Kon de wán nanga jepi foe na soifri tongo
„Dan mi sa meki pipel kenki go tapoe wan soifri tongo, so taki den alamala kan kari na nen foe Jehovah, foe dini en skowroe na skowroe.” — SEFANIA 3:9.
1. Sma jere Jehovah Gado taki oiti wan ten?
A TONGO di Jehovah Gado e taki de soifri. Ma sma jere en e taki oiti wan ten? Ija, foe troe! Disi ben pasa di en Manpikin, Jesus Krestes, ben de na grontapoe 19 jarihondro pasa kaba. Foe eksempel, di Jesus ben kisi dopoe, sma ben jere Gado e taki: „Disi na mi Manpikin, na lobiwan, di mi ben feni boen” (Mateus 3:13-17). Dati ben de wortoe foe soifri waarheid, di Jesus nanga Johanes na Dopoeman ben jere ini wan tongo di libisma e taki.
2. San den wortoe foe na apostel Paulus „den tongo foe . . . den engel” e tjari kon a krin?
2 Wan toe jari a baka, na kresten apostel Paulus ben taki foe „den tongo di libisma nanga engel e taki” (1 Korente sma 13:1). San disi e tjari kon a krin? We, a e sori taki no soso libisma, ma jeje toe abi wan tongo nanga a koni foe man taki! A no de foe taki, dati Gado nanga den engel no e taki nanga makandra, foe di den e gebroiki sten nanga tongo di wi ben sa kan jere èn froestan. Foe san-ede? Foe di a loktoe, so leki a di lontoe grontapoe, de fanowdoe foe tjari den skwala foe babari foe sten, di libisma kan jere èn froestan, go moro fara.
3. Fa a tongo di libisma e taki doe kon?
3 Fa na tongo di libisma e taki doe kon? Wan toe sma e taki, dati den fositen tata foe wi ben feti foe taki nanga makandra nanga jepi foe grompoe nanga knoroe. A boekoe Evolution (Life Nature Library) e taki: „Wan kesikesi-libisma foe wan sani foe wan miljoen jari pasa kaba . . . kande ben kon sabi wan toe babari foe kan taki sani.” Ma Ludwig Koehler, a lexicograaf (skrifiman foe wortoeboekoe) di abi bigi nen, ben taki: „A taki di libisma man taki na wan kibritori; a de wan presenti foe Gado, wan wondroe”. Ija, a taki di libisma man taki, de wan presenti foe Gado, bika Gado ben gi na fosi man, Adam, wan tongo di a ben taki. A ben de leki fa a sori, a tongo di den ben kari te foe kaba na Hebrew tongo. Den Israèl sma ben taki a tongo dati, bika den ben de bakapikin foe „Abram, na Hebrew man”, èn wan getrow famiri-edeman di na afo foe en, Sèm, ben de wan manpikin foe Noa, na bowman foe na ark (Genesis 11:10-26; 14:13; 17:3-6). Nanga na profeiti blesi foe Gado tapoe Sèm na ini prakseri, a de reidelek foe kon na a bosroiti, taki wan sani di Jehovah ben doe na wan wondroe fasi 43 jarihondro pasa kaba, no ben abi krakti tapoe a tongo di Sèm ben taki. — Genesis 9:26.
4. Soema ben de Nimrod, èn fa Satan Didibri ben gebroiki en?
4 Na ini a ten dati ’na heri grontapoe ben abi wán tongo èn wán groepoe foe wortoe’ (Genesis 11:1). Nimrod, „wan kefarlek ontiman di ben de kontrari Jehovah”, ben libi na a ten dati (Genesis 10:8, 9). A moro gran feanti foe a libisma famiri, Satan, di no de foe si, spesroetoe ben gebroiki Nimrod foe seti a pisi foe na organisâsi foe Didibri na grontapoe. Nimrod ben wani foe meki nen gi ensrefi, èn na heimemre fasi dati panja go na den bakaman foe en, di ben bigin foe meki wan spesroetoe bow-projekt na ini a kondre Sinear. Leki fa Genesis kapitel 11, vers 4, e taki, dan den ben taki: „Oen kon! Meki wi bow wan foto gi wisrefi èn so srefi wan toren di na penti foe en e doro te na hemel, èn meki wi meki wan barinen gi wisrefi, so taki den no panja wi go na a heri grontapoe”. A wroko dati di ben de kontrari Gado komando foe „foeroe grontapoe”, ben kon na wan kaba di Jehovah broeja na tongo foe den oproeroeman. „Foe dati-ede”, na bijbel tori e taki, „Jehovah ben panja den foe drape go na tapoe a heri fesi foe grontapoe, èn safrisafri den ben tapoe nanga na bow foe na foto” (Genesis 9:1; 11:2-9). A foto dati ben nen Babel, ofoe Babilon (san wani taki „Broeja”), „foe di drape Jehovah ben broeja a taki foe na heri grontapoe”. — Byington.
