Tan warskow sma gi na ongewoon wroko foe Jehovah
„Jehovah sa opo, neleki fa a ben doe na a bergi Perasim, èn a sa opo doe wan sani, neleki fa a ben doe na ini a lagipresi krosibei foe Gibeon.” — JESAJA 28:21.
1, 2. Sortoe ongewoon wroko Jehovah ben doe gi en pipel ini den dei foe David?
WAN freimde doe! Wan ongewoon wroko srefisrefi! Dati na san Jehovah ben doe gi en pipel na ini owroeten, na ini a di foe erfoe jarihondro bifo G. T. Èn na freimde doe disi ben de a model foe srefi wan moro ongewoon wroko, di a sa doe ini a krosibei ten di e kon. San ben de na doe dati ini owroeten? Sjatoe baka di den ben poti David leki kownoe na ini Jerusalem, dan den Filistijn sma na ini a birti foe den, ben kon feti nanga den, èn dati ben meki Jehovah doe na freimde doe disi. Biginbigin, den Filistijn sma ben bigin feti na ini a lagipresi foe Refaïm. David ben aksi Jehovah san a ben moesoe doe èn a ben kisi na ordroe foe go feti nanga den. Foe di David ben gi jesi na a wortoe foe Jehovah, meki a ben tjari wan hebi slag kon tapoe a makti legre foe den Filistijn sma na Baâl-Perasim. Ma den Filistijn sma no ben erkèn a lasi foe den. Heri-esi den ben drai kon baka foe go doro foe ròs èn foe foefoeroe moro sani na ini a lagipresi foe Refaïm, èn agen David ben soekoe a tiri foe Jehovah.
2 A leisi disi a ben kisi foe jere taki a ben moesoe go nanga en feti-groepoe na a bakatitei foe den Filistijn sma. Jehovah ben taki: „Te joe e jere a babari foe a waka foe sroedati na ini pas na ini den penti foe den bâka boesiboesi, meki a de so dan, taki joe e handri nanga fasti bosroiti, bika na a ten dati Jehovah ben sa go a joe fesi foe naki na kampoe foe den Filistijn sma.” Èn dati na san ben pasa. David ben wakti te leki Jehovah ben meki a babari foe a waka foe sroedati na ini pas ben de foe jere ini a penti foe den bâka boesiboesi — kande nanga jepi foe wan tranga winti. Wantewante, David nanga en feti-groepoe ben djompo komoto foe den kibripresi, go feti nanga den Filistijn sma di ben broeja, èn wini den foe di den ben kiri wan lo foe den. Den ben tjari den falsi gado popki di den Filistijn sma ben libi a baka na tapoe a feti-gron kon makandra èn ben pori den. — 2 Samuèl 5:17-25; 1 Kroniki 14:8-17.
3. Foe san-ede na freimde doe foe Jehovah ben de prenspari gi den djoe ini den dei foe Jesaja, èn foe san-ede a moesoe de prenspari gi na krestenhèit ini a ten disi?
3 Disi ben de wan ongewoon wroko, wan freimde doe, di Jehovah ben doe nanga den Filistijn sma èn gi na boen foe en salfoe kownoe. Na froewondroe doe disi abi wi spesroetoe belangstelling, foe di na profeiti Jesaja ben warskow taki Jehovah ben sa doe wan srefi sortoe freimde èn krakti sani nanga den droengoeman na jejefasi foe Juda. Foe dati-ede, den kerki tiriman di no ben de getrow na ini Jesaja dei, ben moesoe poti so srefi prakseri a tapoe toe. Na krestenhèit na ini a ten disi, moesoe poti prakseri a tapoe toe, foe di san ben pasa nanga Juda ben de wan model foe san sa pasa nanga a krestenhèit te foe kaba.
„Na rostoebedi ben sori taki a sjatoe toemoesi”
4, 5. (a) Fa Jesaja e agersi na situwâsi, di no switi, foe den kerki tiriman foe en dei? (b) San e meki na krestenhèit, na ini a ten disi, abi wan situwâsi di no switi?
