Na Apocalyps—¿Wan Sani Di Wi Musu Frede, Noso Di Wi Musu Howpu na Tapu?

„Na Apocalyps na ini a ten disi no de soso wan sani di Bijbel e taki fu en, ma a tron wan sani di kan pasa trutru.”—Javier Pérez de Cuéllar, di fosi ben de sekretarsi generaal fu den Verenigde Nâsi.

A GEBROIKI di wan prenspari fesiman fu grontapu e gebroiki a wortu „apocalyps” na a fasi dati e sori san furu sma e denki fu na apocalyps èn fa den e si taki sma e gebroiki a wortu na ini kino èn na ini nen fu buku, na ini tijdschrift artikel, èn na ini koranti. A e meki sma prakseri wan rampu di sa pasa na heri grontapu. Ma san a wortu „apocalyps” wani taki trutru? Èn wan sani di de moro prenspari, san na a boskopu na ini a bijbelbuku di nen Apocalyps, noso Openbaring?

A wortu „apocalyps” e kon fu wan Griki wortu di wani taki „tyari kon na krin”. San na Openbaring fu Bijbel e tyari kon na krin? ¿A ben de soso wan krutu boskopu, a bigin fu a kisi di ala sma sa kisi pori, sondro taki wan sma o tan na libi? Di den ben aksi a historia skrifiman Jean Delumeau, wan memre fu na Institut de France, san a ben prakseri fu na Apocalyps, dan a ben fruklari: „A de wan buku di e gi trowstu nanga howpu. Sma prakseri tumusi takru fu den sani di skrifi na ini en fu di den ben poti prakseri soso na den pisi fu a buku di e taki fu wan rampu.”

Den Fositen Kerki Nanga na Apocalyps

Fa den fositen „Kresten” ben prakseri fu na Apocalyps èn a howpu di a e meki sma howpu na tapu a Dusun Yari Tiri (Millennium) fu Krestes di sa tiri grontapu? A srefi historia skrifiman ben taki: „Gi mi a gersi taki moro furu fu den Kresten fu den fosi yarihondro ben kon bribi na ini a Millennium. . . . Wan tu Kresten fu den fosi yarihondro di ben bribi na ini a Millennium ben de spesrutu Papias, a biskopu fu Hièrapolis na ini Pikin Asia, . . . Santa Justinus, di gebore na ini Palestina, èn di dede wan ogri-ati dede gi en bribi na ini Rome kande na ini a yari 165, Santa Irenæus, biskopu fu Lyons, di dede na ini a yari 202, nanga Tertullianus, di dede na ini a yari 222, èn . . . a bigi skrifiman Lactantius.”

The Catholic Encyclopedia e taki fu Papias, di soleki fa sma e fruteri, dede wan ogri-ati dede gi en bribi na ini Pergamum na ini a yari 161 noso 165 G.T.: „Biskopu Papias fu Hièrapolis, wan disipel fu Santa Yohanes, ben kon leki wan sma di ben horibaka gi a Millennium. A ben fruklari taki a kisi a leri disi fu den sma di ben libi na ini a ten fu den Apostel, èn Irenæus e fruteri taki tra ’Presbyteri’ di ben si èn ben yere a disipel Yohanes, ben leri fu en fu bribi na ini a Millennium leki wan fu den leri di Masra ben gi. Soleki fa Eusebius e taki . . . dan Papias ben fruklari na ini en buku taki na baka na opobaka fu den dedewan, wan dusun yari tiri ben o de nanga a glori kownukondre fu Krestes na grontapu èn di ben o de fu si nanga ai.”

San disi e taigi wi fu a bakapisi di a buku Apocalyps, noso Openbaring, ben abi na tapu den fositen bribiman? ¿A ben meki den e frede, noso a ben gi den howpu? A de prenspari fu si taki historia skrifiman e kari den fositen Kresten den chiliast, wan wortu di kon fu den Griki wortu chiʹli·a eʹte (dusun yari). Iya, sma ben sabi furu fu den leki sma di ben bribi na ini a Dusun Yari Tiri fu Krestes, di ben o meki grontapu tron wan paradijs. A wan-enkri presi na ini Bijbel pe den e taki finifini fu a howpu fu a Millennium, na a Apocalyps, noso na Openbaring (20:1-7). So bun, na presi taki na Apocalyps ben frede den sma di ben e bribi na ini en, a ben gi den wan kefalek moi howpu. Na Oxford professor fu kerki historia, Cecil Cadoux, e skrifi na ini en buku The Early Church and the World: „Wan langa pisi ten a kerki ben bribi den denki fu den chiliast, ala di sma no ben bribi den denki moro te fu kaba, èn wan tu fu den moro pôpi skrifiman ben leri sma den denki disi.”

