Abi langa-pasensi nanga ala sma
’Wi e froemane oenoe, brada: piri-ai gi denwan di no e tjari densrefi na wan ordelijk fasi, taki nanga denwan di firi broko-skin foe gi den deki-ati, horibaka gi den swakiwan, abi langa-pasensi nanga ala sma.’ — 1 TESALONIKA SMA 5:14.
1. Pe èn na ini sortoe situwâsi Jehovah Kotoigi sori langa-pasensi?
FA DEN disiten Kotoigi foe Jehovah ben gi wan boen eksempel ini a abi di den abi langa-pasensi! Den froedrage foeroe pina èn froefolgoe na ini den fositen Nazi èn Fascist kondre èn na ini kondre so leki Malawi te nanga a ten disi. So srefi denwan di e libi na ini oso di prati na relisi sei, abi langa-pasensi.
2. San na den toe sani di e froeklari na jeje paradijs di Jehovah pipel e njanboen foe en?
2 Awasi den e ondrofeni froefolgoe èn pina, tokoe na pipel foe Jehovah, di gi densrefi abra, e njanboen foe den blesi foe wan jeje paradijs. Ija, den troetori e sori taki salfoe kresten ben bigin foe njanboen foe disi ini a jari 1919. San de na froeklari gi na jeje paradijs disi? Na a fosi presi, den paradijs toestand disi de a mindri Jehovah pipel foe di Gado tjari en salfoe dienstknekti kon baka na ini a „kondre”, noso toestand foe den foe soifri anbegi (Jesaja 66:7, 8). Na jeje paradijs e go a fesi srefisrefi foe di ibri sma di de na ini e sori den froktoe foe Gado jeje. Langa-pasensi na wan foe den (Galasia sma 5:22, 23). O prenspari na eigifasi disi de gi wi jeje paradijs, sma kan si foe na sani disi, di sabiman William Barclay ben taki: „So wan sani leki wan kresten libimakandra no kan de sondro makrothumia [langa-pasensi]. . . . Èn na reide gi dati na joisti disi — taki makrothumia na a bigi eigifasi foe Gado (Rom. 2.4; 9.22)” (A New Testament Wordbook, bladzijde 84). Ija, na so prenspari langa-pasensi de!
Abi langa-pasensi nanga den brada foe wi
3. Sortoe lès, ini a tori foe abi langa-pasensi, Jesus ben gi Petrus?
3 Leki fa a sori dan na apostel Petrus ben abi pikinso problema foe ben e sori langa-pasensi, bika wan dei a ben aksi Jesus: „Masra, omeni leisi mi brada kan sondoe na mi èn mi moesoe gi en pardon? Te seibi leisi?” Jesus ben gi en na rai: „Mi e taigi joe, no te seibi leisi, ma te seibitenti na seibi leisi” (Mateus 18:21, 22). Nanga tra wortoe, no wan skotoe no de na a nomroe foe den leisi di wi moesoe froedrage makandra èn gi wan sma pardon di e sondoe na wi. Bikasi wi no kan prakseri taki wan sma ben sa tan teri doro te 77 leisi! Ma foe gi pardon na so fasi, seiker e aksi foe sma abi langa-pasensi.
4. Foe san-ede owroeman spesroetoe moesoe abi langa-pasensi?
4 Te a e go foe na sori di jeje brada moesoe sori langa-pasensi, dan a no de foe taki, taki den gemeente owroeman moesoe de wan eksempel. Foe di son kompe bribiman kan de onborsoe noso nanga wan mi-no-kefasi, meki disi ben sa kan tesi na pasensi foe den owroeman. Trawan kande e draidrai te a e go foe kenki takroe gwenti. Owroeman moesoe loekoe boen foe den no mandi makriki noso firi afrontoe makriki foe den swakifasi ede foe den kresten brada èn sisa foe den. Na presi foe dati, dan den jeje herder disi moesoe memre na rai: „Ma wi di de tranga, moesoe tjari den swakifasi foe denwan di no de tranga èn no moesoe plisi wisrefi.” — Rome sma 15:1.
