Sortu Gado yu musu anbegi?

INI NA fosi presi, suma na a wán Gado di sma musu anbegi en wawan? Beibri e piki tapu disi na wan tumusi krin fasi. Na buku Openbaring e taki: „Yu, Yehovah, iya wi Gado, de warti fu kisi na glori nanga grani èn na krakti, bika yu meki ala sani èn fu yu wani ede meki den de èn den ben du kon” (Openbaring 4:11). Iya, Yehovah, na Mekiman, na a wan enkri Gado di e frudini wi anbegi. Fu san-ede? Dyonsro wi sa kon tapu na aksi disi baka. Ma meki wi taki fosi, fu den tra gado di libisma e anbegi.

Baka ala den falsi gado

Aladi libisma e dini furu gado, toku na waarheid de taki ala anbegi di sma e gi na ala den gado ini ala den kondre — boiti na anbegi di e gi na Yehovah, na Mekiman — e dini den prakseri fu soso wán gado. Na sortu fasi? Leisi den wortu fu Paulus gi den kresten na ini Korente. Ini na foto dati den ben anbegi furu gado, fu na yayo Aphrodite, te doro na Aesculapius, na gado fu den fu a koni fu dresi sma. Ma Paulus ben sori, taki a ben de so, taki soso wán ogri-ati krakti ben de baka ala den gado disi. A ben skrifi: „Den sani di den nâsi e tyari leki ofrandi, den e tyari dati leki ofrandi gi den ogri yeye èn no gi Gado” (1 Korente sma 10:20). Iya, den Korente sma di ben de hèiden ben anbegi ogri yeye.

Den ogri yeye ben abi den bigin na ini opruru di den ben meki. Na fosiwan èn na moro bigiwan fu den ben de na engel mekisani di ben kori Eva fu psa Gado wet na ini na dyari fu Eden (Genesis 3:1-6; Yohanes 8:44). Fu di a du disi, dan na mekisani disi meki opruru nanga na soevereiniteit fu na Mekiman. Bakadati, den kon kari en Satan, san wani taki „Gensman”. Bakaten, tra yeye mekisani go makandra nanga en ini na opruru kontrari Gado. Den tu ben tron ogri yeye, èn den ben kon sabi Satan leki na „tiriman fu den ogri yeye” (Mateyus 12:24, 26). Ini na buku Openbaring den e kari den ogri yeye disi „engel” fu Satan (Openbaring 12:7). Sobun na anbegi di sma e anbegi den ogri yeye de na srefi leki na anbegi di den e anbegi Satan.

Satan abi wan bigi krakti na tapu sma. Na apostru Yohanes e taki taki „na heri grontapu” de ini na makti fu en, èn Paulus ben kari en, „na gado fu na seti fu sani disi” (1 Yohanes 5:19; 2 Korente sma 4:4). Fu dati-ede, efu wan sma anbegi na wan ofu tra gado aparti fu Yehovah, dan a wani taki trutru taki a e anbegi Satan. Awasi fa no fa, a e dini den prakseri fu Satan bikasi a de na marki fu en fu kori den pikin fu Adam nanga Eva, fu opo den srefi kontrari Yehovah. Fu di Satan e „kori na heri grontapu pe sma e libi”, dan a de krin taki a ben abi bun bakapisi na ini moro furu kofal (Openbaring 12:9). Ma no ini ala kofal. Toku milyunmilyun sma de di e du muiti fu anbegi Yehovah. Fu san-ede?

Den froktu fu fowtu anbegi

Wan reide de, taki den sabi taki na anbegi fu tra gado boiti Yehovah, e kostu moro leki den wani fu pai. Doti di archeoloogman diki puru na ini Noord-Afrika na ini Kartago fu owruten, ben meki wan beripe fu pikin-nengre kon de fu si. Yu ben abi na ini den dede bonyo fu yonguwan di den ben òfer gi a Phoenisi gado Baal. Pikin-nengre ofrandi ben de na ogri prèis di den sma fu Kartago ben musu pai fu na anbegi fu Baal. Katolik bribi fu den Mindri Yarihondro ben aksi wan prèis tu di a ben tyari tumusi ogri pina kon na ini den Kruistocht pe furu brudu ben fadon èn den ogri Inquisitie. Na anbegi fu na gado fu den Inka ini pre-Columbia-Amerika ben abi na ini en na ritueel kerki gwenti fu a kiri fu dusundusun sma.

Ini moro modern ten, difrenti fasi fu anbegi ben abi fu du nanga bigi srakti fu sma na ini India, èn den ben tyari bigi politiek problema kon na ini Midden Oosten nanga Noord-Ierland. Donfasi, kruktu bribi, nanga frede, de so srefi wan pisi fu na prèis di libisma pai fu a gi fu anbegi na den furu gado fu den.

