Loekoe den model foe langa-pasensi

’Gado, nanga foeroe langa-pasensi, ben froedrage den patoe foe atibron, di ben meki foe den fiti foe kisi pori.’ — ROME SMA 9:22.

1. (a) Fa Gado en Wortoe di skrifi nanga jepi foe santa jeje e tjari wini kon gi wi? (b) Ini a tori disi dan foe san-ede den e loekoe na eigifasi langa-pasensi djaso?

JEHOVAH GADO, wi Mekiman, ben gi wi en Wortoe di skrifi nanga jepi foe santa jeje, na Santa Bijbel. A moesoe dini leki ’wan lampoe gi wi foetoe èn wan leti na wi pasi’ (Psalm 119:105). Gado Wortoe e jepi wi so srefi foe de ’srekasreka dorodoro gi ibri boen wroko’ (2 Timoteus 3:16, 17). Wán fasi fa a e sreka wi gi disi de nanga a gi di a e gi wi toemoesi boen model foe langa-pasensi. Na eigifasi disi na wan foe den froktoe foe Gado jeje èn wi no mag misi foe abi en, so taki Gado kan feni wi boen èn so taki ini wánfasi wi kan feni en nanga wi kompe libisma. — Galasia sma 5:22, 23.

2. San na Griki wortoe di den ben poti abra nanga „langa-pasensi” wani taki, èn soema spesroetoe e sori na eigifasi disi?

² Na Griki wortoe di den ben poti abra nanga „langa-pasensi”, wani taki letterlijk „langafasi foe jeje”. Sma ben froeklari langa-pasensi leki „na eigifasi dati foe dwengi joesrefi te joe de na fesi tjalensi, san no e teki refensi esi-esi noso e gi strafoe wantewante” (Vine’s Expository Dictionary of Old and New Testament Words, foe W. E. Vine, Pisi 3, bladzijde 12). Foe abi langa-pasensi wani taki foe dwengi joe srefi èn foe teki langa foe kisi atibron. Èn soema spesroetoe, a mindri den wan di e teki langa foe kisi atibron, e sori langa-pasensi? No wan tra sma leki Jehovah Gado. Na so wi e leisi na ini Exodus 34:6 taki Jehovah na „wan Gado nanga sari-ati èn boen-atifasi, di e teki langa foe kisi atibron èn di abi lobi-boenfasi èn waarheid pasa marki.” Foe taki en leti, dan aiti leisi moro na ini den Boekoe, den e taki foe Jehovah taki a „e teki langa foe kisi atibron.” — Numeri 14:18; Nehemia 9:17; Psalm 86:15; 103:8; 145:8; Joèl 2:13; Jona 4:2; Nahum 1:3.

3. Sortoe eigifasi e froeklari taki Jehovah abi langa-pasensi?

³ Taki a abi langa-pasensi, noso e teki langa foe kisi atibron, na joisti san wi ben sa froewakti foe Jehovah Gado, bika a abi makti èn koni pasa marki, a de volmaakti ini geregteghèit, èn ini persoon a de lobi (Deuteronomium 32:4; Job 12:13; Jesaja 40:26; 1 Johanes 4:8). A abi den eigifasi foe en ini en makti, èn ala ten a e hori den ini volmaakti balansi. San na Wortoe foe en e tjari kon a krin foe na reide foe san-ede èn fa a sori langa-pasensi gi onvolmaakti libisma?

Langa-pasensi foe en nen ede

4. Foe sortoe boen reide ede Gado sori langa-pasensi gi sondari?

⁴ Foe san-ede Jehovah abi langa-pasensi? Foe san-ede a no e strafoe sondari wantewante? No foe mi-no-kefasi ede noso foe di a mankeri faja gi regtfardikifasi. Nôno, ma foe boen reide ede Jehovah e teki langa foe kisi atibron èn no e strafoe sma wantewante. Wan reide de, so taki sma kan meki en nen bekenti. Wan tra reide de, taki ten ben de fanowdoe foe seti den strei-aksi foe na soevereiniteit foe Gado èn na soifri retifasi foe libisma, di na oproeroe na ini Eden ben meki kon. Ete wan tra reide gi na langa-pasensi foe Gado de, taki a e gi sma di e doe fowtoe na okasi foe meki den pasi foe den kon leti.

5, 6. Foe san-ede Jehovah ben sori langa-pasensi ini a tori foe na oproeroe foe libisma?