4 Fosi, Jesaja ben tjari a tori kon krin a doro, taki den politiek froebontoe di den owroeten droengoeman disi na jejefasi ben poti froetrow na ini, ben de wan bedrigi sani, wan lei. Dan, na wan fasi di sma kan si a tori a den fesi, a e agersi na situwâsi, di no ben de switi foe den wan di e poti den howpoe tapoe a lei dati. A taki: „Na rostoebedi ben sori taki a sjatoe toemoesi foe sma langa den foetoe na tapoe, èn srefi na bedikrosi di brei de toemoesi smara te sma e domroe densrefi na ini” (Jesaja 28:20). Iniwan sma di e langa en foetoe na tapoe wan bedi di sjatoe toemoesi, sa kon si taki en foetoe e pasa go ini a kowroe. Na a tra sei, efoe a e hari en kindi go na en borsoe foe a kan fiti ini a sjatoe bedi, dan a bedikrosi de toemoesi smara èn foeroe foe en skin de foe si a doro ete. Awansi san a e doe toe, tokoe son pisi foe en skin de a doro ini a kowroe.
5 Dati ben de a situwâsi, te joe e taki en na wan agersi fasi, foe den sma na ini den dei foe Jesaja, di ben poti a froetrow foe den na tapoe a kibripresi di de wan lei. A so na situwâsi, di no switi, de toe foe den sma ini a ten disi di poti den froetrow na tapoe a kibripresi foe a krestenhèit di de wan lei. Den skin de na doro ini a kowroe, foe taki en so. Disi a no a ten foe e soekoe switi libi ini den seti foe grontapoe foe meki vrede nanga seikerfasi kon. Na ondro a schaduw foe den kroetoe di Gado sa tjari kon, dan froebontoe nanga politiek tiriman no sa gi na krestenhèit waran nanga wan switi libi.
Na freimde doe foe Jehovah
6. San Jehovah ben sa go doe nanga Juda, èn fa a sa doe nanga na krestenhèit?
6 Di Jesaja kaba froeteri na wan toemoesi boen fasi foe na situwâsi di no switi, foe a Jerusalem foe en ten di no ben de getrow, — èn foe na disiten krestenhèit di no de getrow — dan a e taki moro fara: „Jehovah sa opo neleki fa a ben doe na a bergi Perasim, èn a sa opo doe wan sani neleki fa a ben doe na ini a lagipresi krosibei foe Gibeon foe doe a doe foe en — a doe foe en de wan freimde sani — èn foe doe a wroko foe en — a ongewoon wroko foe en” (Jesaja 28:21). Ija, Jesaja ben warskow, taki heri-esi Jehovah sa opo neleki fa a ben doe disi na Baâl-Perasim. Ma a leisi disi a ben o handri kontrari en pipel di no de getrow, èn a ben o doe dati neleki wan froedoe foe watra di joe no man hori èn di e boro wan olo pasa na ini wan dan di e broko na pisipisi. A froebontoe di Jerusalem ben meki nanga dede, ben sa sori taki a no ben abi no wan enkri waarde. Na a srefi fasi Jehovah sa doe nanga a krestenhèit ini a krosibei ten na wi fesi, èn a krestenhèit sa si taki ala den kroederi foe en, di e droengoe sma, èn di a ben meki nanga a grontapoe disi, no wani taki no wán sani. Na heri kefarlek bigi organisâsi foe en sa fadon broko èn den sa panja den bakaman foe en. Den sa bron den falsi gado foe en krinkrin.