5. San wi man foe froedrage efoe wi abi langa-pasensi?
5 So srefi libisma swakifasi èn onvolmaaktifasi kan meki karakter foe sma bòks nanga makandra. Fowtoe noso aparti fasi foe wi, e meki wi brada e kisi atibron pikinso, foe taki en so, èn den foe den sei kan doe dati nanga wi toe. Fa na rai fiti foe dati-ede: „Tan froedrage makandra èn gi makandra pardon na wan fri fasi efoe a wan abi wan reide foe kragi kontrari a trawan. Neleki fa Jehovah ben gi oenoe pardon na wan fri fasi, na so oenoe moesoe doe toe” (Kolose sma 3:13). „Froedrage makandra” wani taki foe abi langa-pasensi, awasi wi abi boen reide foe wan kragi kontrari wan sma. Wi no moesoe teki refensi noso strafoe wi brada, no soktoe srefi gi en. — Jakobus 5:9.
6. Foe san-ede foe abi langa-pasensi na a pasi foe koni?
6 Na rai di de foe feni na ini Rome sma 12:19 wani taki a srefi sani: „No teki refensi gi joesrefi, oen lobiwan, ma gi pasi na atibron; bika den skrifi: ’Refensi na foe mi; Mi sa pai, Jehovah e taki.’” ’Gi pasi na atibron’ wani taki foe teki langa foe kisi atibron, noso foe abi langa-pasensi. Foe sori na eigifasi disi na a pasi foe koni, foe di a e abi wini gi wi nanga trawan. Efoe wan problema opo ede kon, dan wisrefi e firi moro boen, bikasi foe di wi abi langa-pasensi, meki wi no e meki na afersi kon moro takroe. Èn na sma di wi e sori langa-pasensi gi en, so srefi e firi moro boen, bikasi wi no e strafoe en noso e teki refensi na wan noso tra fasi. A no e gi froewondroe taki Paulus ben gi kompe kresten sma na tranga foe ’taki nanga denwan di firi broko-skin foe gi den deki-ati, foe horibaka gi den swakiwan, foe abi langa-pasensi nanga ala sma’! — 1 Tesalonika sma 5:14.
Ini na osofamiri
7. Foe san-ede sma di trow moesoe abi langa-pasensi?
7 Nanga leti sma ben taki, taki wan kolokoe trow na a tjari kon a wán foe toe sma di sabi foe gi pardon boen. San dati wani taki? Taki sma di trow kolokoe abi langa-pasensi ini a fasi fa den e handri nanga makandra. Sani foeroe tron e hari aparti sma kon na makandra foe di a fasi foe den kenki foe makandra. Den difrenti disi kan hari joe belangstelling, ma den kan de so srefi wan fonten foe trobi di e poti moro na den span firi èn broko-ede di de kaba èn di e meki trow kresten sma abi „pina ini na skin foe den” (1 Korente sma 7:28). Foe eksempel, kon wi taki wan trowmasra no e ke foe den finifini sani noso a no e lobi foe sorgoe sani boen noso a no de netjes. Disi kan de wan tesi srefisrefi gi en wefi. Ma efoe rai di gi nanga switi wortoe no e jepi, dan kande a moesoe froedrage den swakifasi foe en èn abi langa-pasensi.
8. Foe san-ede trowmasra moesoe abi langa-pasensi?
8 Na a tra sei, wan wefi kan meki trobi foe ala sortoe pikin sani èn a kan lobi foe soekoe ini ala sani fowtoe na en masra. Disi kan meki na tekst kon na prakseri: „A moro betre foe libi na tapoe a dak leki foe tan ini wan oso nanga wan wefi di e soekoe fowtoe ini ala sani” (Odo 25:24, Today’s English Version). Ini so wan kefal, a e aksi langa-pasensi foe gi jesi na a rai foe Paulus: „Oen masra, tan lobi oen wefi èn no abi bita atibron nanga den” (Kolose sma 3:19). A e aksi so srefi langa-pasensi foe den masra foe gi jesi na a rai foe na apostel Petrus: „Oen trowmasra, tan libi na a srefi fasi nanga [oen trow-oema] akroederi sabi, foe di oenoe e gi en grani leki wan moro swaki patoe, na oema sma fasi, foe di oenoe de so srefi erfgenaam nanga den foe na no-froedini boenfasi foe libi, so taki no wan sani hendri den begi foe oenoe” (1 Petrus 3:7). Den swakifasi foe en wefi kan tesi wan masra son leisi, ma langa-pasensi sa jepi en foe froedrage den.
