Soekoe den sma di abi na joisti jejefasi gi a têgo libi
„Ala den sma di ben abi na joisti jejefasi gi a têgo libi, ben tron bribiman.” — TORI FOE DEN APOSTEL 13:48.
1. Sortoe koni Jehovah abi ini na tori foe na libisma ati?
JEHOVAH GADO kan leisi na ati. Disi ben kon a krin di na profeiti Samuèl ben go foe salfoe wan manpikin foe Isaï leki kownoe foe Israèl. Di a ben si Eliab, Samuèl „ben taki wante: ’Foe troe, na salfoewan foe Jehovah tanapoe na en fesi.’ Ma Jehovah ben taigi Samuèl: „No loekoe fa a tan na dorosei èn na a hipsi postiri foe en, bikasi mi trowe en. Bika, a no fa sma e si sani, Gado e si sani, bikasi sma e si soso san e kon na fesi den ai; ma foe na sei foe Jehovah, a e si san na ati de.’” Ini akroederi nanga dati, dan Samuèl ben kisi na komando foe salfoe David, di ben sori taki a ’de wan prisiri gi na ati foe Gado.’ — 1 Samuèl 13:13, 14; 16:4-13.
2. San roetoe na ini na agersi ati foe wan sma, èn san wi e leisi so boen foe disi na ini den boekoe?
2 Wan sma e sori wan bepaalde jejefasi di de moro foe si. A abi wan spesroetoe fasi di roetoe ini na agersi ati foe en (Mateus 12:34, 35; 15:18-20). Na so wi e leisi foe wan sma di „na ati foe en lobi feti” (Psalm 55:21). Bijbel e froeteri wi taki „ibriwan sma di lobi foe kisi atibron e doe foeroe sondoe.” Èn wi e leisi: „Mati de di lobi foe broko makandra na pisipisi, ma wan mati de di tai hori moro krosibei leki wan brada” (Odo 18:24; 29:22). Kolokoe, taki foeroe sma e sori taki den de leki son heiden ini a fosi Antiokia na ini Pisidia. Di den ben jere foe den seti foe froeloesoe foe Jehovah, „den ben bigin foe prisiri èn foe gi na wortoe foe Jehovah glori, èn ala den sma di ben abi na joisti jejefasi gi a têgo libi, ben tron bribiman.” — Tori foe den Apostel 13:44-48.
Bribiman de „soifri ini ati”
3, 4. (a) Soema na den wan di soifri ini ati? (b) Fa den wan di soifri ini ati e si Gado?
3 Den bribiman dati na ini Antiokia ben tron dopoe kresten, èn den kotrow-wan a mindri den ben kan tjari den wortoe foe Jesus na tapoe den srefi: „Kolokoe den sma de di de soifri ini ati, foedi den sa si Gado” (Mateus 5:8). Ma soema na den „sma di de soifri ini ati”? Èn fa den e „si Gado”?
4 Den sma di de soifri ini ati de krin na inisei. Den abi warderi, firi, lostoe, nanga boeweigi foe ati di de soifri (1 Timoteus 1:5). Den e si Gado now ini na fasi disi taki den e si a e handri foe na boen foe sma di e kibri den soifri retifasi. (Teki gersi Exodus 33:20; Job 19:26; 42:5.) Na Griki wortoe di den ben poti abra djaso nanga „si” wani taki so srefi „foe si nanga na froestan, foe si, foe sabi.” Foedi Jesus ben sori ini en libi na sma di Gado de (persoonlijkheid foe Gado) na wan volmaakti fasi, dan inzicht ini na sma dati di Gado de, na foe den „sma di de soifri ini ati”, di e sori bribi ini Krestes èn ini na ofrandi foe en di e verzoen sondoe, e kisi pardon foe den sondoe foe den, èn di man foe anbegi Gado na wan fasi di a e teki (Johanes 14:7-9; Efeise sma 1:7). Gi den salfoewan, a si foe Gado e doro en heimarki te den e wiki poeroe komoto foe na dede foe go ini hemel, pe den sa si Gado nanga Krestes troetroe (2 Korente sma 1:21, 22; 1 Johanes 3:2). Ma foe si Gado nanga jepi foe soifri sabi èn troe anbegi na wan sani di kan gi ala sma di de soifri ini ati (Psalm 24:3, 4; 1 Johanes 3:6; 3 Johanes 11). Den abi na joisti jejefasi gi têgo libi na ini hemel ofoe a tapoe na paradijs grontapoe. — Lukas 23:43; 1 Korente sma 15:50-57; 1 Petrus 1:3-5.
