A prenspari fu sreka yusrefi te yu wani tyari bun gobaka
1. Te o fara a Kresten diniwroko fu fositen ben o du te fu kaba?
1 Yesus ben gi den disipel fu en finifini leri so taki den ben kan de bun preikiman fu „a bun nyunsu fu a kownukondre” (Mat. 4:23; 9:35). Yesus ben gi den a leri dati, di den ben e preiki soso na ini a kontren fu Palestina. Ma fosi Yesus opo go na hemel, a ben taki dati a Kresten diniwroko ben o du so fara taki ’sma fu ala kondre ben o tron disipel’.—Mat. 28:19, 20.
2. San wi musu du te wi e gi yesi na a komando fu Yesus di e taki dati wi musu ’meki disipel’?
2 A wroko dati ben o abi fu du tu nanga den gobaka di wi e tyari na den sma di wani sabi moro fu a bun nyunsu fu Gado Kownukondre èn nanga a leri di wi e leri den fu du ala san Krestes komanderi. Fu man tyari bun gobaka, wi musu sreka wisrefi bun.
3. Srefi efu yu taki nanga wan sma fu a fosi leisi, san yu kan du fu go baka na a sma?
3 Sreka yusrefi na fesi: Son preikiman e meki muiti fu poti wan aksi na a kaba fu a takimakandra di den abi nanga a sma fu a fosi leisi. Baka dati den e pramisi a sma taki den o gi piki tapu na aksi te den kon baka. Den kon si taki te den e tyari gobaka èn den e gebroiki den sani di skrifi na ini a Bijbel leri-buku, dan dati e yepi den fu bigin wan bijbelstudie wantewante.
4. Fu san ede wi no musu wakti teleki wi abi nyun tijdschrift, fu man tyari wan gobaka?
4 Aladi wi e kisi wán Waktitoren nanga wán Ontwaakt! nomo gi ibri mun, toku dati no wani taki dati wi musu wakti teleki wi kisi den tijdschrift fu a tra mun, fosi wi go baka na a sma. A kan de so taki a sma o wani sabi moro, te yu e taki fu tra sani di skrifi na ini a tijdschrift di a sma abi kaba.
5. Sortu wini wi abi te wi e poti wan marki gi wisrefi?
5 Poti wan marki di yu wani doro: Fosi yu go baka na wan sma, dan luku baka san yu ben skrifi fu a sma, èn gebroiki den sani dati fu kon sabi san yu wani doro nanga a takimakandra. Fu eksempre, yu kan taki fu wan sani di skrifi na ini a tijdschrift di yu ben libi gi a sma. Noso libi tra publikâsi gi a sma di abi fu du nanga a takimakandra di yu ben abi kaba. Efu yu ben poti wan aksi gi a sma, dan a no de fu taki dati yu o wani gi piki tapu na aksi dati. Te yu e taki fu wan tekst di e horibaka gi san yu taki, dan du muiti fu leisi a tekst langalanga fu Bijbel.
6. San na a marki di wi wani doro te wi e tyari gobaka?
6 A marki di wi wani doro: A no de fu taki dati a marki di wi wani doro na fu bigin wan bijbelstudie. Di wan brada ben go baka na wan man, dan a aksi a man efu a wani studeri, ma a man no ben wani. Bakaten, a brada go baka na a man nanga den nyun tijdschrift, èn a taki: „Wi e go na sma fu gi piki tapu wán Bijbel aksi di den abi.” Baka di a brada arki san a man ben taki, dan a brada leisi wan tekst gi en. Baka dati, a teki wan buku di wi e gebroiki fu studeri nanga sma èn a leisi wan paragraaf di abi fu du nanga a tori dati. A sani disi meki taki a man bigin studeri Bijbel.
7. Fa yu ben man bigin wan bijbelstudie fu di yu sreka yusrefi bun na fesi?
7 Wi sa abi bun bakapisi te wi e teki ten fu sreka wisrefi fosi wi tyari wan gobaka. Disi sa meki taki wi abi moro prisiri, èn wi kan abi a grani fu yepi wan sma di abi „a yoisti denki”, fu kon na tapu a pasi fu libi.—Tori. 13:48.