Fu San Ede Den No Ben Bribi a Howpu fu na Apocalyps Moro

Fu di historia e sori krinkrin taki furu, èn kande srefi moro furu fu den fositen Kresten ben howpu na ini a Dusun Yari Tiri fu Krestes di ben o tiri wan paradijs grontapu, dan fa a du kon taki sma ’no ben bribi den denki disi fu den chiliast te fu kaba’? Wan tu bun reide fu krutu den ben kon de, bika soleki fa sabiman Robert Mounce ben sori, dan „na wan sari taki furu chiliast ben go prakseri moro leki san den ben musu prakseri èn den ben frustan taki a pisi ten fu dusun yari ben o tyari ala sortu materia sani kon bogobogo èn taki a ben o satisferi den lostu fu den na wan tumusi aparti fasi.” Ma a tumusi aparti denki disi ben kan poti kon reti baka, sondro fu lasi bribi na ini a tru howpu di a Millennium e gi.

Wan trutru fruwondru sani ben de den fasi di den gensman ben gebroiki fu meki sma lasi bribi na ini a Millennium. A Dictionnaire de Théologie Catholique e taki fu Gaius, wan kerki fesiman fu Rome (na a kaba fu a di fu tu yarihondro, èn a bigin fu a di fu dri yarihondro) taki „fu man tapu a bribi di sma e bribi na ini a Millennium, dan a ben taki na wan krin fasi dati na Apocalyps [Openbaring] èn na Evangelie fu Santa Yohanes no de trutru tori di wi kan bribi”. A Dictionnaire e taki moro fara taki Dionysius, wan biskopu fu Alexandria na ini a di fu dri yarihondro, ben skrifi buweisi teige a bribi fu a Millennium, èn a „no ben draidrai fu taki dati na Apocalyps a no wan tru tori di wi kan bribi, soso fu no gi den sma di ben tan hori a bribi disi na okasi fu gebroiki na Apocalyps fu Santa Yohanes leki buweisi fu dati”. So wan ogri-ati gens teige a howpu di sma ben howpu na tapu den blesi fu a Millennium na grontapu, e sori a triki krakti di ben e wroko na tapu den theoloog fu a ten dati.

Professor Norman Cohn e skrifi na ini en buku The Pursuit of the Millennium: „Na ini a di fu dri yarihondro sma ben pruberi a fosi leisi fu meki sma lasi bribi na ini a Millennium, di Origenes, wan man di kande ben abi makti moro ala den theoloog fu a fositen Kerki, ben bigin taki fu a Kownukondre leki wan sani di no ben o feni presi trutru, ma di ben o feni presi soso na ini a sili fu sma di e bribi.” Fu di Origenes ben frutrow moro furu na tapu Griki filosofia, na presi fu frutrow na tapu Bijbel, meki a ben swaki a kefalek moi howpu di sma abi fu kisi blesi na grontapu na ondro a Kownukondre fu a Mesias, meki a kon tron wan „sani di ben pasa . . . na ini den sili fu den sma di e bribi èn wan sani di den no man frustan”. A Katolik skrifiman Léon Gry ben skrifi: „A bigi krakti di a Griki filosofia ben abi na tapu sma . . . safrisafri ben meki taki den denki fu den Chiliast ben lasi gowe.”

„Kerki Lasi En Boskopu fu Howpu”

Augustinus ben de trutru a Kerki Tata di ben du a moro bigi pisi fu moksi a Griki filosofia nanga a sani di na ini a ten fu en ben de soso wan fasi fu Krestendom. Na ini a bigin a ben de wan sma di ben horibaka fayafaya gi a Millennium, ma te fu kaba a no ben wani bribi no wan sani di ben abi fu du nanga wan Dusun Yari Tiri fu Krestes na grontapu na ini a ten di e kon. A ben gi sma a kruktu denki taki Openbaring kapitel 20 na wan agersi tori di e taki fu yeye sani.

The Catholic Encyclopedia e taki: „Te fu kaba, Augustinus ben tan hori a bribi taki no wan millennium o de. . . . A e taigi wi taki a fosi opobaka di a kapitel disi e taki fu en, e taki fu a gebore di sma sa gebore baka na yeye fasi te den e dopu; a sabadei fu wán dusun yari di e kon na baka den siksi dusun yari fu a historia, na a trutru têgo libi.” The New Encyclopædia Britannica e fruklari: „A taki di Augustinus e taki dati a millennium na wan agersitori di e taki fu yeye sani, ben tron a trutru leri fu a kerki . . . Den Protestant Hervormsma di ben hori densrefi na den gwenti fu den Luthersma, den Calvijnsma, nanga den Anglicaan . . . ben hori tranga na den prakseri fu Augustinus.” Na so fasi den memre fu den kerki fu Krestenhèit no ben abi a howpu fu a Millennium moro.

