Waka so leki fa Jehovah leri joe foe waka

„Leri mi, o Jehovah, foe joe pasi. Mi sa waka ini joe waarheid. Tjari mi ati kon na wán foe frede joe nen.” — PSALM 86:11.

1, 2. San e boeweigi Jehovah Kotoigi foe weigri foe teki broedoetransfusie?

„KANDE Jehovah Kotoigi abi leti foe weigri foe gebroiki sani di abi broedoe na ini, bika a de troe taki broedoetransfusie kan tjari wan prenspari nomroe foe sani abra, so leki bacterie noso virus, di kan meki wan sma kon siki.” — Le Quotidien du Médecin, 15 december 1987.

² Son sma di ben leisi na kommentaar dati ben firi kande taki na tref Jehovah Kotoigi ben tref en taki den ben weigri broedoetransfusie langa bifo sma ini algemeen ben kon sabi o kefarlek den kan de èn srefi kan tjari dede kon. Ma na fasi fa Jehovah Kotoigi e si broedoe no de so maar, so srefi a no de wan regel di wan ofoe tra freimde relisi groepoe ben meki, wan fasi foe si sani di e komoto foe frede taki broedoe no de sondro kefar. Na presi foe dati den Kotoigi e weigri broedoe foe di den abi na fasti bosroiti foe waka na wan fasi pe den e gi jesi na a Gran Leriman foe den — Gado.

3. (a) Fa David ben prakseri foe na abi di sma abi Gado fanowdoe? (b) Foe di David ben froetrow tapoe Gado dan na sortoe loesoe a ben e loekoe go na fesi?

³ Kownoe David, di ben firi taki a abi Gado fanowdoe, ben abi na fasti bosroiti foe kisi leri foe en èn foe ’waka ini en waarheid’ (Psalm 86:11). Wan leisi den ben gi David na rai taki efoe a ben sorgoe foe no kisi broedoepaiman ini den ai foe Gado, en ’sili ben sa kan sori taki a domroe na ini a saka foe libi na Jehovah’ (1 Samuèl 25:21, 22, 25, 29). Neleki fa sma ben domroe diri sani boen foe kibri èn hori den, dan na so Gado ben kan kibri èn hori na libi foe David. Foe di David ben teki na koni rai, meki a no ben proeberi foe froeloesoe ensrefi nanga jepi foe den moeiti di ensrefi ben doe, ma a ben froetrow tapoe na Sma di a ben kisi en libi: „Joe sa meki mi sabi na pasi foe libi. Prisiri te foe abi satisfaksi de na joe fesi; switifasi de na joe reti-anoe sei foe têgo.” — Psalm 16:11.

4. Foe san-ede David ben wani foe kisi leri foe Jehovah?

⁴ Nanga a fasi dati, David no ben prakseri taki ensrefi ben sa kan bepaal, sortoe wet foe Gado ben abi krakti noso di sma ben moesoe gi jesi na den. En fasi ben de: „Leri mi, o Jehovah, foe joe pasi, èn tjari mi tapoe na pasi foe opregtifasi.” „Leri mi,o Jehovah, foe joe pasi. Mi sa waka ini joe waarheid. Tjari mi ati kon na wán foe frede joe nen. Mi e prèise joe, o Jehovah mi Gado, nanga heri mi ati” (Psalm 27:11; 86:11, 12). Foe waka ini waarheid na Gado fesi son leisi ben sa kan gersi leki a froeferi noso ben sa kan aksi bigi òfer, ma David ben wani foe kisi leri foe na joisti pasi èn foe waka na ini en.

Leri ini a tori foe broedoe

5. San David ben sa sabi foe na fasi fa Gado e si broedoe?

⁵ A boen foe wi froestan taki, foe sensi di David ben pikin, a ben kisi leri foe na fasi fa Gado e si broedoe, wan fasi foe si sani di no ben de wan relisi kibritori. Te den ben leisi na Wet gi na pipel, dan David ben sa jere disi: „Na sili foe na meti de ini na broedoe, èn misrefi poti en tapoe na altari gi joe foe doe verzoening gi joe sili, bikasi a de na broedoe di e doe verzoening nanga jepi foe na sili di de na ini. Foe dati-ede meki mi taki gi den manpikin foe Israèl: ’No wan sili foe oenoe moesoe njan broedoe èn no wan freimde sma di e libi leki wan freimde sma na oen mindri, moesoe njan broedoe.’” — Levitikus 17:11, 12; Deuteronomium 4:10; 31:11.