5. (a) San no ben go doro di Gado ben broeja na tongo foe libisma? (b) Na sortoe bosroiti wi kan kon ini a tori foe na tongo foe Noa nanga Sèm?
5 A wondroe dati — a broeja foe na wan enkri libisma tongo — ben abi leki bakapisi taki sma ben moesoe foeroe grontapoe, so leki fa Gado ben gi Noa na komando, èn a ben tapoe iniwan prakseri di Satan ben sa kan abi foe opo wan anbegi nanga jepi foe libisma di ben meki oproeroe nanga na Soeverein Masra foe hemel nanga grontapoe, wan anbegi foe Satan ensrefi, di no krin èn pe sma tjari kon na wán. A de troe, taki, di sma ben anbegi na wan falsi fasi na wan ofoe tra fasi, den ben tron srafoe foe Didibri, èn den ben e dini den ogri jeje, foe di den ben meki gado èn oemagado, ben gi den nen na ini den difrenti tongo, èn ben e anbegi den (1 Korente sma 10:20). Ma san na wan enkri troe Gado ben doe na ini Babel, ben sorgoe taki a meki foe wán falsi fasi foe anbegi, pe sma tjari kon na wán èn pe den e gi Didibri na anbegi di a ben angri foe en srefisrefi, no go doro. A no de foe taki, dati na regtfardiki Noa nanga en manpikin Sèm no ben go moksi densrefi noiti na ini a pori sani dati ini na kondre Sinear. A de foe dati-ede redelijk foe kan kon na a bosroiti, taki a tongo foe den ben de a srefi tongo di na getrow Abram (ofoe Abraham) ben taki — na tongo di Gado ben taki nanga na man Adam na ini a djari foe Eden.
6. Fa Jehovah ben sori na a dei foe na Pinksterfesa 33 G. T., taki a man meki sma taki ini tongo?
6 Jehovah, di ben broeja a fosi tongo foe a libisma famiri, man foe gi sma so srefi a koni foe man taki ini tongo. Èn a ben doe disi na a dei foe na Pinksterfesa ini a jari 33 foe wi Gewoon Teri! So leki Tori foe den Apostel 2:1-11, e taki, dan so wan 120 bakaman foe Jesus Krestes ben kon makandra na a ten dati na wan tapoesodro na ini Jerusalem (Tori foe den Apostel 1:13, 15). Wantronso, wan babari ben komoto foe hemel „leki na babari foe wan tranga winti”. Sma ben kan si „tongo neleki faja” di ben prati densrefi na tapoe den disipel. Ne den disipel ben „kon foeroe nanga santa jeje, èn den bigin foe taki na ini difrenti tongo, so leki fa na jeje ben gi den foe taki”. Ini den tongo dati, di Gado ben gi den, den ben taki „foe den bigi wroko foe Gado”. Èn fa dati ben de wan troetroe wondroe, di djoe nanga proseliet di no ben taki a srefi tongo, èn di ben komoto foe den farawe presi so leki Mesopotamia, Egipti, Libia nanga Rome, ben man foe froestan na boskopoe di e gi libi!
Wan tongo di Gado gi ini a ten disi!
7. Sortoe howpoe ben sa de na wi fesi efoe sma ben sa taki èn froestan soso wán tongo na a heri grontapoe?
7 Foe di, nanga jepi foe wan wondroe, Gado man foe gi sma difrenti tongo foe taki, dan a no ben sa de wan moi sani efoe a ben sa man foe meki sma taki èn froestan soso wán tongo na a heri grontapoe? Dati ben sa meki a froestan di a libisma famiri moesoe froestan sani foe makandra, kon moro boen? So leki fa The World Book Encyclopedia e taki en: „Efoe ala pipel ben taki na srefi tongo, dan den koeltoeroe èn ekonomia banti ben sa de moro tranga, èn a boen wani a mindri kondre ben sa gro”. We, ini den jari di pasa, sma ben presenteri no moro mendri leki 600 universeel tongo. Foe den disi, Esperanto, ben abi a moro bigi krakti tapoe sma, foe di so wan 10.000.000 sma leri na tongo dati sensi den ben meki en ini a jari 1887. Tokoe noiti den moeiti foe libisma, foe tjari a libisma famiri kon na wán nanga jepi foe wan universeel tongo, ben abi boen bakapisi. Te joe e loekoe en fini, dan moro nanga moro problema e tjari pratifasi kon na ini a grontapoe disi, ala di ’gadolowsoe sma e kon ogri moromoro.’ — 2 Timoteus 3:13.