Boiti dati, soleki fa a theoloog fu Switserland, Frédéric de Rougemont e taki, dan „fu di [Augustinus] ben drai en baka gi a bribi di a ben bribi fosi na ini a dusun yari tiri, meki a ben du a Kerki wan kefalek bigi ogri. Nanga a bigi makti di en nen ben tyari, a ben gi primisi gi wan fowtu di ben puru a denki di [a Kerki] ben abi fu grontapu”. A Doisri theoloog Adolf Harnack ben agri taki fu di sma ben lasi bribi na ini a Millennium, meki dati ben puru „a relisi di [a gewoon pipel] ben frustan”, èn „wan bribi di den no ben man frustan” ben kon na a presi fu „na owruten bribi èn den owruten howpu fu den”. Den leigi kerki fu a ten disi na ini furu kondre na wan krin buweisi taki sma abi wan relisi èn wan howpu fanowdu di den kan frustan.

A Bijbel sabiman George Beasley-Murray ben skrifi na ini en buku Highlights of the Book of Revelation: „Na a wan sei, moro furu bika Augustinus ben abi so wan bigi makti na sma tapu, èn na a tra sei, bika den sekte ben kon bribi na ini a Millennium tu, meki den Katoliksma makandra nanga den Protestantsma no ben wani bribi en. Di sma ben aksi den sortu tra howpu den abi gi libisma na ini a grontapu disi, dan a trutru piki ben de: No wan howpu kwetikweti. Grontapu sa kisi pori te Krestes doro, fu meki presi gi wan têgo hemel nanga wan têgo hel pe sma sa frigiti a historia. . . . Kerki lasi en boskopu fu howpu.”

¡A Kefalek Moi Howpu fu na Apocalyps De Ete!

Yehovah Kotoigi fu den sei, e bribi taki den kefalek moi pramisi di abi fu du nanga a Millennium, sa kon tru. Di den ben interview a Fransi historia skrifiman Jean Delumeau na tapu wan Fransi telefisi programa, di ben nen „A Yari 2000: A Frede Di Sma Frede gi na Apocalyps”, dan a ben taki: „Yehovah Kotoigi abi a srefi bribi na ini a Millennium, bika den e taki dati heri esi . . . wi sa go na ini — èn den e erken taki a sa de nanga yepi fu wan rampu — wan pisi ten fu 1000 yari pe koloku sa de.”

Disi na soifri san na apostel Yohanes ben si na ini wan fisyun di a ben skrifi na ini en buku Apocalyps, noso Openbaring. A ben skrifi: „Mi ben si wan nyun hemel èn wan nyun grontapu . . . Ne mi ben yere wan tranga sten di komoto na a kownusturu, e taki: ’¡Luku! A tenti fu Gado de na libisma, èn en sa tan nanga den, èn den sa de en pipel. Èn Gado srefi sa de nanga den. Èn a sa figi puru ala watra na den ai, èn dede no sa de moro, no wan sari, no wan babari, no wan pen no sa de moro. Den fositen sani pasa kaba.’”—Openbaring 21:1, 3, 4.

Na heri grontapu Yehovah Kotoigi e du wan wroko fu leri sma a Bijbel so taki so furu sma leki a kan e kisi yepi fu bribi a howpu disi. Den sa prisiri fu yepi yu fu kon sabi moro fu en.

[Prenki na tapu bladzijde 6]

Papias ben fruklari taki a kisi a kerki leri fu a Millennium langalanga fu den sma di ben libi na ini a ten fu den apostel

[Prenki na tapu bladzijde 7]

Tertullianus ben bribi na ini a Dusun Yari Tiri fu Krestes

[Sma di abi a reti fu a prenki]

© Cliché Bibliothèque Nationale de France, Paris

[Prenki na tapu bladzijde 7]

„Fu di [Augustinus] ben drai en baka gi a bribi di a ben bribi fosi na ini a dusun-yari tiri, meki a ben du a Kerki wan kefalek bigi ogri”

[Prenki na tapu bladzijde 8]

A Paradijs grontapu di pramisi na ini na Apocalyps na wan sani di wi kan howpu fayafaya na tapu