Yeyses libi nanga diniwroko

Den no man fu meki Yeyses kon na ini wan kepi

YEYSES gi leri na ini na tenpri èn dyonsrode a fruteri en feyanti fu kerki dri agersitori di puru na ogrifasi fu den kon a doro. Den Fariseyman ati e bron èn den e taki nanga makandra fa den kan meki a taki wan sani di den kan grabu en tapu dati. Den e meki wan konplot èn e seni den disipri fu den makandra nanga den partèyman fu Herodes fu pruberi fu meki a kon ini wan kepi.

„Leriman”, den man disi e taki, „wi sabi taki yu e taki tru èn e leri na pasi fu Gado na ini waarheid, èn yu no a bisi nanga no wan sma, bika yu no e luku san wan sma de na dorosey. Taygi unu fu dati-ede: San yu e prakseri? A de wan sani di mag fu pay caesar edemoni ofu no?

Yeyses no e meki den switi wortu fu den kisi en. A e frustan bun taki efu a taki: ’Nôno, a no de reti ofu yoysti fu pay belasting’, a ben sa meki na fowtu taki a opo ensrefi teyge Rome. Ma efu a taki: ’Iya, unu musu pay na belasting disi’, dan den dyu di e tegu fu na posisi fu den na ondro Rome, no sa wani si en na ay. Fu dati-ede a e piki: „Fu san-ede unu e tesi mi, unu hoygriman? Meki mi si wan moni di unu e pay belasting.”

Te den tyari wan gi en, a e aksi: „Suma prenki nanga skrifi disi de?”

„Caesar”, den e piki.

„Pay caesar fu dati-ede baka san de fu caesar, ma Gado san de fu Gado.”

We, te den man disi e yere na tumusi moy piki disi, den e fruwondru. Èn den e gwe èn e libi en nanga rostu.

Baka di den Fariseyman no ben man fu feni wan sani teyge Yeyses, dan den Saduseyman di e taki, taki opo-baka no de, e kon na en, den e aksi: „Leriman, Moses ben taki: ’Efu wan man dede sondro fu abi pikin, dan en brada musu trow nanga en wefi èn meki wan pikin gi en brada.’ Now yu ben abi seybi brada na wi; na fosiwan ben trow èn ben dede, èn fu di a no ben abi wan pikin, a ben libi en uma gi en brada. A ben go na a srefi fasi nanga na di fu tu nanga na di fu dri te doro ala seybi. Leki na lastiwan fu alamala na uma ben dede. Suma fu den seybi sa kisi en fu dati-ede ini na opo-baka leki uma? Bika den alamala ben abi en.”

Yeyses e piki: „A fowtu di unu e meki no de na ini disi, taki unu no sabi Buku èn na krakti fu Gado? Bika ini na opo-baka fu dede, den man no e trow èn den no gi den uma fu trow, ma den de leki engel na ini den heymel. Ma fu na sey fu den dedewan, taki den e wiki opo, yu no ben leysi na ini na buku fu Moses, ini na tori fu na makabusibusi, fa Gado taygi en: ’Mi na a Gado fu Abraham èn na Gado fu Isak èn na Gado fu Yakob’? A no de wan Gado fu den dede sma, ma fu den libiwan. Yu e meki wan bigi fowtu.”

Agen den ipi sma e fruwondru fu den piki fu Yeyses. Srefi son wan fu den koniman fu Buku e erken: „Leriman, yu ben taki bun.”

Te den Fariseyman e si taki Yeyses tapu na mofo fu den Saduseyman, dan makandra den e kon na en. Fu tesi en moro fara dan wan fu den e aksi en: „Leriman, san na a moro bigi gebod na ini na wèti?”

Yeyses e piki: „Na fosiwan de: ’Yere, o Israèl, Yehovah, wi Gado, na wán Yehovah, èn yu musu lobi Yehovah yu Gado nanga heri yu ati èn nanga heri yu sili èn nanga heri yu frustan èn nanga heri yu krakti.’ Na di fu tu de disi: ’Yu musu lobi na sma na yu sey leki yu srefi.’ No wan tra gebod de moro bigi leki disi.” Yeyses e taki moro fara srefi: „Na ala den tu gebod disi na heri Wèti èn den Profeyti e anga.”

„Leriman, yu ben taki bun na ini akruderi nanga waarheid”, na so wan fu den koniman fu Buku ben agri. „’A de Wán, èn no wan trawan de leki En’; èn na lobi disi fu en nanga heri wan sma ati èn nanga heri wan sma frustan èn nanga heri wan sma krakti èn na lobi disi fu na sma na wan sma sey leki en srefi de warti furu moro leki ala den bron-ofrandi nanga srakti-ofrandi di bun dorodoro.”

Fu di Yeyses e si taki na koniman fu Buku piki bun, meki a e taygi en: „Yu no de fara fu na kownukondre fu Gado.”

Yeyses leri now dri dey kba na ini na tenpri — sonde, munde nanga tudewroko. Den sma arki en nanga prisiri, ma den kerkifesiman di ben bruya wani fu kiri en. Mateyus 22:15-40; Markus 12:13-34; Lukas 20:20-40.

◆ Sortu konplot den Fariseyman e meki fu Yeyses kon ini wan kepi èn san ben sa de na bakapisi efu a ben piki iya ofu no?

◆ Fa Yeyses e meki so srefi den muyti fu den Fariseyman kon tron noti fu tyari en go na ini wan kepi?

◆ Sortu muyti den Fariseyman e du moro fara fu tesi Yeyses, èn fa disi e waka?

◆ Omeni dey Yeyses e gi leri ini na ten fu en lasti diniwroko na ini Yerusalen, èn sortu bakapisi disi abi?