9. Foe san-ede langa-pasensi de fanowdoe foe na sei foe papa nanga mama?
9 Papa nanga mama moesoe abi langa-pasensi foe den kweki den pikin nanga boen bakapisi. Jongoewan kan meki den srefi fowtoe foeroe tron baka. A kan gersi taki den tranga-ede noso den e teki langa foe leri sani èn doronomo den e tesi den papa nanga mama foe den. Ondro den situwâsi disi, dan kresten papa nanga mama moesoe teki langa foe kisi atibron èn no moesoe meki den ati teki faja noso taki den no man dwengi densrefi moro ma den moesoe tan bedari ala di den e hori tranga na regtfardiki gronprakseri. Papa moesoe memre taki wan dei den ben de jongoe toe èn so srefi ben meki fowtoe. Den moesoe doe san na rai foe Paulus e taki: „Oen tata, no tergi oen pikin, so taki den no lasi-ati.” — Kolose sma 3:21.
Nanga denwan na dorosei
10. Fa wi moesoe handri na wi wrokope, so leki fa sortoe ondrofenitori e sori?
10 Libisma onvolmaaktifasi èn a soekoe foe wi eigi boen nomo e meki taki froeferi situwâsi kan opo ede na a wrokope foe wan kresten sma. A de na pasi foe koni foe abi tact (firi gi san fiti ini wan situwâsi) èn foe froedrage fowtoe fasi foe handri foe na boen foe a vrede. O koni disi kan de, e kon a krin foe na ondrofeni foe wan kresten man, di wan djaroesoe kompe wrokoman ben meki foeroe sani di no switi miti en. Foe di na brada no ben meki wan strei foe disi ma ben abi langa-pasensi, meki baka ten a ben man foe opo wan studie nanga na wrokoman di ben doe froeferi.
11. Oten spesroetoe wi moesoe abi langa-pasensi, èn foe san-ede?
11 Na pipel foe Jehovah spesroetoe moesoe abi langa-pasensi te den e gi kotoigi na denwan di de dorosei foe na kresten gemeente. Foeroe tron baka kresten sma e miti nanga den grofoe noso srapoe piki foe sma. A ben sa de joisti noso koni foe piki na wan srefi sortoe fasi? Nôno, bikasi dati no ben sa sori langa-pasensi. Na pasi foe koni na foe memre èn waka baka na koni odo: „Wan safoe piki e drai atibron gowe, ma wan wortoe di e gi sari, e meki atibron kon.” — Odo 15:1.
Bribi èn howpoe e jepi foe sori langa-pasensi
12, 13. Sortoe eigifasi sa jepi wi foe abi langa-pasensi?
12 San kan jepi wi foe sori langa-pasensi, foe froedrage takroe situwâsi? Wan sani de na bribi ini den pramisi foe Gado. Wi moesoe bribi ala sani di Gado e taki. Den Boekoe e taki: „No wan tesi ben kon na joe tapoe boiti di ala sma e kisi. Ma Gado de getrow èn a no sa gi pasi taki joe kisi tesi pasa na sani di joe kan froedrage, ma nanga na tesi a sa sorgoe foe wan pasi foe komoto, so taki joe kan froedrage en” (1 Korente sma 10:13). Nanga tra wortoe, so leki wan sma di dini foeroe jari ben taki en: „Efoe Gado e gi pasi foe dati, mi kan teki dati.” Ija, wi kan teki dati foe di wi abi langa-pasensi.
13 San abi foe doe foeroe nanga bribi, na a howpoe ini Gado kownoekondre. Te dati sa tiri abra na grontapoe, dan a sa poeroe ala den takroe situwâsi di e gi wi problema. Ini a tori disi, na psalm skrifiman David ben taki: „Poti atibron na wan sei èn libi hebi atibron; no sori taki joe ati e teki faja soso foe doe ogri. Bika ogridoeman srefi den sa koti poeroe, ma denwan di e howpoe tapoe Jehovah na den sma di sa abi na grontapoe” (Psalm 37:8, 9). Na seiker howpoe taki heri-esi Gado sa poeroe ala den situwâsi disi di e tesi wi, e jepi wi foe abi langa-pasensi.
