Foe sainde na kristenheid no sa tan foe de?
„Loekoe! Den trowe na wortoe foe Jehovah, en sortoe koni den abi dan? . . . na proféti te go miti srefi na priester, ibriwan e handri tapoe wan bidrigifasi.” — Jer. 8:9, 10.
1. Foe sainde a no de wan vreemde sani, dati Jeruzalem leki wan factor foe vréde sa meki na verwakti di poti tapoe hen no kon troe?
NA DISITEN Jeruzalem, na foto di den dri moro bigi religie foe na grontapoe e si leki toemsi prenspari, de leki foe pré wan rol di wani taki foeroe gi na grontapoe. A sa de ete na foto foe na vréde-kownoe? A sa de ete na prenspari factor foe na kon troe foe grontapoe-vréde? Ini den sani disi a no sa meki na verwakti kon troe foe den soema di e waarderi hen bigi tapoe na tori foe religie. Disi no moe de wan vreemde sani gi wi, bikasi srefi na owroe Jeruzalem no ben meki srefi na verwakti foe Gado kon troe, na soema di na glori tempel foe hen ben de foe si tapoe na bergi Moria, wan foe den barinen pikin bergi.
2. (a) San wi kan misi te wi e arki den takiman foe na Kristenheid? (b) San Jehovah ben meki kon foe warskow na kristenheid?
2 No meki wi de wan foe den soema, di ini disi ten e waka na pasi di moesoe sa meki den verwakti no kon troe. Na kristenheid, di e verwakti foeroe foe na Jeruzalem foe disiten, abi langaten baka wan makti ston ini religieuze nanga politiek afersi. Aladi a abi makti, wi ben sa lasi na tégo libi, di wi wani abi nanga ala prisiri, te wi e arki na den takiman foe hen ini na moro moeiliki ten disi foe na heri libisoema historia san den abi foe taki. Akroederi na sondro fowtoe wortoe foe na Gado, di na kristenheid taki den e aanbegi, dan na ini nen kristendom dati moesoe foe pori soleki dati ben de nanga na Jeruzalem foe na ten foe na proféti Jeremia (Jer. 6:1-8). Nanga na mofo foe soema di gi den srefi krin krin abra na Gado soleki Jeremia, na kristenheid ben kisi boen warskow foe na seker pori di e wakti hen. Ja, soleki a ben de ini na laatste dé foe na Jeruzalem ini na ten foe Jeremia, na so Jehovah opo hen salfoe kotoigi kon foe kan dini leki wan disiten Jeremia-klasse (2 Kron. 36:15, 16). Jehovah ben seni geregeld den kristen kotoigi disi go na den kerki-soema foe na kristenheid, en a ben de leki „a ben opo ala dé froekoe foe seni den” (Jer. 7:25, 13). Ma ala den sani disi no ben mag jepi!
3. Baka na eksempel foe soema den „priester” nanga „proféti” foe na kristenheid ben waka ini na doe wan sani nanga so wan warskow?
3 Den „proféti” nanga „priester” foe na kristenheid ben wégri foe poti prakseri tapoe den wortoe foe den. Den no e feni hen prisiri dati na „ipi skapoe” foe den skreki. Foe datede den e gi den falsi djaranti di de kontrari den profétitori foe Gado. So a ben de ooktoe ini na ten foe Jeremia en ini den dé foe den apostel foe Kristus (Jer. 5:20, 21; Matt. 13:13-15; Tori foe. 28:25-27). Wi wani de leki den soema disi di den kori, sodati wi e wégri foe poti prakseri tapoe den wortoe foe Gado? Nono!
VERKEERTI VERTROUW INI WAN KERKI LEKI WAN TAPOE
4, 5. (a) Ini sortoe seti foe sani den soema foe na kristenheid e poti vertrouw now na ini? (b) fa Jeremia ben skrifi foe den soema ini hen ten di ben meki a srefi fowtoe?
