A kibripresi foe den — Wan lei!
„Wi meki wan lei de wi kibripresi èn ini bedrigi sani wi go kibri.” — JESAJA 28:15.
1, 2. (a) Sortoe organisâsi ini a ten disi moesoe poti prakseri a tapoe san ben pasa nanga a kownoekondre Juda foe owroeten? (b) Sortoe fowtoe froetrow Juda ben abi?
DEN wortoe disi e fiti a krestenhèit ini a ten disi so leki a ben fiti Juda, na toe-lo kownoekondre foe owroeten? Foe troe den e fiti en! Èn na teki dati foe Juda gersi nanga na krestenhèit no e pramisi boen gi na disiten krestenhèit. A wani taki, dati heri esi wan rampoe sa miti na kerki organisâsi dati, di fadon komoto a bribi.
2 A tin-lo kownoekondre Israèl ben de na noordsei foe Juda. Di Israèl ben sori taki a no ben de getrow, dan Jehovah ben gi pasi taki Asiriakondre ben wini en na ini 740 bifo G.T. En sisa kownoekondre, Juda, ben de kotoigi foe na rampoe disi di ben pasa, ma leki fa a ben sori krin, a ben abi na firi taki so wan sani no ben sa pasa noiti nanga en. ’We dan’, na so den tiriman foe en ben meki bigi, ’a tempel foe Jehovah a no na ini Jerusalem a de? A no de so taki wi na Gado spesroetoe pipel? Den priester èn den profeiti foe wi no e taki ini Jehovah nen?’ (Teki gersi Jeremia 7:4, 8-11.) Den kerki tiriman dati ben de seiker taki no wan sani ben sa kan pasa nanga den. Ma den no ben abi leti! Den no ben de getrow neleki den famiriman na noordsei. Foe dati-ede, san ben pasa nanga Samaria, ben sa pasa nanga Jerusalem toe.
3. Foe san-ede na krestenhèit abi froetrow na ini na ten di e kon, ma a abi wan boen reide foe a froetrow foe en?
3 Na a srefi fasi, a krestenhèit e taki, dati a abi wan spesroetoe matifasi nanga Gado. ’We dan’, den e meki bigi, ’wi abi tindoesoen nanga tindoesoen kerki nanga wan groepoe foe kerki fesiman di kisi spesroetoe leri, èn so srefi hondromiljoen nanga hondromiljoen bakaman. Wi abi so srefi a bijbel, èn wi e gebroiki na nen foe Jesus ini wi anbegi. Foe troe, wi abi na blesi foe Gado!’ Ma san ben pasa nanga Jerusalem foe owroeten de leki wan krakti warskow. Ala di no so langa pasa kaba aparti sani pasa na politiek sei, tokoe wi sabi taki heri-esi Jehovah sa handri krakti nanga wan fasti bosroiti kontrari a krestenhèit èn ala tra falsi fasi foe anbegi.
„Wan froebontoe nanga Dede”
4. Sortoe froebontoe Juda ben denki taki a ben meki?
4 Na ini owroeten, Jerusalem di no ben de getrow, ben kisi foeroe warskow nanga mofo foe den troe profeiti foe Gado, ma a no ben bribi den. Na presi foe dati, a ben skepi, taki dede noiti no ben sa meki a saka go na ini Sjeool, na grebi, so leki fa a ben meki Israèl, na kownoekondre foe noordsei, saka go na ini dede. Na ondro krakti foe santa jeje, na profeiti Jesaja ben taigi Juda: „Foe dati-ede, jere na wortoe foe Jehovah, oen djafman, oen tiriman foe na pipel disi di de na ini Jerusalem: Foe di oenoe ben taki: ’Wi ben meki wan froebontoe nanga Dede, èn nanga Sjeool, wi ben meki wan fisjoen doe kon; na bigi froedoe di e soengoe sani, efoe dati o hari pasa, a no sa doro na wi, bika wi meki wan lei de wi kibripresi èn ini bedrigi sani wi go kibri.’” — Jesaja 28:14, 15.
5. (a) San ben de na froebontoe di Juda ben denki taki a ben abi nanga dede? (b) Sortoe warskow, di kownoe Asa ben kisi, Juda ben frigiti?
