenspari pisi fu a Bijbel leriwroko fu Yehovah Kotoigi

10. (a) Sortu prenspari sani kapitel 7 e leri wi? (b) Fa Krestes ben taki fu den sma di kisi a Kownukondre?

¹⁰ Kapitel 7 abi prisiri nyunsu fu tru. Soso na ini a buku Openbaring wi e feni a nomru fu den sma Yesus ben kari a „pikin ipi” èn di e kisi a Kownukondre fu a Pikin Skapu en Tata (Lukas 12:32; 22:28-30). Yehovah Gado poti wan lakstampu na den tapu nanga yepi fu en yeye (2 Korentesma 1:21, 22). Na apostel Yohanes, di ben kisi na Openbaring, e fruklari: „Mi ben yere omeni den wan de di ben kisi wan lakstampu, wan hondro fotenti na fo dusun” (Openbaring 7:4). A fasti nomru disi e kari baka na ini wan tra kapitel moro fara, èn den e taki dati disi na a nomru fu den wan di „den ben bai puru na mindri libisma” fu tiri nanga a Pikin Skapu na tapu a hemel Sionbergi (Openbaring 14:1-4). Ala di den kerki fu Krestenhèit no e gi wan krin fruklari fu a nomru disi èn den no abi tranga buweisi, a de bun fu si san a Bijbel sabiman E. W. Bullinger e taki fu en: „A de wan makriki fasi fu taki wan sani: wan fasti nomru di poti kontrari wan nomru di no kari krin, na ini a srefi kapitel disi.”

11. (a) Sortu prisiri nyunsu de fu feni na ini kapitel 7? (b) Sortu howpu de gi den sma di de memre fu a „bigi ipi”?

¹¹ Fu sortu nomru di no kari krin, Bullinger ben taki? Na ini vers 9, na apostel Yohanes ben skrifi: „Baka den sani disi mi ben si, èn, ¡luku! wan bigi ipi, di no wan sma ben man teri, di komoto na ala nâsi nanga lo nanga pipel nanga tongo” (Openbaring 7:9). Suma de na ini a bigi ipi disi, san na a posisi di den abi now fesi Gado, èn sortu tamara den abi? A piki fu na apocalyps na bun nyunsu gi den sma di e libi na grontapu. Wi e leisi: „Disi na den sma di komoto na a bigi banawtu, èn den wasi den langa krosi fu den èn meki den kon weti na ini a brudu fu a Pikin Skapu.” Fu di den e bribi na ini a brudu di Krestes trowe, meki Gado sa kibri den na ini „a bigi banawtu”. Krestes „sa tyari den go na fonten fu watra fu libi. Èn a sa figi ala watra-ai puru na den ai” (Openbaring 7:14-17). Iya, milyunmilyun sma di e libi na ini a ten disi kan tron wan pisi fu a kefalek bigi ipi sma di no sa dede te a kaba fu a disiten godelowsu seti fu sani sa kon. Leki borgu fu Kownu Yesus Krestes na ini a Dusun Yari Tiri fu en, a sa tyari den fu libi fu têgo na grontapu. ¿Dati a no bun nyunsu?

„Den Krutu fu En De Tru èn Regtfardiki”

12, 13. (a) San de na ini kapitel 8 te go miti 19? (b) Fu san ede opregti sma no musu frede gi den sortu profeititori disi?

¹² Den kapitel 8 te go miti 19 na moro furu a reide fu san ede sma e denki so fu a buku Apocalyps, noso Openbaring, leki wan buku di e taki na fesi taki kefalek takru rampu sa feni presi. Den abi kefalek krakti krutu boskopu (di a bro na tapu trompeti, den plaag, nanga den komki fu Gado en atibron e prenki), di ben taki teige den difrenti pisi fu Satan en seti fu sani. Den krutustrafu disi sa tyari fosi na tapu falsi relisi („Babilon a Bigiwan”), dan na tapu den godelowsu politiek sistema, di de wan prenki fu werdri meti.—Openbaring 13:1, 2; 17:5-7, 15, 16.a