5. Fa wawan wan sma kan tron wan bribiman èn troe bakaman foe Jesus Krestes?
5 Den wan di no abi na joisti jejefasi gi a têgo libi no sa tron bribi sma. Den no man sori bribi (2 Tesalonika sma 3:2). Boiti foe dati, no wan sma kan tron wan troe bakaman foe Jesus Krestes efoe a no wani den gi en leri èn Jehovah, di e si fa na ati de, e hari na sma dati (Johanes 6:41-47). A no de foe taki, taki ini na oso-foe-oso preikiwroko, Jehovah Kotoigi no e kroetoe no wan sma na fesi. Den no kan leisi den ati, ma e libi na bakapisi na ini den lobi anoe foe Gado.
6. (a) San den taki foe persoonlijk kontakti ini na oso-foe-oso diniwroko? (b) Sortoe sani ben seti foe jepi Jehovah Kotoigi foe feni den sma di abi na joisti jejefasi gi a têgo libi?
6 Wan bijbel sabiman ben taki nanga reti: „[Paulus] ben gi leri foe na waarheid na publiki èn oso foe oso. No wawan foe na podium ma ini kontakti di en srefi ben abi nanga aparti sma a ben preiki Krestes. Nofotron a go na a sma joe srefi abi foeroe moro boen bakapisi leki iniwan tra methode ofoe fasi foe miti sili” (August Van Rijn). Den sortoe publikâsi leki Handleidingboekoe gi a Teokrasia Diniwrokoskoro, Taki-go-taki-kon nanga jepi foe den Boekoe (Bakratongo), èn Wi Kownoekondredienst, e jepi Jehovah Kotoigi foe hori lezing èn foe gebroiki persoonlijk kontakti di den abi ini a velddienstwroko foe den moro boen. Den demonstrâsi foe a Dienstkonmakandra èn rai foe a Teokrasia Diniwrokoskoro na wan jepi toe. Den wan di e fisiti na skoro e kisi warti leri na ini den fasi foe taki so leki boen inleiding, joisti gebroiki foe den Boekoe, logis fasi foe bow na lezing, boeweisi di e gi overtoigi, gebroiki foe agersitori, nanga bosroiti di abi boen bakapisi. Meki wi si fa na bijbel e meki den instruktie disi kon moro foeroe, di kan meki na pipel foe Gado kon abi moro boen bakapisi te den e soekoe den sma di abi na joisti jejefasi gi a têgo libi.
Den inleiding di e dwengi sma foe prakseri
7. San den fosi wortoe foe na Bergipreiki foe Jesus e leri sma foe den inleiding?
7 Den sma di e sreka den srefi foe na oso-foe-oso wroko, kan leri foe na eksempel foe Jesus wan sani foe den inleiding di e wiki na belangstelling. Ini na bigin foe na Bergipreiki foe en, a ben gebroiki na wortoe „kolokoe” neigi tron. Foe eksempel, a ben taki: „Kolokoe den wan de di sabi den jeje nowtoe, bika na kownoekondre foe hemel na foe den. . . . Kolokoe den safri-ati sma de, bika den sa kisi na grontapoe leki den porsi” (Mateus 5:3-12). Den prakserilin go leti tapoe a tori èn ben de krin. Èn den inleiding dati seiker ben wiki belangstelling èn ben meki den arkiman foe en firi taki den de na ini a tori, bika soema no wani de kolokoe?