5 Ija, den tiriman foe Jerusalem ben denki taki den ben abi wan kroederi nanga dede èn nanga Sjeool, foe taki en so, so taki a foto foe den ben kan kisi kibri. Ma na so kari froebontoe foe Jerusalem nanga dede ben wani taki, dati a ben abi berow foe den sondoe foe en èn taki a ben froetrow now tapoe Jehovah foe kisi froeloesoe? (Jeremia 8:6, 7) Kwetikweti! Na presi foe dati, a ben go soekoe jepi na libisma politiek tiriman. Ma a froetrow foe en tapoe grontapoe patna ben de wan bedrigi sani, wan lei. Den grontapoe sma di a ben froetrow na den tapoe, no ben man froeloesoe en. Èn foe di Jerusalem gowe libi Jehovah, meki Jehovah gowe libi en. A ben pasa so leki a profeiti Asaria ben warskow kownoe Asa: „Jehovah de nanga joe, so langa joe e sori taki joe de nanga en; èn efoe joe e soekoe en, a sa meki joe feni en, ma efoe joe e gowe libi en a sa gowe libi joe.” — 2 Kroniki 15:2.
6, 7. Sortoe stap Juda ben teki foe de sondro kefar, ma nanga sortoe bakapisi te foe kaba?
6 Foe di den tiriman foe Jerusalem ben abi foeroe froetrow ini den politiek patna foe den, meki den tiriman foe Jerusalem ben de seiker taki no wan „bigi froedoe di e soengoe sani”, dati na den legre di e kon feti, ben sa kon krosibei foe den foe pori na vrede nanga na seikerfasi foe den. Di den legre foe Israèl nanga Siriakondre ben bondroe kon na wan, èn ben tapoe skreki gi Juda, dan Juda ben go soekoe jepi na Asiriakondre (2 Kownoe 16:5-9). Bakaten, di den legre foe Babilon ben hari go feti nanga en, dan a ben aksi Egipti foe jepi en èn Farao opo doe wan sani, foe di a seni wan legre go jepi en. — Jeremia 37:5-8; Esekièl 17:11-15.
7 Ma den legre foe Babilon ben de toemoesi tranga, èn a legre foe Egipti ben moesoe hari ensrefi poeroe baka. A froetrow di Jerusalem ben poti na ini Egipti ben sori taki disi ben de wan fowtoe sani, èn ini 607 bifo G. T., Jehovah ben gi en abra na a pori di a ben taki a fesi. So boen den tiriman èn den priester foe Jerusalem no ben abi leti! A froetrow di den ben abi taki grontapoe froebontoe ben o tjari vrede nanga seikerfasi kon, ben de „wan lei” di den legre foe Babilon, a froedoe di e soengoe sani, ben figi poeroe.
A trowe foe na „Ston di ben kisi tesi”
8. Fa na krestenhèit teki wan posisi di gersi toemoesi foeroe di foe Juda?
8 A situwâsi dati abi en prenki ini a ten disi? Ija, foe troe! Den kerki fesiman foe na krestenhèit e prakseri toe taki no wan rampoe sa miti den. Foe taki en leti, den e taki so leki fa Jesaja ben taki a fesi: „Wi ben meki wan froebontoe nanga Dede, èn nanga Sjeool, wi ben meki wan fisjoen doe kon; na bigi froedoe di e soengoe sani, efoe dati o hari pasa, a no sa doro na wi, bika wi meki wan lei de wi kibripresi èn ini bedrigi sani wi go kibri” (Jesaja 28:15). Neleki Jerusalem foe owroeten, na so na krestenhèit e froetrow tapoe froebontoe foe grontapoe foe kisi seikerfasi èn den kerki fesiman foe en e weigri foe soekoe kibri na Jehovah. Ija, den no e gebroiki en nen srefi, èn den e spotoe èn e froefolgoe den sma di e gi grani na a nen dati. San den kerki fesiman foe na krestenhèit ben doe na a srefi leki san den djoe ede-priester ben doe ini a fosi jarihondro, di den ben trowe Krestes. Den ben taki, foe taki en leti: „Wi no abi no wan tra kownoe leki keisri.” — Johanes 19:15.
9. (a) Soema e warskow na krestenhèit na ini a ten disi na a srefi fasi leki fa Jesaja ben doe disi? (b) Na soema a krestenhèit moesoe go soekoe jepi?
