Sori bribi di e tyari yu go na têgo libi
’Abi bribi, san e meki a sili tan a libi.’ — HEBREW SMA 10:39.
1. San wan katolik encyclopedie e erken fu a fasi fa na beybri e kobroyki na wortu „sili”?
NA NO wan pe a beybri e taki taki libisma abi wan sili di no e dede èn di e tan a libi te a skin dede èn e libi go doro fu têgo na ini na yeye kondre. Srefi na New Catholic Encyclopedia e erken: „Na prakseri taki na sili baka dede e libi go doro, no de makriki fu si na ini a beybri. . . . Na sili na ini a O[wru] T[estamenti] no e wani taki wan pisi fu na libisma, ma na heri libisma — na sma leki wan libilibi persoon. Na so tu a e wani taki na ini a N[yun] T[estamenti] a libisma libi: a libi fu wan aparti sma.” Sobun libisma no abi wan sili, den de wan sili.
2. (a) Pe na bribi na ini wan sili di no e dede ben feni en bigin? (b) San na a waarheid fu na toestand fu libisma baka dede?
2 So leki fa na artikel na fesi ben meki wi si, dan a bribi na ini wan sili di no e dede de wan hèyden bribi di e feni en pasi go te na a fruku historiya. Na mekiman fu en na a sma di ben taki kontrari na krin fruklari fu Gado taki libisma te a ben trangayesi ben ’sa dede seykerseyker’ (Genesis 2:17). A ben de na gensman, Satan Ddibri, di ben taki: „Unu no sa dede kwetikweti” (Genesis 3:4). Èn dati ben de wan ley (Yohanes 8:44). Baka ten Satan ben meki a leri fu na libisma sili di no e dede panya go moro fara. Ma na waarheid fu a toestand fu libisma baka dede de so leki a Wortu fu Gado, di skrifi na ondro santa yeye, e taki na ini Preykiman 9:5: „Den dedewan no sabi noti kwetikweti.” — Luku tu Rome sma 5:2.
Na howpu fu têgo libi
3. Fu sortu howpu a beybri abi furu fu taki?
3 Ala di na beybri e sori krin taki so wan sani leki wan sili di no e dede no de, toku a abi bun furu fu taki fu têgo libi. Na howpu fu libi sondro kba ben de wan fondamenti leri fu Yeyses. A ben taki: „Disi wani taki têgo libi, fu den teki doronomo sabi na ini den fu yu, na wan enkri tru Gado, èn fu en di yu ben seni kon, Yeyses Krestes” (Yohanes 17:3). Fu na sey fu den di e sori bribi na ini Gado nanga Yeyses Krestes, Yeyses ben fruklari: „Mi e gi den têgo libi” (Yohanes 10:28). Nanga trutru frutrow a ben taki: „A sma di e bribi, abi têgo libi. . . . A [sa] libi fu têgo” (Yohanes 6:47, 51). Èn a ben fruklari tu: „Gado ben lobi grontapu sote taki a ben gi en wan enkri kobore Manpikin, so taki ibriwan sma di e sori bribi ini en, no ben sa pori ma ben sa abi têgo libi.” — Yohanes 3:16.
4. San Yeyses ben taki fu a howpu fu a ten di e kon?
4 Fu di yu no abi wan sili di no e dede èn e libi doro baka dede, dan fa na beybri pramisi fu têgo libi sa kon tru? Yeyses ben fruteri moro fu disi di a ben fisiti Marta nanga Mariya baka di den brada Lasarus ben dede. A ben taygi Marta: „Mi na a opobaka èn a libi. A sma di e sori bribi ini mi, awinsi a dede, a sa libi baka.” A ben aksi Marta: „Yu e bribi disi?” A ben piki: „Iya, Masra; mi bribi taki yu na a Krestes, na Manpikin fu Gado.” — Yohanes 11:25-27.
5, 6. San Yeyses ben sori nanga na opo di a ben opo Lasarus baka?