¹³ Den kapitel disi e sori fa hemel sa krin, te Satan nanga den ogri yeye fu en e trowe go na a birti fu grontapu. Disi na a wan-enkri logisch fruklari gi den banawtu di grontapu e ondrofeni fu sensi 1914 èn di noiti pasa ete (Openbaring 12:7-12). Den e taki so srefi na wan agersi fasi taki Satan en ogri seti fu sani na grontapu sa kisi pori (Openbaring 19:19-21). ¿Opregti sma musu frede den sortu frede sani disi di sa pasa? Nôno, bika na a ten te Gado e tyari en krutustrafu kon, dan wan bigi ipi na hemel e bari taki: „¡Prèise Yah, un pipel! A frulusu nanga a glori nanga a krakti na fu wi Gado, bika den krutu fu en de tru èn regtfardiki.”—Openbaring 19:1, 2.

14, 15. (a) Fa a kaba fu a disiten godelowsu sistema sa kon na wan regtfardiki fasi? (b) Fu san ede a pisi disi fu na Apocalyps musu meki opregti sma e prisiri?

¹⁴ Yehovah no sa tyari wan regtfardiki sistema kon sondro fu puru den sma di e pori grontapu (Openbaring 11:17, 18; 19:11-16; 20:1, 2). No wan libisma noso politiek tirimakti abi a makti noso a krakti fu du disi. Yehovah wawan nanga en Kownu nanga Krutuman di a poti, Krestes Yesus, kan du disi na wan regtfardiki fasi.—2 Tesalonikasma 1:6-9.

¹⁵ Soleki na Apocalyps e sori krinkrin, Yehovah abi na prakseri fu tyari wan kaba kon na a disiten godelowsu sistema. A sani disi musu gi man nanga uma di „e soktu èn e geme fu ala den tegu sani di e pasa”, prisiri (Esekièl 9:4). Disi musu meki den frustan moro bun taki a de tranga fanowdu fu gi yesi na a kari fu na engel di e fruteri prisiri nyunsu, di a ben fruklari: „Frede Gado . . . bika a yuru doro te a sa tyari krutu kon, èn fu dati ede, anbegi a Sma di ben meki hemel nanga grontapu” (Openbaring 14:7). Meki den sma disi anbegi èn dini Yehovah makandra nanga den Kotoigi fu en, „di e hori den komando fu Gado èn abi a wroko fu gi kotoigi fu Yesus”.—Openbaring 12:17.

A Tumusi Bun Dusun Yari Tiri

16. (a) Fu san ede den kerki fu Krestenhèit no e bribi moro na ini a howpu di a Millennium e gi? (b) Fu san ede Yehovah Kotoigi e bribi taki a modelbegi sa kon tru?

¹⁶ Kapitel 20 te go miti 22 fu a buku Openbaring abi den Bijbel buweisi di e meki sma e howpu na tapu a Millennium. Disi na a wan-enkri pisi fu Bijbel di e taki trutru fu wan dusun yari pisi ten di sa de a bigin pisi fu têgo koloku na hemel èn na grontapu. Den kerki fu Krestenhèit no e bribi moro na ini a howpu di a Millennium e gi. Fu di kerki e leri taki den regtfardikisma e go na hemel èn den godelowsusma e go na hel, meki den no e taki fu wan paradijs grontapu. A modelbegi, di e aksi taki Gado en „wani sa du na grontapu, soleki na ini hemel”, no wani taki notinoti moro gi furu memre na ini den kerki fu Krestenhèit (Mateus 6:10, New International Version). Ma dati no de so nanga Kotoigi fu Yehovah. Den e bribi tranga taki Yehovah Gado no ben meki grontapu „fu soso”, ma „fu sma libi na tapu” (Yesaya 45:12, 18). So bun, den owruten profeititori, a modelbegi, nanga a howpu na ini na apocalyps di e taki fu a Millennium e kruderi nanga makandra. Na ini a Dusun Yari Tiri fu Krestes, a sa sorgu taki a wani fu Yehovah o pasa na grontapu, soleki fa a e pasa na hemel.

