Na millennium howpoe e wini
1. Sortoe aksi ben kon na fesi na a ten foe na kon foe na Messias?
DI NA Messias di sma ben froewakti langaten ben kon na den djoe, a ben poti krakti tapoe na fosi bribi foe den ini wan libi di e kon nanga jepi foe wan opobaka, ofoe a ben agri nanga na heiden prakseri foe den di den ben feni pas dati wan sili di no kan dede noiti de wan pisi foe libisma? Di Jezus ben poti krin leti tapoe na hemel howpoe, a ben bedoel, dati ala sma di e kisi ferloesoe, ben sa go na hemel? Ofoe den Hebrew Boekoe èn den kristen Griki Boekoe e poti gi miljoen miljoen sma na howpoe tapoe tego libi na grontapoe na den fesi?
LIBI INI NA TEN DI E KON NANGA JEPI FOE WAN OPOBAKA
2. San Jezus ben leri foe na howpoe foe libi ini na ten di e kon?
2 Jezus séker no ben leri na heiden prakseri foe wan libisma sili di no e dede noiti. Na presi foe dati, a ben sori dati na howpoe di wan sma kan abi foe libi di e kon, anga foe wan opobaka. A ben verklari: „Bikasi soleki na Tata abi libi ini ensrefi, a so a ben gi a Manpikin toe foe abi libi ini ensrefi. Èn a ben gi en makti foe kroetoe, foedi a de a Manpikin foe libisma. No froewondroe foe dati, bikasi na joeroe e kon, pe ala sma di de ini den memre-grebi, sa jere en sten èn den sa kon na doro, den di ben doe boen sani, foe kisi wan opobaka foe libi, den di doe takroe sani, foe kisi wan opobaka foe kroetoe.” — Joh. 5:26-29.
3. San son wan foe den theoloog foe na kristenheid e piki tapoe a tori foe na sili?
3 Na wan moi sani foe si dati son disiten theoloog foe na kristenheid e bigin foe anga na a prakseri dati no den Hebrew Boekoe èn no de kristen Griki Boekoe e gi krakti na a no dede noiti foe na sili foe libisma. Ini The New International Dictionary of New Testament Theology (Deel 3, 1978) foe eksempre e poti krakti „fa na OT (Owroe Testamenti) no ben sabi na prakseri foe wan sili di de aparti foe na skin, ofoe wan sili di e prati ensrefi na a dede foe na skin”. Èn sosrefi toe: „Matteus 10:28 no e leri a no dede foe na sili noiti, ma e leri a kroetoe foe Gado di no e kenki tapoe den sma di no e sori berouw . . . Na NT (Njoen Testamenti) e si na libisma leki wan wanfasi èn e pramisi na kenki foe na heri persoon, èn no soso na tan na libi foe wan pisi foe na persoon . . . wan no dede noiti foe na sili no kan de sondro wan opobaka na fesi.”
WAN HEMEL NANGA WAN GRONTAPOE HOWPOE
4. San Jehovah Kotoigi e teki, ma san den no e teki èn foe sanede?
4 Jehovah Kotoigi no e taki dati den kristen Griki Boekoe no e leri dati son kristen no e kisi na „hemel kari” (Hebr. 3:1). San den e taki no de so, de, dati Gado fosi prakseri foe meki na grontapoe tron wan paradijs èn foe foeroe en nanga wan regtvaardiki famiri-lo foe man nanga oema, e poti na wan sé nanga so wan „hemel kari”. Den no kan teki na prakseri dati ala profétitori ini den Hebrew Boekoe pe na konbaka foe na paradijs na grontapoe ben taki na fesi, tron dede letter. Den abi na tranga bribi disi moro foedi na pramisi foe wan „njoen grontapoe” pe „regtvaardiki fasi sa libi” e kisi krakti ini den kristen Griki Boekoe. — 2 Petr. 3:13; Openb. 21:1-4.
5, 6. Fa na bijbel e meki na howpoe di de toe pisi kon krin: (a) na hemel howpoe èn (b) na grontapoe howpoe?