14. Sortoe ondrofenitori e sori foe san-ede wi moesoe abi langa-pasensi nanga wan trowpatna di no de ini bribi?
14 San wi moesoe doe efoe wi masra noso wefi di no de ini bribi e gi wi problema? Tan loekoe na Gado foe kisi jepi, èn tan howpoe taki na gensman sa tron wan anbegiman foe Jehovah. Na wefi foe wan kresten ben weigri son leisi foe sreka njanjan gi en masra èn foe krin den krosi foe en. A ben gebroiki doti-taki, foeroe dei langa a no ben wani taki nanga en èn ben proeberi srefi foe wisi en nanga jepi foe bonoewroko. „Ma”, a ben taki, „mi ben go na Jehovah doronomo ini begi, èn mi ben froetrow tapoe En foe jepi mi foe kweki na boen eigifasi foe langa-pasensi, so taki mi no lasi mi kresten balansi. Mi ben howpoe so srefi taki wan dei na fasi foe en ati ben sa kenki.” Baka 20 jari foe so wan fasi foe doe, dan en wefi ben bigin foe kenki, èn a ben taki: „Fa mi de Jehovah grantangi taki a ben jepi mi foe kweki na froktoe foe na jeje, langa-pasensi, bikasi now mi kan si den bakapisi: Mi wefi bigin foe waka na pasi foe libi!”
Begi, sakafasi nanga lobi sa jepi
15. Foe san-ede begi kan jepi wi foe abi langa-pasensi?
15 Begi na wan tra bigi jepi foe sori langa-pasensi. Paulus ben gi na tranga: „No broko-ede foe noti, ma meki ini ala sani nanga jepi foe begi èn faja begi makandra nanga taki tangi joe tranga begi kon bekènti na Gado; èn na vrede foe Gado di e pasa ala prakseri, sa kibri joe ati èn joe jeje koni nanga jepi foe Jesus Krestes” (Filipi sma 4:6, 7). Hori so srefi na froemane na prakseri: „Trowe joe lai na tapoe Jehovah, èn ensrefi sa jepi joe. Noiti a sa gi pasi taki a regtfardiki sma seki.” — Psalm 55:22.
16. Fa sakafasi kan jepi wi foe abi langa-pasensi?
16 Sakafasi na ete wan tra bigi jepi foe kweki na froktoe foe na jeje, langa-pasensi. Wan sma di abi bigi-memre no abi pasensi. A e firi afrontoe makriki, e kisi atibron esi-esi èn no e teki no wan fowtoe fasi fa sma e handri nanga en. Ala den sani disi de na abrasei foe na abi foe langa-pasensi. Ma wan sma di abi sakafasi no sa si ensrefi toemoesi serjoesoe. A sa wakti tapoe Jehovah, neleki fa David ben doe di kownoe Saul ben onti en èn di na Benjamin sma Simei ben afrontoe en (1 Samuèl 24:4-6; 2 Samuèl 16:5-13). So boen wi moesoe wani foe waka „nanga ala sakafasi foe jeje èn safoefasi, nanga langa-pasensi, e froedrage makandra ini lobi (Efeise sma 4:2). Moro fara, wi moesoe ’saka wisrefi ini den ai foe Jehovah’. — Jakobus 4:10.
17. Foe san-ede lobi sa jepi wi foe abi langa-pasensi?
17 Lobi di no e soekoe en eigi wini nomo spesroetoe sa jepi wi foe abi langa-pasensi. Foe troe, „lobi e hori langa-pasensi”, bikasi a e meki wi hori den moro boen belang foe trawan na prakseri (1 Korente sma 13:4). Lobi e meki wi man foe firi gi trawan, foe poti wisrefi ini a presi foe trawan, foe taki en so. Moro fara, dan lobi e jepi wi foe abi langa-pasensi foe di „a e froedrage ala sani, e bribi ala sani, e howpoe ala sani, e horidoro ini ala sani. Lobi no e fadon noiti” (1 Korente sma 13:7, 8). Ija, so leki fa Kownoekondre singi nomroe 108 na ini a singiboekoe Singi èn tya unsrefi nanga poku ini unu ati, nomroe 200 na ini a boekoe Singi prèise singi gi Jehovah (Bakratongo), e taki:
„Lobi e luk bun sani,
bow wi brada wanfasi.
