Libi, baka te wan sma dede — Fa, pe, o ten?
A MEKIMAN foe libisma èn Giman foe libi srefi e gi a djaranti taki te libisma dede, dan a no abi foe de so taki a libi kaba foe têgo. Boiti dati, Gado e gi wi a djaranti taki no wawan a man taki wi no e libi gi wan tra sjatoe pisi ten baka, ma taki wi e libi nanga a froewakti taki noiti moro wi sa kisi foe doe nanga dede! Na apostel Paulus ben taki en krin, ma tokoe nanga overtoigi: „A [Gado] gi ala sma wan djaranti taki di a opo en [Krestes Jesus] baka na dede.” — Tori foe den Apostel 17:31.
A no de foe taki, dati dri prenspari aksi de ete di no kisi wan piki: Fa wan dede sma kan kon na libi baka? O ten disi o pasa? Pe a njoen libi dati sa de? Na heri grontapoe, difrenti piki gi na tapoe den aksi disi, ma wan prenspari fasi foe kon sabi a waarheid foe a tori na foe froestan soifri san e pasa nanga libisma te den dede.
A dede di wan sma no man dede, na a piki?
Wan prakseri di boen foeroe sma abi na, taki ala libisma abi wan pisi di no man dede èn taki soso a skin foe den e dede. Joe moesoe foe jere so wan sani. Den e kari a pisi disi di sma e taki dati a no man dede, na difrenti fasi, soleki „sili” noso „jeje”. Den e taki, dati disi e tan na libi baka te a skin dede èn e go doro foe libi na wan tra presi. Foe troe, so wan bribi no ben kon foe bijbel. A troe, taki den fositen Hebrew sma foe bijbel ben howpoe foe libi, baka te den dede, ma no foe di wan pisi foe den di no man dede, ben o tan na libi. Nanga ala froetrow den ben howpoe foe libi baka na grontapoe na ini a tamara, nanga jepi foe a wondroe foe wan opobaka.
A famiri-edeman Abraham na wan heri boen eksempre foe wan sma di ben bribi ini wan opobaka foe den dedewan na ini a tamara. Hebrewsma 11:17-19 e froeteri wi taki Abraham ben de klariklari foe gi en manpikin Isak leki wan ofrandi: „Wi kan taki foe bribi ede Abraham ben òfer Isak, di Gado ben tesi en, . . . ma a ben hori na prakseri taki Gado ben man opo en baka srefi na dede; èn foe drape a kisi en toe na wan agersi fasi”, foe di Gado no ben aksi taki a ben moesoe gi Isak leki wan ofrandi. Foe boeweisi moro fara taki den Israèlsma ben bribi fosi taki den ben o kon na libi baka na wan tra ten (na presi taki wantewante den ben o libi go doro na wan jeje kondre), meki a profeiti Hosea ben skrifi: „Foe na anoe foe Sjeol [a grebi pe ala libisma e go] mi sa froeloesoe den; foe dede mi sa poeroe den.” — Hosea 13:14.
So boen, o ten a prakseri ben kon na ini a denki èn a bribi foe den djoe taki libisma gebore so, taki den no man dede? Na Encyclopaedia Judaica e erken taki „kande a ben de na ondro a krakti foe den Grikisma taki a leri foe a dede di a sili no man dede, ben kon ini a djoe bribi”. Ma tokoe te na a ten foe Krestes, opregti djoe ben bribi ete na ini wan opobaka na ini a tamara èn den ben howpoe na tapoe dati. Krinkrin wi kan si disi na a takimakandra di Jesus ben abi nanga Marta di Marta brada Lasarus dede: „Dati meki, Marta ben taigi Jesus: ’Masra, efoe joe ben djaso, dan mi brada no ben o dede.’ . . . Jesus ben taigi en: ’Joe brada sa opo baka.’ Marta ben taigi en: ’Mi sabi taki a sa opo baka na a opobaka na a lasti dei.’” — Johanes 11:21-24.
A situwâsi foe den dedewan
Djaso baka, wi no abi foe rai foe a tori. Na eenvoudig bijbel waarheid de taki den dedewan „de na sribi”, sondro taki den sabi wan sani, èn den kwetikweti no abi firi noso sabi. Bijbel no e pristeri so wan waarheid na wan frekti fasi di moeilek foe froestan. Loekoe den bijbeltekst disi di de makriki foe froestan: „Den libiwan sabi ete, taki den sa dede; ma foe a sei foe den dedewan, den no sabi notinoti, . . . Ala san joe anoe feni foe doe, doe dati nanga joe krakti srefi, bika no wan wroko noso prakseri noso sabi noso koni no de na ini Sjeol, a presi pe joe e go” (Preikiman 9:5, 10). „No poti oen froetrow tapoe heiheisma, noso tapoe a manpikin foe libisma na grontapoe, di abi froeloesoe. En jeje e komoto gowe, a e go baka na en gron; na a dei dati den prakseri foe lasi en gowe.” — Psalm 146:3, 4.
