Vrede na grontapu — San disi wani taki trutru?

NA VREDE na grontapu di Gado abi na prakseri, sa wani taki furu moro leki wan stòp fu feti nanga wapen na a heri grontapu ofu wan nucleaire dyam. Disi e kon na krin ini na fasi fa na beybri e kobroyki na wortu „vrede”.

Ini den buku fu beybri ini Hebrew tongo (na „Owru Testamenti”) fu eksenpre dan a wortu gi vrede na sja.lomʹ. Wan vorm fu na wortu disi Genesis 37:14 e kobroyki, pe na famiri-edeman Yakob e taygi en manpikin Yosef: „Luku efu yu brada de bun èn gosontu èn efu den pikin meti de bun èn gosontu, èn kon fruteri mi dan.”a Sja.lomʹ ben kobroyki agen na ini Genesis 41:16, pe den e poti en abra nanga „tanbun”.

Leki fa a beybri e sori san vrede wani taki, dan te a e go trutru fu vrede, dan a no e go soso fu stòp nanga feyantifasi, ma so srefi fu gosontu, de sondro kefar nanga tanbun. Ini wan uitgave a fesi wi ben sori taki sma no kan lusu na problema fu fa vrede musu tyari kon. Soso Yeyses Krestes, na „Vredekownu”, sa sorgu fu na lusu èn tyari trutru vrede kon na grontapu (Yesaya 9:6, 7). Luku pikinso san na beybri e taki na fesi na ini Psalm 72:7, 8 fu na tirimakti fu en: „Na ini den dey fu en na regtfardikiwan sa sproyti kon, èn vrede psa marki, te leki munkenki no de moro. Èn a sa abi onderdaan fu se te go miti se èn fu na Liba te na den uku fu grontapu.” Go prakseri disi pikinso — gosontu, de sondro kefar nanga tanbun na a heri grontapu! No wan enkri politik kruderi ben sa kan meki disi kon oyti. Soso Gado Kownukondre man fu du disi, èn a sa du moro srefi. Na profeytifasi na beybri e meki wi si wantu span pisi fu na vrede di o kon na grontapu. Meki wi go luku wantu fu den.

Na puru fu fetisani na a heri grontapu — na a fasi fu Gado!

Na ini Psalm 46:8, 9 tanapu: „Un kon, luku den wroko fu Yehovah, fa a poti fruwondru sani di psa na grontapu. A e meki feti stòp te na den uku fu grontapu. A e broko na bo èn a e naki na lansri trutru broko na pisipisi, den wagi a e bron na ini faya.” Den wortu „bo”, „lansri” nanga „wagi” e prenki ibri sortu fu fetisani ofu sani fu go na feti. Yehovah e go sobun moro fara leki fu skotu fetisani ofu srefi puru ala fetisani. A e tyari wan pori kon fu ala kernwapen, kanu, tank, lanceerinrichting, granaat, kneedbom, gon, syatumofogon — ala sani san ben sa kan de wan kefar gi na vrede na a heri grontapu!

Ma fetisani wwan no e meki feti kon. Feti moro furu e feni en bigin na ini na ogri-ati, bigi-ay ofu bun ogrifasi fu onvolmaakti libisma. (Teki gersi Yakobus 4:1-3.) Gado Kownukondre fu dati-ede sa opo du wan sani nanga na rutu fu feti, fu di a e puru den fru-akti fasi fu na persoonlijkheid na ini libisma. Fa? Nanga yepi fu wan programa fu leri sma na a heri grontapu. „Grontapu seyker sa kon furu nanga na sabi fu Yehovah, so leki den watra e furu na se tu.” — Yesaya 11:9.

Te den sma na a fasi disi kisi ’leri fu Yehovah’ dan libisma no sa si den difrenti na ini ras leki wan gron fu feti, feyantifasi ofu fu wisiwasi trawan (Yohanes 6:45). ’Gado no e teki sma partij’ èn den sma di e libi na grontapu sa sori taki a no e teki sma partij (Tori fu den Apostru 10:34). Na Kownukondre sa puru ibri okasi di kan meki nationaal feti du kon, fu di a o puru nationaal grens. ’Fu se te go miti se èn te na den uku fu grontapu’, dan ala sma sa wani èn de grantangi fu sweri taki den sa de kotrow na Krestes tirimakti. — Psalm 72:8.

So taki so wan sortu vrede sa tan, dan na Kownukondre sa tyari wan kba kon tu na a moro tranga krakti ini na historiya fu libisma di e tyari pratifasi kon: na falsi relisi (Sefanya 2:11). Libisma sa tyari kon na ini wánfasi ini na anbegi fu na wan tru Gado (Yesaya 2:2, 3). Na a heri grontapu bradafasi sa de!

Vrede na oso

Ma omeni waarde vrede na grontapu ben sa abi efu oso ben sa de kontren fu feti pe libisma doronomo e gi makandra syen, e taki hati sani ofu e tapu skreki gi makandra? Disi de now so na ini furu osofamiri. Tra osofamiri e kibri feyantifasi, di abi den rutu bun dipi, a baka wan skotu fu na tapu di den e tapu den mofo.

Tru vrede fu dati-ede musu abi na ini en so srefi na rostu na ini na oso. Na ondro na programa fu leri sma fu a Kownukondre, dan trowmasra nanga trow-uma sa kisi leri fu lobi makandra èn fu handri makandra nanga respeki (Kolose sma 3:18, 19). Pikin-nengre sa kisi leri fu ’gi yesi na den ppa nanga mma na ini ala sani’ (Kolose sma 3:20). Yu no sa abi opruru tini, di e bruya den ppa nanga mma èn e gi den broko-ede. Gi yesi sa de na markitiki, wrokomakandra na regel. A sa de wan switi èn prisiri sani fu si pikin èn abi den lontu yu.