4 Miljoen miljoen soema e poti den vertrouw ini disi ten ini wan kerki seti foe sani di moesoe pori. Den geestelijken (kerkifesiman) foe na kristenheid e gi tranga na den kerkisoema foe den foe doe disi. Ini den dé foe Jeremia, den soema di ben libi ini Jeruzalem nanga na kondre Juda ben meki na srefi fowtoe. Wi no wani waka na den baka. Jeremia ben kisi na komando foe Jehovah, foe go tanapoe ini na doro foe na tempel foe Jeruzalem en foe taki krin gi den soema di ben kon na inisé drape:
5 „’No poti oen vertrouw ini bidrigi wortoe, foedi den e taki: Na tempel foe Jehovah, na tempel foe Jehovah, na tempel foe Jehovah na den! Oen de poti oen vertrouw ini bidrigi wortoe — a no sa jepi kwet-kweti. San? Foefoeroe, kiri nanga soetadoe nanga sweri falsi, en ofrandi-smoko na Baäl en waka baka tra gado, di oen no ben sabi — en oen moe kon tanapoe na mi fesi ini na oso disi di den kari nanga mi nen en oen moe taki: „Wi sa kon fri troe troe”, wansi den e doe ala den takroe sani disi? Na oso disi, di den kari nanga mi nen, no de moro leki wan olo foe foefoeroeman? Loekoe, misrefi toe si hen’, so Jehovah taki.” — Jer. 7:4-11.
6. Di Jezus ben opo doe sortoe sani a ben gebroiki den wortoe foe Jeremia tapoe na tori foe na tempel foe Jeruzalem?
6 Jeremia no ben kisi na makti foe krin na tempel foe ala sani di no ben krin en di den soema ben poti drape, di ben wani moksi na aanbegi foe Jehovah nanga na heiden afkodré aanbegi (Jer. 7:30, 31) Ma, moro leki 630 jari baka na pori foe na tempel dati foe Jeruzalem, dan Jezus Kristus leki na Manpikin foe Gado ben krin na toe okasi na tempel foe Jeruzalem, di ben meki baka. Nanga disi Jezus ben gebroiki den wortoe foe Jeremia. Wi e lési: „Jezus ben go ini na tempel en a ben trowe ala den soema na dorosé di ben seri en bai sani en a kanti den tafra foe den soema di e broko moni en den bangi foe den di e seri doifi. En a taki gi den: ’Boekoe taki: „Mi oso sa de wan oso foe begi”, ma oen e meki a tron wan olo foe foefoeroeman’” (Matt. 21:12, 13; loekoe ooktoe Johannes 2:15, 16). Na tempel dati di no ben krin ben pori ini 70 G.T.
7. (a) Ini san den kerkiman dati foe na kristenheid e kenki na kerki seti foe den aladi na a srefi ten den e doe na aanbegi foe den? (b) Fa den e kari Jezus Kristus en fa a sa kari den tokoe?
7 Spesroetoe sensi 1919 G.T. na disiten Jeremia-klasse ben sori na grontapoe tapoe na fasi foe na kristenheid di no krin. Aladi kerkisoema e doe den aanbegi ini na sokari kristen seti foe sani, na a srefi ten den e teki prati ooktoe na „foefoeroe kiri, doe soetadoe en sweri falsi”. Den e tjari den kerki ofrandi foe den na tra gado ete (Baäl, Masra) boiti na Masra Jezus Kristus. Nanga na kisi foe goedoe na prakseri, den e kenki na kerki seti foe den kon tron „wan olo foe foefoeroeman” (Jer. 7:9-11). Nanga ala den sani disi di de takroe ini na ai foe Jehovah, tog den kerkiman foe na kristenheid e dini Jezus Kristus nanga mofo, en den e kari hen „Masra”. Den e prakseri dan dati ala sani boen kaba, en dati Gado e teki na fasi foe aanbegi foe den. Ma Jezus Kristus sa meki den skreki te a sa kari den „wrokoman foe kroetoedoe”, bikasi den no e doe na wani foe hen papa. — Matt. 7:21-28.