7. Foe san-ede den ben kari den prakseri foe Jehovah di ben abi foe doe nanga Juda „wan freimde” èn „ongewoon” sani?
7 Foe san-ede Jesaja e kari na doe foe Jehovah kontrari Jerusalem wan freimde sani èn ongewoon wroko? We, Jerusalem ben de a presi pe na anbegi foe Jehovah ben de èn na foto foe na salfoe kownoe foe Jehovah (Psalm 132:11-18). Foe dati-ede, a no ben kisi pori noiti a fesi. Noiti den ben bron a tempel foe na foto disi. Di a kownoe oso foe David ben poti steifi kaba na ini Jerusalem, dan noiti sma no ben trowe en na gron. Sma ben denki taki den sortoe sani disi noiti ben sa kan pasa. A ben de wan sani, di ben de troetroe ongewoon foe Jehovah ben sa prakseri foe gi pasi taki den sortoe sani disi feni presi.
8. Sortoe warskow Jehovah ben gi foe en ongewoon doe di e kon?
8 Ma Jehovah ben gi nofo warskow nanga mofo foe en profeiti, taki sani ben o pasa di ben o seki sma (Mika 3:9-12). Foe eksempel, na profeiti Habakuk, di ben libi na ini a di foe seibi jarihondro bifo G. T., ben taki: „Oen loekoe na mindri den nâsi, tan loekoe, a wan e loekoe a trawan so dôên nanga opo mofo. De nanga opo mofo; bika wan wroko de di sma sa doe na ini den dei foe joe, di oenoe no sa bribi, awansi sma sa froeteri foe disi. Bika loekoe, mi e meki den Kaldew sma opo kon, na nâsi nanga bita-ati èn bigi krakti, di e go na den bradi opo presi foe grontapoe, foe teki foto abra pe sma e libi na ini èn di no de foe en. A de toemoesi ogri èn a e gi sma frede.” — Habakuk 1:5-7.
9. Na sortoe fasi Jehovah ben meki na warksow foe en di a ben gi Jerusalem, kon troe?
9 Ini 607 bifo G. T., Jehovah ben meki a warskow foe en kon troe. Baka di a ben gi den legre foe Babilon primisi foe kon feti nanga Jerusalem, dan a ben gi den pasi foe den pori na foto so boen leki na tempel (Kragisingi 2:7-9). Boiti dati, a ben gi pasi meki den pori Jerusalem wan di foe toe tron. Foe san-ede? We, baka 70 jari foe katibo, dan djoe di ben abi berow ben drai go baka na den eigi kondre, èn te foe kaba den ben bow wan njoen tempel na ini Jerusalem. Ma agen den djoe ben drifi gowe foe Jehovah. Na ini a fosi jarihondro G. T., Paulus ben teki den wortoe foe Habakuk taki gi den djoe foe en ten, èn na so fasi a ben warskow taki na profeititori ben sa kon troe ete wan tra leisi na ini a ten di ben o kon (Tori foe den Apostel 13:40, 41). Jesus srefi ben warskow na wan aparti fasi taki Jerusalem nanga en tempel ben sa kisi pori foe di den djoe no ben abi nofo bribi (Mateus 23:37–24:2). Den fosi jarihondro djoe dati ben poti prakseri a tapoe? Nôno. Neleki den afo foe den, na so den ben trowe na warksow foe Jehovah krinkrin. Foe dati-ede meki Jehovah ben doe na freimde wroko foe en ete wantron. Jerusalem nanga en tempel ben kisi pori ini 70 G. T. nanga jepi foe den legre foe Rome.
10. San Jehovah sa doe nanga na krestenhèit na ini a krosibei tamara?
10 Foe san-ede dan, wan sma sa denki taki Jehovah no sa doe wan srefi sortoe sani na ini wi ten? A tori de so, taki a sa meki a prakseri foe en kon troe, ala di a gersi taki a de wan freimde èn ongewoon sani gi sma di e degedege. A leisi disi a sa opo doe sani kontrari a krestenhèit, di, neleki Juda foe owroeten, e taki dati den e anbegi Gado, ma di kon pori srefisrefi. Nanga jepi foe en Moro Bigi David, Krestes Jesus, Jehovah sa kon na tapoe den „Filistijn sma” foe na krestenhèit, na wan joeroe di den no e froewakti en. A sa doe na ongewoon wroko foe en so boen, taki srefi den lasti pisi foe na kerki seti foe sani foe na krestenhèit a sa figi poeroe. — Mateus 13:36-43; 2 Tesalonika sma 1:6-10.