8. San ben sa de ete, srefi efoe den ben teki wan universeel tongo ini a disiten grontapoe, èn foe san-ede?
8 Na a sei foe kerki, bigi broeja de. Ma a no de so, taki wi moesoe froewakti disi, foe di a bijbel boekoe Openbaring e kari na grontapoe makti foe falsi relisi „Babilon na Bigiwan”? (Openbaring 18:2) Ija, bika „Babilon” wani taki „Broeja”. Srefi efoe sma ben sa teki wan tongo di densrefi meki ofoe wan natuurlijk tongo, so leki a Ingrisitongo, Fransitongo, Doisritongo ofoe Rusiatongo, leki wan universeel tongo gi na grontapoe foe disiten, dan tokoe pratifasi ben sa de ete tapoe a kontren foe relisi noso tapoe tra kontren. Foe san-ede? Foe di „a heri grontapoe de ini na makti foe na gadolowsoewan”, Satan Didibri (1 Johanes 5:19). En de na moro bigi eksempel foe a soekoe foe wan sma eigi wini nomo, èn na wan gridi fasi a e angri foe na heri libisma famiri anbegi en, neleki fa a ben doe disi ini den dei foe Nimrod èn na Toren foe Babel. Ija, wan universeel tongo di onvolmaakti libisma ben sa kan taki, ben sa kan gi Satan srefi na okasi foe seti wan Didibri anbegi pe sma tjari kon na wán! Ma noiti Jehovah sa gi pasi foe dati; ija, heri-esi a sa tjari wan kaba kon na ala falsi fasi foe anbegi, di de na ondro krakti foe Didibri.
9. Fa den e tjari sma foe ala nâsi èn ras kon na wán now?
9 Tokoe wan froewondroe sani de, taki boen sma foe ala nâsi èn ras e tjari kon na wán nownow. Disi e pasa tapoe den kondisi di Gado poti èn foe na boen foe en anbegi. Na ini a ten disi, Gado e meki taki libisma man foe leri èn taki na wán enkri soifri tongo di de na grontapoe. Èn a de troetroe wan universeel tongo. Ija, Jehovah Gado e leri na soifri tongo disi a foeroe sma, di komoto foe ala nâsi foe a disiten grontapoe. Disi de leki wan kontroe foe a profeiti pramisi foe Gado nanga mofo foe en profeiti èn kotoigi, Sefania: „Dan mi sa meki pipel kenki go tapoe wan soifri tongo [letterlijk: „wan krin mofoboeba”], so taki den alamala kan kari na nen foe Jehovah, foe dini en skowroe na skowroe” (Sefania 3:9). San na a soifri tongo disi?
San a soifri tongo wani taki
10. San na a soifri tongo?
10 A soifri tongo na a waarheid foe Gado di de foe feni na ini en eigi Wortoe, den Santa Boekoe. A de moro spesroetoe a waarheid di abi foe doe nanga Gado Kownoekondre, di sa tjari vrede èn tra blesi kon gi na libisma famiri. A soifri tongo e teki fowtoedoe foe relisi èn falsi anbegi poti a wan sei. A e tjari ala den wan di e taki en kon na wán ini a soifri, krin, blesi anbegi foe na libi èn troe Gado, Jehovah. Na ini a ten disi, so wan 3000 tongo e wroko leki wan skotoe foe wi no froestan makandra èn hondrohondro falsi fasi foe anbegi e broeja na libisma famiri. Fa wi breiti foe dati-ede, taki Gado e gi pipel na okasi foe kenki go tapoe na froewondroe, soifri tongo disi!