Fu san-ede yu musu dini Yehovah Gado?

Na a tra sei, na anbegi fu Yehovah e tyari soso winimarki kon. Wan reide de taki a de „na Sma di e libi fu têgo alaten, di ben meki hemel èn ala sani di de na ini èn grontapu èn ala sani di de na en tapu èn na se èn ala sani di de na ini” (Openbaring 10:6). Sobun wi musu anbegi en bika en na wi Mekiman.

Moro fara, wi musu anbegi Yehovah Gado fu di den eigifasi fu en e kari wi kon fu anbegi en. Na apostru Yohanes ben taki taki „Gado na lobi” (1 Yohanes 4:8). Na kotrow man Yob ben taki taki „[Gado] koni na ini ati èn tranga na ini makti” (Yob 9:4). Moses ben singi fu en: „Na Stonbergi, volmaakti na ini en wroko, bika ala en pasi na geregtigheid. Wan Gado fu kotrowfasi di kruktudu no de na en; regtfardiki èn opregti a de” (Deuteronomium 32:4). Suma kan draidrai dan fu dini so wan Gado?

Boiti fu dati, beibri e taki: „Na gi di wi e gi wi srefi na a dini fu Gado de bun gi ala sani, fu di a abi wan pramisi na ini en fu a disiten libi èn a libi di e kon” (1 Timoteyus 4:8). Fa disi de tru! Yehovah wani san bun gi na libismafamiri. A ben meki grontapu leki wan moi oso gi den mekisani fu en, èn a ben meki sani psa marki so taki libi ben sa de wan sani fu abi prisiri. Gado ben go doro fu horibaka gi a libi na a grontapu disi, awasi libisma ben opo den srefi kontrari en, fu di a ben gi libisma den fanowdu na skinfasi bika „a e meki son opo gi den ogri èn bun sma èn a e meki alen kon tapu den regtfardiki nanga den onregtfardiki sma.”—Mateyus 5:45.

Ma na „pramisi fu na disiten libi” e go moro fara. Dini Gado e gi tevredefasi nanga satisfaksi. Dati na a reide fu san-ede Gado meki wi. Èn Gado e yepi den wan di e dini en kotrow fu meki a libi fu den waka bun. Nanga yepi fu beibri a e sori fa sma di no trow, sma di trow, pikin — sma ini ala fasi fu na libi musu libi. A e gi koni di de fu frutrow èn di de praktis fu yepi sma ini ala situwâsi so taki wi kan lusu den problema ini na libi leki onvolmaakti libisma ini wan grontapu di de ondro na krakti fu Satan. Efu wi e anbegi Gado na wan fasi di e prisi en, dan wi kan nyanbun fu „na vrede fu Gado di e psa ala prakseri.” — Filipi sma 4:7.

Wan moi sani fu si tu, na a „pramisi fu a libi . . . di e kon”. Yeises ben fruteri na Fariseiman Nikodemus: „Gado ben lobi grontapu so te taki a ben gi en wan enkri gebore Manpikin, so taki ibriwan sma di sori bribi na ini en, no ben sa go pori, ma ben sa abi têgo libi” (Yohanes 3:16). Têgo libi! Sortu gado leki Yehovah wawan kan pramisi so wan sani èn dan meki na pramisi fu en kon tru? Fu na toestand fu den wan di e kisi na bigi presenti dati te fu kba, den e skrifi fu en na ini Openbaring: „[Gado] sa figi puru ala watra na den ai, èn dede no sa de moro, no wan krei, no wan babari, no wan pen no sa de moro. Den fosi sani psa kba” (Openbaring 21:4, 5). Fu tru, den sani di wi e fruwakti na ini na libi di e kon musu meki unu wani fu dini Yehovah!

Sortu Gado, wi musu anbegi dan? Soso Yehovah, na Mekiman. Fu ala den gado di de, dan soso gi Yehovah wawan den wortu e fiti: „Bigi èn wondrufasi den wortu fu yu de, Yehovah Gado, na Almaktiwan. Regtfardiki nanga tru yu pasi de, kownu fu têgo ten. Osuma no sa frede yu trutru, Yehovah, èn prèise yu nen, bikasi yu wawan de loyaal. Bikasi ala nâsi sa kon èn anbegi na yu fesi, bika yu regtfardiki bosroiti ben tyari kon na krin” (Openbaring 15:3, 4). O koni den wan de di e handri akruderi den frumane fu na psalm singiman: „O kon, meki wi anbegi èn boigi, meki wi kindi fesi Yehovah , wi Mekiman!”—Psalm 95:6.

[Prenki na tapoe bladzijde 6]

Sonwan fu den gado di Satan ben meki na libismafamiri anbegi

[Prenki na tapoe bladzijde 7]

Den sani di wi e fruwakti ini na libi di e kon, musu meki wi wani fu dini Yehovah