Kon na a „Frede gi Gado”-distriktkongres

FOSITEN, dri tron wan jari den foetoeboi foe Jehovah ben abi a plekti foe kon makandra foe hori spesroetoe fesa, so leki fa a ben skrifi ini a wet foe Moses. Den okasi disi ben de okasi di ben de prisiri èn di ben bow sma na jeje fasi. — Deuteronomium 16:16.

So srefi, ini a ten disi den foetoeboi foe Jehovah e kon makandra dri leisi ala jari: foe a spesroetoe deikonmakandra, foe a toe dei kringkonmakandra èn foe a dri noso fo dei distriktkongres. Ini a diniwroko-jari foe 1994, Jehovah Kotoigi sa kon makandra foe a „Frede gi Gado”-distriktkongres.

A Wortoe foe Gado no e misi foe sori o prenspari a frede gi Gado de. Ini a Wortoe foe Gado den e kari a sortoe frede dati so wan 200 leisi. A frede gi Gado e kibri sma, so leki fa a skrifi ini Odo 16:6: „Ini a frede foe Jehovah wan sma e drai pasi gi san takroe.” We, Psalm 111:10 e taigi wi taki a frede gi Gado na a fosifosi bigin foe koni!

Wi ben kan taki, dati toe fasi foe froestan a frede gi Gado de. Wan sani de, taki lobi e poesoe wi foe abi a sortoe frede disi. Foe a bigi lobi di wi abi gi Gado, meki wi e frede foe doe wan sani di En no feni boen (Odo 27:11). Dan agen, koni foe wi sei sa jepi taki a frede di wi e frede Gado gro safrisafri, foe di wi sabi taki Gado na „wan faja toe di e bron ala sani” gi ala sma di e tan doe ogri. — Hebrewsma 12:29.

Tapoe a „Frede gi Gado”-distriktkongres, wi sa kisi foeroe leri nanga deki-ati foe gro ini a frede gi Gado. Den sortoe leri disi wi sa kisi nanga jepi foe taki, demonstrâsi nanga wan drama, so boen leki a froeteri di den sa froeteri ondrofenitori.

So leki fa den Israèlsma foe fositen ben kisi a komando foe no kon na den konmakandra sondro foe tjari wan sani, wi moesoe wani foe abi wan prati toe ini a prisiri èn foe meki wi kongres waka boen (Deuteronomium 16:17). Wi kan doe disi foe di wi e sori lespeki gi a tafra foe Jehovah. Fa? Foe di wi de drape bifo a programa e bigin, foe di wi e arki boen na den sani di den e taki foe a podium, foe di wi e singi den singi nanga wi heri ati. Na a pisi ten foe a programa wi no wani foe takitaki noso wakawaka lontoe. Wi wani foe abi wan prati toe ini a friwani-wroko, someni leki wi man. Na organisâsi foe a kongres abi foe doe nanga foeroe afdeling, di alamala abi sma fanowdoe foe doe a wroko. Wi wani gi moni-bijdrage toe, nètso foeroe leki fa Jehovah ben blesi wi.

Meki ibri foetoeboi foe Jehovah seti sani gi ensrefi now foe de drape na ala den dri dei foe a „Frede gi Gado”-distriktkongres, foe a fosi singi tapoe freida mamanten te kon miti a lasti begi tapoe sonde bakadina.

DISTRIKTKONGRES 1994

SRANANTONGO: 5, 6, 7 augustus Gakaba

BAKRATONGO: 19, 20, 21 augustus Tweede Rijweg

SRANANTONGO: 26, 27, 28 augustus Tweede Rijweg

INGRISITONGO: 2, 3, 4 september Tweede Rijweg