Heri esi — Wan grontapu sondro pen!

A DE SO, taki wan grontapu sondro pen o kon heri esi? Fa dati ben sa de wan switi nyunsu gi den wan di doronomo e nyan pina, — efu a nyan di den e nyan pina de now na skin fasi, frustan fasi ofu emotioneel fasi! Milyunmilyun sma fu eksenpre, ben sa de koloku psa marki efu a hebi skin-ati di e kon fu son sortu fu kanker, pen fu a fesi èn na atisiki angina pictoris ben sa teki puru. Den wan di abi fu du nanga seryusu problema na frustan sei, ben sa wani kon fri sote fu a pen di nofotron yu no man taki fa a tan. Èn milyunmilyun trawan ben sa breiti srefisrefi efu wan kba ben sa kon soso na a pen fu den na emotioneel fasi, di e kon fu firi so leki frede, sari, a firi fu fowtu, broko-ede nanga mandi. Ma wi wani trutru taki wan kba kon na ala pen?

„Fu no abi pen srefisrefi na wan ranpu”, na so na anatoom Allan Basbaum fu a Universtiy of California na ini San Francisco e fruklari. Nanga bun reide a ben taki a sani disi. A pen na skinfasi de leki wan warskow di e meki wi sabi taki wan sani e psa di no bun.

Efu yu no man firi pen na skin fasi, dan a kan de trutru wan ranpu. Den e prenki disi na ini a pisi tori disi fu a tijdschrift Time: „A switi lafu fu a boi fu twarfu yari de heri tra fasi leki a fesi fu en di e gi yu sari. Den anu nanga futu fu en kon takru èn den kron, neleki a kisi rachitis. Wantu finga mankeri. Tapu wan fu den kindi a abi wan bigi soro di opo, èn den mofobuba nanga san a e lafu, a biti opo. Na ala fasi a gersi wan pikin di den fon srefisrefi . . . A ben gebore nanga wan genetis mankeri di furu sma no abi èn di e meki taki a no e firi pen. Den finga fu en masimasi ofu bron, fu di a no ben hari en anu puru fu sani di ben faya ofu di de kofarlek. Den bonyo nanga skrufu fu en malengri fu di a ben stanpu tumusi hebi na den tapu di a ben e waka ofu e lon. En kindi ben kon sweri fu di a ben kroipi tapu srapu sani di a no ben man firi. Efu a ben sa broko wan bonyo ofu ben sa meki en dyonku komoto na skrufu, dan a ben sa firi so pikinso fu disi, taki a no ben sa bari kari fu kisi yepi.”

Son sma de gaw fu gi Gado a frantiwortu fu den sortu siki disi èn fu a pina di milyunmilyun sma e ondrofeni. Ma wi kan gi Gado nanga reti a fowtu fu a ondrofeni di a libismafamiri e ondrofeni pen?

A de a fowtu fu Gado?

Sowan 6000 yari kba a libismafamiri de na ini katibo fu pen na skin fasi, frustan fasi èn emotioneel fasi. Sowan tina-neigi yarihondro psa, na apostru Paulus nanga reti ben kon si tu taki „te nanga now a heri mekisani e soktu makandra èn e nyan pina makandra” (Rome sma 8:22). Ala di someni yepisani fu tapu pen de fu bai na den dresi-wenkri nanga apteiki, èn ala di datra nanga senwedatra e du furu muiti, toku a katibo fu ala sortu pen e tan go doro. Sonwan fluku Gado srefi fu a pina di den e ondrofeni neleki fa furu yarihondro psa kba a uma fu Yob ben gi en tranga fu du so! Ma so leki fa Yob srefi ben frustan, dan so wan yeyefasi ben de wan don èn fowtu sani. — Yob 2:9, 10.

Wi no kan skoifi a frantiwortu go tapu Gado fu a pen di libisma e ondrofeni ini a ten disi. A frantiwortu didon morofuru na wan leiman di sma ai no man si èn na wi fosi ppa nanga mma. Fa so?

Den Buku fu beibri e sori taki wan yeye mekisani, di ala di a ben de regtfardiki na ini a bigin, ben meki bigi-ai fu kisi makti nanga wan prenspari posisi, gro na ini en. Na a bigin fu a libisma libi dyaso na grontapu, a ben si na en fesi kba, wan paradèisi grontapu di furu nanga sma di alamala ben e gi den srefi krinkrin ini a dini fu na Almakti Gado, Yehovah. Fu di wan ati di ben kon ogri ben pusu en, meki a yeye mekisani disi ben meki opruru nanga a Mekiman, èn ben wani kisi gi en srefi na anbegi fu libisma èn a gi di den e gi den srefi na Gado. Den ogri prakseri fu en ben sori den srefi di na wan tumusi koni fasi a ben taki wan lei. Disi, fu en sei, ben tyari sondu kon na ini grontapu.