6. Fa wan doronomo fanowdoe ben de foe meki den dienstknekti foe Gado kisi leri ini a tori foe broedoe?

⁶ So langa Gado ben gebroiki Israèl leki en pipel di a ben tjari kon makandra, dan denwan di ben e wani foe plisi en ben moesoe kisi leri ini a tori foe broedoe. Famiri-lo baka famiri-lo foe manpikin èn oemapikin foe Israèl, ben kisi leri na so fasi. Ma na sortoe leri disi ben sa go doro baka di Gado ben teki na gemeente foe kresten sma, èn ben meki den tron „na Israèl foe Gado”? (Galasia sma 6:16) Ija, seiker. Na fasi fa Gado e si broedoe no ben kenki (Maleaki 3:6). Na posisi foe en, di a ben meki bekenti, ini a tori foe na gebroiki foe broedoe na wan fowtoe fasi ben de kaba bifo na Wet froebontoe ben kon kisi krakti, èn a ben tan so baka di na Wet ben tjari kon na wan kaba. — Genesis 9:3, 4; Tori foe den Apostel 15:28, 29.

7. Foe san-ede a de prenspari taki wi e kisi leri foe Gado ini a tori foe broedoe?

⁷ Respeki gi broedoe de na moro prenspari sani foe na krestendom. ’Den no e taki sani moro bigi leki fa a de?’, son sma kan aksi. A no de so taki na srakti-ofrandi foe Jesus de na moro prenspari sani gi na krestendom? Èn na apostel Paulus ben skrifi: „Nanga jepi foe [Jesus] wi abi na froeloesoe nanga jepi foe a loesoeprèis nanga jepi foe en broedoe, ija, na pardon foe a pasa di wi e pasa na wet, akroederi na goedoe foe en no-froedini boen-ati” (Efeise sma 1:7). The Inspired Letters, di Frank C. Laubach ben poti abra, e gebroiki gi a vers disi den wortoe disi: „Na broedoe foe Krestes ben pai gi wi èn now wi na foe En.”

8. Fa a e anga foe broedoe efoe na „bigi ipi” o kisi libi?

⁸ Ala sma di e howpoe foe pasa libilibi na „bigi banawtoe” di e kon, èn foe njanboen foe den blesi foe Gado na tapoe wan paradijs grontapoe, abi Jesus broedoe di ben lon fanowdoe. Openbaring 7:9-14 e froeteri foe den èn e taki foe san den ben doe kaba: „Disi na denwan di e komoto foe na bigi banawtoe, èn den wasi den krosi èn meki den kon weti ini a broedoe foe na Pikin skapoe.” Loekoe fa den e taki en djaso. A no e taki, dati denwan di pasa na banawtoe libilibi ben ’teki Jesus’ noso ’ben poti bribi ini en’, ala di den sani dati seiker na prenspari sani. Na tekst e go pikinso moro fara èn e taki, dati den ’wasi den krosi èn meki den kon weti ini [Jesus] broedoe’. Dati de, foe di en broedoe abi na waarde foe meki sma kon fri.

9. Foe san-ede a de so serjoesoe foe gi jesi na Jehovah ini a tori foe broedoe?

⁹ Foe di Jehovah Kotoigi e warderi na waarde disi, meki dati e jepi den foe abi na fasti bosroiti foe no gebroiki broedoe na wan fowtoe fasi, srefi efoe wan datra e hori nanga ala opregtifasi taki wan transfusie de prenspari. A kan bribi taki den wini di wan transfusie kan abi e wegi moro hebi leki den risiko foe na broedoe srefi gi na gesontoe. Ma na kresten sma no man foe tapoe ai gi wan risiko di moro bigi srefi, na risiko foe lasi a feni di Gado e feni en boen, foe di a ben agri foe gebroiki broedoe na wan fowtoe fasi. Wan leisi Paulus ben taki foe denwan di „e tan doe sondoe foe espresi baka di [den] kisi na soifri sabi foe na waarheid”. Foe san-ede so wan sortoe sondoe ben de so serjoesoe? Foe di so wan sma „trapoe na Manpikin foe Gado nanga foetoe èn . . . loekoe na broedoe foe na froebontoe, di ben meki taki a kon santa, leki wan soso sani”. — Hebrew sma 9:16-24; 10:26-29.

Jepi trawan foe kisi leri

10. San de na bakagron foe na fasti bosroiti foe wi foe tan farawe foe broedoe?

¹⁰ Wi di e warderi Jesus ’froeloesoe-ofrandi, e loekoe boen foe no tan doe sondoe, èn trowe nanga dati na waarde foe kibri libi, di a broedoe foe en abi. Di wi ben prakseri foe na heri afersi, dan wi e froestan taki soso a tangi di wi moesoe gi Gado foe a libi foe wi moesoe boeweigi wi foe trowe iniwan skeki foe den regtfardiki wet foe en, di so leki wi abi a froetrow, ben gi nanga wi moro boen belang na prakseri — wi moro boen belang foe wan langa ten na wi fesi (Deuteronomium 6:24; Odo 14:17; Preikiman 8:12). Ma fa a de nanga den pikin foe wi?