8. Fa wan tori foe takimakandra moesoe bigin ini na oso-foe-oso diniwroko?
8 Ibri tori foe takimakandra di ben gebroiki na ini na oso-foe-oso diniwroko moesoe bigin na wan positief, èn prisiri fasi. Ma no wan sma moesoe gebroiki inleiding di e seki sma, so leki, „Mi abi wan boskopoe gi joe di kon foe dorosei foe na grontapoe foe wi.” Na boen njoensoe abi en fonten na ini hemel, ma den inleiding disi kan meki na ososma aksi en srefi efoe a moesoe teki na Kotoigi serjoesoe ofoe moesoe seni en gowe so esi leki a kan.
Handri na wortoe foe Gado joisti
9. (a) Fa sma moesoe bigin taki foe den tekst, leisi den, èn gebroiki den ini na diniwroko? (b) Sortoe eksempel kari foe sori fa Jesus ben gebroiki aksi?
9 Na ini a velddienst, èn so srefi na tapoe a podium, joisti inleiding moesoe gebroiki gi den tekst, den moesoe leisi den nanga joisti krakti èn gebroiki den na wan krin, èn soifri fasi. Aksi di e meki wan ososma go denki foe bijbel penti kan de wan jepi toe. Agen a de so taki den methode foe Jesus e leri joe wan sani. Na wan okasi, wan man di ben kisi leri boen na ini a wet foe Moses, ben aksi en: „Meester, san mi moesoe doe foe kisi têgo libi?” Na ini en piki Jesus ben aksi: „San skrifi na ini a Wet? Fa joe e leisi?” Degedege no de taki Jesus ben sabi taki disi ben de wan aksi di a man ben kan piki. A ben piki na wan joisti fasi, taki: „’Joe moesoe lobi Jehovah joe Gado nanga joe heri ati èn nanga joe heri sili èn nanga joe heri krakti èn nanga joe heri froestan,’ èn: ’joe moesoe lobi na sma na joe sei leki joe srefi.’” Disi ben meki Jesus prèise en èn wan takimakandra ben feni presi baka dati. — Lukas 10:25-37.
10. San sma moesoe hori na prakseri foe so fara wan sma tori foe takimakandra abi foe doe nanga disi, èn gi san sma moesoe kibri den srefi te den e poti aksi gi na ososma?
10 Den wan di e preiki oso foe oso moesoe poti krakti na tapoe na thema foe tori foe takimakandra èn moesoe meki kon na krin na reide foe a leisi foe bijbel tekst foe bow na tori go moro fara. Foedi na Kotoigi e proeberi foe doro na ati foe na ososma, meki a moesoe kibri en srefi foe poti aksi di e meki sma froeleigi. Te wi e gebroiki na wortoe foe Gado, ’dan meki na taki foe wi de alaten switi, moksi nanga sowtoe.’ — Kolose sma 4:6.
11. Te wi e gebroiki den Boekoe foe poti fowtoe fasi foe si sani reti, dan sortoe eksempel wi abi foe na tesi di Satan ben tesi Jesus?
11 Spesroetoe na gobaka a kan de fanowdoe foe poti fowtoe fasi foe si sani reti, foedi wi e sori san den Boekoe e taki ofoe wani taki troetroe. Sowan srefi sortoe sani Jesus ben doe di a ben piki Satan, di ben taki: „Efoe joe na a manpikin foe Gado, trowe joe srefi go na gron [foe den lanki foe na tempel leki wan sma di e proeberi foe kiri en srefi]; bika Boekoe skrifi, ’A sa gi den engel foe en wan komando foe joe ede, èn den sa tjari joe na tapoe den anoe, so taki no wan joeroe joe sa naki joe foetoe na wan ston.’” Psalm 91:11, 12, na bijbeltekst di Satan ben teki taki, no e regtfardiki na tjari kon ini kofar foe a libi, san de wan presenti foe Gado. Foedi a ben froestan taki a ben fowtoe foe tesi Gado foe teki tjans nanga na libi foe en, meki Jesus ben taigi Satan: „Agen Boekoe skrifi, ’joe no moesoe tesi Jehovah joe Gado’” (Mateus 4:5-7). A no de foe taki, Satan a no wan sma di e soekoe waarheid. Ma te reidelek sma e tjari fowtoe fasi foe si sani kon na doro di ben sa hendri a jeje go na fesi foe den, dan bedinari foe na Wortoe foe Gado na wan koni fasi moesoe sori san den Boekoe e taki èn wani taki troetroe. Disi na alamala wan pisi foe „a handri foe na wortoe foe waarheid na wan reti fasi” — wan foe den prenspari les di den e leri sma na a teokrasia diniwrokoskoro. — 2 Timoteus 2:15.
