Taki na soifri tongo èn libi foe têgo!
„Soekoe Jehovah . . . Soekoe regtfardikifasi, soekoe safri-atifasi. Kande joe sa kisi kibri na a dei foe Jehovah atibron.” — SEFANIA 2:3.
1. (a) Sortoe fasi studenti e gebroiki foe leri wan freimde tongo? (b) Foe san-ede wi moesoe taki na soifri tongo?
STUDENTI kan leri wan njoen tongo foe di den e gebroiki a fasi foe gramatika (dati na den regel di a tongo abi foe taki en soifri) noso na fasi fa foe taki a tongo. Nanga a fasi foe gramatika, moro foeroe den studenti e gebroiki leriboekoe èn e leri gramatika regel. Nanga a fasi fa foe taki a tongo, den studenti e soekoe foe taki den wortoe èn patron foe wortoe na a srefi fasi leki fa a leriman foe den e taki den. Ala toe fasi e gebroiki foe leri a „soifri tongo”. Èn a de prenspari taki wi taki a tongo disi efoe wi e howpoe foe „kisi kibri na a dei foe Jehovah atibron”. — Sefania 2:1-3; 3:8, 9.
2. Fa wi kan leri, san sma ben sa kan kari den gramatika regel?
2 Na moro prenspari leriboekoe di e gebroiki foe leri a soifri tongo na a bijbel. Wan fajafaja studie foe a bijbel èn foe publikâsi di abi den fondamenti ini a bijbel, e leri joe san den e kari den gramatika regel foe na soifri tongo. Wan oso-bijbelstudie di wan Kotoigi foe Jehovah e hori, na wan boen bigin. Gi den wan di gi densrefi abra kaba, studeri a bijbel doronomo èn fajafaja de prenspari. Ma spesroetoe fasi di abi boen bakapisi de foe leri a soifri tongo? Èn sortoe winimarki sa kon te joe e taki en?
Fa foe leri na soifri tongo
3. San na wan fasi foe leri na soifri tongo?
3 Wan fasi foe leri na soifri tongo na foe teki den waarheid di joe e leri, tjari kon ini akroederi nanga den penti di joe sabi kaba, neleki fa wan studenti di e leri wan tongo safrisafri, e poti difrenti gramatika regel kon na makandra. Foe eksempel, kande joe ben kon sabi wan dei kaba taki Jesus Krestes de a manpikin foe Gado, ma joe ben sabi pikinso nomo foe a wroko foe en. Sensi na ten dati, dan studie foe a bijbel ben leri joe, taki Krestes e tiri now leki wan hemel kownoe èn taki na ini a ten foe en Doesoen Jari Tiri a sa tjari libisma, di e gi jesi, go na volmaaktifasi (Openbaring 20:5, 6). Ija, te joe e teki njoen prakseri tjari kon ini akroederi nanga den wan di joe sabi kaba, dan disi e meki a froestan di joe e froestan na soifri tongo kon moro boen.
4. (a) San na wan tra fasi foe leri den ‘gramatika regel’ foe na soifri tongo, èn sortoe bijbel tori den e gebroiki foe agersi disi? (b) San ben pasa di Gideon nanga en dri hondro man ben opo doe wan sani? (c) San wi e leri foe na tori foe Gideon?