5 Wan ernstig bijbelstudi ben tjari Jehovah Kotoigi so fara foe bribi dati na kristen bijbel howpoe de toe pisi: Na presenti foe no dede moro ini hemel gi wan pikin nomroe sma èn tego libi na grontapoe gi wan moro bigi pisi sma. Na hemel howpoe foe tiri makandra nanga Kristus „leki kownoe” e gi leki wan toemsi aparti „gnade” (Statenvertaling) ofoe „no-ferdini boen-ati” na 144.000 „sma di ben teki mindri tra sma”, foe bigin nanga den apostel èn fositen discipel foe Kristus (Luk. 12:32; Rom. 5:17; 8:33; Openb. 5:9, 10; 7:1-4; 14:1-4). Soso wantoe foe den „wan di fika” foe den sma foe na klasse disi di „de ini libi te na de-noja foe na Masra”, e libi now tapoe grontapoe. — 1 Thess. 4:14-17; Openb. 12:17.
6 Na grontapoe howpoe de a fosi howpoe di ben poti gi Adam nanga Eva te den ben tan ondro Jehovah Gado soevereiniteit èn no ben soekoe moreel onafhankelijkheid. (Loekoe den fosi dri kapitel foe Genesis) Libisoema „de foe nature foe grontapoe” (1 Kor. 15:47, The Jerusalem Bible). En natuurlek moeiti nanga lostoe de foe grontapoe. „Na hemel de foe Jehovah, ma grontapoe a ben gi na libisma pikin” (Ps. 115:16). Èn na bijbel e taki krin dati Jehovah „no ben meki na grontapoe foe soso, ma ben seti en foe sma libi na tapoe” (Jes. 45:18). Na howpoe tapoe tego libi tapoe grontapoe ini paradijs toestand de foe datede natuurlek èn akroederi na bijbel. Wan sma no abi foe firi sjen foe na howpoe disi.
NA HOWPOE TAPOE NA MILLENNIUM GI TOE GROEPOE
7. Sortoe howpoe e poti fesi den volkoe foe grontapoe nanga jepi foe na pramisi foe Abraham èn Daniël profétitori?
7 Foedi den 144.000 jeje Israëlsma de na „siri” ofoe troe „bakapikin foe Abraham” èn den „troe erfgenaam foe en pramisi” (Gal. 3:26-29, Phillips), a boen foe hori na prakseri dati ini na pramisi di ben gi na Abraham ben taki toe: „Nanga jepi foe joe siri ala naatsi foe grontapoe sa blesi densrefi troetroe” (Gen. 22:16-18). Na proféti Daniël sosrefi toe taki foe „volkoe, nationaal groepoe nanga pipel”, di tapoe den Jezus Kristus komoto foe „hemel” sa abi „na kownoekondre nanga tirimakti”. A de doe disi makandra nanga den „wan di teki na mindri trawan” di den e kari den „santawan foe na Moro-héwan”. — Dan. 7:13, 14, 27; 2 Tim. 2:10.
8. San e sori dati Paulus nanga Johannes ben froestan dati ferloesoe no de wawan gi den „wan di teki mindri tra sma”?
8 Den fositen kristen no ben de onbekenti nanga den profétitori disi pe ben taki foe toe groepoe: na „siri” èn den „naatsi”, den „santa wan” èn den „nationale groepoe”. Disi e kon na krin foe eksempre, baka di na apostel Paulus ben taki foe den sma di sa de „mede-erfgenaam nanga Kristus” èn di „makandra nanga en sa kisi grani ini hemel”, a de taki foe na libisma „mekisani”, di abi wan „faja froewakti” foe „kon fri foe na katibo foe pori”, ofoe sondoe, èn „abi na glori fri foe den pikin foe Gado” (Rom. 8:15-21). Ini na brifi di na apostel Johannes skrifi gi kristensma, di leki en ben abi na hemel howpoe, a ben taki foe Kristus leki „wan zoen-ofrandi gi wi sondoe (di foe den sma di teki mindri tra sma), ma no wawan foe wi sondoe, ma foe di foe na heri grontapoe”. — 1 Joh. 2:2; 3:1-3.
9. (a) Sortoe visioen Johannes kande séker ben si, bifosi a ben skrifi en fosi brifi? (b) Fa den visioen disi e poti krakti tapoe na de foe toe groepoe sma di sa kisi libi?
