Wan soifri tongo gi ala nâsi
„Dan mi sa meki pipel kenki go tapoe wan soifri tongo, so taki den alamala kan kari na nen foe Jehovah, foe dini en skowroe na skowroe.” — SEFANIA 3:9.
1, 2. (a) San Jehovah e doe ini wi ten leki wan kontroe foe Sefania 3:9? (b) Sortoe aksi moesoe kisi wan piki efoe wi wani froestan fa a profeititori foe Sefania abi krakti na wi tapoe?
JEHOVAH GADO e doe wan wroko na ini wi ten, di de troetroe wan froewondroe sani. A e tjari sma di komoto foe ala nâsi, kon na wán. So leki a ben taki a fesi langa ten kaba na ini en Santa Wortoe, dan a e doe disi foe di a e leri den wan njoen tongo. — Sefania 3:9.
2 San na a tongo dati? Foe san-ede a de fanowdoe? San a e aksi foe wi srefi foe wi leri a njoen tongo disi?
A presenti foe man taki
3. (a) Sortoe toemoesi moi presenti Adam ben kisi? (b) Sortoe tongo Adam ben taki?
3 A koni foe kenki prakseri nanga jepi foe taki, na wan presenti foe Gado, di e poti a libisma famiri aparti foe ala meti di Gado meki. Na fosi libisma, Adam, den ben meki nanga wan froestan di ben man foe denki na wan konifasi. A ben kisi stenbanti, wan tongo, nanga mofoboeba di a ben kan gebroiki foe taki, èn so srefi wan maksin foe wortoe, èn a koni foe man meki njoen wortoe. Adam ben man foe froestan, te Jehovah ben taki nanga en, èn Adam, na a tra sei, ben kan poti en prakseri abra na ini wortoe (Genesis 1:28-30; 2:16, 17, 19-23). A tongo di Adam ben kisi ben de, so leki fa a e sori, a wan di sma ben kon sabi baka ten leki a Hebrew tongo. So leki fa a e sori, dan a heri libisma famiri ben tan taki a wán tongo dati na ini no moro pikinso leki den fosi 1757 jari di libisma ben de. — Genesis 11:1.
4. Fa sani di ben pasa na ini den dei foe Nimrod ben abi krakti tapoe na libisma tongo?
4 Dan, na ini den dei foe Nimrod, foe den moeiti foe gadolowsoe sma no go doro, meki Jehovah ben broeja a tongo foe ala sma di ben gi pasi foe den orga den foe teki prati na ini a bow foe a toren foe Babel (Genesis 11:3-9). A e sori taki Jehovah ben figi fosi ala a memre poeroe foe a tongo di den alamala ben taki a fesi èn dan a ben poti njoen tongo na ini den prakseri. Disi no ben abi soso njoen maksin foe wortoe na ini, ma so srefi njoen grammatica nanga njoen patron foe denki. Foe den tongo di Jehovah ben meki bigin na ini Babel, trawan gro kon safrisafri te na ini a ten disi, èn so leki fa den akademia foe tongo e taki, dan na a heri grontapoe sma e taki so wan 3000 tongo.
5. Fa wi kan kon sabi san „a kenki go tapoe a soifri tongo” abi na ini?
5 San a ben sa wani taki gi sma di e taki den tongo disi te Gado ben sa meki „den kenki go tapoe wan soifri tongo”? Disi ben sa aksi foe den taki den moesoe libi a mama tongo foe den èn leri a fosi tongo di Gado ben gi Adam? Den omstandigheid di ben de lontoe na gi foe a profeititori, e jepi foe gi piki tapoe na aksi dati.
A fanowdoe foe wan soifri tongo
6-8. (a) Sortoe situwâsi ini a tori foe relisi ben opo ede kon na ini Juda bifo den ben kisi a profeititori foe Sefania 3:9? (b) Sortoe fasi fa den ben si sani ben bradi ensrefi ini den nâsi lontoe Juda?
6 A kownoekondre foe Juda no langa a fesi ben abi fosi Manase leki kownoe èn baka en Amon, di ben meki altari gi Baäl, den ben doe loekoeman wroko èn ben meki afkodreiwroko go a fesi (2 Kownoe 21:1-6; 2 Kroniki 33:21-23). Leki bakapisi, na ini a ten foe na tiri foe Josia, a manpikin foe Amon èn na wan di kon na en baka, Jehovah ben poti en profeiti Sefania foe warskow taki Gado ben o tjari kroetoe kon na tapoe a kondre. — Sefania 1:1, 2.
