Yepi den wan di ati e pusu den fu du san bun
1. Suma Yehovah e tyari kon na wan ini a ten disi?
1 Ibri sma abi wan fasi fu denki di rutu dipi na ini na agersi ati fu en (Mat. 12:35). Bijbel e taki fu den wan „di ati e pusu den fu feti” (Ps. 55:21). Son sma e atibron esi-esi (Odo 29:22). Ma trawan de sosrefi di e sori taki den ’wani a têgo libi’ (Tori. 13:48). Na ini a ten disi, Yehovah e tyari den sortu sma disi kon na wan (Hag. 2:7). Fa wi kan yepi den fu tron anbegiman fu Yehovah?
2. San wi musu du efu wi wani du a wroko fu meki disipel na wan bun fasi?
2 Du seryusu muiti fu tyari gobaka: Efu wi wani gi yesi na a komando fu meki disipel, dan wi musu kon frustan o prenspari a de fu tyari gobaka (Mat. 28:19, 20). Efu wi e si taki wan sma wani sabi moro, dan wi e go baka wantewante? Wi e go baka na ala sma di teki buku, noso na sma di sori taki den wani sabi moro fu a bun nyunsu? Wi e horidoro te wi e yepi den fu gro na yeye fasi? Fu di sma kan lasi den libi, meki wi musu go baka fu yepi ala sma di wani sabi moro.
3. San wi musu du baka te wi taki nanga wan sma na ini a preikiwroko?
3 Efu yu e memre ete san yu ben taki nanga a sma di wani sabi moro, dan teki a ten fu skrifi na adres nanga a nen fu a sma na tapu wan pisi papira. Skrifi syatu fu sortu tori yu nanga na ososma ben taki, èn skrifi ala den tekst di unu ben leisi, nanga sortu lektuur yu ben libi na baka. Baka dati, no frigiti fu go baka so esi leki yu man.
4. Fa wi kan tyari bun gobaka?
4 Fa wi musu tyari gobaka: Te yu e tyari gobaka, dan a bun te yu e taki nanga firi, èn na wan switi fasi, èn te yu e sori taki yu e broko yu ede nanga na ososma trutru. No taki fu muilek sani, ma taki fu wan penti na ini Bijbel. Sreka fu taki fu wan moi Bijbel penti, èn na a kaba fu a takimakandra, yu kan poti wan aksi di yu sa piki na a tra fisiti. A bun fu no hari taki nanga na ososma fu sani di no e kruderi nanga Bijbel. Pruberi fu taki fu sani di yu nanga na ososma e si na a srefi fasi.—Kol. 4:6.
5. Sortu muiti wan pionier meki, èn nanga sortu bakapisi?
5 A e aksi furu fu wi fu tyari gobaka, ma den winimarki di wi e kisi e gi wi prisiri trutru. Wan pionier na ini Yapan ben poti a marki gi ensrefi fu tyari moro gobaka ibri mun. A bigin skrifi den nen fu den sma di a ben e miti na ini na oso fu oso wroko, èn fosi wan wiki ben tapu a ben e go baka na den. A ben e sreka ensrefi bun gi san a ben o taki, èn a ben e du a diniwroko fu en aladi a ben e sori taki a ben de nanga overtoigi fu a boskopu di a e prati. Na wan fu den gobaka, a ben man bigin wan bijbelstudie nanga wan sma di ben taki: „Ala ten mi ben e yagi unu. Disi na a fosi leisi di mi arki”. Fu di a pionier ben horidoro na wan lobi-ati fasi, meki a ben abi bun bakapisi. Na a kaba fu a fosi mun, a ben abi tin bijbelstudie.
6. Fu san ede wi musu horidoro te wi e tyari gobaka?
6 A situwâsi fu sma e kenki doronomo (1 Kor. 7:31). Furu tron a de fanowdu fu go na a sma wan tu leisi fosi wi miti en na oso. Te wi e meki ala muiti fu tyari gobaka, dan wi kan yepi den wan di ati e pusu den fu du san bun, fu kon tapu a pasi fu têgo libi.—Mat. 7:13, 14.