8. Foe sainde den kerkiman foe na kristenheid e bribi dati na kerki seti foe den noti sa kan pasa nanga hen?
8 Soleki den Israëlsoema di Jeremia ben moe meki Jehovah boskopoe bekenti gi den, na so den kerkiman foe na kristenheid e si na tempel foe den, di kari nanga na nen foe Kristus, leki wan tapoe tegen na ongolokoe di sa kon foe na sé foe Gado. Den e sori tapoe na sokari kristen seti foe den en den e taki: „Na tempel foe Jehovah na den” (Jer. 7:14). Na Lomsoe Kerki e taki, dati a de leki den apostel, foedi a meki wan lin foe soema di teki presi foe den apostel te go miti den twarfoe apostel foe Kristus. Na Anglikaanse Kerki foe Groot-Brittanië (Ingrisikondre) e doe a srefi sani nanga den „bischop” foe den (episcopale geestelijken). Den patriarchen foe na Oosters-Orthodoxe kerki e steun tapoe wan teki presi foe den bischop foe den di noiti ben tapoe en di e go te na den twarfoe apostel, di soleki den taki ben abi soema di ben teki na presi foe den. Na pausdom foe Rome abi hen stonfoetoe tapoe na bribi dati a ben bow tapoe na apostel Petrus leki na „klipston disi”, di „den doro foe hel” no ben sa kan wini (Matt. 16:18, 19, Willibrordvertaling). Foedi den e taki dati foe sensi na ten foe Kristus den sani disi tan, den e taki dati na Kristenheid abi wan tapoe en no kan pori poeroe na pasi.
9, 10. (a) Sortoe aksi e kon foe aanbegiman di e poti vertrouw ini na „tapoe” foe na kristenheid? (b) San Jehovah ben taigi Jeremia foe taki foe den djoe di ben vertrouw tapoe na tempel foe den?
9 Efoe wan soema poti hen vertrouw ini na „tapoe” foe na kristenheid, dan disi de wan djaranti gi hen, dati a no sa pori makandra nanga na kristenheid en ondrofeni ongolokoe? Na apostel Paulus e warskow, dati soema ini „den laatste dé . . . ben sa abi wan sortoe reti fasi foe dini Gado, ma na krakti foe hen den no e sori, en” so a de taki moro fara, „Drai baka foe den disi” (2 Tim. 3:1-5). Soboen te soema e dini Gado nanga gwenti ini oso ofoe tra presi di den taki gi abra na Gado, ma na a srefi ten no de krin foe na moksi makandra foe falsi aanbegi nanga grontapoefasi, dan disi de dan wan sekerfasi, dati den sortoe soema disi sa tan na libi te Gado tjari hen regtvaardiki atibron kon? We, san Jehovah ben taigi Jeremia foe taigi den Israël soema di ben vertrouw tapoe na tempel foe den? Arki:
10 „’Go now na a presi foe mi, di de ini Silo (so wan 32 kilometer noordsé foe Jeruzalem) pe mi ben meki na nen foe mi libi fositen, en loekoe san mi ben doe nanga dati foe na takroedoe foe mi pipel Israël ede. En now, foedi oen ben tan doe ala den wroko disi’ so Jehovah taki, ’en mi ben tan taki nanga oen, mi ben opo froekoe mamanten en taki ma oen no ben arki, en mi ben tan kari oen, ma oen no ben piki, meki mi wani doe soleki mi doe nanga Silo, mi wani doe ooktoe nanga na oso di kari nanga mi nen en di oen vertrouw na tapoe, en nanga na presi di mi ben gi na oen fositenpapa. En mi wani trowe oen foe mi fesi, soleki mi ben trowe oen brada, ala den pikin foe Efraïm.’” — Jer. 7:12-15.