⁵ Jehovah ben abi langa-pasensi ini a fasi fa a ben handri nanga na fosi libismapaar na ini a djari foe Eden. Di den ben pasa na komando foe en foe no njan na froktoe foe na bon foe sabi boen nanga ogri, dan wantewante a ben kan kiri den èn kiri na engel di ben fadon èn di ben kori Efa. A no de foe taki, taki den ben doe Jehovah en firi foe regtfardikifasi èn geregteghèit ogri, so taki en ati ben bron nanga den dri oproeroeman. A ben sa de volmaakti ini en reti efoe a ben kiri den wantewante. Gado ben warskow na fosi libisma, Adam: „Ma ini a tori foe na bon foe sabi boen nanga ogri, joe no moesoe njan foe dati, bika na a dei di joe sa njan foe dati, seiker joe sa dede” (Genesis 2:17). Na srefi dei di Adam ben sondoe, Gado ben kari den sma di pasa en wet foe gi frantiwortoe na en èn a ben leisi na dede strafoe. Akroederi na wet, dan Adam nanga Efa ben dede na dei dati. Tokoe wi langa-pasensi Mekiman ben meki Adam libi 930 jari. — Genesis 5:5.

⁶ Gado ben abi boen reide foe abi langa-pasensi, noso foe teki langa foe kisi atibron, ini a kefal disi. Efoe a ben kiri den oproeroeman wantewante, dan disi no ben sa gi wan piki na a spotoe foe Didibri — di a no ben taki nanga mofo — taki Jehovah Gado no e froedini foe sma anbegi en èn taki a no kan abi libisma dienstknekti di sa hori den soifri retifasi na en, awasi fa a situwâsi sa de toe. Moro fara, den sortoe aksi, so leki den di e kon now, ben sa tan sondro foe kisi wan piki: Soema fowtoe a ben de taki Adam nanga Efa ben sondoe? A de so, taki Jehovah ben meki den fosi so swaki na moreel sei, taki den no ben kan kakafoetoe gi tesi èn dan ben strafoe den foe di den ben misi foe doe dati? Na piki tapoe ala den sani disi e kon a krin ini den wortoe di joe e feni na ini a boekoe Job, kapitel 1 nanga 2. Foe di Jehovah ben gi na libisma ras pasi foe kon moro foeroe, meki Jehovah ben gi libisma na okasi foe boeweisi taki den kragi foe Satan de falsi.

7. Foe san-ede Jehovah no ben kiri Farao wantewante?

⁷ Di Jehovah ben de so fara foe fri en pipel, den Israèl sma, foe katibo na ini Egipti, a ben boeweisi agen taki a abi langa-pasensi. Jehovah ben kan pori Farao nanga en sroedati legre wantewante. Ma na presi foe doe disi, Gado ben froedrage den foe wan pisiten. Foe sortoe boen reide ede? We, baka wan pisiten, dan Farao ben kon abi moro tranga-ede ini a weigri di a ben weigri foe meki den Israèl sma libi Egipti leki Jehovah en fri pipel. Na so fasi a ben sori, taki a ben de wan ’patoe foe atibron’ di e froedini pori, foe di a ben tergi Jehovah (Rome sma 9:14-24). Tokoe, wan moro prenspari reide ben de foe san-ede Gado ben abi langa-pasensi ini a kefal disi. Nanga mofo foe Moses, a ben taigi Farao: „Nownow kaba mi ben kan langa mi anoe foe naki joe èn joe pipel nanga pestsiki, so taki joe ben pori komoto foe na grontapoe. Ma foe disi ede mi meki joe tan na libi, foe sori joe mi krakti, èn foe sma meki mi nen bekenti na a heri grontapoe.” — Exodus 9:15, 16.

8. Foe sortoe boen reide ede Gado no ben kiri oproeroe Israèl sma na ini a sabana?

⁸ Nanga boen reide Jehovah so srefi ben sori na langa-pasensi foe en, di den Israèl sma ben de na ini a sabana. Fa den ben tesi a pasensi foe Gado, foe di den ben anbegi na gowtoe pikin kaw èn foe di den ben misi foe sori bribi, di den tin spion ben drai kon baka nanga wan takroe njoensoe! Gado no ben pori den leki en pipel, foe di en nen èn boen-nen ben de ini a tori. Ija, Jehovah ben sori langa-pasensi foe en nen ede. — Exodus 32:10-14; Numeri 14:11-20.