A krakti foe overtoigi sma abi en presi
12, 13. Foe san-ede a joisti foe meki gebroiki foe na krakti foe hari sma kon abra na ini a diniwroko?
12 A krakti foe overtoigi sma abi en joisti presi ini na kresten diniwroko. Foe eksempel, Paulus ben gi en kompewrokoman Timoteus tranga foe tan na ini den sani di a ben leri èn di nanga a krakti foe „overtoigi sma [a ben] go bribi na ini” (2 Timoteus 3:14). Na ini Korente Paulus „ben gwenti foe gi ibri sabat wan lezing na ini a snoga èn ben overtoigi den djoe nanga Griki sma” (Tori foe den Apostel 18:1-4). Na ini Efeise, nanga boen bakapisi a „ben hori lezing èn ben meki gebroiki foe a krakti foe overtoigi sma gi na kownoekondre foe Gado” (Tori foe den Apostel 19:8). Èn di den ben poti en a strafoe na ini wan oso na ini Rome, dan na apostel ben kari sma kon na en èn ben preiki gi den, „èn a ben gebroiki a krakti foe overtoigi”, èn sonwan ben tron bribiman. — Tori foe den Apostel 28:23, 24.
13 Awansi fa na kotoigi kan proeberi foe overtoigi sma, a no de foe taki, soso sma di abi na joisti jejefasi gi a têgo libi sa tron bribi sma. Boeweisi di e overtoigi sma èn krin froeklari, di ben pristeri nanga koni, kan overtoigi den foe go bribi. Ma san moro kan de wan jepi foe overtoigi den?
De logis èn overtoigi sma
14. (a) San logis, samenhangende opbouw wani taki? (b) San boeweisi di e overtoigi sma e aksi?
14 Wan foe den eigifasi foe taki, di den e poti krakti a tapoe na a Teokrasia Diniwrokoskoro, na logis, samenhangende opbouw. Disi abi foe doe nanga na poti foe ala den ede-prakseri sroto idea nanga materiaal di abi foe doe nanga a tori na ini wan reidelek volgorde. So srefi boeweisi di e overtoigi sma de prenspari, san e aksi foe poti wan boen fondamenti èn foe gi boen boeweisi. Wan sani di abi foe doe nanga disi de foe jepi den arkiman foe taki-go-taki-kon foedi den e hori wan gemeenschappelijk fondamenti, foe froeklari den penti na wan boen fasi, èn foe gebroiki den nanga boen bakapisi. Agen, a de so taki den Boekoe e gi lin foe tjari wi.
15. (a) Fa Paulus ben hari na prakseri foe sma èn ben poti wan gemeenschappelijk fondamenti di a ben taki na tapoe a Pikinbergi foe Mars? (b) Sortoe boeweisi wi abi ini na taki foe Paulus foe logis, samenhangende opbouw?