11. San ben pasa ini den dé foe Samuël ini Silo, di ben seki na kerki firi foe den Israëlsoema?
11 San ben pasa ini den dé foe na jongoe proféti Samuel nanga Silo, ben seki na kerki firi foe den Israëlsoema. Den ben vertrouw dati na santa ark foe na verbontoe ben sa kibri den dati den Filistijn soema no ben wini den. Foe datede den ben poeroe disi foe na Moro santa kamra foe na tabernakel, di ben de ini Silo, aladi wetteloos priester, den manpikin foe na hépriester Eli, ben tjari hen (na ark) go na a fetigron. Ma na ark no ben kibri den foe den bakapisi foe den sondoe foe den na a wet foe Jehovah, en na ark ben fadon ini anoe foe den heiden Filistijn soema; den priester manpikin foe Eli, Hofni nanga Pinehas, den kiri en di na fatoe hépriester Eli ben jere na takroe njoensoe, a ben fadon na baka, broko hen neki en a ben dede. Na kwinsi di den Filistijn soema ben kwinsi den Israëlsoema ben go doro en na ark, na marki foe na de noja foe Jehovah, no go noiti moro na hen presi ini na santa tabernakel ini Silo, aladi den afkodré Filistijn, di ben kisi kwinsi ben seni hen go baka. — 1 Sam. 3:1 te nanga 7:2.
12. Fa Jehovah ben handri nanga Jeruzalem nanga na kondre Juda soleki a ben handri wan dé nanga Silo di a ben feni boen?
12 Nanga mofo foe Jeremia, Jehovah ben meki den jere na warskow, dati a ben sa meki na srefi sani pasa nanga Jeruzalem leki ben pasa nanga Silo di a ben lobi wanten. Foe datede a meki ini 607 bifo G.T. den Babylon soema pori Jeruzalem. Srefi na tempel di kownoe Salomo ben bow en di ben abi na ark foe na verbontoe, ben pori. Na ark srefi no de foe feni moro ini no wan skrifi, sodati na presi pe a de no de bekenti now. Baka na ongolokoe tapoe Silo, den Filistijn soema ben meki den Israël soema libi drape. Ma di den Babylon soema ben pori Jeruzalem nanga na tempel foe hen den ben tjari na moro bigi pisi foe den djoe di ben tan na libi go na a farawe Babylon. Den wan toe djoe di ben tan na baka ben gwe libi na kondre te foe kaba nanga frede en lowe go na Egypte. Nanga disi na heri kondre Juda ben tan na baka sondro soema ben libi na ini. Na so fasi Jehovah ben trowe den djoe dati, di ben broko hen verbontoe, komoto foe hen fesi!
13. Sortoe leri wi kan leri ini na tori disi foe verkeerti vertrouw?
13 Meki wi teki wan leri foe disi now. Meki wi no poti vertrouw ini san den geestelijken (kerkifesiman) foe na kristenheid e si leki wan tapoe foe kibri hen foe na pori. San ben pasa nanga Jeruzalem nanga hen tempel, en dati ben de dri-tenti-na-sébi jari baka di Jezus ben krin na doti tempel foe Jeruzalem, di ben kenki kon ini „wan olo foe foefoeroeman”, sa de noti te joe loekoe na „bigi benawtoe” di djonsro sa kon tapoe na kristenheid. — Matt. 24:1, 2, 21, 22.
FOE KERKI SANTAFASI TE GO NA DOTIFASI
14. Foe sainde wi no moe begi foe na kristenheid moe tan?
14 No wan troe lobiman foe na Gado foe na bijbel sa begi dati so wan vreemde sani noiti moe pasa nanga na kristenheid. Jehovah ben gi na proféti Jeremia na komando foe no begi dati Jeruzalem nanga na morsoe tempel foe hen moe tan fri foe Hen regtvaardiki atibron. Na Jeruzalem foe disiten, na kristenheid, sori dati a no kan kenki. Baka ala den jari di Jehovah ben seni hen kristen Kotoigi foe warskow den soema foe na kristenheid, a ben doro ini na doe foe takroedoe wan hémarki di a no man kisi pardon moro. — Jer. 7:18-26; 5:7-9.
15, 16. (a) Te joe loekoe sortoe doe meki na kristenheid no verdini sari? (b) San Jehovah ben taki ini Jeremia 7:30, 31 leki wan gersitori?