9 Na ini a ten disi, Jehovah Kotoigi e warskow taki wan froedoe foe legre di o tjari dedestrafoe kon, heri-esi sa figi na krestenhèit poeroe. Boiti dati, den e sori go tapoe na troe kibripresi gi na froedoe dati. Den e taki san skrifi na ini Jesaja 28:16: „Disi na san na Soeverein Masra Jehovah ben taki: ’Loekoe, mi e poti leki fondamenti ini Sion wan ston, wan ston di ben kisi tesi, na diri oekoe foe wan fasti fondamenti. No wan sma di e sori bribi sa broeja.’” Soema na a ’diri oekoeston’ disi? Na apostel Petrus ben teki den wortoe disi skrifi èn ben tjari den kon tapoe Jesus Krestes (1 Petrus 2:6). Efoe na krestenhèit ben soekoe vrede nanga Jehovah en Kownoe, Jesus Krestes, dan a ben sa man kibri ensrefi gi na bigi froedoe di e kon. — Teki gersi Lukas 19:42-44.
10. Na baka sortoe demakandra a krestenhèit ben feti?
10 Ma a no ben doe dati. Na presi foe dati, a e soekoe vrede nanga seikerfasi, foe di a e poesoe ensrefi gi den politiek tiriman foe den nâsi foe den kon lobi en — ala di bijbel ben warskow taki a matifasi nanga grontapoe na feantifasi nanga Gado (Jakobus 4:4). Boiti dati, dan ini 1919 na wan krakti fasi a ben djompo taki gi a Folkoebontoe leki a moro boen howpoe gi libisma foe kisi vrede. Sensi 1945 a ben poti en howpoe tapoe a Verenigde Nâsi. (Teki gersi Openbaring 17:3, 11.) O fara a boemoei foe en nanga na organisâsi disi e go?
11. Sortoe sma e teki presi gi kerki na ini a VN?
11 Wan boekoe foe no so langa pasa kaba, e gi oenoe wan idea te a e taki: „No moro mendri leki toetenti-na-fo lomsoe organisâsi abi sma di e teki presi gi den na a VN. Difrenti foe den kerki tiriman foe grontapoe ben fisiti na internationaal organisâsi. A fisiti di Santa Pawsoe Paulus VI ben tjari go na a Algemene Konmakandra na ini 1965 èn di foe Pawsoe Johanes Paulus II na ini 1979, ben de den wan di sma sa memre moro iniwan trawan. Foeroe kerki abi spesroetoe tranga begi, begi, prèisesingi nanga dienst gi a Verenigde Nâsi. Den moro prenspari eksempel na di foe den lomsoe, den unitarisch-universalist sma, den baptist sma nanga a bahai bribi.”
Falsi howpoe gi vrede
12, 13. Ala di sma na ala sei abi na howpoe taki den kan doro vrede, dan foe san-ede Jehovah Kotoigi de seiker taki den warskow foe den de troe?
12 Wan foe den moro makti politiek tiriman foe grontapoe ben tjari a howpoe foe foeroe sma kon a fesi, di a ben taki: „A geslakti disi foe sma na grontapoe sa de kotoigi kande foe na kon foe wan pisiten foe vrede, di no wan sma kan poeroe baka ini a historia foe na libisma libimakandra.” A ben abi leti? Sani di ben feni presi no so langa pasa kaba wani taki, dati den warskow di Jehovah Kotoigi tjari kon a doro èn di abi foe doe nanga na kroetoe di Jehovah o tjari kon a tapoe den nâsi, no sa kon troe? Jehovah Kotoigi no abi leti?
13 Nôno, a no de so taki den no abi leti. Den sabi taki den e froeteri a waarheid foe di den e poti a froetrow foe den tapoe Jehovah èn na ini bijbel, di de Gado eigi Wortoe foe waarheid. Titus 1:2 e taki: „Gado . . . no man lei.” Foe dati-ede den abi froetrow dorodoro taki te wan bijbel profeititori e taki, dati wan seiker sani o pasa, a sa kon troe toe sondro foe misi. Jehovah ensrefi e taki: „Na so mi wortoe di e komoto foe mi mofo sa sori taki a de. A no sa drai kon baka na mi sondro boen bakapisi, bika seiker a sa doe na sani di mi abi prisiri na ini.” — Jesaja 55:11.
14, 15. (a) San den tiriman foe Juda ben meki bekènti sjatoe bifo a pori foe Jerusalem kon na ini 607 bifo G. T.? (b) San Paulus ben taki a fesi dati sma ben o meki bekènti bifo wan wantewante pori ben o kon a tapoe a grontapoe disi? (c) San wi kan froewakti na a heimarki foe na meki bekènti di den ben taki a fesi foe en na ini 1 Tesalonika sma 5:3?