4 Wan tra fasi fa joe kan leri den ’gramatika regel’ foe na soifri tongo na foe man si den sani, di pasa èn di skrifi na ini bijbel libilibi ini joe prakseri. Foe agersi disi: Proeberi foe ’si èn jere’ na tori di skrifi na ini Kroetoeman 7:15-23. Loekoe! A kroetoeman foe Israèl, di nen Gideon, prati a legre foe en na ini dri groepoe di ibriwan foe den abi wán hondro man. Na ini a doengroe, den e saka safri foe na bergi Gilboa go na gron èn e lontoe na kampoe foe den Midian sma di e sribi. Den dri hondro man disi abi nofo fetisani? Te joe loekoe en na a sei foe wan sroedati, nôno. Ija, heimemre sroedatiman ben o meki spotoe, lafoe den! Ibriwan foe den man abi soso wán toetoe, wán bigi watrakan nanga wán flambo na ini a watrakan. Ma arki! Te a marki gi, dan den wan hondro man di de nanga Gideon e bro tapoe den toetoe èn e naki den watrakan foe den broko. So den tra toe hondro man e doe toe. Te den alamala e opo den flambo di e leti go na loktoe, joe e jere den e bari taki: „Na feti-owroe foe Jehovah èn foe Gideon!” Fa disi e frede den Midian sma! Den e waka leki wan droengoeman komoto foe a tenti foe den, nanga sribi a den ai, di piri-opo foe frede te den e si den fajatongo di e dansidansi èn di e skèin go tapoe den skin di no de krin foe si, san e meki wan frede di abi en gron tapoe kroektoebribi, opo kon ini den. Ala di den Midian sma e bigin lowe, den man foe Gideon e tan blo na tapoe den toetoe, èn Gado e meki den feanti foe den feti kontrari makandra. Fa disi de wan krakti leri na ini a soifri tongo! Gado kan froeloesoe den foetoeboi foe en sondro wan sroedati legre foe libisma. Boiti dati, „Jehovah no sa libi en pipel, foe en bigi nen ede.” — 1 Samuèl 12:22.
5. Fa kresten konmakandra kan jepi foe meki a fasi fa wi e taki kon moro boen?
5 Te den e leri studenti wan freimde tongo nanga jepi foe a fasi fa foe taki a tongo, dan den e proeberi foe taki soifri, na a srefi fasi den wortoe èn den patron foe wortoe di den e jere a leriman e taki. Fa wi abi moi okasi foe taki a soifri tongo na den kresten konmakandra! Drape wi e jere fa tra sma e taki wortoe ini a tongo dati foe bijbel waarheid, èn wi kan abi na grani foe wisrefi gi kommentaar. Wi frede taki wi kan taki wan sani di fowtoe? No meki dati de a moro prenspari broko-ede foe wi, bika wan fowtoe di e poti reti na wan switifasi nanga jepi foe na owroeman di e hori so wan konmakandra, so leki na Waktitoren-studie di e hori ala wiki, kan meki a fasi fa wi e taki kon moro boen. Foe dati-ede, go doronomo na den konmakandra èn teki prati na den. — Hebrew sma 10:24, 25.
Fa sani di no soifri e boro kon safrisafri na ini
6. Foe san-ede wi kan si so wan difrenti a mindri Jehovah Kotoigi nanga den relisi organisâsi foe na krestenhèit?
6 Den sma di e taki foe den prakseri foe Jehovah èn di e meki en hemel Kownoekondre bekenti, e taki na soifri tongo leki Kotoigi foe en. Den e meki en nen bekenti èn e dini en „skowroe na skowroe”, ofoe leki wán man (Sefania 3:9). Ala di den relisi foe na krestenhèit abi na bijbel, tokoe den no e taki na soifri tongo ofoe e kari na nen foe Gado na ini bribi (Joèl 2:32). Den no abi wan boskopoe di de ini akroederi nanga makandra èn di abi en fondamenti a tapoe den Boekoe. Foe san-ede? Foe di den e poti relisi gwenti, grontapoe filosofie nanga politiek loyaalfasi moro hei leki a Wortoe foe Gado. Den prakseri, den froewakti, èn den fasi foe den de foe a gadolowsoe grontapoe disi.