Yehovah Gado ben fruteri a fosi libisma, Adam, taki a nyan fu a froktu fu a sabi fu bun nanga ogri ben sa abi dede leki bakapisi (Genesis 2:15-17). Ma den ben kori na uma fu Adam, Eva, fu tranga yesi Gado. A yeye bidrigiman ben kobroiki a sneki leki takiman, èn ben fruteri en: „Yu no sa dede kwetikweti. Bika Gado sabi taki na a dei di yu e nyan fu en, den ai fu unu [di fu Eva èn di fu en trow-masra] seiker sa kon opo, èn unu [alatu] seiker sa de leki Gado, sabi bun nanga ogri” (Genesis 3:1-5). Disi ben de a fosi lei, èn a ben marki a gadolowsu yeye mekisani disi leki ’a tata fu ala lei’ (Yohanes 8:44). Taki a ben kobroiki wan sneki na a okasi dati na ini a dyari fu Eden, e feni wan parallel na ini a fasi fa a beibri e meki wi kon sabi en leki „a fosi sneki, di den e kari Ddibri nanga Satan”. — Openbaring 12:9.

Sondu ben tyari soktu nanga katibo fu pen kon gi a libismafamiri. Akruderi a Wortu fu Gado dan a srefi dei ete di Adam ben sondu Gado ben leisi na dede-strafu gi den sondari. Leki fa a de na krutubangi, dan te yu luku en fu a sei fu Yehovah, dan Adam nanga Eva ben dede a dei dati. (Teki gersi Lukas 20:37, 38.) Na ini Eden, Yehovah ben fruteri a fosi uma di now ben abi sondu: „Mi sa meki a pen te yu de nanga bere kon de moro furu; nanga pen fu meki yu sa kisi pikin” (Genesis 3:16). Nanga muiti Adam ben sa sorgu gi den fanowdu fu en na skin fasi, a dorosei fu a dyari fu Eden, tapu wan grontapu di ben kenki krinkrin fu di fu a Paradeisi. Yehovah ben taki: „Ini a sweti fu yu fesi yu sa nyan brede, te leki yu drai go baka na a gron, bika fu drape den ben teki yu puru. Bika doti yu de èn na doti yu sa drai go baka” (Genesis 3:17-19). Na a fasi disi a katibo fu pen ben bigin gi a libisma geslakti.

A katibo fu pen abi sobun fu du nanga onvolmaaktifasi, sondu èn dede di wi kisi fu Adam. So leki fa a apostru Paulus ben taki fu na afersi: ’Nanga wán sma sondu kon na ini grontapu, èn nanga na sondu na dede kon èn na so dede ben panya go na ala sma fu di den alamala ben sondu’ (Rome sma 5:12). Ma na wortu fu Gado e yepi wi fu frudrage pen, fu di a e fruteri wi fu san-ede Yehovah gi pasi taki pen de èn a e gi wi a seikerfasi taki heri-esi a sa kon na wan kba. Gado ben gi pasi taki a „ppa fu lei”, di furu nanga triki, Satan Ddibri, ben kwinsi Yob, èn ben tesi na so fasi en soifri-retifasi. Ddibri ben taki taki Yob ben anbegi Gado fu gridi ede, èn no fu lobi ede. (Yob 1:8-12). Ma Yob ben tan kotrow na Gado, èn ben sori taki onvolmaakti sma kan dini en fu lobi ede èn kan hori Gado soevereiniteit hei, awasi den bribi fu den e kisi hebi tesi. A hori di Yob ben horidoro leki wan sma di e kibri en soifri-retifasi, ben yepi fu regtfardiki a nen fu Yehovah, a ben buweisi taki Satan na wan leiman èn a ben tyari bigi pai gi a famiri-edeman dati di ben de leki wan eksenpre (Yob 42:12-17; Yakobus 5:11). Fu a ondrofenitori fu Yob, wi kan kon na a bosroiti taki te a prakseri fu Gado kontru, a katibo fu pen gi a libismafamiri sa kon na wan kba. Ma fu san-ede wi kan de seiker fu dati?