7 Ala di den sma foe Juda ben sabi foe den eigi historia èn foe den Boekoe di skrifi na ondro krakti foe santa jeje, taki Jehovah de a troe Gado, den ben gi densrefi pasi foe doe den hoeroedoe gwenti foe na anbegi foe Baal. Den ben boigi gi son èn moenkenki, èn gi den groepoe stari foe na horoscoop, san ben de langalanga a pasa foe a wet foe Gado (Deuteronomium 4:19; 2 Kownoe 23:5). Boiti dati, den ben teki prati na ini wan fasi foe intergeloof (moksi anbegi), èn ben doe neleki ala relisi de a srefi, foe di den ben sweri na Jehovah èn na ini a nen foe a falsi gado Malkam. A fasi fa den ben si sani ben de taki ’Jehovah no sa doe boen, èn a no sa doe ogri’ (Sefania 1:4-6, 12). Ini a tori foe den nâsi di ben de lontoe Juda, den alamala ben bow wan nen foe opo densrefi kontrari Jehovah nanga en pipel, so boen a kroetoe foe Gado ben o kon so srefi a tapoe den. — Sefania 2:4-15.
8 Nanga den sani disi di ben pasa leki bakagron, Jehovah ben taki a fesi taki a ben sa „meki pipel kenki go tapoe wan soifri tongo, so taki den alamala kan kari na nen foe Jehovah, foe dini en skowroe na skowroe” (Sefania 3:9). Dan san na a soifri tongo dati?
9. (a) Foe san-ede a soifri tongo no de a Hebrew tongo ofoe soso a skrifi Wortoe foe Gado? (b) San na a soifri tongo dati, èn fa a abi krakti tapoe a libi foe den sma di e taki en?
9 A de a Hebrew tongo? Nôno, a pipel foe Juda ben abi dati kaba, ma den sani di den ben e taki èn ben e doe, krinkrin no ben de soifri èn opregti na ini den ai foe Jehovah. Èn a soifri tongo no de soso a skrifi Wortoe foe Gado. Den ben abi dati so srefi. Ma san den ben abi fanowdoe ben de foe froestan na wan joisti fasi a waarheid foe Gado nanga den prakseri foe en, èn Jehovah wawan ben kan sorgoe gi dati nanga jepi foe en jeje. Te den ben leri foe taki a soifri tongo dati, dan den ben sa poti a prakseri foe den, a taki foe den, èn a fasi foe doe foe den, krinkrin tapoe na erken di den e erken taki Jehovah na a wan enkri troe Gado (Sefania 2:3). Den ben sa poti den froetrow na ini en èn horibaka dorodoro gi en soevereiniteit. Disi de toemoesi prenspari gi wi ini a ten disi. Foe san-ede?
Den sma di e kisi a soifri tongo
10. Na ini sortoe pisiten a profeititori foe Sefania 3:9 ben moesoe kon troe?
10 Te Sefania 3:9 e sori go na a kontroe foe a profeititori na ini wan spesroetoe pisiten, a e taki: „Dan mi sa meki pipel kenki go tapoe wan soifri tongo.” Oten dati de? Vers 8 e piki taki a de na ini a ten te Jehovah e ’tjari den nâsi kon na wán’, bifo a ’e kanti a faja atibron foe en na den tapoe’, taki a e meki den safri-ati sma foe grontapoe kenki go tapoe wan soifri tongo.
11. (a) Sortoe toe kontroe Sefania 3:9 ben abi bifo a njoen modo ten disi? (b) Fa a kontroe foe en de tra fasi ini a ten disi?
11 Na ini den dei foe kownoe Josia, bifo Jehovah ben gi den legre foe Babilon pasi foe tjari a kroetoe kon, foeroe sma ben libi falsi anbegi, èn ben dini Jehovah na presi foe dati (2 Kroniki 34:3-33). Èn agen, na ini a fosi jarihondro G. T., bifo den Rome sma ben pori Jerusalem, doesoendoesoen sma ben leri a waarheid ini a tori foe Gado nanga en prakseri èn ben kon de wán na ini a dienst foe en. Na a ten dati a tongo foe a waarheid ben kon moro goedoe srefisrefi, nanga den sani di Jesus ben doe leki wan kontroe foe na prakseri foe Jehovah. Ma a de ini wi ten taki a profeititori foe Sefania e kon troe na a heri grontapoe. Den e tjari ala den nâsi kon na wán now, gi a feti foe a bigi dei foe Gado na Almaktiwan na ini Armagedon (Openbaring 16:14, 16). A tjari kon na wán dati ben bigin sensi a gebortoe foe a Kownoekondre na ini 1914. Èn a de ini a srefi pisiten disi taki Jehovah ben meki sma na a heri grontapoe kenki go tapoe wan soifri tongo, leki wan kontroe foe a profeititori disi. A leri foe a tongo disi de toemoesi prenspari, foe di den sma di sa pasa libilibi a bigi banawtoe di e kon, sa de sma di troetroe ben meki a soifri tongo disi kon tron a tongo foe den. — Joèl 2:32.