Wan warskow gi na doe foe Jehovah
11, 12. Fa Jehovah Kotoigi warskow sma gi den kroetoe foe Jehovah di e kon?
11 Foeroe jari langa kaba Jehovah Kotoigi e warskow sma gi na kroetoe disi foe Jehovah di e kon. Den ben sori a tapoe taki a pori foe Jerusalem nanga en tempel na ini 607 bifo G. T. èn agen na ini 70 G. T. ben de wan warskow na profeiti fasi foe san sa pasa nanga na krestenhèit. Boiti dati, den ben sori krin taki na krestenhèit, foe di a ben fadon komoto na bribi, a ben tron wan pisi foe a grontapoe makti foe falsi anbegi, Babilon na Bigiwan. Foe dati-ede meki den kroetoe foe Gado a tapoe Babilon na Bigiwan sa kon spesroetoe tapoe na krestenhèit, foe di a de a moro fowtoe pisi ini Satan orga, di moksi kon de wán. — Openbaring 19:1-3.
12 Jehovah Kotoigi sori tapoe a profeiti warskow di skrifi na ini bijbel, taki na Jehovah fasti ten, den politiek freiri foe Babilon na Bigiwan, sa drai baka gi en. Na boekoe Openbaring di e agersi den freiri disi nanga den tin toetoe foe na redi-kloroe werdri meti, e warskow: „Den tin toetoe di joe ben si, èn na werdri meti, den disi no sa wani si na hoeroe-oema [Babilon na Bigiwan] na ai, èn den sa meki a kon leigi èn nanga soso skin, èn den sa njan den pisi foe en skin èn den sa bron en krinkrin nanga faja” (Openbaring 17:16). Den sa bron na kerki krestenhèit makandra nanga ala tra falsi fasi foe anbegi. Disi sa de na freimde doe foe Jehovah, na ongewoon wroko foe en gi wi ten.
13. Fa na fasi fa sma e handri tapoe den warskow foe Jehovah de a srefi leki san Jesaja ben miti?
13 Te Jehovah Kotoigi e meki na warskow foe a rampoe disi di e kon bekènti, dan foeroe tron sma e spotoe èn e lafoe den. Sma e aksi densrefi soema den Kotoigi e prakseri taki den de foe taki den sortoe sani disi. Na krestenhèit sori so stanfaste, leki a tanapoe so fasti na ini en soesoe. Ija, son sma e feni srefi taki a posisi foe en e kon srefi moro boen. Den tiri di ben gwenti foe kwinsi en, no so langa pasa kaba ben gi en pasi foe abi moro fri foe doe sani. Ma, foe taki en leti, na krestenhèit moesoe poti prakseri tapoe a rai foe Jesaja: „No sori taki joe na spotoeman, so taki den banti foe joe no kon tranga, bika foe wan pori, ija, foe wan sani di den teki a bosroiti foe doe, mi jere foe na Soeverein Masra, Jehovah foe den legre, gi na heri kondre.” — Jesaja 28:22; 2 Petrus 3:3, 4.
14. Fa den banti foe na krestenhèit sa kon moro tranga èn moro steifi?
14 Na moro bigi pisi foe na krestenhèit sa tan kaka foetoe na wan feanti fasi gi na Kownoe nanga na Kownoekondre (2 Tesalonika sma 2:3, 4, 8). Ma, na a srefi ten, den banti foe en sa kon moro tranga èn o hari kon moro steifi. Nanga tra wortoe, a e kon de seiker moro nanga moro taki a sa kisi pori. Jehovah no sa drifi komoto foe na bosroiti foe en foe meki na krestenhèit kisi pori, neleki fa a no ben drifi komoto foe a bosroiti foe en, di a gi pasi foe Jerusalem nanga en tempel kisi pori ini 607 bifo G. T.