7. Foe sortoe difrenti a mindri Jehovah Kotoigi nanga falsi relisi den e taki na ini 1 Johanes 4:4-6?
7 Na krestenhèit — èn foe taki en leti, na heri grontapoe makti foe falsi relisi — no e taki na srefi tongo leki Jehovah Kotoigi. A de moi foe si taki na apostel Johanes ben skrifi gi den wan di e taki na soifri tongo: „Oenoe komoto foe Gado, . . . èn oenoe wini den sma dati, foe di a sma di de na ini wánfasi nanga oenoe de moro bigi leki a sma di de na ini wánfasi nanga grontapoe. Den komoto foe grontapoe; foe dati-ede den e taki san e komoto foe grontapoe èn grontapoe e arki den. Wi komoto foe Gado. A sma di e kisi na sabi foe Gado, e arki wi; a sma di no komoto foe Gado no e arki wi” (1 Johanes 4:4-6). Den foetoeboi foe Jehovah wini den falsi leriman, foe di Gado, di de na ini wánfasi nanga en pipel, „de moro bigi leki [Didibri, di] de na ini wánfasi nanga grontapoe”, na onregtfardiki libisma libimakandra. Foe di sma di fadon komoto foe bribi „komoto foe grontapoe” èn abi na gadolowsoe jeje foe grontapoe, meki „den e taki san e komoto foe grontapoe èn grontapoe e arki den”. Ma den sma di gersi skapoe e arki den di komoto foe Gado, foe di den sabi taki a pipel foe Jehovah e taki na soifri tongo foe bijbel waarheid di Gado gi nanga jepi foe en organisâsi.
8. Soema na a sma foe kroektoedoe?
8 Den ben taki a fesi foe wan bigi fadon komoto foe bribi, èn a ’kibritori foe kroektoedoe’ ben e wroko kaba na ini a fosi jarihondro G. T. Baka wan pisiten, man di ben kisi a posisi — ofoe ben teki en nanga tranga — foe gi leri ini a gemeente, ben leri sma foeroe falsi kerkileri. A tongo di den ben taki no ben de soifri kwetikweti. Na so a „sma foe kroektoedoe”, di abi foeroe memre, ben opo kon, dati na den kerki tiriman foe na krestenhèit, di ben lobi falsi relisi gwenti, filosofie foe grontapoe nanga leri di no komoto foe na bijbel srefisrefi. — 2 Tesalonika sma 2:3, 7.
Sma e jere na soifri tongo na a heri grontapoe
9. Sortoe gro na a sei foe relisi ben de foe si ini na di foe tinaneigi jarihondro?
9 Soso wan pikin groepoe foe sma di e frede Gado ’ben strei sondro foe weri gi na bribi di den ben gi abra na den santawan’ (Judas 3). Pe den ben kan feni den sortoe bribiman disi? Foeroe jarihondro, falsi relisi ben hori den bigi ipi sma ini jeje doengroe, ma Gado ben sabi den wawan sma di a ben feni boen (2 Timoteus 2:19). Èn dan, a mindri foe den bisnis, industrie èn sociaal kenki foe na di foe 19 jarihondro, sten ben opo, di no ben gersi di foe na babel di sma ben gwenti foe a broejafasi foe falsi relisi. Pikin groepoe ben proeberi foe froestan den marki foe a ten èn ben taki a fesi foe a di foe toe kon foe Jesus, ma a no alamala ben taki a soifri tongo.
10. Sortoe groepoe foe a „di foe toe kon” Gado ben teki foe taki na soifri tongo, èn foe san-ede a de krin taki na anoe foe Jehovah de nanga den?
10 Ma na ini 1879, a ben kon a krin sortoe wan foe den sten „foe na di foe toe kon”, Jehovah ben teki foe taki na soifri tongo leki en Kotoigi. Na a ten dati wan pikin bijbelstudie groepoe, ben kon makandra na ondro a tiri foe Charles Taze Russel, na ini Pittsburgh (Pennsylvania, VS). Den ben de seiker taki a di foe toe kon foe Jesus ben sa de na bigin foe en denoja di no de foe si, taki wan ten foe grontapoe banawtoe ben de a den fesi, èn taki baka dati na doesoen jari tiri foe Krestes ben sa kon di ben sa tjari a paradijs na grontapoe kon baka, nanga têgo libi gi libisma di e gi jesi. Na ini juli 1879 den bijbelstudenti disi ben bigin foe tjari a tijdschrift di sma sabi now leki Na Waktitoren, kon na doro. Foe na fosi uitgave den ben prati soso 6000 eksemplaar. Ma „na anoe foe Jehovah” ben de nanga den Kotoigi dati, foe di den e tjari na tijdschrift disi kon na doro now ini 111 tongo, èn foe wán uitgave den e druk gemiddeld moro leki 15.000.000 tijdschrift. — Teki gersi Tori foe den Apostel 11:19-21.