Foe dati ede, wi kan froestan foe san ede Jesus Krestes ben taki foe dede leki wan sribi. Na apostel Johanes e skrifi foe wan takimakandra na mindri Jesus nanga den disipel foe en: „A ben taigi den: ’Lasarus wi mati, go rostoe, ma mi e go drape foe wiki en na a sribi.’ Dati meki den disipel ben taigi en: ’Masra, efoe a go rostoe, dan a sa kon boen baka.’ Ma Jesus ben taki foe a dede foe en. Ma den ben prakseri taki a ben e taki foe wan rostoe na ini sribi. Dati meki Jesus ben taigi den krin: ’Lasarus dede.’” — Johanes 11:11-14.
A heri sma e dede
Te wan libisma e dede, dan a heri sma de ini a tori, no soso a dede di a skin dede. Soleki fa bijbel e taki krin, dan wi moesoe kon na a bosroiti taki libisma no abi wan sili di no man dede èn di kan tan na libi, baka te a skin foe en dede. Den Boekoe foe bijbel e sori krin taki wan sili kan dede. „Loekoe! Ala den sili — na foe mi den de. Soleki a sili foe a papa, so srefi a sili foe a manpikin — na foe mi den de. A sili di e sondoe, ensrefi sa dede” (Esekièl 18:4). Na no wan presi den e taki foe den wortoe „no man dede” noso „a dede di wan sma no man dede”, taki a de wan sani di libisma gebore nanga en.
A New Catholic Encyclopedia e taki toe foe a moi background disi foe den Hebrew nanga Griki wortoe di den vertaal nanga „sili” na ini bijbel: „Sili na ini na OT [Owroe Testamenti] na nepeš, na ini a NT [Njoen Testamenti] [psy·kheʹ]. . . . Nepeš e kon foe wan fosi roetoe di kande wani taki foe bro, èn na so fasi, . . . foe di bro e meki den libiwan e difrenti foe den dedewan, nepeš ben kon wani taki libi noso a sma srefi noso soso a libi foe wan sma. . . . No wan dichotomie [a prati di wan sani prati na ini toe pisi] foe skin nanga sili no de na ini na OT. Na Israèlsma ben si sani leki fa den de, leki heriheri sani, èn na so fasi a ben si libisma leki sma èn no leki sani di abi difrenti pisi. A wortoe nepeš, di vertaal nanga sili, a wortoe di wi e gebroiki gi dati, noiti wani taki sili leki wan sani di de aparti foe a skin noso a sma wawan. . . . A wortoe [psy·kheʹ] na a NT wortoe di de a srefi leki nepeš. A kan wani taki a fonten foe a libi, libi srefi, noso a libi sani.”
So boen, joe kan si taki te wan sma dede, dan a sma di ben de na libi fosi, noso a libi sili, no de moro. A skin e go baka na a „doti” noso na den pisi foe san a gron meki, efoe disi e pasa safrisafri te den e beri a skin èn baka dati a e pori gowe noso efoe a e gowe esi-esi foe di den e bron a skin. Jehovah ben taigi Adam: „Doti joe de èn na doti joe sa drai go baka” (Genesis 3:19). Dan fa libi man de, baka te wan sma dede? A de foe di Gado e memre na en eigi fasi fa a sma de di dede. Jehovah abi a wondroe makti nanga koni foe meki libisma, so taki a no abi foe froewondroe wi taki a kan hori ala den sani foe a fasi fa a sma ben libi, na ini En prakseri. Ija, ala howpoe di a sma dati kan abi foe kon na libi baka, na wan sani di Gado e bosroiti.
Disi na san a wortoe „jeje” wani taki, di sma e taki foe en taki a e drai go baka na a troe Gado di ben gi en. Te a skrifiman foe a boekoe Preikiman e taki foe a bakapisi foe disi, dan a e tjari kon na krin: „Dan a doti e drai go baka na a gron, neleki fa a ben kon, èn a jeje srefi e drai go baka na a troe Gado, di ben gi en.” — Preikiman 12:7.