15 Wi no moe abi sari gi na kristenheid, foedi nanga na pori foe hen someni soema sa lasi libi. Na doe foe hen ben tjari foeroe sjen kon tapoe Gado. Foe sainde wi no e prakseri na a fosi presi na hen? Hen de moro prenspari leki ala libisoema mekisani. Prakseri pikinso fa na kristenheid nanga den hondro hondro miljoen kerkiman foe hen, ben tjari sjen kon tapoe hen nen en fa den ben vervolgoe hen getrouw kotoigi di ben meki bekenti hen warskow en bosroiti foe libi. Wi e broko-ede moro nanga tranga jesi soema leki wi e broko-ede nanga na nen foe a Moro Hé Gado? Dati den sa dede makandra nanga na kristenheid na wan sari sani, ma na disiten sjen kerki doe foe den de wan moro sari sani. Leki wan gersitori foe disi, Jehovah ben taki:
16 „’Den manpikin foe Juda ben doe san de ogri ini mi ai’, so Jehovah taki. ’Den ben poti den tegoe sani foe den ini na oso di kari nanga mi nen foe morsoe hen. En den ben bow den hé presi foe Tofeth, di didon ini na lagi presi foe na manpikin foe Hinnom (dorosé foe na zuidsé Skotoe foe Jeruzalem), foe (bron san?) bron den manpikin nanga oemapikin ini na faja, wan sani di mi no ben komanderi den en di no ben kon ini mi ati.’” — Jer. 7:30, 31; Loekoe ooktoe Lev. 18:21; 20:2-5.
17. (a) Sortoe aksi e kon na fesi tapoe na tori foe sari gi den libisoema slagti-ofrandi nanga den papa nanga mama? (b) Foe soema na prakseri foe den sortoe ofrandi disi komoto?
17 Te ai kon tapoe sari soboen, dan nanga soema wi abi moro sari? Nanga den afkodré papa nanga mama, di ben moe gi frantwortoe na Jehovah? Ofoe nanga den jongoe manpikin nanga oemapikin di ben bari te den ben gi den leki ofrandi tapoe wan hé altari ini Tofeth ini na lagipresi foe na manpikin foe Hinnom leki libisoema ofrandi gi na falsi gado Molech (Kownoe) (Jer. 32:35). Fa den papa nanga mama disi di no ben abi ati gi den pikin foe den ben kan tjari so wan aanbegi kon akroederi nanga na aanbegi ini na santa tempel pikinso nordsé foe na lagi presi? Jehovah no ben gi den komando foe tjari den sortoe libisoema ofrandi gi wan falsi gado. Na prakseri na den sortoe libisoema ofrandi disi ben kon ini na ten dati ini na ati foe den kerkiman di ben fadon komoto foe bribi, ma noiti a ben kon ini na ati foe Jehovah Gado. San de na paiman di den soema verdini di e proeberi foe moksi so wan aanbegi nanga na aanbegi foe Jehovah?
18. Fa joe kan agersi den sortoe ofrandi disi foe owroeten te joe loekoe na nomroe foe den nanga den ofrandi di na kristenheid ben tjari now ini moro pikinso leki wan hondro jari?
18 Den pikinnengre ofrandi di den „manpikin foe Juda” di ben fadon komoto na bribi ben gi leki ofrandi, te joe loekoe na nomro no de noti nanga den libisoema ofrandi di na kristenheid ben tjari ini den hondro hondro jari gi den no-kristen gado foe hen. Aladi a de taki dati a de na kownoekondre di joe kan si foe na vréde kownoe, . . . tog a ben gi leki ofrandi na a feti-gado, na, Molech foe hen ofoe „Kownoe” den foeroe foeroe manpikin nanga oemapikin foe hen. Ini moro pikinso leki hondro jari ten a ben gi leki ofrandi now tin tron miljoen foe den moro boen jongoe kerkiman ini den toe moro broedoe feti foe na heri libisoema historia en ini foeroe moro pikin feti. Na kristenheid e kari disi tapoe wan tergi fasi kristendom. Den sortoe ofrandi disi a de si leki na moro „bigi ofrandi” di e gi den wan di den tjari leki ofrandi wan paspoort wantron wantron foe kon ini na de noja foe Kristus ini hemel!