11, 12. San na wan toe bijbel waarheid di den sma di e taki na soifri tongo, e froestan?
11 Nanga jepi foe a bijbel èn den poeblikâsi foe Jehovah Kotoigi, èn spesroetoe nanga jepi foe den fajafaja kresten disi di e preiki na boen njoensoe, sma ben kon sabi na soifri tongo na a heri grontapoe. Èn fa den sma di e taki na tongo disi e njanboen foe den bigi winimarki! Na presi foe taki, dati ’Gado na Gado, Krestes na Gado, èn na Santa Jeje na Gado’, na ini a dangra tongo foe den sma di e bribi na ini a Driwanfasi, den e agri nanga na sei di bijbel e teki, taki Jehovah de a Moro Hei Sma, Jesus Krestes leki wan moro mendriwan na en Manpikin, èn na santa jeje na a froewondroe wroko krakti foe Gado (Genesis 1:2; Psalm 83:18; Mateus 3:16, 17). Sma di e taki na soifri tongo sabi, taki libisma no ben kon foe wan moro lagi vorm foe libi nanga jepi foe evolutie, ma taki wan lobi Gado ben meki den (Genesis 1:27; 2:7). Den sabi taki na sili e stòp foe libi te sma e dede — wan troe tori di e poeroe frede gi dede krinkrin (Preikiman 9:5, 10; Esekièl 18:4). Den e froestan taki hèl na a gemeenschappelijk grebi foe na libisma famiri, no wan presi foe skin-ati na ini faja di wan ogri-ati falsi gado ben meki (Job 14:13). Den sabi so srefi taki na opobaka na a howpoe di Gado gi foe den dedewan. — Johanes 5:28, 29; 11:25; Tori foe den Apostel 24:15.
12 Den sma di e taki na soifri tongo, e sori lespeki gi broedoe èn libi (Genesis 9:3, 4; Tori foe den Apostel 15:28, 29). Den sabi taki a libi foe Krestes na grontapoe na a loesoe prijs di a ben pai gi libisma di e gi jesi (Mateus 20:28; 1 Johanes 2:1, 2). Noiti den e seni begi gi „santawan”, foe di den sabi taki den moesoe seni den begi go na Jehovah Gado nanga jepi foe Jesus Krestes (Johanes 14:6, 13, 14). Foe di na Wortoe foe Gado e kroetoe a dini foe kroektoe gado, meki den no e gebroiki stonpopki ini na anbegi foe den (Exodus 20:4-6; 1 Korente sma 10:14). Èn den e wai pasi gi den kefar foe ogri-jeje wroko foe di den e kakafoetoe gi afkodrei, di a bijbel e kroetoe toe. — Deuteronomium 18:10-12; Galasia sma 5:19-21.
13. Foe san-ede den sma di e taki na soifri tongo no de ini broeja?
13 Den foetoeboi foe Jehovah, di e taki na soifri tongo, no broeja ini a tori foe pe den de ini a lon foe na ten. Jehovah ben leri den, taki den de ini „a ten foe na kaba”, èn taki Jesus de now leki wan glori jeje di no de foe si (Danièl 12:4; Mateus 24:3-14; 2 Timoteus 3:1-5; 1 Petrus 3:18). Nanga makti hemel legre na en baka, Krestes de klariklari foe rèi go na ini wan feti foe tjari na kroetoe foe Gado kon tapoe na seti foe sani disi (Danièl 2:44; Openbaring 16:14, 16; 18:1-8; 19:11-21). Ija, èn den sma di e taki na soifri tongo, de fajafaja e doe a wroko foe meki na boen njoensoe bekenti, taki na Kownoekondre foe Gado na ondro Krestes heri-esi sa tjari na ini wan paradijs grontapoe bigi blesi kon gi a heri libisma famiri di e gi jesi (Jesaja 9:6, 7; Danièl 7:13, 14; Mateus 6:9, 10; 24:14; Lukas 23:43). Disi wawan oen ben kari èn dan wi loekoe en frafra nomo! Foe troe, na soifri tongo na a moro goedoe wan, a moro warti tongo na grontapoe!