5 Fu sori taki en, leki a Manpikin fu Gado, ben kisi makti fu wiki den dedewan kon a libi baka, meki Yeyses ben go na a grebi fu Lasarus. Lasarus ben dede fo dey kba èn a skin fu en ben bigin pori kba. Toku ete ”[Yeyses] ben bari nanga wan tranga sten: ’Lasarus kon a doro!’ A man di ben dede, ben kon a doro, en futu nanga anu domru nanga wensri èn wan duku ben tay en fesi. Yeyses ben taygi den: ’Lusu en èn meki a go’” (Yohanes 11:43, 44). Na dede man Lasarus ben tyari kon baka a libi!
6 Yeyses no ben tyari Lasarus kon baka fu heymel ofu fu wan tra pisi fu na yeye kondre. Lasarus no ben go na a yeye kondre di a ben dede, ma sondro fu a ben sabi wan sani a ben de na ini a grebi, pe ala dede sma de (Psalm 146:4; Yohanes 3:13; Tori fu den Apostru 2:34). A no ben sa de wan logisch sani fu denki taki na sili fu Lasarus di no e dede ben e nyanbun fu wan koloku libi na ini heymel èn dan ben hari puru fu heymel fu kon de wán baka nanga en onvolmaakti skin na grontapu fu libi ete wantron na ini wan grontapu di furu nanga pina, siki nanga dede. Ma fu di a no ben de na ini heymel, meki a kon a libi baka fu en ben de wan prisiri sani, bika a ben wani taki gi en fu de wantu yari moro a libi èn fu de baka nanga en lobiwan. Baka ten a ben o dede baka.
7, 8. (a) Na sortu tra okasi Yeyses ben tyari dede sma kon baka a libi? (b) Fu san-ede Yeyses ben du den wondru disi fu opo dede sma kon baka a libi?
7 Di Yeyses ben wiki wan yongu umapikin di ben dede, dan en mma nanga ppa „ben prisiri psa marki” (Markus 5:42). Toku a umapikin dati te fu kba ben dede baka. Di Yeyses ben wiki na dede manpikin fu na weduwe fu Naïn, „frede ben teki ala sma abra, èn den ben bigin gi Gado grani” (Lukas 7:16). Ma a man dati ben dede baka tu. Fu den wondru disi The New International Dictionary of New Testament Theology e piki: „Den sma di Yeyses ben opo baka na a ten fu en grontapu diniwroko ben musu dede baka, fu di den opobaka disi no ben gi den wan libi fu no dede moro.”
8 Fu san-ede Yeyses ben wiki den sma disi baka fu dede? No fu gi den na a momenti dati têgo libi, ma fu sori taki a ben de na Mesiyas èn fu sori sortu sani Gado ben gi en na makti fu du. Disi ben bow bribi na ini a howpu fu na opobaka èn têgo libi na ondro na tirimakti di e kon fu Gado heymel kownukondre ini anu fu Krestes. — Mateyus 6:9, 10; Yohanes 11:41, 42.
9. Sortu yoysti frustan fu sani Marta nanga Paulus ben abi fu na leri fu Yeyses di e go fu na howpu fu na opobaka?
9 Marta ben sabi a howpu dati fu di a ben e de nanga Yeyses, bika bifo dati a ben taygi Yeyses ini a tori fu Lasarus: „Mi sabi taki a sa opo baka ini na opobaka na a lasti dey” (Yohanes 11:24). A ben sabi taki na opobaka ben sa feni presi, no na en (Lasarus) lasti dey, ma ini a ten di o kon, „na a lasti dey” — na Krutudey, te den dedewan sa opobaka na ondro Gado Kownukondre tirimakti. Na apostru Paulus ben sabi dati tu, bika a ben taki: „[Gado] poti wan dey di a abi a prakseri fu krutu na grontapu pe libisma e libi a tapu na ini regtfardikifasi” (Tori fu den Apostru 17:31). Paulus ben taki tu: ’Wan opobaka sa de fu den regtfardikiwan èn den onregtfardikiwan’ (Tori fu den Apostru 24:15). A no ben taki taki na opobaka ben feni presi kba ma taki a ben o feni presi na ini a ten di e kon — na ondro na Kownukondre tirimakti.
10. San wan Fransi heyleriman ben taki fu den bribi-overtoygi fu na krestenhèyt fu na opobaka na a wan sey èn na a tra sey fu den leri fu na beybri?