9 Di Johannes ben skrifi den wortoe dati, dan kande séker a ben kisi na Openbaring kaba, pe a ben si „wan bigi ipi, di nowan sma kan teri, foe ala naatsi èn volkoe èn tongo”, baka di a ben si den 144.000 jeje Israëlsma di ben kisi wan „ségelmarki”. Ala den sma disi e pasa libilibi na „bigi benawtoe” èn na „Lam”, Kristus Jezus, „e tjari den go na fonten foe watra foe libi” (Openb. 7:4-17). Èn a no de foe taki dati ini na srefi Openbaring dati, dati Johannes ben abi wan visioen foe na doesoen-jari regering foe Kristus, pe agen baka toe groepoe e kari: den sma di „abi prati na a fosi opobaka”, di „sa tiri leki kownoe”, èn „den sma” tapoe grontapoe, di Gado sa blesi èn di „sa de en pipel”. — Openb. 20:1-21:8.
10. Sortoe groepoe ini disi ten abi na howpoe tapoe na milennium, èn fa na nomroe foe den kan teki gersi nanga makandra?
10 Na victori howpoe tapoe a millennium e meki na ati foe den memre foe na „pikin ipi” ini disi ten, di ben kisi kari foe „sidon tapoe troon” nanga Kristus ini hemel foe tiri doesoen jari langa, djompo foe prisiri (Luk. 12:32; 22:28-30). Den memre foe na „bigi ipi” sosrefi toe, di ben moksi densrefi na den salfoe kristen fikapisi foe meki bekenti „na boen njoensoe disi foe na Kownoekondre . . . leki wan kotoigi gi ala naatsi”, ben meki na howpoe foe na millennium de na howpoe foe den (Matt. 24:14). Den toe groepoe disi ben de tapoe na fésti foe na Avondmaal tapoe 31 maart 1980. Tapoe na heri grontapoe soso 9564 sma ben gebroiki na brede nanga win; foe troe soso wantoe „fikapisi” foe den 144.000 di sa tiri makandra nanga Jezus ini en doesoen-jari kownoekondre. Ma makandra nanga den ben de 5.717.092 tra sma leki sma di ben e loekoe, sodati den ben sori waarderi gi den toemsi bigi seti di ben de mogelijk nanga na slagti-ofrandi foe en Manpikin. Den sma disi e prisiri ini na froewakti foe tego libi tapoe wan paradijs-grontapoe.
NA HOWPOE TAPOE NA MILLENNIUM DE TE NOW ETE NA LIBI!
11. Oten èn fa na howpoe tapoe na millennium e kon troe?
11 Ja, na howpoe tapoe na millennium ini disi ten te now ete no flaw na no wan fasi. Na howpoe disi sa kon troe baka na „bigi benawtoe”, te Kristus nanga den 144.000 „sma di teki mindri tra sma” bigin den doesoen-jari hemel regering èn den „bigi ipi” sma di gersi skapoe, makandra nanga miljard miljard sma foe grontapoe di opobaka foe dede, sa kisi foeroe blesi ini na grontapoe kontren foe na Messias kownoekondre. — Matt. 25:34; Openb. 20:12, 13.
12. Fa wan encyclopedie e tjari na millennium kon na fesi?
12 Na libisma-famiri abi so wan howpoe tranga fanowdoe. Sma nanga ondrofeni foe grontapoe no de onbekenti nanga na howpoe disi. Na so na millennium ini na Britannica Macropaedia (1977) e tjari kon na fesi: „Na doesoen-jari ten, di de bekenti leki na millennium, e si leki wan ten, di den faja lostoe foe libisma foe vréde, fri foe ogri èn na tirimakti foe regtvaardiki fasi tapoe grontapoe te foe kaba e kon troe nanga na makti foe Gado. . . na millenarisme e broko-ede nanga den grontapoe froewakti foe na libisma gemeenschap . . . na millenarisme e proberi foe gi piki tapoe aksi leki: San sa de na definitief kaba foe disi grontapoe? Libisma sa meki kontroe na tego dren foe libi ini wan paradijs na grontapoe, ofoe ala sma sa dede ini wan faja pori di sa kon foe den égi donfasi ofoe nanga na kroetoe foe Gado?” — Wi e poti strepi na ondro son wortoe.
13. (a) Joe e bribi dati na grontapoe sa pori ini wan „faja pori”? San de na rede foe na piki foe joe? (b) San ben de Gado fosi prakseri foe na grontapoe?