„Komoto foe en”
15. Sortoe pasi foe lon komoto, opo gi den opregti sma?
15 Fa wan sma kan lon gi na pori di sa miti a krestenhèit? Na ini den dei foe Israèl, Jehovah ben seni getrow profeiti foe kari den reti-ati sma kon baka na a soifri anbegi. Na ini a ten disi a meki en Kotoigi di de now miljoen nanga miljoen, kon a libi gi wan srefi sortoe prakseri. Sondro foe frede den e tjari na dede kondisi na jeje fasi foe na krestenhèit kon a doro. Na so fasi, den e meki na wan getrow fasi den bariwroko di sma kan teki gersi nanga plaag bekènti, di de na bakapisi foe na bro di den engel foe Openbaring kapitel 8 èn 9 e bro tapoe den tronpèti foe den. Boiti dati, dan fajafaja den ben meki na deki-ati bekènti na poebliki, di tanapoe na ini Openbaring 18:4: „Komoto foe en, mi pipel, . . . efoe joe no wani kisi afoe foe den plaag foe en.” Na „en” di den e sori go a tapoe djaso, na Babilon na Bigiwan, na grontapoe makti foe falsi anbegi, di na krestenhèit de a moro prenspari memre foe en.
16. Na sortoe fasi miljoen nanga miljoen sma lon komoto foe falsi relisi?
16 Sensi 1919, èn spesroetoe sensi 1922, wan ipi foe safri-ati sma di e kon bigi moro nanga moro, doe boen tapoe na deki-ati dati di gi èn den gowe libi Babilon na Bigiwan. Fosi doesoen nanga doesoen, baka dati hondrodoesoen nanga hondrodoesoen, èn now miljoen nanga miljoen sma poti densrefi aparti foe falsi fasi foe anbegi, spesroetoe na krestenhèit, èn den lon go na a soifri anbegi (Jesaja 2:2-4). Den sabi taki soso te den e gowe libi Babilon na Bigiwan na so fasi, den kan kibri densrefi foe no ondrofeni den plaag foe en, di sa abi wan heimarki te a sa kisi pori, te a ten doro foe Jehovah klari na ongewoon wroko foe en.
17, 18. Fa Jehovah ben tron wan moi kownoe-ati èn wan toemoesi moi kransi gi en pipel?
17 Na profeiti Jesaja e skrifi foe na kolokoe situwâsi foe den wan di teki a sei foe a soifri anbegi. A e taki: „Na a dei dati Jehovah foe den legre sa tron leki wan moi kownoe-ati èn leki wan toemoesi moi kransi gi den sma di e tan abra foe na pipel foe en, èn leki wan jeje foe geregteghèit gi na sma di e sidon foe kroetoe, èn leki krakti gi den di e poeroe a feti foe na portoe.” — Jesaja 28:5, 6.
18 Foe a loyaalfasi di den memre foe na getrow èn koni srafoe-groepoe e sori gi a waarheid, meki Jehovah de gi den a kownoe-ati foe glori, di no dede. Disi de spesroetoe so sensi 1926. Na ini a jari dati na Ingrisi uitgave foe Na Waktitoren foe 1 januari ben abi wan span artikel di ben nen „Soema sa gi Jehovah grani?”, pe den poti krakti tapoe a bigi fanowdoe foe gi Jehovah nen glori. Sensi a ten dati, leki noiti a fesi salfoe kresten meki na nen dati bekènti na a heri grontapoe. Na ini 1931 sma ben kon sabi den leki sma di abi moro krosibei foe doe nanga Jehovah, foe di den ben teki a nen Jehovah Kotoigi. Boiti dati, wan bigi ipi tra skapoe ben komoto so srefi foe na krestenhèit èn foe na tra pisi foe Babilon na Bigiwan. Den toe teki na nen foe Gado. Na bakapisi? Jehovah srefi — èn no na wan noso tra nationaal srefidensi di de foe wan pisiten nomo — na wan moi kownoe-ati foe glori èn wan toemoesi moi kransi gi moro leki fo miljoen sma na ini so wan 212 kondre nanga èilanti foe se. Fa a de wan grani gi den sma disi foe tjari na nen foe na wán enkri libi èn troe Gado! — Openbaring 7:3, 4, 9, 10; 15:4.