10 Ini a buku Immortality of the Soul or Resurrection of the Dead? na Fransi anitri heyleriman Oscar Cullmann e skrifi: „Wan bigi difrenti de a mindri na kresten fruwakti fu na opobaka fu den dedewan èn a Griki bribi na ini na sili di no e dede. . . . Ala di na krestendom baka ten ben meki wan broki a mindri den tu overtoygi disi, èn ini a ten disi wan gemiddelde kresten e bruya den krinkrin, meki mi no e si no wan reyde fu kibri a tori san de gi mi èn gi moro furu fu den beybri sabiman na waarheid. . . . Wan bribi na ini wan opobaka abi tranga tapu a libi nanga denki fu na heri Nyun Testamenti. . . . Na heri libisma, di dede trutru, e tyari kon baka a libi nanga yepi fu wan nyun du fu na sey fu Gado fu meki sani.”
Opobaka — fu go pe?
11, 12. (a) San na a prakseri fu Gado nanga libisma èn na grontapu disi? (b) Fa Yeyses ben sori taki na prakseri fu Gado nanga na grontapu no kenki?
11 Di Gado ben meki libisma, a ben gi den a grontapu leki a têgo tanpe fu den èn a ben de a prakseri fu en fu furu na planeet disi nanga wan regtfardiki libisma ras (Genesis 1:26-28; Psalm 115:16). A beybri e taki fu Yehovah leki „na Setiman fu na grontapu èn na Mekiman fu en, A sma, di ben poti en steyfi, di no ben meki en soso gi noti, di ben seti en fu sma libi a tapu tu”. — Yesaya 45:18.
12 Ala di dusundusun yari fu onvolmaaktifasi nanga dede ben psa fu sensi na opruru fu libisma, toku a de te now ete na prakseri fu Gado taki grontapu sa de na têgo tanpe fu libisma: „Den regtfardikiwan sa kisi grontapu leki den gudu, èn den sa libi fu têgo a tapu” (Psalm 37:29). „Koloku den safri-ati sma de, bika den sa kisi grontapu leki den gudu” (Mateyus 5:5). Sobun di Yeyses ben tyari dede sma kon baka a libi, dan a ben wiki den baka leti dya na grontapu, èn tra sma ben herken den wantewante leki den sma di ben dede. Disi e sori taki na ondro na Kownukondre tirimakti den dedewan sa tyari kon baka na libi na grontapu fu abi na okasi fu libi fu têgo a tapu (Openbaring 20: 12, 13). Dati sa meki na prakseri fu Gado kon tru gi na libismafamiri èn gi na grontapu. — Yesaya 46:9-11; 55:11; Titus 1:1, 2.
13. Den kerki fu na krestenhèyt tanapu na fesi sortu muylek problema, èn fa den e pruberi fu lusu en?
13 Ma, fu di den kerki fu na krestenhèyt e bribi na ini a sili di no e dede, dan disi e poti den na fesi wan muylek problema: Fa den kan tyari na opobaka fu „na heri sma”, so leki Yeyses ben demonstreer disi, kon ini akruderi nanga a bribi fu den ini wan sili di no e dede èn di de kba na ini heymel ofu na ini hel? The Catholic Encyclopedia e taki: „Na di fu fo Lateraans Kerki-konmakandra e leri taki ala sma, efu Gado frukisi den ofu frudume den, ’sa opobaka nanga den eygi skin di den e tyari now nanga den’.” Na buku dati e taki moro fara: „Fu di na skin de wan patna fu na sili di du ogri, èn teki prati na den bun fu en, meki na geregtigheyt fu Gado e aksi taki a skin e teki prati ini a strafu nanga payman fu na sili.” Leki fa a bribi disi e sori, dan a skin sa tyari kon de wán nanga a sili na ini heymel ofu na ini hel. Fu o langa? „Den skin di opo fu santawan nanga sondari sa kisi libi di no e pori”, na so a buku dati e taki.