11. San soifri tongo ben doe gi sma foe ala nâsi èn ras?
11 Ija, sma foe ala nâsi èn ras kon sabi foe gebroiki na tongo boen. Leki a wán enkri soifri tongo na jejefasi na grontapoe, a e dini leki wan toemoesi bigi krakti di e tjari sma kon na wán. A e meki taki ala den sma di e taki en e „kari Jehovah nen, so taki den kan dini en skowroe na skowroe”, ofoe letterlijk: „nanga wán skowroe”. Na so fasi den e dini Gado „leki wán man”, „makandra leki wán man èn nanga wán skowroe” (The New English Bible; The Amplified Bible). A vertaling foe Steven T. Byington e taki: „Dan mi [Jehovah Gado] sa meki den mofoboeba foe ala den pipel kon krin, so taki den alamala kan kari Jehovah nen èn wroko makandra ini en dienst”. So wan wrokomakandra ini foeroe tongo na a heri grontapoe ini a dienst foe Gado de soso a mindri Jehovah Kotoigi. Na ini a ten disi, moro leki fo miljoen foe den Kownoekondre preikiman disi e preiki a boen njoensoe na ini foeroe tongo di libisma e taki na ini 212 kondre. Tokoe, den Kotoigi e „taki ini akroederi nanga makandra” èn den de „krosibei na ini wánfasi ini na srefi jeje èn ini na srefi fasi foe denki” (1 Korente sma 1:10). Disi de so, foe di ala Kotoigi foe Jehovah e taki na wán enkri soifri tongo, awansi pe den de na grontapoe, foe prèise a hemel Tata foe den èn gi en glori.
Leri na soifri tongo now!
12, 13. (a) Foe san-ede joe moesoe doe moeiti foe taki a soifri tongo? (b) Foe san-ede den wortoe na ini Sefania 3:8, 9 wani taki so foeroe ini a ten disi?
12 Foe san-ede joe moesoe doe moeiti foe taki a soifri tongo? Wan reide de, foe di joe libi e anga foe a leri èn a taki foe a tongo disi. Leti bifo Gado ben pramisi foe „meki sma kenki go tapoe a soifri tongo”, a ben warskow: „’Tan froewakti mi,’ Jehovah taki, ’te na a dei te mi opo tanapoe foe wini, bikasi mi kroetoe bosroiti de, foe tjari nâsi kon makandra, taki mi tjari kownoekondre kon na wán, foe mi kanti mi kroetoe kon a den tapoe, heri mi faja atibron, bikasi nanga na faja foe mi tranga wroko heri grontapoe sa pori.’” — Sefania 3:8.
13 Toetenti na siksi jarihondro pasa kaba, na Soeverein Masra Jehovah ben taki den wortoe disi foe na fosi leisi na ini Juda, di ben abi Jerusalem leki mamafoto. Ma den wortoe dati ben de spesroetoe gi wi dei, bika Jerusalem ben de na prenki foe na krestenhèit. Èn a ten foe wi, sensi a hemel Kownoekondre foe Gado ben opo ini 1914, de a dei foe Jehovah foe tjari nâsi kon makandra èn foe tjari kownoekondre kon na wán. Nanga jepi foe wan bigi kotoigi wroko, a tjari den alamala kon makandra foe hori ai a tapoe den. Foe a sei foe den nâsi, disi ben meki den opo densrefi kontrari na prakseri foe Gado. Ma Jehovah Gado nanga sari-ati fasi e meki sma, di komoto foe ala den nâsi disi, kon na wán, foe taki a soifri tongo. Na so fasi, ala den sma di e soekoe libi na ini en njoen grontapoe di a ben pramisi, e dini en na ini wánfasi bifosi ala den nâsi sa kisi pori na ini a faja foe na atibron foe Gado na ini „a feti foe na bigi dei foe Gado na Almaktiwan,” di sma gwenti foe kari Armagedon (Openbaring 16:14, 16; 2 Petrus 3:13). Kolokoe taki den wan di e taki na soifri tongo èn e kari Jehovah nen na ini bribi leki troe anbegiman di de na ini wánfasi, sa njanboen foe na kibri di Gado e gi den na ini na faja foe na rampoe dati foe grontapoe. Gado sa tjari den libilibi go na ini a njoen grontapoe, pe te foe kaba, soso na soifri tongo sa de na den mofoboeba foe ala libisma.
14. Fa Gado ben sori nanga mofo foe Sefania, taki foe pasa libilibi na kaba foe na seti foe sani wani taki foe handri wantewante?
14 Nanga mofo foe en profeiti Sefania, Jehovah e meki kon a krin taki den sma di e howpoe foe pasa libilibi na kaba foe na disiten seti foe sani, sa moesoe handri wantewante. Akroederi Sefania 2:1-3, dan Gado e taki: „Kon makandra, ija, kon na wán, o nâsi di fesi no e lasi kloroe foe sjen ede. Bifo na wet meki wan sani si na leti, bifo na dei pasa neleki boeba aleisi, bifo na faja atibron foe Jehovah e kon na oenoe tapoe, bifo na dei foe Jehovah faja-ati e kon na oen tapoe, soekoe Jehovah ala oenoe safri-atiwan foe grontapoe, di e doe En kroetoe bosroiti. Soekoe regtfardikifasi, soekoe safri-atifasi. Kande oenoe sa kisi kibri tapoe a dei foe Jehovah atibron.”