14 Na ini den jari bifo na pori foe Jerusalem ini 607 bifo G. T., Jeremia ben froeteri taki den tiriman ben e bari: „Vrede de! Vrede de!” (Jeremia 8:11) Ma dati ben de wan lei. Jerusalem ben kisi pori leki wan kontroe foe den warskow di den troe profeiti foe Jehovah ben taki na ondro krakti foe santa jeje. Na apostel Paulus ben warskow taki wan srefi sortoe sani ben sa pasa na ini wi dei. A ben taki, dati sma ben sa bari taki „Vrede nanga seikerfasi!” Ma dan, na so a ben taki, „wan pori di e kon wantronso sa kon wantewante a den tapoe”. — 1 Tesalonika sma 5:3.
15 Di wi doro den jari 1990, dan koranti nanga tijdschrift foe ala sei ben taki, dati na Kowroe Orlokoe kon a wan kaba èn taki vrede na a heri grontapoe de foe si te foe kaba. Ma dan wan feti broko na ini a Mindri Owstoe. Ma tide ofoe tamara a situwâsi na grontapoe sa gro kon miti na penti di sa tjari na kari foe „Vrede nanga seikerfasi!”, di den ben taki foe en a fesi na ini 1 Tesalonika sma 5:2, 3, go na wan heimarki. Nanga a howpoe foe wi di ankra steifi ini a Wortoe foe Gado, wi sabi taki, te den doro na heimarki dati, den kroetoe foe Gado sa kon esi-esi èn sondro foe misi. No wan enkri bariwroko foe vrede èn seikerfasi di seti esi-esi, moesoe meki wi prakseri taki a pori di Gado ben taki foe en a fesi, no sa kon. Den kroetoe foe Jehovah skrifi poti na ini en Wortoe a bijbel, sondro foe joe man kenki den. Na krestenhèit, makandra nanga ala den tra falsi fasi foe anbegi, sa kisi pori. Èn baka dati Jehovah kroetoe foe pori sani, sa tjari kon a krin kontrari a tra pisi foe Satan grontapoe (2 Tesalonika sma 1:6-8; 2:8; Openbaring 18:21; 19:19-21). Foe di Jehovah Kotoigi de seiker taki Jehovah sa meki en wortoe kon troe, meki den e tan de na ai ondro na tiri foe na getrow èn koni srafoe-groepoe èn den e loekoe finifini fa den sani di e pasa na grontapoe e kon a krin (Mateus 24:45-47). Foe troe, no wan enkri moeiti foe libisma foe tjari vrede kon, moesoe meki wi denki taki Jehovah poti en prakseri a wan sei foe tjari wan bigi froedoe di e pori sani kon tapoe a krestenhèit di lai nanga sondoe.
’Gado na wi kibripresi’
16, 17. San Jehovah Kotoigi e doe te wan toe sma e mandi foe na eerlijk fasi fa den e taki a boskopoe foe den fri?
16 Son sma sa mandi kande foe na fasi fa Jehovah Kotoigi e taki fri te den e meki a tori disi bekènti. Ma te den e taki, dati den kerki tiriman foe na krestenhèit soekoe kibripresi ini wan leisani di seti, dan den e froeteri soso san bijbel e taki. Te den e taki, dati na krestenhèit e froedini strafoe foe di a tron wan pisi foe grontapoe, dan den e froeteri soso san Gado ensrefi ben taki na ini bijbel (Filipi sma 3:18, 19). Boiti dati, foe di na krestenhèit e poti en froetrow na ini den plan di a grontapoe disi e presenteri, meki den e horibaka, te joe e loekoe en boen, gi na gado foe a grontapoe disi, Satan Didibri, di Jesus ben taki foe en, dati a de a tata foe lei. — Johanes 8:44; 2 Korente sma 4:4.