17. San e sori taki wi musu si „den dusun yari” leki trutru dusun yari?

¹⁷ Den wortu „dusun yari” de siksi tron na ini den fosi seibi vers fu Openbaring kapitel 20. A de prenspari fu si taki den gebroiki en fo tron nanga a bepaald lidwortu „a”, di e sori taki a e taki fu wan trutru pisi ten fu dusun yari, èn taki a no e taki fu wan pisi ten di no kari krinkrin soleki fa furu sma fu Krestenhèit di e fruklari sani, wani meki wi bribi. San sa feni presi na ini a Millennium? Fosi, Satan no sa man du noti moro na ini a heri pisi ten dati (Openbaring 20:1-3; teki gersi Hebrewsma 2:14). ¡Dati na bun nyunsu fu tru!

18. (a) Fu san ede wi kan kari a Millennium wan krutu „dei”? (b) San sa pasa na a kaba fu den dusun yari?

¹⁸ Fu di Gado gi a „makti fu krutu” na den wan di e „tiri leki kownu makandra nanga en [Krestes], dusun yari langa”, meki a pisi ten disi de trutru wan krutu „dei” fu dusun yari (Openbaring 20:4, 6; teki gersi Tori fu den Apostel 17:31; 2 Peter 3:8). Den dedewan sa kisi wan opobaka èn, makandra nanga den wan di pasa „a bigi banawtu” libilibi, den sa kisi krutu na wan eerlijk fasi akruderi den sani di den du na a ten dati (Openbaring 20:12, 13). Na a kaba fu den dusun yari, Gado sa lusu Satan wan syatu ten fu tesi libisma wan lasti leisi, èn baka dati, en nanga den ogri yeye fu en, èn iniwan opruruman na grontapu di e waka na en baka, sa kisi pori fu têgo (Openbaring 20:7-10). Den nen fu den libisma di e pasa a tesi disi sa skrifi na ini „a buku fu libi” sondro taki den nen sa man figi puru, èn den sa tyari go fu libi fu têgo na ini koloku, fu dini èn fu anbegi Yehovah na wan paradijs grontapu.—Openbaring 20:14, 15; Psalm 37:9, 29; Yesaya 66:22, 23.

19. (a) Fu san ede wi kan de seiker taki den kefalek moi pramisi di skrifi na ini a buku Openbaring sa kon tru seiker? (b) San wi sa ondrosuku na ini a tra artikel?

¹⁹ Dati na den prisiri nyunsu di skrifi na ini na Apocalyps. Den a no pramisi fu libisma di no abi waarde. Na apostel Yohanes ben skrifi: „A Sma di ben sidon na tapu a kownusturu, ben taki: ’¡Luku! Mi e meki ala sani kon nyun.’ A e taki tu: ’Skrifi, bika den wortu disi de getrow èn tru’” (Openbaring 21:5). San wi musu du fu ondrofeni a kontru fu den prisiri nyunsu disi? A buku Openbaring abi furu rai gi den wan di wani plisi Gado. Te wi e gebroiki den rai disi, dan dati sa gi wi bogobogo koloku, now èn fu têgo, soleki fa a tra artikel sa sori.

[Futuwortu]

Penti fu Luku Baka

◻ Sortu prenspari waarheid di de na ini Openbaring kapitel 4 te go miti 6 de wan prenspari pisi fu den prisiri nyunsu?

◻ Sortu prisiri nyunsu de fu feni na ini Openbaring kapitel 7?

◻ Fu san ede opregti sma no musu frede den krutu boskopu di de na ini Openbaring?

◻ Na sortu fasi a Millennium sa de wan krutu „dei”?

[Prenki na tapu bladzijde 10]

A Kownu Yesus Krestes sa puru orloku, angriten, nanga dede krinkrin na grontapu