Ekonomiya druk na ini na ten disi e meki spanning na ini na osofamiri kon moro bigi, fu di ppa nanga mma nofotron de fruplekti fu teki wan hebi lay fu grontapuwroko na tapu den. Ma ondro Krestes tirimakti osofamiri sa kon fri fu na moni lay di de leki wan hebi di e masi den — osoyuru di kon moro hey, bigi hypotheekkostu, belasting di e kren, nanga wroko di no de fu feni. Nofo wroko di e gi satisfaksi sa de. Èn no wan sma no sa abi fu de sondro wan oso. Luku pikinso fa na profeytitori na ini Yesaya 65:21-23 e meki disi kon na fesi: „Èn seyker den sa bow oso èn libi na ini . . . den no sa bow èn wan tra sma go libi na ini, den no sa prani èn wan tra sma nyan fu en. . . . Den sma di mi teki sa nyan fu na wroko fu den eygi anu dorodoro. Den no sa naki den skin fu soso, èn den no sa meki pikin nanga skreki, bika den de na bakapikin di de fu sma di kisi blesi fu Yehovah, èn den bakapikin fu den nanga den.”

Go prakseri pikinso fu libi na ini wan kontren pe san yu e si, e yere, èn e smeri no de a doti fu wan foto di e trobi yu senwe! Go prakseri pikinso fu libi tapu grun grasigron — na gron fu yu — di wroko na wan volmaakti fasi, di meki moy èn de krin. Go prakseri pikinso fu hari loktu di de krin èn soyfri èn e smeri switi, na presi fu na tranga kakofonie fu na modern libimakandra, fu yere korostu èn natuurlijk bbari. A de tru taki son sma di de koloku na wan seyker marki e prisiri kba na ini wantu fu den sani disi. Ma ondro Gado kownukondre ala sma sa prisiri na ini libi omstandigheid fu vrede. Pôti sma no sa de moro, no wan angribere sma èn no wan sma di den poti a baka. — Psalm 72:13, 14, 16.

Na beybri e pramisi moro fara: „Fu na sey fu den ogri sma, den sa koti den puru” (Odo 2:22). Dati wani taki na kba fu ogridu. Te a moro yongu pikin fu yu e go fu prey na dorosey, dan yu no abi fu broko yu ede fu sma di e luru fu kori yu pikin tyari gwe, fu oto nanga drungu chauffeur baka na stuur di e lasi a controle tapu na wagi fu den ofu fu strati bende fu yongusma di de srafu fu drugs. Den pikin fu yu sa prey na ini trutru seykerfasi, sondro kefar.

Vrede nanga tanbun fu yu srefi

Te fu kba, yu abi na pisi tori ete fu na tanbun fu yu srefi. Srefi paradeys toestand no e lekti na pen fu kanker ofu na pen fu den skrufu fu yu. Tru vrede abi fu dati-ede na ini en na puru fu siki, nanga dede. So wan sani kan? Di Yeyses Krestes ben de na grontapu, a ben sori ala ten baka taki a abi makti tapu siki fu libisma (Mateyus 8:14-17). Komoto fu na bun posisi fu en na ini heymel a sa kan du wondru na a heri grontapu! „Ini na ten dati”, na so na beybri e pramisi, „dan den ay fu den breniwan sa kon opo, èn srefi den yesi fu den dofuwan sa kon opo. Ini na ten dati na malengriwan sa kren neleki wan diya èn na tongo fu na bbawwan sa bigin wan prisiri bbari.” — Yesaya 33:24; 35:5, 6.

Ma na campagne fu Krestes teyge na pina fu libisma no sa kon na wan kba nanga disi. Na apostru Paulus e taki fu Krestes kownuwroko: „Bika a musu tiri leki kownu te leki Gado poti ala feyanti na ondro en futu. Leki lasti feyanti den sa puru dede a pasi” (1 Korente sma 15:25, 26). Disi e wani taki taki a sa tyari ala pori di dede ben tyari kon na mindri a libisma famiri fu sensi na fosi bigin, kon na wan kba. Yeyses Krestes srefi tyari kon na krin: „A yuru e kon pe ala sma di de na ini den memregrebi sa yere [Krestes] sten èn sa kon na doro” (Yohanes 5: 28, 29). Furu milyunmilyun sma di libi na ini pina èn dede, sa kisi na a fasi disi na okasi fu prisiri na ini vrede na grontapu na ini na ten di e kon.

Yu sa prisiri na ini tu? Yehovah Kotoygi e gi yu deki-ati fu leri sabi moro fu san beybri e leri na ini a tori disi.b Na fruwakti tapu vrede na grontapu na wan tumusi span sani, wan sani di de tumusi trutru, fu yu poti en na wan sey. De seyker taki efu yu e span yu srefi fu leri sabi na wortu fu Gado èn e poti en na ini yu libi, ’na Gado fu vrede sa de nanga yu’ — fu têgo! — Filipi sma 4:9.

[Foetoewortoe]

[Prenki na tapoe bladzijde 5]

Yehovah sa meki feti stòp „te na den uku fu grontapu”

[Prenki na tapoe bladzijde 6]

Trowmasra nanga trow-uma sa kisi leri fu libi ini vrede nanga makandra