13 Gi skrifiman foe encyclopedie èn kerki fesiman sondro bribi den aksi dati de kande soso foe theoretisch waarde. Ma gi foeroe reti-ati sma ini ala kondre den aksi disi de teki na presi foe troetroe, disiten problema di de toemsi prenspari. Jehovah Kotoigi ben feni na piki ini na bijbel tapoe den aksi disi. Gi den na howpoe dati foe libi foe alaten „ini wan grontapoe paradijs” no de wan „tego dren”. Wan boen fundamenti de foe na howpoe dati, foedi a abi en roetoe ini troetroe sabi foe na bijbel. Den Hebrew èn den Griki Boekoe e sori dati Gado no sa gi pasi na ogrisma foe pori na grontapoe „ini wan faja pori” (Openb. 11:18; Jes. 45:18). Ensrefi toe no sa pori na grontapoe (Ps. 104:5). Baka di Gado ben meki na libisma èn ben poti en tapoe wan bepaalde presi tapoe grontapoe ini wan paradijs, dan Gado ben tjari kon na krin En prakseri, namkoe, dati libisma ben sa „poti grontapoe na en ondro” foe meki den paradijs toestand panja go na a heri grontapoe èn foe „foeroe na grontapoe (no pasa marki)” nanga wan regtvaardiki famiri-lo foe man nanga oema di „ben meki akroederi na prenki foe Gado”. — Gen. 1:26-28; 2:15.
14. Fa na howpoe tapoe na millennium e fiti ini Gado „tego prakseri”?
14 Disi de te now ete Gado „wani”, di sa moe pasa — nanga jepi foe en Messias kownoekondre — „ini hemel soleki na grontapoe” (Matt. 6:10). Foe na heri bijbel e kon na krin sondro foe degedege dati Gado no ben libi na fosi prakseri disi (Jes. 46:9, 10). Na millennium, ofoe na doesoen-jari regering foe Kristus e fiti ini a „tego prakseri” foe Gado, pe de na ini „foe tjari ala sani kon wàn baka ini na Kristus, den sani di de ini hemel èn den sani di de na grontapoe” (Ef. 3:11; 1:8-10). Nanga tra wortoe, na millennium foe ensrefi no de wan marki; a de na wrokosani foe doro na marki, na doe foe a fosi prakseri foe na grontapoe.
NO „WAN MATERIALISTISCH DREN”
15, 16. Fa wan katholiek priester taki foe na howpoe foe na millennium, ma san a ben frigiti leki fa a de krin?
15 Gensman foe kerki e lafoe Jehovah Kotoigi foe na préki foe den foe na howpoe tapoe na millennium. Ma ete de spotoeman disi de tevréde foe seni ala boen sma go na hemel èn ala ogrisma go na wan tego pina ini wan helfaja, sodati na grontapoe no ben sa teki poti kwet-kweti ini Gado „tego prakseri”. Na Fransi dominicaner priester H.C. Chéry, di poti ensrefi spesroetoe foe feni fowtoe na Jehovah Kotoigi, e kari na howpoe tapoe wan paradijs na grontapoe foe eksempre wan „materialistische dren”.
16 Ini na fosi presi na katholiek priester disi moe hori na prakseri dati na howpoe tapoe na millennium no ben trowe noiti formeel foe na sé foe na katholiek Kerki ofoe de leki wan falsi sani. Disi no moe froewondroe wi, foedi na howpoe disi abi en fundamenti tapoe na bijbel èn di na moro bigi pisi foe fositen „kerkitata” di den sabi moro boen e si leki „wan foe den prenspari dogma foe na kristen bribi”. Polycarpus, Papias, Irenaeus, Justinus Martyr nanga Tertullianus ben de sosrefi toe ’materialistische drenman’?
17. Foe sanede nowan sma no kan feni fowtoe na Jehovah Kotoigi foe de „materialistisch drenman”?
17 A de troe dati son wan foe den, èn sosrefi toe trawan bakaten, ben trowe na howpoe tapoe na millennium, foedi den drai den blesi foe na millennium poti na wan grontapoe fasi èn gi srefi wan sociaal-politiek drai na en. Ma nowan sma ini boen bribi kan feni fowtoe na Jehovah Kotoigi dati den e doe disi now. Srefi ini disi ten, ini wan grontapoe di lobi prisiri, den kristen disi e feti wan tranga feti ini den égi libi èn inisé den gemeente foe den tegen na lobi foe goedoe nanga prisiri. Den e poti krakti tapoe jeje waarde. Den e froestan krinkrin dati te son sma ini disi „ten foe na kaba” fadon go ini na anoe foe lobi goedoe, kande den noiti sa si na millennium (Luk. 21:34-36). Boiti dati den no abi na howpoe foe tjari na millennium kon nanga jepi foe programma foe maatschappelek kenki foe libisma. Den e libi densrefi krinkrin tapoe na kon foe Gado na mindri nanga jepi foe en Messias kownoe. „A Kownoe disi foe den Kownoe” sa tanapoe na ede foe hemel fetiman foe feti èn tjari wan kaba kon na ala ogri fasi na grontapoe. — Openb. 19:11-20:3.