15 Den eigifasi disi foe taki, de krin foe si ini na barinen taki foe Paulus na tapoe a Pikinbergi foe Mars na ini a owroe Ateine (Tori foe den Apostel 17:22-31). Ma den inleiding foe en ben hari na prakseri èn ben poti wan gemeenschappelijk fondamenti, bika a ben taki: „Oenoe man foe Ateine, mi e si taki na ini ala sani a gersi taki oenoe gi oenoe srefi moro abra na a frede foe den gado moro leki tra sma.” Sondro degedege, disi ben de gi den leki wan prèise. Baka di a ben taki foe wan altari di den ben gi abra „Na wan Gado di den no sabi”, dan Paulus ben go doro nanga en logis, samenhangende opbouw èn boeweisi di e overtoigi sma. A ben sori taki na Gado disi di den no ben sabi ben „meki grontapoe èn ala sani di de na ini.” Tra fasi leki Ateine ofoe tra Griki gado, ’ a no e libi na ini tempel di anoe meki, èn a no abi libisma anoe fanowdoe foe sorgoe en toe.’ Baka dati na apostel ben sori taki na Gado disi ben gi wi libi èn no ben meki wi e firi na en leki wan breniman. Dan Paulus ben taki-go-taki-kon taki wi Mekiman, di ben loekoe pasa den ten foe so wan don na ini a dini foe kroektoe gado, ’e taigi sma now na alape foe abi berow.’ Na logis fasi disi ben tjari sma go na a penti taki ’Gado sa kroetoe libisma di e libi na grontapoe ini regtfardikifasi nanga jepi foe wan man di a ben poti èn di a ben wiki foe dede.’ Foedi Paulus ben meki „na boen njoensoe foe Jesus èn na opobaka bekenti,” meki den Ateine sma dati ben sabi taki na Kroetoeman disi ben sa de Jesus Krestes. — Tori foe den Apostel 17:18.
16. Fa na lezing foe Paulus na tapoe a Pikinbergi foe Mars èn a leri na a Teokrasia Diniwrokoskoro kan abi krakti tapoe wan sma en diniwroko?
16 A troe, Paulus no ben kotoigi oso foe oso na tapoe na Pikinbergi foe Mars. Ma Jehovah Kotoigi kan leri foeroe sani foe na lezing foe en èn foe na leri di den e kisi na a Teokrasia Diniwrokoskoro, èn di kan meki na velddienst foe den go na fesi. Ija, ala disi e jepi foe meki den tron bedinari nanga moro boen bakapisi, neleki fa na logis opbouw èn a gi foe boeweisi foe overtoigi sma foe na sei foe Paulus ben hari son foe den Ateine sma dati foe tron bribiman. — Tori foe den Apostel 17:32-34.
Gebroiki agersitori pe wan sma e leri wan sani na ini
17. Sortoe agersitori moesoe gebroiki na ini a diniwroko?
17 Na Teokrasia Diniwrokoskoro e jepi den bedinari foe Gado toe foe gebroiki boen agersitori ini na oso-foe-oso preiki èn tra pisi foe na diniwroko foe den. Foe poti krakti tapoe prenspari penti, dan eenvoudig agersitori di e sori wan boen tesi moesoe gebroiki. Na Kotoigi moesoe poeroe den foe situwâsi di sma sabi èn moesoe loekoe boen foe sori san den wani taki. Den agersitori foe Jesus ben doro ala den marki disi.
18. Fa Mateus 13:45, 46 kan sori taki a boen foe gebroiki na ini a diniwroko?
18 Foe eksempel, loekoe den wortoe foe Jesus: „Na kownoekondre foe hemel de leki wan seriman di e soekoe moi peri. Di a feni wán peri foe bigi waarde, a ben gowe èn wantewante a ben seri ala sani di a ben abi èn ben bai en” (Mateus 13:45, 46). Peri na warti diriston di sma e feni ini den skropoe foe den pakro èn tra pakro sortoe. Ma soso wan toe peri „moi.” Na seriman ben abi na koni foe man si sani di de fanowdoe foe warderi na toemoesi bigi waarde foe na wan peri disi èn ben de klariklari foe gi ala tra sani abra foe kisi en. Kande na wan gobaka ofoe oso-bijbelstudie na agersitori disi ben kan gebroiki foe sori taki wan sma di troetroe e warderi na Kownoekondre foe Gado sa handri leki na seriman dati. So wan sma sa gi na Kownoekondre na fosi presi na ini en libi, foedi a sabi taki a warti ibri ofrandi.