Soso Gado kan meki wan sma libi. Di Gado ben meki libisma na ini Eden èn ben bro „a libibro” na ini en noso-olo, dan boiti taki Jehovah ben foeroe den fokofoko foe Adam nanga loktoe, a ben sorgoe taki a libikrakti ben gi krakti na ala den cel na ini en skin (Genesis 2:7). Foe di a libikrakti disi kan go abra foe papa nanga mama na tapoe pikin te na oema e kisi bere èn a pikin kon gebore, dan a de joisti foe taki dati wan libisma libi de foe Gado, ala di, a no de foe taki, dati disi kon toe nanga jepi foe a papa nanga mama.
Na opobaka — Wan kolokoe ten
Sma no moesoe broeja na opobaka nanga reïncarnatie, di den Santa Boekoe foe bijbel no e skrifi noti foe en. Reïncarnatie na a bribi di sma e bribi taki baka te wan sma dede, a e kon gebore baka na ini wán noso moro tra libi sani. Den e taki dati disi de na wan moro hei fasi noso wan moro lagi fasi foe libi te joe e teki en gersi a libi di a sma ben abi fosi, èn disi e anga foe sortoe libi a sma dati ben abi na ini a fosi libi dati. Akroederi a bribi disi, wan sma kan kon „gebore baka” leki wan libisma noso leki wan meti. Dati de krinkrin kontrari san bijbel e leri.
Den vertaal a wortoe „opobaka” foe a Griki wortoe a·naʹsta·sis, san troetroe wani taki „na opo di wan sma e opo tanapoe baka”. (Hebrew sma di vertaal a Grikitongo, vertaal a·naʹsta·sis nanga den Hebrew wortoe techi·yathʼ ham·me·thimʹ di wani taki „gi den dedewan libi baka”.) Na opobaka wani taki toe foe seti a fasi baka fa a sma ben libi, èn a fasi disi fa a sma ben libi de na ini a prakseri foe Gado. Akroederi a wani di Gado abi gi a sma, dan a sma e kisi wan libisma skin baka noso wan jeje skin; tokoe a tan de a sortoe sma di a ben de kaba nanga den srefi eigifasi nanga ala den sani di a ben memre ensrefi bifo a ben dede.
Ija, bijbel e taki foe toe sortoe opobaka. Wán foe den na wan opobaka di sma e kisi foe go na hemel nanga wan jeje skin; disi de gi wan pikin groepoe sma nomo, te joe e teki disi gersi tra sani. Jesus Krestes ben kisi so wan opobaka (1 Petrus 3:18). Foe bigin nanga den getrow apostel, a ben sori nanga wan groepoe sma di a ben froekisi na mindri foe den bakaman foe en di ben waka soifri na en baka, taki den ben o ondrofeni so wan sani èn a ben pramisi den: „Mi e go drape foe sreka wan presi gi oenoe. . . . Mi e kon baka èn misrefi sa teki oenoe na mi oso, so taki oenoe kan de toe pe mi de” (Johanes 14:2, 3). Bijbel e taki foe disi leki „a fosi opobaka”, a fosiwan na ini ten èn na ini posisi. Den Boekoe foe bijbel e taki foe den wan disi di e kisi so wan opobaka taki den e go libi na hemel leki priester foe Gado èn leki sma di e tiri leki kownoe makandra nanga Krestes Jesus (Openbaring 20:6). A „fosi opobaka” disi de gi wan pikin groepoe nomo, èn den Boekoe foe bijbel srefi e tjari kon na krin taki den sa teki soso 144.000 sma poeroe na mindri getrow man nanga oema. Den sa de sma di boeweisi a soifri retifasi foe den na Jehovah Gado nanga Krestes Jesus te na a dede foe den, foe di den wroko tranga foe gi trawan kotoigi foe a bribi foe den. — Openbaring 14:1, 3, 4.
Tweifri no de taki na opobaka foe den dedewan na wan ten foe kolokoe pasa marki gi den wan di kisi wan opobaka foe go libi na hemel. Ma a kolokoe no e kaba drape, bika wan pramisi de toe taki sma sa kisi wan opobaka foe libi leti djaso na grontapoe. Den sma di e opo baka sa de makandra nanga wan groepoe sma di wi no man teri, di sa pasa a kaba foa a disiten ogri seti foe sani, libilibi. Baka di na apostel Johanes ben si a pikin groepoe sma, di den feni boen foe kisi wan opobaka na hemel, dan a ben kisi wan fisjoen foe „wan bigi ipi, di no wan sma ben man teri, di komoto na ala nâsi nanga lo nanga pipel nanga tongo”. A sa de troetroe wan kolokoe ten te den miljoenmiljoen sma, èn kande miljarmiljard sma, e kon na libi baka, djaso na grontapoe! — Openbaring 7:9, 16, 17.
O ten dati sa de?