14. Foe sortoe tra winimarki den sma di e taki na soifri tongo e njanboen foe en?
14 Na ini den winimarki di den sma, di e taki na soifri tongo, e njanboen foe en, joe abi toe „a vrede foe Gado” di e kibri sma ati èn jeje krakti (Filipi sma 4:6, 7). Den e gi jesi na bijbel wet, di e meki gesontoe, kolokoe, èn a satisfaksi di e kon, foe di wi e prisiri Jehovah, go a fesi (1 Korente sma 6:9, 10). Ija, èn sma di e taki na soifri tongo abi na howpoe foe têgo libi na ini Gado pramisi njoen grontapoe. — 2 Petrus 3:13.
Gebroiki en ofoe lasi en
15. Fa joe sa abi winimarki foe froestan na soifri tongo dorodoro?
15 Efoe joe sa moesoe taki na soifri tongo na ini a njoen grontapoe, dan joe moesoe sabi en so boen, taki a e tron na tongo di joe e denki na ini. Te wan sma e leri wan tongo, dan biginbigin a e denki na ini na mama tongo foe en èn e poti den prakseri foe en abra ini a njoen tongo dati. Ma te a kon sabi na njoen tongo moro betre, dan a e bigin foe denki na ini en sondro foe abi na fasi fanowdoe foe poti a tongo abra. Na a srefi fasi, nanga jepi foe studeri fajafaja, joe sa kan froestan a soifri tongo dorodoro, so taki joe sa sabi fa foe gebroiki den wet nanga gronprakseri foe bijbel foe loesoe problema èn foe tan na tapoe „a pasi foe libi”. — Psalm 16:11.
16. San kan pasa efoe joe no e gebroiki na soifri tongo doronomo?
16 Joe moesoe gebroiki na soifri tongo doronomo, noso joe sa lasi na man di joe man taki en boen. Foe agersi disi: Jari pasa kaba, wan toe foe wi ben leri wan freimde tongo. Wi kan memre wan toe wortoe foe na tongo dati, ma kande wi lasi a froestan di wi ben man froestan en boen, foe di wi no ben gebroiki en doronomo. Na srefi sani kan pasa nanga na soifri tongo. Efoe wi no e gebroiki en doronomo, wi kan lasi na taki di wi man taki en boen, èn na jeje sei, dati ben sa kan abi rampoe bakapisi. Meki wi taki na soifri tongo foe dati-ede doronomo na den konmakandra èn ini wi kresten diniwroko. Den aktiviteit disi, makandra nanga persoonlijk studie, sa meki wi taki sani na wan joisti fasi ini a soifri tongo. Èn fa disi de prenspari!
17. San e sori taki na tongo di joe e taki kan kibri sma libi ofoe kan meki sma lasi libi?
17 Taki kan kibri sma libi noso kan meki sma lasi libi. Wi ben kan si disi ini wan feti a mindri a Israèl lo foe Efraim èn kroetoeman Jefta foe Gilead. Foe kon sabi den Efraim sma di ben proeberi foe lowe abra na Jordan liba, den Gilead sma ben gebroiki a wakti-wortoe „Sjibolèt”, di den bigin letter foe en ben piki „sj”. Den man foe Efraim ben tori densrefi na den waktipostoe foe den Gilead sma na den presi pe sma ben kan waka na ini a lagi watra foe a Jordan, foe di den ben taki „Sibolèt” na presi foe „Sjibolèt”, èn den no ben e meki den fosi letter foe na wortoe piki boen. Leki bakapisi, den ben kiri 42.000 Efraim sma! (Kroetoeman 12:5, 6). Na a srefi fasi a kan de, taki, san den kerki tiriman foe na krestenhèit e leri kan piki pikinmoro neleki na soifri tongo gi den sma di no sabi bijbel waarheid boen. Ma foe taki na wan falsi relisi fasi, sa sori foe de wan rampoe gi joe na a dei foe Jehovah atibron.