12. (a) San a fisjoen di den kari na ini Jesaja 6 abi foe doe nanga a profeititori foe a soifri tongo? (b) Foe san-ede a salfoe fikapisi ben abi jepi fanowdoe efoe Jehovah ben wani feni en boen gi en diniwroko?
12 Ini akroederi nanga disi, dan froekoefroekoe ini a pisiten di ben kon baka a Fosi Grontapoefeti, Jehovah ben bigin foe opo den ai foe na froestan foe den salfoe dienstknekti foe en, foe kon froestan a toemoesi moi fisjoen di skrifi na ini Jesaja kapitel 6 (vers 1-4). A fisjoen disi e poti krakti tapoe a prensparifasi foe abi krin mofoboeba so taki wi kan dini Jehovah so leki fa a fiti. A e sori taki Jehovah de santa, na a moro hei fasi. Den foetoeboi foe en so srefi moesoe sori a eigifasi dati (1 Petrus 1:15, 16). Ma a salfoe fikapisi ben abi jepi fanowdoe ini a tori disi. Na a ten foe a Fosi Grontapoefeti te na wan seiker marki den ben gi densrefi pasi foe flaka densrefi foe na boemoei di den ben boemoei nanga den afersi foe grontapoe. „A frede gi Jehovah de soifri”, ofoe krin, ma den ben meki a frede gi libisma èn libisma organisâsi, abi krakti a tapoe den mofoboeba foe den, so taki foe wan prenspari pisi den no ben meki a Wortoe foe Gado bekenti (Psalm 19:9). Nanga a kontakti di den ben abi nanga a krestenhèit, a fikapisi ben doti ete nanga wantoe gwenti nanga doe foe a krestenhèit.
13, 14. (a) Fa na fikapisi ben sori a reti fasi, èn san Jehovah ben doe gi den? (b) Fa Jehovah ben gi a fikapisi a soifri tongo?
13 Di a fikapisi kon froestan a situwâsi foe den, den ben taki, so leki fa a profeiti Jesaja ben taki: „Heloe foe mi! Bika mi de neleki den tapoe mi mofo krinkrin, bika mi na wan man di mofoboeba no krin, èn a mindri wan pipel di mofoboeba no krin, mi e libi; bika den ai foe mi si na Kownoe srefi, Jehovah foe den legre!” (Jesaja 6:5) Den ben erken taki a situwâsi foe den no ben fiti. Den no ben horidoro, na wan fowtoe waka nanga libi foe swakifasi ede ofoe ben weigri nanga tranga-ede foe teki a piri-ai foe Jehovah. Den no ben moksi densrefi na den kerki fesiman di den kerki fesiman disi ben dini Gado Kownoekondre soso nanga den mofoboeba èn ben feni a Volkenbond boen, neleki disi ben de na Kownoekondre dati.
14 Na ini en no-froedini boenfasi Jehovah ben bigin foe krin den mofoboeba foe a fikapisi, foe di nanga sakafasi den ben sori berow. Jesaja 6:6, 7 e froeteri wi: „Tapoe dati wan foe den seraf ben frei kon na mi èn a ben abi na ini en anoe wan krofaja di ben leti, di a ben teki poeroe foe na altari nanga wan tanga. Èn morofara a ben meri mi mofo èn a ben taki: ’Loekoe! Disi ben fasi den mofoboeba foe joe, èn a sondoe foe joe wai gwe èn joe sondoe srefi e kon verzoen.’” A ben de a boskopoe di e krin sani èn di komoto foe Gado Wortoe, di neleki faja ben pori den gwenti nanga leri foe libisma. A ben poeroe komoto na ini den ati a frede gi libisma èn ben poti na ini en presi wan faja foe wroko tranga, foe den gebroiki den mofoboeba foe den foe gi Jehovah grani. Na so fasi Jehovah ben meki a pramisi foe en kon troe foe „meki pipel kenki go tapoe wan soifri tongo [letterlijk, wan krin mofoboeba], so taki den alamala kan kari na nen foe Jehovah.” — Sefania 3:9.