15. (a) San ben de na fosi kontroe foe Sefania 2:1-3? (b) Soema ben pasa libilibi na kroetoe di Gado ben tjari kon tapoe Juda, èn sortoe prenki a pasa libilibi disi abi ini a ten disi?
15 Den wortoe disi ben abi den fosi kontroe na ini Juda nanga Jerusalem foe owroeten. Na pipel foe Juda di ben sondoe no ben teki na kari foe Gado na wan boen fasi, so leki fa a ben kon a krin nanga a strafoe di a ben tjari kon a den tapoe nanga jepi foe den Babilon sma ini a jari 607 bifo G. T. Neleki fa Juda ben de na ’nâsi di fesi no e lasi kloroe foe sjen ede’ na fesi foe Gado, na so a krestenhèit ben de wan „nâsi” sondro sjen na fesi foe Jehovah. Ma wan toe sma foe Juda nanga tra sma ben tan na libi, foe di den ben gi jesi na Gado wortoe, èn a mindri den, joe ben abi Jehovah getrow profeiti Jeremia. Tra sma di ben tan na libi ben de wan Etiopia man di ben nen Ebèd-meilèk nanga den bakapikin foe Jonadab (Jeremia 35:18, 19; 39:11, 12, 16-18). Na a srefi fasi „wan bigi ipi” foe Jesus „tra skapoe” di tjari kon makandra foe ala nâsi na ini a ten disi sa pasa Armagedon libilibi èn go na ini Gado njoen grontapoe (Openbaring 7:9; Johanes 10:14-16). Soso den sma di leri èn e taki na soifri tongo sa de den sma di de nanga prisiri èn di sa tan na libi.
16. San wan sma moesoe doe foe kisi kibri „na a dei foe Jehovah atibron”?
16 Neleki fa a ben de na wortoe foe Jehovah taki Juda nanga Jerusalem ben moesoe wai poeroe, na so na krestenhèit moesoe kisi pori toe. Ija, na pori foe ala falsi relisi de krosibei, èn den sma di wani foe tan na libi moesoe handri wantewante. Den moesoe doe so „bifo a dei e pasa neleki aleisi boeba”, di winti e wai gowe esi-esi, neleki te den e trowe aleisi na loktoe na tapoe a gron pe den e masi aleisi. Foe kisi froeloesoe foe na atibron foe Gado, wi moesoe taki na soifri tongo èn doe wan sani a tapoe na warskow foe Gado bifo na dei foe Jehovah faja atibron kon a wi tapoe. Na ini den dei foe Sefania èn na ini a ten disi, safri-ati sma e soekoe Jehovah Gado, èn so srefi regtfardikifasi èn safri-atifasi. A soekoe di wi e soekoe Jehovah, wani taki foe lobi en nanga wi heri ati, sili, froestan èn krakti (Markus 12:29, 30). „Kande [den wan di e doe disi] sa kan kisi kibri na a dei foe Jehovah atibron”. Ma foe san-ede na profeititori e taki „kande”? Foe di froeloesoe e anga foe getrowfasi èn horidoro (Mateus 24:13). Den sma di e fiti densrefi na den regtfardiki markitiki foe Gado èn e tan taki na soifri tongo sa kisi kibri na a dei foe Jehovah atibron.
17. San na den aksi di tan foe wi go loekoe?
17 Foe di na dei foe Jehovah atibron de krosibei èn froeloesoe e anga foe a leri èn a gebroiki foe na soifri tongo, dan now a de na ten foe gi wisrefi krinkrin foe studeri en èn foe taki en. Ma fa wan sma kan leri na soifri tongo? Èn fa joe kan abi wini efoe joe e taki en?
Fa joe ben sa piki?
◻ Fa a tongo di libisma e taki doe kon?
◻ San na a soifri tongo?
◻ Foe san-ede den wortoe ini Sefania 3:8, 9 wani taki so foeroe ini a ten disi?
◻ San wi moesoe doe foe kisi kibri „na a dei foe Jehovah atibron”?
[Prenki na tapoe bladzijde 10]
Na ini Babel Gado ben panja libisma foe di a ben broeja a tongo di den ben taki