Wi e kari oenoe kon na a „Sma di lobi fri” — Distriktkongres
FOE bigin foe november 1989, na tori di e go foe fri, ben kon bekènti moro leki no wan ten a fesi. Spesroetoe den sma foe den Owstoe Europees kondre e njanboen foe moro politiek fri leki san den ben abi ini den 40 jari di ben pasa ofoe moro langa.
Ma wan fri de, di de moro prenspari leki iniwan politiek fri di de. Wi kan leisi foe disi na ini Gado Wortoe, a bijbel. Jesus Krestes ben taki wan leisi: „Oenoe sa sabi na waarheid èn na waarheid sa meki oenoe kon fri” (Johanes 8:32). Ija, kresten di gi den srefi abra, kon fri foe a frede gi libisma èn foe a katibo foe sondoe nanga dede, soleki wi e leisi na ini Rome sma 6:18, 22. Wi e leisi so srefi taki: „Pe na jeje foe Jehovah de, na drape fri de” (2 Korente sma 3:17). Foe taki en leti, a Wortoe foe Gado e gi wi wan toemoesi moi loekoe a fesi, taki „den mekisani srefi sa meki kon fri foe a katibo foe pori èn sa abi na glori fri foe den pikin foe Gado”. — Rome sma 8:21.
Efoe wan sma e winsi foe kisi kresten fri na ini a ten disi, dan a moesoe doe troetroe moeiti foe disi. A no de kwetikweti soso wan afersi foe doe san de moro makriki. Èn foe tan njanboen foe na fri disi e aksi moro moeiti, te joe e loekoe den makti di wani foe poeroe na fri disi foe wi: Satan Didibri, en gadolowsoe grontapoe, èn wi eigi sondoe fasi di wi kisi foe wi papa nanga mama. Jehovah Gado ben sorgoe gi jepi nanga jepi foe en Wortoe, di skrifi ondro krakti foe santa jeje, nanga jepi foe en santa jeje èn nanga jepi foe en organisâsi di sma ai kan si. — Lukas 11:13.
Foe jepi ala den sma di lobi fri, foe meki na hori di den e hori na fri disi moro steifi, meki den distriktkongres foe Jehovah Kotoigi foe na jari disi e regtfardiki a thema „Sma di lobi fri”. Den kongres disi di sa hori dri dei langa, e bigin freida 9.30 mamanten èn e go doro te sonde 4.00 joeroe bakadina. Ala den sma di e kon na den kongres disi, sa kisi jeje kowroe-ati èn sa kisi tranga nanga jepi foe den lezing di e gi deki-ati, aksi-takimakandra di e wiki na belangstelling, demo di abi boen bakapisi, èn wan disiten drama di e naki sma ati; so srefi wi no moesoe frigiti na prisiri foe na demakandra di e waran sma ati, nanga owroe èn njoen mati, na prisiri foe singi den Kownoekondre singi foe wi makandra nanga doesoendoesoen trawan, èn foe teki prati na den poebliki begi di e komoto foe na ati.
Meki a de so, taki noti sa kon a mindri sotaki ala den foetoeboi foe Jehovah, di gi den srefi abra, de biten freida mamanten drape te den kongres disi e bigin. Èn sorgoe, taki joe no e kon wawan nanga bijbel èn singiboekoe, ma so srefi nanga wan potlood èn skrifiboekoe foe skrifi sani. Kon, so srefi, nanga wan troetroe froestan foe den jeje fanowdoe foe oenoe, leki wan sma di de wan pisi foe wan pipel di de fri. — Mateus 5:3.