15. Fa na piki foe a fikapisi ben de ini akroederi nanga a reide di Jehovah ben abi foe gi den a soifri tongo?
15 So boen di a Jesaja-groepoe foe disiten ben bigin foe jere a sten foe Jehovah di ben aksi, so leki fa a skrifi na ini Jesaja 6:8: „Soema mi sa seni, èn soema sa go gi wi?”, den ben piki nanga prisiri: „Dja mi de! Seni mi.” A no ben de makriki gi alamala foe meki wan bigin nanga a poebliki diniwroko, ma den ben wani foe Gado gebroiki den leki wan pipel gi en nen. A jeje foe en ben gi den krakti. A nomroe foe den ben gro.
16. (a) Sortoe onfroewakti bakapisi a preiki foe a fikapisi ben abi? (b) Fa a bigi ipi e sori taki den e taki so srefi a soifri tongo now?
16 Baka wan pisiten a ben kon de krin taki a preiki foe den ben gi onfroewakti bakapisi. Nanga jepi foe den, Jehovah ben jepi wan tra groepoe foe kon leri a soifri tongo (Jesaja 55:5). Den sma disi no ben abi a howpoe foe libi na ini hemel, ma den ben feni en wan grani foe de kompe foe a fikapisi foe den Kownoekondre erfgenaam èn foe dini skowroe na skowroe nanga den leki sma di e meki a Kownoekondre foe Gado bekenti. Moro nanga moro, den ben komoto foe „ala nâsi èn lo èn pipel èn tongo” te leki den tron now „wan bigi ipi” di a nomroe foe den e doro miljoenmiljoen sma. A taki di e komoto foe a mofo foe den no de a wan di ben sa meki sma kon sabi den leki wan foe den elementi foe grontapoe di e tjari prati kon. Den no e poti a howpoe foe den tapoe iniwan sma ofoe iniwan libisma organisâsi. Na presi foe dati, „den e tan bari nanga wan tranga sten èn e taki: ’Froeloesoe wi abi foe taki tangi na wi Gado, di sidon tapoe na kownoestoeroe èn na a Pikin Skapoe.’” — Openbaring 7:9, 10.
San a leri di wi e leri a tongo e aksi foe wi
17. Foe san-ede a de prenspari taki wi e leri a soifri tongo boen èn taki wi e meki a man di wi man foe gebroiki en, kon moro betre?
17 Awinsi o langa wi abi kontakti nanga Jehovah organisâsi, tokoe foeroe sani de, di wi kan doe foe meki a sabi foe wi foe na soifri tongo èn a koni foe wi foe gebroiki en boen, kon moro betre. A de prenspari foe meki moeiti foe doe dati. Foe san-ede? Foe di disi na wan fasi foe sori a lobi foe wi gi a waarheid.
18, 19. (a) Foe san-ede a de prenspari foe meki wan tranga lobi gi a waarheid gro foe sensi a bigin? (b) Foe san-ede a de prenspari foe go doro foe kweki a lobi dati?
18 Biginbigin, so wan lobi e jepi foe opo a froestan èn na ati foe wan sma, so taki a man foe froestan den tekst di den e tjari kon na en prakseri; den e boeweigi en foe kon krosibei na Jehovah èn foe abi warderi gi En organisâsi. So boen, lobi gi a waarheid na wan sroto foe broko loesoe foe den banti foe falsi relisi. Son sma e taki, taki den abi belangstelling gi a boskopoe foe bijbel, ma den no e libi ala den sani troetroe di abi foe doe nanga falsi relisi èn en fasi foe libi foe no loekoe sani finifini. Foe san-ede? So leki fa 2 Tesalonika sma 2:10 e froeklari, den no „teki a lobi foe waarheid, so taki den ben sa kisi froeloesoe.” Fa a de prenspari taki wi kweki a lobi dati!
19 Efoe wi teki a waarheid kaba, dan a kweki di wi e kweki a lobi dati de a moro prenspari sani foe gro na jeje fasi. Hori na prakseri, taki Jehovah e sori go tapoe a waarheid leki wan „tongo”. Te wan sma e leri wan njoen tongo, a moesoe doe ala moeiti foe bow en maksin foe wortoe, foe taki den wortoe boen, foe leri den finifini sani foe a grammatica, èn go so doro. A lobi gi a njoen tongo èn gi den sma di e taki en, sa jepi en foe tan go a fesi. Kande a man foe taki a tongo pikinso ini wantoe moen, ma a e teki jari foe serjoesoe moeiti foe taki en leki wan sma foe a kondre. A srefi sortoe moeiti de fanowdoe foe basi a soifri tongo.
20. (a) San e meki a soifri tongo de soifri troetroe? (b) Foe san-ede a de fanowdoe taki ibriwan foe wi moesoe doe wi pisi finifini?