17 Foe dati-meki, Jehovah Kotoigi e froeklari: Foe wi sei, wi no e gi tranga na sma foe bribi den falsi howpoe foe vrede na a heri grontapoe, foe di a politiek situwâsi e kenki. Na presi foe dati, wi e teki den wortoe foe na psalm skrifiman taki: „Gado na wan kibripresi gi wi . . . Den manpikin foe libisma na grontapoe na wan bro, den manpikin foe libisma na wan lei. Te sma e poti den tapoe wan wegi, den alamala makandra de moro lekti leki wan bro” (Psalm 62:8, 9). Den plan foe libisma foe tjari na krestenhèit èn na tra pisi foe na seti foe sani disi go na fesi èn foe gi en kibri, na wan falsi sani, wan lei! Te joe e poti den alamala makandra, dan den no abi srefi moro krakti, foe gens den prakseri foe Jehovah, leki te wan sma e haribro!
18. Sortoe warskow foe na psalm singiman e fiti na ini a ten disi?
18 Jehovah Kotoigi e teki Psalm 33 den vers 17 te nanga 19 taki toe, pe e froeklari: „Foe kisi froeloesoe, na asi [foe Egipti, di e agersi feti] na noti moro leki wan bedrigi sani, èn nanga en krakti foe libi di de pasa marki a no sa gi pasi foe lon komoto. Loekoe! Na ai foe Jehovah de tapoe den wan di e frede en, na den wan di e wakti tapoe en lobi boenfasi, foe meki na sili foe den kon fri foe dede srefi, èn foe hori den a libi ini angriten”. Na ini a ten disi, troe kresten e froetrow tapoe Jehovah èn tapoe en hemel Kownoekondre, na wan enkri seti di kan tjari vrede kon di e tan.
Na krestenhèit „wan presi di den sa masi”
19. Foe san-ede a de wan dren efoe sma e froetrow a tapoe, taki politiek organisâsi sa tjari vrede kon na grontapoe?
19 Foe di sma e poti froetrow na tapoe iniwan sani di libisma poti a presi foe Gado Kownoekondre, dan den e meki a sani dati kon tron wan falsi gado, wan sani di sma e anbegi (Openbaring 13:14, 15). Na so toe a de wan dren, wan lei te den e gi sma deki-ati foe froetrow tapoe politiek seti, so leki a Verenigde Nâsi, foe tjari vrede nanga seikerfasi kon. Jeremia e taki foe den sortoe sani disi foe falsi howpoe: „A popki foe en di a smelter sani meki en, na wan falsi sani èn no wan jeje de na ini den. Den na soso sani, wan wroko foe spotoe nanga en. Na a ten te sma e poti prakseri na den tapoe, den sa lasi gowe” (Jeremia 10:14, 15). Foe dati-ede meki den feti-asi foe na disiten prenki foe Egipti, dati wani taki a sroedati-politiek makti foe den nâsi na ini a ten disi, no sa kibri na kerki kownoekondre foe na krestenhèit na a dei foe a toemoesi moeilek ten foe en. Na froebontoe foe den kerki foe na krestenhèit nanga a grontapoe disi foe troe no sa man kibri den.
20, 21. (a) San ben pasa nanga na Folkoebontoe, èn foe san-ede a no sa waka moro boen nanga a Verenigde Nâsi? (b) Fa Jesaja ben sori taki na froebontoe foe na krestenhèit nanga grontapoe no sa gi en froeloesoe?
20 Na krestenhèit ben poti en howpoe tapoe a Folkoebontoe, ma disi ben fadon srefi sondro taki Armagedon ben kon! Now a go poti a loyaalfasi foe en tapoe a Verenigde Nâsi. Ma na organisâsi dati sa abi foe tanapoe heri-esi a fesi „a feti foe na bigi dei foe Gado na Almaktiwan”, èn a no sa pasa en libilibi (Openbaring 16:14). Srefi wan VN di den tjari kon a libi baka, noiti sa kan tjari vrede èn seikerfasi kon. Gado profeiti Wortoe e sori taki na organisâsi foe a Verenigde Nâsi nanga den nâsi di de wan memre foe en „sa feti nanga na Pikin Skapoe [Krestes na ini Kownoekondre makti], ma na Pikin Skapoe sa wini den, foe di en na Masra foe den masra èn Kownoe foe den kownoe”. — Openbaring 17:14.
21 Jehovah Kotoigi e taki nanga foeroe froetrow taki froeloesoe no de gi na krestenhèit ini den froebontoe foe en nanga Satan grontapoe. Èn te den e taki disi, dan den e sori nomo a tapoe san bijbel srefi e taki. Na ini Jesaja 28:17, 18 wi e leisi san Jehovah e taki: „Mi wani meki geregteghèit leki na markitiki èn regtfardikifasi leki na waterpas wrokosani; èn na alen foe pisipisi ijs moesoe figi den kibripresi foe wan lei poeroe, èn den watra srefi sa wasi a kibripresi poeroe. Èn na froebontoe foe joe nanga Dede seiker sa broko. Èn na fisjoen foe joe nanga Sjeool no sa tan tanapoe. Te na bigi froedoe di e soengoe sani, e hari pasa — dan joe moesoe tron toe gi en wan presi di a sa masi.”