Langa-pasensi foe libisma ede

9. Foe san-ede Jehovah ben sori langa-pasensi ini den dei foe Noa?

⁹ Jehovah ben abi langa-pasensi foe na libismafamiri ede, foe sensi na momenti di Adam ben doe ogri na ala den bakapikin foe en, di a ben kan kisi, ija, di a ben doe den wan bigi kroektoedoe di a ben sondoe. Na langa-pasensi foe Gado ben meki a kan, taki na fowtoe dati ben poti reti, foe di a ben gi ten foe meki sma di abi berow kon verzoen nanga en (Rome sma 5:8-10). Jehovah Gado so srefi ben sori langa-pasensi gi libisma ini den dei foe Noa. Na a ten dati, dan „Jehovah ben si taki na ogri foe libisma ben de pasa marki na grontapoe èn ala sani di den ati ben e prakseri, ben de soso ogri nomo, ala ten” (Genesis 6:5). Ala di Gado ben kan wai na libisma ras poeroe so esi leki a ben si na situwâsi disi, tokoe a ben gi a komando taki a ben sa tjari wan kaba kon na a situwâsi disi baka 120 jari (Genesis 6:3). Na sori disi foe langa-pasensi ben gi ten foe meki Noa kisi dri manpikin, foe den gro kon bigi èn trow èn foe meki na famiri dati bow na ark foe froeloesoe den sili foe den èn foe kibri den meti di Gado ben meki. Na a fasi disi a ben kan, taki na fosi prakseri foe Gado gi na grontapoe ben sa kon troe.

10, 11. Foe san-ede Jehovah ben abi langa-pasensi so foeroe nanga na nâsi Israèl?

¹⁰ Wan tra froeklari foe langa-pasensi abi spesroetoe foe doe nanga den boemoei di Gado e boemoei nanga en pipel. A de ’na froedrage foe fowtoe fasi foe handri noso tjalensi na wan pasensi fasi, makandra nanga a weigri di wan sma e weigri foe lasi howpoe taki wan matifasi di kon broeja no kan kon boen baka’ (Jepi foe froestan na bijbel, bladzijde 927 [Bakratongo], di kon a doro nanga jepi foe na Watchtower Bible and Tract Society of New York, Inc.). Disi e sori tapoe ete wan reide foe san-ede Gado ben sori langa-pasensi gi den Israèl sma. Foeroe tron den ben drai baka gi Jehovah èn ben kon ondro katibo foe heiden nâsi. Tokoe, a ben sori langa-pasensi foe di a ben fri den Israèl sma èn ben gi den na okasi foe abi berow. — Kroetoeman 2:16-20.

¹¹ Moro foeroe foe den kownoe foe Israèl ben tjari den sma di ben de na den ondro, go ini falsi anbegi. Gado ben trowe na nâsi wantewante? Nôno, a no ben lasi howpoe esi-esi taki sani ben kan kon moro betre ini na matifasi di kon broeja. Na presi foe dati, Jehovah ben teki langa foe kisi atibron. Foe di a ben e sori langa-pasensi, meki Gado ben gi den foeroe tron na okasi foe abi berow. Wi e leisi na ini 2 Kroniki 36:15, 16: „Jehovah, na Gado foe den granpapa, ben tan seni warskow gi den, nanga jepi foe den boskopoeman foe en, foe di a ben firi sari gi en pipel èn gi en tanpresi. Ma doronomo den ben e spotoe den boskopoeman foe na troe Gado èn ben e wiswasi den wortoe foe en èn ben e spotoe den profeiti foe en, te leki na atibron foe Jehovah ben opo kon kontrari en pipel, te leki kon betre no ben de moro.”

12. Foe san den kresten Griki Boekoe e kotoigi ini a tori foe na reide foe san-ede Jehovah abi langa-pasensi?

¹² Den kresten Griki Boekoe e gi so srefi boeweisi taki Jehovah e sori langa-pasensi foe jepi a pipel foe en di e sondoe. Foe eksempel, na apostel Paulus e aksi kresten sma di e pasa na wet: „Joe e wiswasi den goedoe foe en boenfasi èn froedragefasi èn langa-pasensi, foe di joe no sabi taki na boen-ati eigifasi foe Gado e proeberi foe meki joe kon kisi berow?” (Rome sma 2:4) Den wortoe foe Petrus wani taki a srefi: „Jehovah no e draidrai nanga en pramisi, so leki son sma e si leki a e draidrai, ma a abi pasensi nanga joe, foe di a no wani taki wan sma go lasi, ma a wani taki ala sma kon kisi berow” (2 Petrus 3:9). A e fiti heri boen taki den e taigi wi foe „si na pasensi foe wi Masra leki froeloesoe” (2 Petrus 3:15). Na so fasi wi e si taki Jehovah abi langa-pasensi, no foe di a e firi sani esi pasa marki noso de loboso, ma foe di en nen èn den prakseri foe en de ini a tori èn a abi sari-ati èn lobi.

