Libi baka dede — Den aksi sondro piki
„EFU wan tranga man na skinfasi dede, a kan libi baka?” (Yob 14:14) Na aksi disi di a famiri-edeman Yob ben aksi hondrohondro yari psa kaba, poti sma fu ibri libimakandra na prakseri ini den yarihondro di psa èn wan heri ipi piki tyari kon na fesi.
Den Griki sma fu owruten ben taki taki den sili fu den dedewan ben e libi doro. Nanga wan boto den ben poti den abra na liba Styx go na wan bigi kondre na ondrogron, di ben nen ondrogron grontapu. Drape den krutuman ben krutu den sili fu kisi skin-ati na ini wan strafu-oso di ben lontu nanga hei skotu ofu fu abi koloku na ini den Elysium gron. Tra pipri fu owruten ben denki taki den sili ben tron stari ofu komeet. Trawan baka ben prakseri taki den sili ben de sani di e gi leti èn ben hari go na a munkenki; ibri mun te a mun ben kon furu, dan den ben tyari den go abra na a son.
Na ini a ten disi wan heri ipi theorie de ete fu wan libi baka dede. Den hindu nanga den Buddha sma e bribi na ini reïncarnatie ofu a nasi di a sili e nasi. Den muslim e leri taki baka te a skin dede, a sili e libi go doro èn na a lasti krutu a e go na a paradèis ofu na hèl. A moro bigi pisi fu den Anitri sma kisi a leri taki a sili e libi go doro baka dede fu kisi koloku na ini hemel ofu skin-ati na ini den flam fu hèl. Na lomsu leri e poti limbo nanga vagevuur ete a tapu ini disi.
Na ini son kondre a e sori leki den fasi fa den relisi e denki fu a sokari sili fu den dedewan de wan sortu moksi-morion fu gwenti fu kondre èn fu a presi pe yu e libi nanga na krestendom ini nen. Na ini West-Afrika fu eksenpre, a de a gwenti a mindri furu lomsu sma nanga anitri sma fu tapu ala spigri te wan sma dede, so taki no wan sma kan luku èn si a yeye fu a dedewan. Fotenti dei baka na dede fu wan sma dan den famiriman nanga mati e hori fesa fu memre na opo di a sili opo go na hemel. Baka dati, dan a gwenti de taki na a dei fu kresneti ofu nyunyari, den krosibei famiri e fisiti na beripe èn e kanti sopi tapu a grebi. Den e taki srefi nanga den dedewan, e aksi den wan bun èn e fruteri nyunsu fu a famiri.
A makriki fu si taki den relisi fu grontapu e agri pikinso nomo nanga den srefi fu na aksi san e psa trutru baka dede. Toku na a heri grontapu sma e agri nanga wán fondamenti fruklari: a dede di a libisma sili no e dede. A moro bigi pisi fu den leri fu libi baka dede de soso wan tra fasi fu luku na fondamenti thema disi.
Toku wantu fruferi aksi e opo ede kon: Fu taki leti, pe na prakseri komoto taki a sili e libi doro? Buku e leri en? Efu dati de so, fu san-ede dan no-kresten bribi e leri disi? Den aksi disi a no aksi di yu kan poti na wan sei sondro fu abi bisi nanga den? Awasi sortu relisi yu abi tu, dede na wan trutru sani di yu e kon tanapu na en fesi. Na afersi abi sobun furu fu du nanga yu srefi. Fu dati-ede wi e kari yu fu ondrosuku den afersi disi nanga wan frustan di opo.