14. Fa wan jezuïet skrifiman e pruberi fu tyari sani kon a krin fu na fasi fa na krestenhèyt e si na opobaka fu na skin?
14 Na ini a buku The Future Life, fu na anu fu na jezuïet J. C. Sasia, wi e leysi: „Dati wan heymel libi sa de wan fu prisiri, e kon fu dati-ede tu fu den sani di kisi grani so leki smeri, si èn so moro fara [fu a kon de wán fu skin nanga sili].” Fu den skin di e tyari kon de wán nanga a sili fu den na ini hel, na buku dati e taki: „Na ini hel, baka na opobaka [fu na skin], dan ibri sani so leki si, yere nanga so moro fara fu na libisma skin sa abi den eygi aparti strafu . . . Na firi ofu na fasi fu sani spesrutu sa kisi pina, bika spesrutu nanga den sondu fu na skin den frudume sma ben tergi Gado. . . . A tyari kon de wán fu den nanga a skin fu den sa de wan rutu gi den fu ekstra skin-ati nanga pina.”
15. Fu san-ede a de wan kosi di wan sma e kosi Gado fu leri taki Gado e gi sma skin-ati fu têgo na ini wan hel?
15 Na teki fu dati-ede fu na hèyden leri fu na sili di no e dede ben opo gi na krestenhèyt na pasi fu teki so srefi na hèyden leri taki sili — èn srefi skin — e ondrofeni skin-ati fu têgo na ini hel. Toku Yehovah e fruklari fu na gwenti fu owruten fu na bron fu pikin leki wan ofrandi gi falsi gado: ’Den e bron den manpikin fu den na ini a faya leki heri ofrandi gi na Baäl, wan sani san mi no ben komanderi èn san mi no ben taki fu en èn san no ben opo kon na ini mi ati’ (Yeremiya 19:5). A de fu dati-ede wan sani di e kosi Gado fu leri taki Gado e gi sma skin-ati fu têgo, ala di en eygi Wortu e sori krin taki ogri sma di no abi berow sa kisi pori, èn no sa tan a libi. „Ibri sili di no e arki na Profeyti [Yeyses] dati, sa way puru krinkrin.” — Tori fu den Apostru 3:23; luku tu Mateyus 10:28; Lukas 17:27; Yohanes 3:16; 2 Petrus 2:12; Yudas 5.
Libi fu no dede moro
16. San a beybri e leri fu wan libi fu no dede moro?
16 Ma a beybri no e leri taki sma sa teki go na heymel fu abi drape wan libi fu no dede moro? Iya, dati de so. Ma disi no abi noti fu du nanga den libisma sili di no e dede. Libi fu no dede moro e kon fu disi, taki wan sma e kisi wan opobaka leki wan yeye mekisani (so leki dati ben psa nanga Yeyses) èn no fu di a abi wan sili di no e dede èn di baka dede e libi go moro fara. Na payman ini a ten di e kon fu wan libi sondro fu dede moro ben poti a fesi gi wantu kotrow sma, di gersi Krestes na ini disi èn ben sa kontru pas te Krestes ben kon na ini heymel Kownukondremakti, no wantewante baka di Krestes ben opo go na heymel ini na fosi yarihondro. — Psalm 110:1; 1 Korente sma 15:53, 54.
17. Omeni sma sa kisi wan libi sondro fu dede moro, èn sortu ròl den e prey na ini a prakseri fu Gado nanga na grontapu?
17 Boyti fu dati, a howpu dati ben poti a fesi fu relatief wantu sma fu a libismafamiri. Yeyses ben kari den sma disi wan „pikin ipi” (Lukas 12:32). A grupu disi, 144.000 ini nomru, e opobaka go kisi heymel libi leki yeye mekisani di no e dede moro fu tiri nanga Krestes na ini en heymel kownukondre abra na grontapu (2 Petrus 3:13; Openbaring 7:4; 14:1, 4; 20:4). A grontapu di den o tiri a tapu, te fu kba sa kon furu nanga sma di tyari kon de volmaakti, sondro fu degedege a sa de milyardmilyard fu den. Furu fu den sma disi sa de den sma di sa dray kon baka na grontapu ini na ’opobaka fu den regtfardikiwan èn den onregtfardikiwan’ (Tori fu den Apostru 24:15). Ma boyti den sma di e opobaka fu dede, yu sa abi trawan ete di sa kisi libi na ini na nyun grontapu. Suma na den trawan disi?