NA PARADIJS — JEJE FASI ÈN LETTERLEK
18. Fa wi kan froewakti dati na jeje paradijs sa gro moro fara ini na ten foe na millennium?
18 Jehovah kotoigi e libi kaba ini wan jeje paradijs. Boiti dati den e loekoe nanga froetrow na fesi foe kisi moro jeje fasi ini a ten foe a heri 1000-jari regering foe Kristus, te agersi „boekoe-lolo” pe den marki foe Gado e kon na krin. — Openb. 20:12.
19. Foe sanede na millennium sa aksi foeroe offer foe wan sma nanga tranga wroko?
19 Foedi Jehovah Kotoigi ben lési finifini tekst di e go foe na 1000-jari regering foe Kristus (Openb. 20:11-21:8), dan den sabi toe dati na millennium sa aksi foeroe offer foe na sé foe den sma di abi wan grontapoe howpoe. Foeroe sa moe doe foe bow na grontapoe èn meki a kon moi, ma den no sa wroko nanga gridifasi gi densrefi wawan èn den égi osofamiri foe tjari paradijs-toestand kon. Kristus 1000-jari regering de foe troe wan „kroetoedé” gi den sma di e pasa libilibi na „feti foe na bigi dé foe Gado na Almaktiwan” di e kon esesi (Tori foe den Apostel 17:30, 31; Openb. 16:14, 16), a de sosrefi toe na kroetoedé gi den miljoen-miljoen dedesma di sa kisi opobaka akroederi den wroko di den sa doe ini na paradijs na grontapoe (Joh. 5:28, 29; Luk. 23:42, 43). Den boen foeroe sma disi di sa opobaka foe dede sa moe kisi sondro gridi fasi leri ini den pasi foe regtvaardiki fasi foe den sma di e libi kaba ondro na doesoen-jari regering foe na Messias. (Teki gersi Jesaja 11:1-9). Dati séker no de wan „materialistisch dren”! A sa wani taki foeroe tranga wroko, srefi tapoe jeje kontren.
20. San sa psa te den doesoen jari kon a wan kaba, nanga na froewakti foe den getrow-wan?
20 San de moro, na millennium sa de soso wan bigin. Baka wan laatste tesi, na a kaba foe den doesoen jari, dan den man nanga oema di tan getrow na Gado universele soevereiniteit sa tjari go ini tego libi tapoe wan paradijs-grontapoe. — 1 Kor. 15:24-28; Openb. 20:7-10.
WAN HOWPOE DI KAN DE FOE JOE
21, 22. (a) Foe doe san Jehovah kotoigi de klari alaten nanga prisiri? (b) Sortoe howpoe den abi foe na ten di e kon?
21 Disi de na howpoe di moro leki toe miljoen kristen kotoigi foe Jehovah abi ini moro leki 200 kondre. Na howpoe disi de a libi troetroe ini den froestan nanga ati èn de so krakti dati den de klari alaten „foe gi trawan wan rede foe na howpoe di de ini den”. — 1 Petr. 3:15.
22 Sensi 1914 a de kon na krin foe den sani di e pasa na grontapoe leki wan kontroe foe den bijbel profétitori, dati wi e libi now ini na „ten foe na kaba” èn dati na „ten foe benawtoe” di no abi en speri de krosibé kaba (Dan. 12:1-4; Matt. 24:3-21). Na fika-pisi foe den „wan di teki na mindri tra sma” nanga na „bigi ipi” mati foe den ben kisi na pramisi, dati den sa pasa libilibi na „bigi benawtoe” (Matt. 24:22; Openb. 7:9, 10, 14). Baka dati na howpoe di den toe groepoe abi tapoe na millennium, sa kon troe. Joe e bribi dati? „Meki na Gado di e gi howpoe, meki joe kon foeroe nanga ala prisiri èn vréde, foedi joe e bribi, sodati joe kan de pasa marki ini howpoe.” — Rom. 15:13.