Jesus eksempel foe langa-pasensi

13. Sortoe bijbel boeweisi de taki Jesus Krestes ben abi langa-pasensi?

¹³ Leti a baka na eksempel foe langa-pasensi di Gado e sori, joe abi ini a di foe toe presi a di foe en Manpikin, na Mesias, Jesus Krestes. Jesus de wan toemoesi moi eksempel foe na dwengi di wan sma moesoe dwengi ensrefi sondro foe teki refensi esi-esi awinsi sma e tjalensi en.a Taki na Mesias ben sa abi langa-pasensi, na profeiti Jesaja ben taki a fesi nanga den wortoe disi: „A ben kisi en moeilek, èn a ben libi den foe den ben pina en; tokoe a no ben opo en mofo. Neleki wan skapoe den ben tjari en go foe srakti; èn neleki wan oemaskapoe di no ben man opo en mofo na fesi den sma di e koti en wiwiri, na so a no ben opo en mofo toe” (Jesaja 53:7). Na froeklari foe Petrus e kotoigi foe na srefi waarheid: „Te sma ben kosi en, a no ben go kosi baka. Te a ben pina, a no ben go tapoe skreki gi sma, ma ben tan froetrow ensrefi na a sma di e kroetoe regtfardiki” (1 Petrus 2:23). Fa den disipel foe Jesus ben moesoe foe tesi en nanga den foeroe kesekese foe den di ben go foe soema ben de a moro bigiwan! Tokoe fa a ben abi langa-pasensi èn pasensi nanga den! — Markus 9:34; Lukas 9:46; 22:24.

14. San Jesus eksempel foe abi langa-pasensi moesoe boeweigi wi foe doe?

¹⁴ Wi moesoe waka baka na eksempel foe langa-pasensi di Jesus ben sori. Paulus ben skrifi: ’Meki wi horidoro foe lon a streilon di poti na wi fesi, ala di wi e loekoe finifini na a moro Prenspari Wrokoman èn a Man di e meki wi bribi kon boen dorodoro, Jesus. Foe na prisiri ede di ben poti na en fesi meki a ben froedrage wan pina-oedoe, ben e si sjen leki noti, èn a ben go sidon na a reti-anoe foe na kownoe-stoeroe foe Gado. Ija, loekoe finifini na a sma di ben froedrage den sortoe gens-taki foe sondari kontrari den eigi belang, so taki oenoe no kon weri èn lasi-ati ini oen sili.’ — Hebrew sma 12:1-3.

15. Fa wi doe sabi taki Jesus ben abi langa-pasensi èn taki a ben froedrage tesi foe di a ben wani?

¹⁵ Taki Jesus ben abi langa-pasensi èn ben froedrage tesi foe di a ben wani, sma kan si foe na fasi di a ben sori na a ten di den ben kisi en. Baka di a ben piri-ai gi Petrus foe di a ben teki na feti-owroe foe kibri en Masra, Jesus ben taki: „Joe prakseri taki mi no kan aksi mi Tata foe gi mi na a momenti disi moro leki twarfoe legioen engel? Dan fa den Boekoe ben sa kon troe ini a kefal dati, taki a moesoe pasa na a fasi disi?” — Mateus 26:51-54; Johanes 18:10, 11.

Tra eksempel foe langa-pasensi

16. Fa den Boekoe e sori taki Josef na manpikin foe Jakob ben abi langa-pasensi?

¹⁶ Srefi onvolmaakti, sondoe libisma kan sori langa-pasensi. Den Hebrew Boekoe abi den eksempel foe onvolmaakti sma di na wan pasensi fasi ben froedrage fowtoe fasi foe handri. Foe eksempel, joe abi Josef, na manpikin foe na Hebrew famiri-edeman Jakob. Fa a ben froedrage na wan pasensi fasi den kroektoedoe di den afoe brada foe en èn na wefi foe Potifar ben doe en! (Genesis 37:18-28; 39:1-20) Josef no ben gi pasi foe den tesi disi ben meki a kisi bita-ati. Disi ben kon a krin di a ben taigi den afoe brada foe en: „No sari toemoesi èn no kisi atibron nanga joesrefi foe di joe ben seri mi kon djaso; bika na foe a kibri foe libi Gado seni mi go na fesi foe oenoe” (Genesis 45:4, 5). Fa Josef ben gi wan toemoesi boen eksempel foe langa-pasensi!

17, 18. Sortoe boeweisi foe langa-pasensi wi abi ini a kefal foe David?