20 A de moro moi foe si taki den e taki, taki a tongo di Gado e gi en dienstknekti de soifri. Disi de troe, no foe a fasi fa a poti grammaticaal, ma foe di a e sori moreel nanga jeje krinfasi. Ini a tongo disi pasi no de gi lei, gi bidrigi, ofoe gi wan tongo foe triki. Den sma di e taki a tongo disi, ala ten moesoe taki a waarheid (Sefania 3:13; Efeise sma 4:25). A taki foe den moesoe sori den hei markitiki foe Jehovah ini a tori foe seks moreelfasi (Efeise sma 5:3, 4). Bijbel e poti wi prakseri so srefi a tapoe, taki ala sani di abi foe doe nanga Babilon a Bigiwan, a grontapoe tirimakti foe falsi relisi, no de krin (Openbaring 18:2-4). Den e kari den prenki foe den gado foe en „koenkoen gado” (Jeremia 50:2). A fiti foe dati-ede, taki den sma di e leri a soifri tongo moesoe poeroe den sani di abi foe doe nanga falsi relisi na pasi, den moesoe trowe den leri foe en, den moesoe broko nanga den fesa foe en, èn den moesoe figi poeroe so srefi a fasi fa den e taki wortoe di e sori a fowtoe fasi foe denki foe a relisi disi. Boiti dati, Openbaring 16:13-16 e warskow wi taki a kari di e tjari den nâsi kon na wán foe opo tanapoe kontrari Gado Kownoekondre, so srefi no de krin, foe di a de na ondro krakti foe den ogri jeje. So boen wi moesoe de na ai foe no meki no wan foe den doti sani disi abi wan pori krakti a tapoe na taki foe wi.
21. Boiti wortoe di sma e taki, san a soifri tongo wani taki moro fara?
21 San wi e leri, den e kari wan tongo èn disi de joisti, ma dati no wani taki, taki den sma di e taki en e leri soso fa foe gebroiki den wortoe di Jehovah pipel gwenti foe gebroiki. A fasi fa a sten e piki, a fasi fa a fesi e sori, èn den gebaar de so srefi prenspari. Den kan tjari boskopoe abra di wortoe wawan no man doe. Foeroe tron den e sori san wi de troetroe na inisei. Den kan sori efoe wi roetoe poeroe djaroesoe, kesekese èn atibron, sani di alamala de wroko foe a sondoe skin. Te Gado jeje e wroko na wan frifasi na ini wi libi, den froktoe foe en e kon foe si ini a fasi fa wi e kenki prakseri nanga trawan. — Galasia sma 5:19-23; Efeise sma 4:31, 32.
22. Te wi leri a soifri tongo boen, fa a abi krakti tapoe den bosroiti di wi e teki?
22 Iniwan sma di leri wan njoen tongo sabi taki a doro wan troetroe heimarki te a e si taki a e denki troetroe na ini a njoen tongo dati, na presi foe poti wortoe abra komoto foe en mama tongo. So a de toe, te wi e studeri a waarheid, e doe troetroe moeiti foe tjari en na ini wi libi, èn e prati en doronomo nanga trawan, dan safrisafri wi o si taki wi e denki akroederi na waarheid. A no foe têgo wi e teki den owroe sani gersi nanga den njoen sani èn abi moeiti foe teki wan sei. Srefi na ini pikin sani, bijbel gronprakseri e kon na ini wi prakseri foe gi a tiri di de fanowdoe. — Odo 4:1-12.
23. Awinsi san a mama tongo foe den mag de, san e sori taki Jehovah Kotoigi na a heri grontapoe e taki a soifri tongo?
23 A de troe, taki a libisma famiri e gebroiki doesoendoesoen tongo, ma sma kan taki a soifri tongo na ini ala den tongo disi. Na ini wánfasi, na a heri grontapoe, Jehovah Kotoigi e meki boen gebroiki foe a soifri tongo te den e dini skowroe na skowroe foe gi wan poebliki kotoigi, di e gi Jehovah, wi lobi Gado, grani.
Overzicht aksi
◻ San de alamala ini a tori foe a presenti foe man taki?
◻ San na a soifri tongo?
◻ Na ini soema Sefania 3:9 kon troe?
◻ Fa wi kan sori taki wi lobi a soifri tongo troetroe?
[Prenki na tapoe bladzijde 17]
Den sma di sabi a soifri tongo e prati en nanga trawan
[Prenki na tapoe bladzijde 19]
Awasi san a mama tongo foe den de, tokoe Jehovah Kotoigi na a heri grontapoe e taki a soifri tongo