Lobi tap sondu di pkin,
ai tya na bun kon na krin.”
Abi langa-pasensi na wan prisiri fasi?
18. Fa sma kan abi langa-pasensi na wan prisiri fasi?
18 Paulus ben begi taki den kompe bribiman foe en na ini Kolose ben sa kon foeroe nanga a soifri sabi foe a wani foe Gado foe den kan waka na wan fasi di ben fiti Jehovah, foe plisi en, èn foe meki froktoe ini ibri boen wroko. Na so fasi den ben sa ’kon tranga nanga ala krakti akroederi na marki foe na glori makti foe en, so taki den ben kan horidoro dorodoro èn ben kan abi langa-pasensi na wan prisiri fasi’ (Kolose sma 1:9-11). Ma fa wan sma kan abi ’langa-pasensi na wan prisiri fasi’? Dati no de kontrari makandra, bikasi foe abi na prisiri di den taki foe en na ini den Boekoe, no de eenvoudig wan afersi foe de sondro sorgoe noso de breiti. Na froktoe foe na jeje, prisiri, abi na ini en wan firi foe dipi satisfaksi foe a doe di a sma e doe joisti sani na fesi foe Gado. A de so srefi wan sori foe na howpoe foe kisi wan paiman di Gado pramisi, leki wan bakapisi foe na sori foe langa-pasensi. Foe dati-ede meki Jesus ben taki: „Kolokoe foe joe te sma e gi joe sjen èn e froefolgoe joe èn nanga ala di den e lei, e taki ala sortoe foe takroe sani kontrari joe foe mi ede. Prisiri èn djompo foe prisiri, bikasi oen paiman de bigi na ini den hemel; bikasi na a fasi dati den ben froefolgoe den profeiti di ben de bifo joe.” — Mateus 5:11, 12.
19. Sortoe eksempel e sori taki a kan foe sma abi langa-pasensi so boen leki prisiri?
19 Jesus ben abi na sortoe prisiri dati. Foe troe, „foe na prisiri di ben poti na en fesi meki a ben froedrage wan pina-oedoe, broko-ai gi sjen” (Hebrew sma 12:2). Na prisiri dati ben meki Jesus abi langa-pasensi. Loekoe na a srefi fasi san ben pasa di den ben krawasi den apostel èn ben gi den na ordroe foe „stòp foe taki tapoe a fondamenti foe Jesus nen”. Den „ben komoto gowe foe na Sanhedrin, nanga prisiri foe di den ben feni den warti foe ben kisi sjen foe en nen ede. Èn sondro foe stòp ibri dei den ben tan foe leri èn meki na boen njoensoe foe na Krestes, Jesus, bekènti na ini a tempel èn oso foe oso” (Tori foe den Apostel 5:40-42). Fa a de wan toemoesi moi eksempel di e boeweisi taki den bakaman foe Krestes kan abi langa-pasensi na wan prisiri fasi!
20. Fa a sori foe langa-pasensi kan abi krakti tapoe wi matifasi nanga trawan?
20 Na Wortoe foe Gado troetroe e gi wi koni rai te a e gi wi na tranga foe no teki refensi, foe teki langa foe kisi atibron ala di wi e howpoe tapoe a moro boen sani — ija, foe abi langa-pasensi! Wi abi doronomo begi èn na froktoe disi foe Gado jeje fanowdoe foe feni en nanga wi brada èn sisa ini na gemeente, nanga den memre foe wi osofamiri, nanga sma na wi wrokope èn nanga sma di wi e miti ini na kresten diniwroko. Èn san kan jepi wi foe sori langa-pasensi? Bribi, howpoe, sakafasi, prisiri èn lobi. Troetroe, nanga den sortoe eigifasi disi wi kan abi langa-pasensi nanga ala sma.
Joe e memre?
◻ Foe san-ede langa-pasensi de fanowdoe foe wi abi wan prati ini wan jeje paradijs?
◻ Foe san-ede owroeman spesroetoe moesoe abi langa-pasensi?
◻ Foe san-ede trowmasra èn trow-oema moesoe kweki langa-pasensi?
◻ Sortoe tra eigifasi sa jepi wi foe abi langa-pasensi?
[Prenki na tapoe bladzijde 29]
Sortoe rai foe Jesus ben jepi Petrus foe abi langa-pasensi?