„Na tapoe en na jeje foe Jehovah moesoe kon sidon”
19. Soema na a sma di e sidon foe hori kroetoe, èn fa Jehovah ben tron wan jeje foe geregteghèit gi en?
19 Jehovah ben tron „wan jeje foe geregteghèit” gi Jesus, „na sma di e sidon foe hori kroetoe”. Di Jesus ben de na grontapoe, a no ben wani foe a jeje foe den grontapoe froebontoe, di e droengoe sma, teki en abra. Now, leki na Kownoe foe Gado di poti na tapoe a kownoestoeroe, Jesus foeroe nanga santa jeje, èn na jeje e tiri en foe teki bosroiti di de ini balansi èn di e kotoigi taki a man si sani moro krin. Na profeititori kon troe na ini Jesus: „Na tapoe en na jeje foe Jehovah moesoe kon sidon, na jeje foe koni èn foe froestan, na jeje foe rai èn foe krakti, na jeje foe sabi èn foe na frede gi Jehovah” (Jesaja 11:2). Foe troe, nanga jepi foe Jesus, Jehovah sa „meki geregteghèit leki na markitiki èn regtfardikifasi leki na waterpas wrokosani” (Jesaja 28:17). Ala di den feanti di droengoe na jeje fasi sa kisi pori srefisrefi, dan den sa doe reti na a santa nen foe Jehovah èn en universeel soevereiniteit.
20, 21. Fa den wortoe foe Jesaja 28:1-22 abi krakti a tapoe joe?
20 Fa a profeititori disi foe Jesaja kapitel 28, wani taki wan toemoesi moi sani gi wi ini a ten disi! Efoe wi e tan hori wisrefi krin foe den droengoeman na jeje fasi foe na krestenhèit èn e tan hori na a soifri anbegi, dan wi sa kisi kibri te Jehovah e doe en freimde doe èn en ongewoon wroko. Fa wi e breiti foe sabi disi! Èn fa a prakseri e meki wi firi kolokoe taki te den sani disi sa pasa, dan ibriwan sma sa moesoe foe sabi taki Jehovah foe den legre ben doe disi gi en getrow pipel èn gi a regtfardiki foe ensrefi nanga jepi foe Jesus Krestes! — Psalm 83:17, 18.
21 Foe dati-ede, meki ala troe kresten go doro foe warskow sondro frede gi na freimde doe foe Jehovah. Meki den tan horidoro foe froeteri foe en ongewoon wroko. Èn te den e doe disi, meki bekènti na ala sma taki wi poti na howpoe foe wi di no kan seki, na tapoe Gado Kownoekondre na ondro en Kownoe di Gado poti tapoe a kownoestoeroe. Meki na faja, na fasti bosroiti èn na loyaalfasi foe den jepi foe gi wi almakti Gado Jehovah têgo prèise. — Psalm 146:1, 2, 10.
Joe kan memre disi ete?
◻ Foe san-ede na krestenhèit de ini wan situwâsi di no switi?
◻ San Jehovah ben abi ini prakseri foe doe nanga Jerusalem, èn foe san-ede disi ben de „wan freimde” èn „ongewoon” sani?
◻ Sortoe warskow Jehovah Kotoigi meki bekènti ini a tori foe na krestenhèit, èn sortoe fasi foe handri den miti?
◻ Fa sma kan lon komoto gi na pori di na krestenhèit o kisi?
[Prenki na tapoe bladzijde 20]
Jehovah sa doe ete wantron en freimde doe, a leisi disi kontrari na krestenhèit