DEN OFRANDI DI E PRISIRI JEHOVAH GADO
19. San a wani taki foe datede gi wan kristen foe pristeri hen skin leki wan „libi, en santa slagti ofrandi” na Gado?
19 Disi no de den ofrandi di Jehovah Gado taigi den foetoe boi foe hen manpikin, Jezus Kristus foe tjari. Ini Romeini 12:1, 2 a ben Meki na apostel Paulus skrifi moro foeroe: „Mi e begi oenoe tranga, brada, na den sari-ati foe Gado, foe pristeri oen skin leki wan slagti-ofrandi, di abi libi, santa en switi na Gado, wan santa diniwroko nanga joe verstan. En no teki den fasi foe na seti foe sani disi, ma kon verander nanga na kenki foe oen verstan, sodati oen kan sabi san de na boen en switi nanga volmaakti wani foe Gado.” Te wan kristen e pristeri hen skin leki „wan libi en santa slagti-ofrandi”, dan disi no wani taki dati a moe kiri hen srefi ofoe a meki wan kerki priester kiri hen en offer hen tapoe wan altari. Dati no ben sa de wan „santa diniwroko nanga oen verstan”. A wani taki moro foeroe, dati wan kristen e libi wan libi foe offer hensrefi foe na boen foe na diniwroko foe Gado en no dati foe espresi, foe soema si, a de meki hensrefi wan soema di e pina.
20. Sortoe slagti-ofrandi wan libi kristen kan offer na Gado te a de libi tapoe so wan fasi dati „a switi na Gado”?
20 Te a de libi tapoe wan fasi „di switi na Gado”, dan wan troe kristen kan tjari gi Gado den ofrandi di Hebreeër 13:15, 16 e kari: „Nanga jepi foe hen (Kristus, Gado Hépriester) meki wi tjari alaten wan slagti-ofrandi foe prijse, da foe taki den froktoe foe den mofo-boeba, di e meki bekenti hen nen. Boiti dati, no frigiti foe doe boen en prati sani nanga trawan, bikasi den sortoe ofrandi disi de switi na Gado.”
21. San Jehovah ben si leki na moro prenspari sani gi hen pipel leki na offer foe meti slagti-ofrandi en san wi kan taki foe datede foe libisoema ofrandi?
21 Den sortoe ofrandi disi di skrifi dja e poti na wan sé ibri moksi foe na aanbegi foe Jehovah nanga na offer foe libisoema ofoe meti slagti-ofrandi gi falsi gado (Jes. 42:8). San Gado e verwakti na a fosi presi foe hen pipel, de foe gi jesi, en spesroetoe na „boen en switi en volmaakti wani foe Gado”. Di Jehovah ben verloesoe hen pipel poeroe foe na kwinsi foe na Egypte foe owroeten, wan kwinsi di ben sa tjari dede, a no ben poti na offer foe meti slagti-ofrandi tapoe na fosi presi leki foe na moro bigi fanowdoe: „Ma na wortoe disi mi ben komanderi den, taki: ’Gi jesi na mi sten en mi wani de oen Gado en oen sa de mi pipel; en oen moe waka na heri pasi di mi sa komanderi, sodati a sa waka oen boen” (Jer. 7:22, 23; 1 Sam. 15:22). Efoe Jehovah soboen no ben aksi meti ofrandi foe hen pipel, dan na moro a no ben sa aksi libisoema ofrandi foe den. Na prakseri foe libisoema ofrandi, soleki den wan di ben tjari gi Baäl ofoe Molech, „no ben kon srefi ini hen ati”. — Jer. 7:31.
22, 23. (a) Fa a kristenheid nanga na heri bericht foe hen foe trowe broedoe no ben tjari ofrandi gi Gado di e prisiri Gado? (b) San ben sa pasa nanga na eksempel foe hen ini owroeten, san e sori ofoe a sa tan sondro foe kisi strafoe?