Ini wánfasi wi e tan a libi
18, 19. San Sefania 3:1-5 wani taki?
18 Na ini Sefania 3:1-5 den e sori go na Jerusalem, foe owroeten, di no ben de getrow nanga en disiten prenki, na krestenhèit, èn den e taki: „Heloe gi en di e opo ensrefi èn di e doti ensrefi, na foto di e hori sma na ondro dwengi! A no ben arki wan sten, a no ben teki tranga leri. A no ben froetrow tapoe Jehovah. A no go krosibei foe en Gado. Den kownoe foe en na en mindri ben de lew di e bari. Den kroetoeman foe en ben de wolfoe foe neti di no ben kaw tapoe bonjo te na a mamanten. Den profeiti foe en no ben abi sjen, den ben de man di e tori sma. Den priester foe en densrefi ben doti den sani di ben santa; den ben doe ogri kontrari na wet. Jehovah ben de regtfardiki na en mindri; a no ben sa doe no wan onregtfardiki fasi. Mamanten baka mamanten a ben tan gi en eigi kroetoe bosroiti. Den no ben mankeri te na son-opo. Ma na onregtfardikiwan no ben sabi sjen”. San den wortoe dati wani taki?
19 Jerusalem foe owroeten so boen, leki a disiten krestenhèit ben opo densrefi kontrari Jehovah èn den ben doti densrefi nanga falsi anbegi. Den takroedoe foe den tiriman foe den ben abi kwinsi leki bakapisi. Ala di Gado ben warskow den foeroe leisi, tokoe den no ben arki èn no ben kon krosibei na en. Den kownoe foe den ben de neleki lew di e angri foe foefoeroe, èn di no ben poti prakseri tapoe regtfardikifasi. Den kroetoeman foe den no ben meki noti tan abra foe retifasi. Den priester foe den ben ’doti san de santa èn den ben doe ogri kontrari’ na wet foe Gado. Foe dati-ede Jehovah de klari foe ’tjari nâsi kon makandra, èn tjari kownoekondre kon na wán, foe kanti a kroetoe foe en kon a den tapoe, heri en atibron’. — Sefania 3:8.
20. (a) San sma moesoe doe foe pasa na dei foe Jehovah atibron libilibi? (b) Fa joe kan howpoe foe njanboen foe den têgo blesi foe Gado?
20 Na dei foe Jehovah atibron e kon krosibei, esi-esi. Foe dati-ede, leri èn taki na soifri tongo sondro draidrai efoe joe wani pasa libilibi go na ini Gado njoen grontapoe. Na so fasi wawan joe sa kisi kibri foe na rampoe na jeje fasi now èn foe na grontapoe rampoe di esi-esi e kon krosibei. Jehovah Kotoigi e meki a dei foe Gado atibron èn na boskopoe foe en Kownoekondre di e gi deki-ati, bekenti. Fa a e gi den prisiri foe taki foe na glori foe a kownoewroko foe en! (Psalm 145:10-13) Kon moksi nanga den, èn joe kan abi na howpoe foe njanboen foe têgo foe a libi èn tra blesi foe na Fonten foe na soifri tongo, na Soeverein Masra Jehovah.
Fa joe ben sa piki?
◻ San na wan toe fasi foe leri na soifri tongo?
◻ Foe san-ede wi kan abi winimarki foe taki na soifri tongo?
◻ San kan pasa efoe joe no e gebroiki na soifri tongo doronomo?
◻ Fa wan sma kan tan na libi na a dei foe Jehovah atibron èn njanboen foe den têgo blesi?
[Prenki na tapoe bladzijde 16]
Gideon nanga den man foe en e blo tapoe den toetoe foe den èn e opo den flambo foe den go na loktoe
[Prenki na tapoe bladzijde 18]
Foe bigin foe 1879 a ben de krin taki Gado ben gebroiki Charles Taze Russell nanga den kompe foe en foe meki na soifri tongo go na fesi
[Prenki na tapoe bladzijde 20]
Joe e moksi joesrefi nanga Jehovah Kotoigi ini a taki di den e taki na soifri tongo?