„No sa dede noyti”
18. Sortu fruwondru sani Yeyses ben taki a fesi ete, sey na opobaka fu den dedewan?
18 Ala di na seyker howpu gi den dedewan de na opobaka, dan ete wan tra moy howpu de ini wi ten. A howpu disi abi fu du nanga san Yeyses ben taki moro fara gi Marta. Baka di a ben taki: „A sma di e sori bribi na ini mi, awinsi a dede, a sa kon a libi [na ini na opobaka]”, dan Yeyses ben taki moro fara: „èn ibriwan sma di e libi èn e sori bribi na ini mi, seyker no sa dede noyti” (Yohanes 11:25, 26). Ini na lasti fruklari disi Yeyses ben taki a fesi fu wan fruwondru afersi: Wan ten ben sa kon taki sma di ben e libi na a ten dati, no ben sa abi fu dede! Ma oten dati ben o de?
19. (a) Na ini sortu pisiten na howpu fu no abi fu dede noyti ben sa kontru? (b) Fa na beybri e fruteri fu den sma di abi na howpu fu no dede noyti?
19 Now — na ten fu wi— de a pisiten di na pramisi dati sa kon tru! Ala buweysi e sori taki wi doro bun krosibey fu na kba fu na ogri grontapu disi (Mateyus 24:3-14; 2 Timoteyus 3:1-5, 13). Sma di e sori bribi ini a ten disi na ini Gado èn na ini en Manpikin abi na span howpu fu psa libilibi na kba fu na seti fu sani disi èn go libilibi na ini Gado nyun grontapu — sondro fu dede kwetikweti! Fu den sma disi Openbaring 7:9, 14 e taki fu den leki „wan bigi ipi di no wan sma ben kan teri, fu ala nâsi nanga lo èn pipri èn tongo . . . [di] komoto fu na bigi banawtu”, èn di Gado kibri psa fu di den sori bribi. Yeyses ben taki fu na pori di e kon fu na disiten ogri seti leki wan „bigi banawtu” . . . so leki fu sensi na bigin fu grontapu te now ete no ben kon, nono, no sa kon moro tu”. — Mateyus 24:21; luku tu Odo 2:21, 22; Psalm 37:10, 11, 34.
20, 21. Fa milyunmilyun sma ini a ten disi e sori bribi na ini Gado nanga Krestes, èn san furu fu den no sa abi fanowdu?
20 Na ini a heri grontapu milyunmilyun sma fu na bigi ipi di wani libi fu têgo na grontapu e sori bribi kba na ini den pramisi fu Gado èn na ini a sma di a gi a makti fu de „na opobaka èn a libi”, Yeyses Krestes. Èn den gi den srefi abra na Gado èn sori disi nanga teki dopu na ini watra (Mateyus 28:19, 20). Den e erken taki frulusu den abi fu taki tangi krinkrin na „Gado, di sdon na tapu na troon, èn na a Lam”, Yeyses Krestes. — Openbaring 7:10.
21 Den sma fu na bigi ipi di e psa na kba fu na grontapu disi libilibi, no sa abi wan opobaka fanowdu fu dede fu di ’den no sa dede noyti’! Yu e du wan sani fu de wan sma fu a grupu disi? Efu dati de so, fa disi de wan fruwondru, aparti grani di e wakti yu dan fu psa na kba fu na ogri seti fu Satan libilibi èn fu den tyari yu go na ini wan regtfardiki nyun pisiten di sa tyari volmaakti gosontu nanga têgo libi gi yu na tapu wan paradèys grontapu! (Lukas 23:43; Openbaring 21:4, 5) Fu di yu e kon sabi san a wani fu Gado de èn e tan du a wani dati, dan yu sa sori taki ’yu no de fu a sortu di e kikbak’. Yu tu ’kan abi bribi, san e meki a sili tan a libi’. — Hebrew sma 10:39; 1 Yohanes 2:15-17; Openbaring 7:15.
Aksi fu luku san wi ben leri
◻ San na a tru howpu gi den dedewan?
◻ Fu san-ede na bribi fu na krestenhèyt na ini a opobaka fu na skin de wan afrontu fu Gado?
◻ San a beybri e leri fu wan libi fu no dede moro?
◻ Sortu fruwondru howpu sma kan abi na ini a ten disi?