Ala prisiri nanga kolokoe ben o de wan sjatoe pisi ten nomo efoe den dedewan ben o kon baka na wan grontapoe di foeroe nanga strei, a kiri di sma e kiri makandra, a pori di den e pori grontapoe, nanga ogri di e doe nanga tranga — neleki fa a situwâsi de na ini a ten disi. Nôno, den sma di e opo baka moesoe wakti a seti di den sa seti „wan njoen grontapoe”. Prakseri nomo, wan planeiti di kon krin foe sma nanga organisâsi di te nanga now sori taki den wani pori grontapoe èn pori a moi di a moi srefisrefi, èn no frigiti a bigi sari di den tjari kon gi den sma di e libi na tapoe. — 2 Petrus 3:13; Openbaring 11:18.
A de krin, taki a ten dati a moro bigi pisi foe a libisma famiri sa kisi wan opobaka, moesoe kon ete. Tokoe a boen njoensoe de, taki disi no de so fara moro. A troe, taki disi moesoe wakti te na a kaba foe a disiten ogri seti foe sani. Ma boen foeroe boeweisi de taki a ten te a „bigi banawtoe” sa broko kon wantronso de krosibei, èn a sa abi en heimarki ini ’[na] orlokoe foe a bigi dei foe Gado na Almaktiwan’ — di sma gwenti foe kari Armagedon (Mateus 24:3-14, 21; Openbaring 16:14, 16). Disi sa poeroe ala ogridoe foe a moi planeiti disi, Grontapoe. Baka dati a Doesoen Jari Tiri foe Krestes Jesus sa kon, te grontapoe safrisafri sa tjari kon na ini wan paradijs situwâsi.
Bijbel e tjari kon na krin taki na ini a ten foe a Doesoen Jari Tiri disi, na opobaka foe libisma di dede, sa feni presi. Dan a pramisi di Jesus ben gi di a ben de na grontapoe, sa kon troe: „No froewondroe foe disi, bika a joeroe e kon pe ala sma di de na ini den memre-grebi, sa jere en sten èn sa kon na doro . . . foe go ini wan opobaka.” — Johanes 5:28, 29.
A bakapisi di na opobaka howpoe abi
A froewakti disi foe wan opobaka — wan ten pe den dedewan sa kon na libi baka — na troetroe wan toemoesi moi howpoe gi a tamara! Fa disi e gi wi deki-ati te wi e kisi foe doe nanga den froeferi sani di abi foe doe nanga na owroe di wi e kon owroe, siki, onfroewakti rampoe nanga sari, nanga den aladei kwinsi nanga problema foe libi nomo! A e poeroe a maka foe dede — a no e poeroe sari ala nanga ala, ma a e prati wi foe den wan di no abi wan howpoe gi a tamara. Na apostel Paulus ben erken taki trowstoe na a bakapisi di e kon foe na opobaka howpoe, nanga den wortoe disi: „Brada, wi no wani taki oenoe no sabi foe den wan di e sribi [na ini dede], so taki oenoe no e sari neleki fa den tra sma e doe, di no abi no wan howpoe. Bika efoe wi e bribi taki Jesus dede èn agen ben opo baka, dan a de so toe taki Gado sa tjari den wan di dede kon na en, foe di a e gebroiki Jesus.” — 1 Tesalonikasma 4:13, 14.
Kande wi ondrofeni a troetori kaba foe wan tra sani di na Owstoesei man Job ben taki: „Libisma e pori gowe neleki wan pori sani, neleki wan krosi di motoe njan. Libisma di e kon gebore foe wan oema, abi wan toe dei nomo èn a abi soso problema. A e opo kon leki wan bromki èn a e flaw; neleki wan skaduw di e hari gowe, a no e tan langa” (Job 13:28–14:2, New International Version). Wi so srefi, sabi taki libi no de seiker èn taki a tranga waarheid taki „ten nanga sani di e pasa èn di sma no ben sabi na fesi”, kan miti ibriwan foe wi (Preikiman 9:11). Wi kan de seiker, taki no wan foe wi lobi a prakseri taki a sa kisi foe doe nanga a dede di wan sma e dede. Tokoe a tranga howpoe foe wan opobaka e jepi troetroe foe poeroe a bigi frede di sma abi gi dede.
Abi deki-ati, foe dati ede! Loekoe pasa a sribi di wan sma moesoe sribi na ini dede kande, taki a kan kon na libi baka nanga a wondroe foe na opobaka. Howpoe nanga ala froetrow tapoe a froewakti di wi kan froewakti wan libi na ini a tamara di no abi kaba, èn meki a prisiri disi kon moro bigi foe di joe sabi taki so wan blesi ten no de fara moro.