San a buku Openbaring wani taki?
A piki fu Bijbel
A Griki nen fu a Bijbel buku Openbaring na Apokalupsis (apokalips) èn a wani taki „tyari kon na krin”. Sobun, a buku Openbaring e tyari sani kon na krin di ben de wan kibritori fosi èn a e taki fu sani di ben o pasa langa ten baka di den skrifi. Furu fu den profeititori na ini Openbaring musu kon tru ete.
San na wan tu sani na ini a buku Openbaring
A bigin.—Openbaring 1:1-9.
Boskopu fu Yesus gi den seibi gemeente.—Openbaring 1:10–3:22.
Wan fisyun fu Gado di e sidon na tapu en kownusturu na ini hemel.—Openbaring 4:1-11.
Wan heri ipi fisyun. Ibriwan fu den fisyun abi fu du tu nanga a trawan di e kon baka dati:
Seibi lakstampu.—Openbaring 5:1–8:6.
Seibi trompeti. Den lasti dri e sori taki dri bigi rampu ben o kon.—Openbaring 8:7–14:20.
Seibi komki. Ibriwan fu den komki abi wan rampu na ini di e sori taki Gado o krutu grontapu.—Openbaring 15:1–16:21.
Fisyun di e sori fa den feanti fu Gado o kisi pori.—Openbaring 17:1–20:10.
Fisyun di e sori fa Gado o blesi hemel nanga grontapu.—Openbaring 20:11–22:5.
A lasti pisi fu a buku.—Openbaring 22:6-21.
Feifi sani di kan yepi yu fu frustan a buku Openbaring
A buku abi wan bun boskopu. A no skrifi fu frede den sma di e anbegi Gado. Furu sma e denki taki a wortu „apokalips” abi fu du nanga wan bigi rampu. Ma a buku Openbaring e bigin èn e kaba nanga wortu di e sori taki sma o de koloku efu den e leisi èn e frustan a boskopu na ini, èn efu den e du san skrifi na ini.—Openbaring 1:3; 22:7.
Openbaring e gebroiki furu agersitori noso prenki di sma no musu si leki sani di e pasa trutru.—Openbaring 1:1.
Furu fu den sma noso sani di kari na ini a buku Openbaring, kari kaba na tra presi na ini Bijbel:
Yehovah: „A tru Gado na hemel” èn a Gado di meki ala sani.—Deuteronomium 4:39; Psalm 103:19; Openbaring 4:11; 15:3.
Yesus Krestes: „A Pikin Skapu fu Gado”.—Yohanes 1:29; Openbaring 5:6; 14:1.
Satan Didibri: A bigi feanti fu Gado.—Genesis 3:14, 15; Yohanes 8:44; Openbaring 12:9.
Babilon a Bigiwan: Neleki Babilon (noso Babel) fu owruten, a de wan feanti fu Yehovah Gado nanga en pipel, èn na drape na ala den lei e komoto di sma e leri na ini kerki.—Genesis 11:2-9; Yesaya 13:1, 11; Openbaring 17:4-6; 18:4, 20.
„A se”: Disi na den ogrisma di e gens Gado.—Yesaya 57:20; Openbaring 13:1; 21:1.
Sani di wi e si tu na ini a tabernakel fu owruten di sma ben e gebroiki fu anbegi Gado. Wan tu fu den sani disi na a santa kisi fu a frubontu, a grasi se (wan beki pe sma ben kan wasi), lampu, switismeri di sma e bron leki ofrandi, nanga wan altari fu tyari ofrandi.—Eksodes 25:10, 17, 18; 40:24-32; Openbaring 4:5, 6; 5:8; 8:3; 11:19.
Ogri meti: Den na prenki fu libisma regering.—Danièl 7:1-8, 17-26; Openbaring 13:2, 11; 17:3.
Nomru di a buku e gebroiki na agersi fasi.—Openbaring 1:20; 8:13; 13:18; 21:16.
Fisyun di abi fu du nanga „a dei fu Masra”. A fisyun disi e bigin na a ten di Gado Kownukondre seti na ini 1914 èn di Yesus bigin tiri leki Kownu (Openbaring 1:10). Sobun, wi kan fruwakti taki furu sani fu Openbaring o kon tru na ini wi ten.
Efu wi wani frustan a buku Openbaring, dan wi abi den srefi sani fanowdu di e yepi wi fu frustan den tra buku fu Bijbel. Wi abi a koni fu Gado fanowdu, èn sma di e frustan a buku disi kaba musu yepi wi.—Tori fu den apostel 8:26-39; Yakobus 1:5.