22. San sa de a bakapisi te na krestenhèit sa kisi wan volmaakti kroetoe akroederi geregteghèit?
22 Te den kroetoe bosroiti foe Jehovah kon, dan a sa de akroederi volmaakti geregteghèit. Èn a fondamenti foe na froetrow foe na krestenhèit, en „froebontoe nanga Dede”, den sa figi en poeroe krinkrin neleki te wan froedoe e soengoe sani. Jesaja e taki moro fara: „Mamanten go miti mamanten a sa hari go doro, na deiten èn na netiten; èn a no moesoe tron noti moro leki wan reide foe beifi foe meki [trawan] kon froestan san de foe jere” (Jesaja 28:19). Fa disi sa frede sma di e loekoe, foe de kotoigi foe na bigi krakti foe a kroetoe foe Jehovah! Fa disi sa de wan toemoesi ogri sani gi den kerki fesiman foe na krestenhèit nanga den bakaman foe den foe kon si toemoesi lati, taki den ben poti den froetrow ini wan lei!
A nen foe Jehovah „wan tranga toren”
23, 24. San Jehovah Kotoigi sa doe na presi foe soekoe seikerfasi na ini a grontapoe disi?
23 Ma fa a de nanga Jehovah Kotoigi? Srefi nanga ala di internationaal, sma no wani si den na ai èn e froefolgoe den, tokoe den e horidoro foe tan aparti foe grontapoe. Den no e frigiti noiti taki Jesus ben taki foe en bakaman: „Den no de wan pisi foe grontapoe, neleki fa mi no de wan pisi foe grontapoe” (Johanes 17:16). Na ini den kriboi dei disi, den e tan poti froetrow na ini a kownoekondre foe Jehovah, no na ini den prakseri foe libisma. Foe dati-ede na rampoe di o miti na krestenhèit no sa gi Jehovah Kotoigi frede. So leki fa Jesaja ben taki a fesi: „No wan sma di e sori bribi, sa kon broeja.” — Jesaja 28:16.
24 Odo 18:10 e taki: „Na nen foe Jehovah na wan tranga toren. Djaso na regtfardikiwan e lon go na ini èn e kisi kibri.” Foe dati-ede wi e kari ala den sma di gersi skapoe foe den soekoe kibri na Jehovah èn a kownoekondre foe en ini anoe foe Krestes. Jehovah leki wan kibripresi, no de wan falsi sani! En kownoekondre ini anoe foe Krestes no de wan lei! A kibripresi foe na krestenhèit na wan lei, ma na kibripresi foe troe kresten na a waarheid.
Joe kan froeklari disi?
◻ Fa na Juda foe owroeten ben soekoe kibripresi ini wan lei?
◻ Na sortoe fasi na krestenhèit ben proeberi foe go kibri ensrefi ini bedrigi sani?
◻ Fa Jesaja ben warskow Juda èn fa Jehovah Kotoigi e meki sma jere na srefi sortoe warskow ini a ten disi?
◻ Fa na krestenhèit sa kon si taki a ben poti na froetrow foe en ini wan fowtoe sani?
◻ Tra fasi leki na krestenhèit, dan sortoe sei Jehovah Kotoigi e tan hori?
[Faki na tapoe bladzijde 13]
HEI FROEWAKTI DI DEN TAKI FOE A VERENIGDE NÂSI
„Foe na fosi tron sensi na di foe toe Grontapoe Feti na internationaal libisma libimakandra kon de wán. Na tiriwroko foe a Verenigde Nâsi, di wan ten ben de soso wan prakseri di sma ben poti howpoe a tapoe, e meki a fisjoen foe den mekiman foe en kon troe now. . . . Foe dati-ede grontapoe kan meki gebroiki foe na okasi disi foe meki a pramisi foe wan njoen grontapoe seti di sma wani langa ten kaba, kon troe.” — Presidenti Bush foe Amerkankondre ini en ’State of the Union-boskopoe gi a nâsi dati, 29 januari 1991