22 Na kristenheid, aladi a trowe libisoema broedoe, no ben tjari den ofrandi di e prisiri Gado. A mankeri na gi jesi na a Gado foe na bijbel (Micha 6:6-8). Te leki na dé foe tide a no ben sori berouw foe na tranga jesi doe foe hen, sodati a ben kan tjari wan ofrandi di fiti Gado: „Den slagti-ofrandi gi Gado de wan broko geest; wan broko en masi ati, o Gado, joe no sa veragti” (Ps. 51:17). A verdini foe tan sondro foe kisi strafoe? Na eksempel foe hen ini owroeten, Jeruzalem, ben ondrofeni wan reti strafoe, soleki Jehovah ben taki ooktoe:
23 „’Foe datede, loekoe! dé e kon’, so Jehovah taki, ’Dati soema no sa kari hen moro Tofeth nanga na lagipresi foe Hinnom, ma na lagi-presi foe kiri; en den moe beri ini Tofeth sondro dati nofo presi de. En den dede skin foe na pipel disi moe de leki njanjan gi den fowroe foe hemel en gi den meti foe grontapoe, sondro dati wan soema e meki den béfi. En mi wani meki kon tan tiri foe den foto foe Juda nanga den strati foe Jeruzalem na sten foe bigi prisiri en na sten foe bréti-fasi, na sten foe na bruidegom en na sten foe na bruid; bikasi na kondre sa de noti moro leki wan pori presi.’” — Jer. 7:32-34; 19:6-9.
24. Oten na kon troe foe na ernstig profétitori ben kon troe leki wan eksempel?
24 Na kon troe foe na ernstig profétitori disi no pasa ini na ten foe na tiri foe kownoe Josia, di ben broko den afkodré-gado en di ben morsoe den presi di ben de foe na aanbegi foe Molech en tra demoon gado (2 Kron. 23:3-20). Ini 607 bifo G.T., di Jeruzalem ben fadon ini anoe foe den Babylon soema en den mofina soema di ben tan na libi ben tjari gwe en baka dati na foto ben pori, dan Tofeth ben kenki en na lagipresi foe Hinnom ini wan lagipresi foe dedesoema, wan presi pe den dedeskin foe den Judasoema di no ben beri ben didon, sodati den fowroe di e njan meti nanga den fo-foetoe meti ben abi fri now foe njan den. Juda nanga Jeruzalem ben de 70 jari sondro libisoema. — 2 Kron. 36:17-21.
25. Ini na kon troe foe sortoe profétitori foe Jeremia na kristenheid no sa lon komoto te wi loekoe san wi ben taki dja na fesi?
25 Leki fa a ben pasa nanga na eksempel foe hen na owroeten, na so a no sa pasa moro betre nanga na kristenheid foe now, di lai nanga broedoe-paiman, nanga den heiden gwenti, libisoema traditie en wan moksi foe heiden filosofie nanga bijbel leri. A no sa lon komoto foe na kon troe foe na profétitori foe Jehovah: „Wan hebi winti so opo kon foe den moro farawe pisi foe grontapoe. En den di Jehovah sa naki trowe sa didon tapoe na dé dati troe troe foe na wan pisi foe na grontapoe te no a tra pisi. Soema no sa kré foe den, den no sa tjari kon makandra ofoe beri. Den sa de leki fatoe tapoe na doti foe grontapoe” (Jer. 25:32, 33). Nono! Na kristenheid no sa pasa libi-libi na „bigi benawtoe” di e kon (Matt. 24:1, 2, 21, 22). Boiti dati, na heri tra pisi foe na grontapoe kownoekondre foe falsi religie sa waka na hen baka en sa go ini na pori foe hen!
[Faki na tapoe bladzijde 225]
Den bijbel profétitori foe Jeremia, e sori sma di lobi regtvaardikifasi, „na pasi foe libi”. A de verteri ooktoe fa Jehovah Gado sa tjari na kroetoe kon tapoe falsi religie en na den naatsi di e kaka foetoe gi na wani foe hen. Na joeroe dati kon krosibé! A de foe datede actueel, dati na „Wachttoren” disi nanga den trawan di e kon, e taki foe na disiten kon troe foe na profétitori foe Jeremia.