Bosroiti nanga na boeweigi foe sma ati
19. San den bosroiti moesoe sori na ososma ini na oso-foe-oso diniwroko?
19 Na a teokrasia Diniwrokoskoro, na pipel foe Gado e leri so srefi taki na bosroiti foe wan lezing ofoe takimakandra moesoe abi langalanga foe doe nanga na thema èn moesoe sori den arkiman san den moesoe doe èn gi den deki-ati foe doe dati. Ini na oso-foe-oso diniwroko, a de fanowdoe foe sori na ososma krin sortoe pasi den e froewakti foe a teki, so leki foe teki wan bijbel publikâsi ofoe foe agri nanga wan gobaka.
20. Sortoe moi eksempel wi abi na ini Mateus 7:24-27 foe bosroiti di e boeweigi sma ati?
20 Na bosroiti foe na Bergipreiki foe Jesus e gi wan moi eksempel. Nanga jepi foe wan agersitori di den ben froestan esi-esi, Jesus ben sori taki a ben sa de wan froestan sani foe gi jesi na den wortoe foe en. A ben bosroiti: „Foe dati-ede ibriwan sma di e jere den wortoe disi foe mi èn e doe den, den sa gersi nanga wan koni man, di bow en oso na tapoe a stonbergi. Èn na alen ben fadon èn den froedoe ben kon èn den winti ben wai èn ben naki na oso dati, ma a no ben broko fadon bikasi a ben abi wan boen fondamenti na tapoe na stonbergi. Morofara, ibriwan sma di e jere den wortoe disi foe mi èn no e doe den den sa agersi nanga wan donman, di bow en oso na tapoe santi. Èn na alen ben fadon èn den froedoe ben kon èn den winti ben wai èn ben naki na oso dati èn a ben broko fadon, èn na fadon foe en ben bigi” (Mateus 7:24-27). O boen disi e sori taki den bedinari foe Gado moesoe doe moeiti foe boeweigi na ati foe den ososma!
21. San na takimakandra foe wi ben sori, ma san sma moesoe erken?
21 Den penti di ben kari a fesi e sori fa na Teokrasia Diniwrokoskoro kan jepi foeroe sma foe de bekwaam Kownoekondrepreikiman. A no de foe taki, foe de bekwaam troetroe e komoto ini a fosi presi foe Gado (2 Korente sma 3:4-6). Èn o fa na dinari kan de bekwaam, no wan sma kan overtoigi sma foe tron bribiman efoe Gado no hari den kon nanga jepi foe Krestes (Johanes 14:6). Tokoe, na pipel foe Gado seiker moesoe meki gebroiki foe ala den jeje seti di Jehovah meki te den e soekoe den sma di abi na joisti jejefasi gi a têgo libi.
San na den piki foe joe?
◻ Soema na den „sma di de soifri ini ati”, èn fa den „e si Gado”?
◻ Sortoe sani sma moesoe hori na prakseri te den e bigin taki foe na Kownoekondreboskopoe ini na oso-foe-oso wroko?
◻ Fa sma kan handri a Wortoe foe Gado na wan reti fasi ini na diniwroko?
◻ San sa jepi foe meki logis pristeri di e gi overtoigi ini na velddienst?
◻ San sma moesoe hori na prakseri ini a tori foe na gebroiki foe agersitori ini na diniwroko?
◻ Sortoe marki den bosroiti di ben gebroiki ini na preikiwroko moesoe doro?
[Prenki na tapoe bladzijde 28]
Jesus ben taki taki „den sma di de soifri ini ati” ben sa „si Gado”. San disi ben wani taki?
[Prenki na tapoe bladzijde 30]
Joisti inleiding moesoe gebroiki gi den tekst, den moesoe leisi nanga krakti tapoe den joisti wortoe, èn gebroiki na wan krin èn soifri fasi