Fa pen sa kon na wan kba

Fu taki en leti, Yehovah sorgu gi wan yepisani di bun dorodoro fu meki wan kba kon na a katibo fu pen di libisma de na ini. Disi a du tapu a gron fu a frulusu-paiman fu en Manpikin, Yeises Krestes. Yeises na „a Lam fu Gado di e teki a sondu fu grontapu gowe” (Yohanes 1:29). A ben kon na grontapu „no fu sma dini en, ma fu dini sma èn fu gi en sili [en volmaakti libisma libi] leki wan frulusu-paiman ini a presi fu furu sma” (Mateyus 20:28). Fu di Adam ben tranga-yesi, meki a ben lasi a volmaakti libisma libi, nanga ala en reti nanga fruwakti di e kon nanga dati. Èn dati de now precies a sani di a frulusu-paiman fu Yeises e bai kon baka (1 Timoteyus 2:5, 6; Hebrew sma 7:26). Iya, Gado ben lobi a grontapu [fu libisma] sote, taki a gi en wan enkri gebore Manpikin, so taki ibriwan sma di e sori bribi na ini en, no ben sa kisi pori, ma ben sa abi têgo libi”. — Yohanes 3:16.

Gado pramisi aparti tu taki wan kba sa kon na a katibo fu pen. Di a kresten apostru Yohanes ben taki na fesi fu wan ten, pe pen di abi fu du nanga sondu no ben sa de moro, dan a yeye fu Gado ben buweigi en fu skrifi:

„Mi ben si wan nyun hemel nanga wan nyun grontapu; bika a fosi hemel nanga a fosi grontapu ben psa gwe, èn a se no de moro. . . . Mi ben yere wan tranga sten, di komoto fu a kownusturu, taki: ’Luku! A tenti fu Gado de nanga libisma, èn en sa libi na den, èn den sa de den pipri fu en. Èn Gado srefi sa de nanga den. Èn a sa figi puru ala watra na den ai, èn dede no sa de moro, nowan row, nowan bbari, nowan pen sa de moro. Den fosi sani psa gwe.’ Èn A Sma di ben sidon tapu a kownusturu [Yehovah Gado], ben taki: ’Luku! Mi e meki ala sani kon nyun.’ A e taki tu: ’Skrifi, bika den wortu disi de kotrow èn tru.’” — Openbaring 21:1-5.

Heri esi den sma di e gi yesi sa nyanbun dorodoro fu a frulusu-paiman fu Yeises. Disi sa psa ondro na tirimakti fu a Kownukondre di den opregtiwan begi bun langa kba fu en nanga den wortu: „Wi Tata na ini hemel, Yu nen musu kon santa. Yu Kownukondre musu kon. Yu wani musu psa, so leki na ini hemel, so tu na grontapu” (Mateyus 6:9, 10). Yeises Krestes sa tiri na ini a hemel kownukondre te leki a poti ala feyanti na ondro en futu, makandra nanga a katibo fu pen, nanga dede leki a lasti feyanti. — 1 Korente sma 15:25, 26.

Iya, ini a kofal fu den sma di e gi yesi, Gado sa figi puru heri esi ’ala watra na den ai, èn dede, row, bbari no sa de moro’ (Openbaring 21:4). Dan den profeiti wortu di e kon now èn di ini a ten disi kan kobroiki na yeyefasi, sa kon tru so srefi na wan trutru fasi: „Blesi Yehovah, ow mi sili, . . . en di e gi yu pardon fu ala yu fowtu, di e dresi ala yu siki.” Nowan sma di e libi drape sa taki: ’Mi e siki’” — Psalm 103:1-3; Yesaya 33:24.

Oten wan kba sa kon na pen?

A kba fu a katibo fu pen de krosibei e kon. Iya a sa kon na ini wi ten, èn a libisma geslakti fu a ten disi sa si en. Fu a kontru fu beibri profeititori e kon na krin taki wi e libi na a kba fu a ogri seti fu sani disi. Den orloku, angriten nanga gronseki di no abi den speri, èn so srefi a preiki fu a bun nyunsu di Yehovah Kotoigi e preiki na a heri grontapu, de wan pisi fu wan „marki” di abi difrenti pisi na ini en èn di e go fu a „denoya” di sma ai no kan si fu Yeises na ini hemel Kownukondre glori. — Mateyus 24:3-14, 21, 34.

Heri esi „a fosi hemel nanga a fosi grontapu”, a seti fu sani fu Satan di orga èn en strokturu fu tiri sani, sa psa gwe. Na krasi „se” fu a ogri libismafamiri no sa de moro. Fu dati-ede wi de na a doromofo fu wan „nyun hemel” di Gado blesi èn di sa tiri „wan nyun grontapu”, wan regtfardiki libimakandra. Na ini disi „regtfardikifasi sa de”. — Openbaring 21:1; 2 Petrus 3:13.

Abi deki-ati, now di den sortu blesi disi na ondro wan nyun tiri — Gado Kownukondre — de so krosibei. Teki moro sabi fu a nyun grontapu sondro pen nanga dede. Iya, luku go now na a blesi dei di de so krosibei, te ala sma di lobi Yehovah èn e gi en yesi, sa libi na ini wan grontapu sondro pen.