¹⁷ David na wan tra eksempel foe wan kotrow dienstknekti foe Jehovah di na wan pasensi fasi ben froedrage fowtoe fasi foe handri, èn di ben e sori langa-pasensi. Di a djaroesoe kownoe Saul ben onti tapoe David neleki tapoe wan dagoe, dan na toe okasi David ben kan teki refensi foe kiri en (1 Samuèl 24:1-22; 26:1-25). Ma David ben wakti tapoe Gado, so leki a de foe si foe den wortoe foe en gi Abisai: „Jehovah srefi sa naki [Saul]; noso en dei sa kon èn a sa moesoe dede, noso a sa hari go na feti èn den sa wai en poeroe seiker. Foe mi sei te oenoe loekoe en so leki fa Jehovah e si en, dan a no de foe go prakseri, taki mi ben sa langa mi anoe kontrari na salfoewan foe Jehovah!” (1 Samuèl 26:10, 11) Ija, David ben man foe meki wan kaba kon na a onti di Saul ben onti en. Na presi foe dati, David ben teki a bosroiti foe abi langa-pasensi.

¹⁸ Loekoe toe san ben pasa di kownoe David ben lowe gi en manpikin Absalon, di no ben de foe froetrow. Simei, wan Benjamin sma foe na oso foe Saul, ben trowe ston go tapoe David èn ben begi foe ogri moesoe kon tapoe David, ala di a ben bari taki: „Gowe, gowe joe man di lai nanga broedoe paiman èn di no warti noti!” Abisai ben wani foe den kiri Simei, ma David ben weigri foe teki refensi. Na presi foe doe dati, a ben sori agen na eigifasi foe langa-pasensi. — 2 Samuèl 16:5-13.

Loekoe na eksempel foe Paulus

19, 20. Fa na apostel Paulus ben sori taki ensrefi ben abi langa-pasensi?

¹⁹ Ini den kresten Griki Boekoe, wi abi ete wan toemoesi moi eksempel foe langa-pasensi foe na sei foe wan onvolmaakti libisma — na apostel Paulus. A ben sori taki a ben kan froedrage sani na wan pasensi fasi èn taki a ben kan abi langa-pasensi nanga den kerki feanti foe en èn nanga den aparti sma di ben hori taki den de kresten. Ija, Paulus ben sori langa-pasensi ala di sonwan ini na gemeente na ini Korente ben taki: „Den brifi foe en de hebi èn krakti, ma a denoja foe en ini persoon de swaki èn a taki foe en wan wiswasi sani.” — 2 Korente sma 10:10; 11:5, 6, 22-33.

²⁰ Nanga boen reide foe dati-ede Paulus ben taigi den Korente sma: „Na ibri fasi wi e rikomanderi wisrefi leki Gado dinari: nanga a froedrage foe foeroe sani, nanga banawtoe, nanga kefal foe nowtoe, nanga moeilekhèit, nanga fonfon, nanga doengroe-oso, nanga oproeroe, nanga hebi wroko, nanga neti sondro sribi, nanga ten sondro njanjan, nanga soifrifasi, nanga sabi, nanga langa-pasensi, nanga boenfasi, nanga santa jeje, nanga lobi di de fri foe hoigrifasi” (2 Korente sma 6:4-6). Ini a srefi sortoe fasi foe prakseri na apostel ben kan skrifi gi en kompe wrokoman Timoteus: „Joe ben waka finifini baka mi leri, mi libi èn waka, mi prakseri, mi bribi, mi langa-pasensi, mi lobi, mi horidoro, mi froefolgoe, mi pina, . . . èn tokoe Masra ben fri mi foe den alamala” (2 Timoteus 3:10, 11). Fa na apostel Paulus ben gi wan toemoesi moi eksempel na wi foe abi langa-pasensi!

21. Fa na artikel di e kon kan jepi wi?

²¹ A de krin taki den Boekoe foeroe nanga toemoesi boen eksempel foe langa-pasensi. Jehovah èn en lobi Manpikin de den moro prenspari eksempel. Ma fa a e gi deki-ati foe si taki onvolmaakti libisma sori na eigifasi disi, so leki Josef, David èn na apostel Paulus! Den ben meki na artikel di e kon foe jepi wi foe waka baka den sortoe toemoesi moi eksempel disi.

[Foetoewortoe]

Fa joe ben sa piki?

◻ San a wani taki foe abi langa-pasensi?

◻ Foe sortoe reide ede spesroetoe Jehovah ben abi langa-pasensi?

◻ Fa Jesus ben sori taki a abi langa-pasensi?

◻ Sortoe bijbel boeweisi de taki onvolmaakti libisma kan sori langa-pasensi?

[Prenki na tapoe bladzijde 22]

Josef, Jesus, David, Paulus èn Job ben de model foe langa-pasensi

[Prenki na tapoe bladzijde 25]

Jesus ben sori langa-pasensi gi en disipel