11-13. Sortoe fowtoe fasi foe si sani son kresten papa nanga mama abi ini a tori foe den pikin foe den èn broedoe, èn foe san-ede?

¹¹ Ala di den pikin foe wi na beibi noso de toemoesi jongoe foe froestan sani, dan tokoe Jehovah Gado kan si den leki den krin èn e teki den tapoe na fondamenti foe na gi di wi e gi wisrefi ini a dini foe en (1 Korente sma 7:14). So boen a troe taki jongoe pikin ini wan kresten osofamiri kande no abi froestan ete foe gi jesi na Gado wet ini a tori foe broedoe èn no teki wan bosroiti ete ini a tori dati. Ma wi e doe san wi kan foe gi den leri foe na prenspari afersi disi? Kresten papa nanga mama moesoe prakseri foe dati serjoesoe, bika son papa nanga mama, leki fa a e sori, abi wan fowtoe fasi ini a tori foe den pikin èn broedoe. Sonwan, leki fa a e sori, abi na prakseri taki den, foe taki en leti, no abi troetroe foeroe makti ini a tori efoe den e gi den mendri-jari pikin foe den wan transfusie. Foe san-ede sma abi na fowtoe fasi disi foe si sani?

¹² Foeroe kondre abi wet noso organisâsi foe lanti foe kibri pikin di no ben kisi boen sorgoe èn pikin di den meshandri. Papa nanga mama di de Jehovah Kotoigi no e misi foe sorgoe boen gi den pikin èn den no e meshandri den te den e bosroiti foe no gi pasi foe sma gi den lobi manpikin noso oemapikin foe den broedoe, ala di na a srefi ten den e aksi foe gebroiki tra fasi di na njoen-modoten dresi kan gi. Srefi foe na sei foe datrawroko disi no wani taki dati den e misi foe sorgoe boen foe den noso e meshandri den, te joe loekoe na den kefar, di sma ben erkèn, foe transfusietherapie (therapie na wan fasi foe dresi sma). A de wan gebroiki foe na reti foe wegi den risiko go-kon di de ini a tori èn dan foe teki na fasi foe dresi.a Tokoe son sma di e wroko na ati-oso ben soekoe jepi foe a seti foe na wet foe kisi na makti foe dwengi wan sma foe teki wan transfusie di a no wani.

¹³ Son papa nanga mama, di e froestan taki a kan de makriki gi sma di e wroko na ati-oso foe kisi na horibaka foe wan kroetoebangi foe gi wan mendri-jari pikin wan transfusie, e firi kande taki na afersi no de ini den anoe, taki noti no de san papa nanga mama man noso abi foe doe. Fa dati de wan fowtoe fasi foe si sani! — Odo 22:3.

14. Fa David èn Timoteus ben kisi leri ini den jongoe jari?

¹⁴ Wi ben si kaba taki David ben kisi leri foe na pasi foe Gado, foe sensi di a ben jongoe. Dati ben meki en klari foe si libi leki wan presenti foe Gado èn foe sabi taki broedoe e prenki libi. (Teki gersi 2 Samuèl 23:14-17.) Timoteus ben kisi leri foe na fasi fa Gado e denki „foe sensi pikin-nengre ten” (2 Timoteus 3:14, 15). Joe no e agri taki srefi di David èn Timoteus no ben doro na jari di ini a ten disi na a jari di na wet poti foe de wan bigisma, dan tokoe den ben moesoe man foe taki krinkrin fa den ben denki foe afersi di abi foe doe nanga Gado wani? Na a srefi fasi, dan langaten bifo den tron bigisma, jongoe kresten ini a ten disi, moesoe kisi leri foe Gado pasi.

15, 16. (a) Sortoe fasi foe si sani ben opo ede na ini son kondre ini a tori foe den reti foe mendri-jari pikin? (b) San ben meki taki den ben gi wan mendri-jari pikin broedoe?

¹⁵ Na ini son kondre ’wan lepi mendri-jari pikin’, so leki fa den e kari en, e kisi reti di de a srefi leki denwan foe bigisma. Den kan si wan jongoewan leki a lepi nofo foe teki en eigi bosroiti ini a tori foe datra sorgoe, tapoe a fondamenti foe a jari di a abi noso a lepi fasi fa a e prakseri, noso alatoe. Srefi pe disi no de a wet, kroetoeman noso lantiman kan gi foeroe prakseri na den winsi foe wan jongoe sma di man foe taki krinkrin foe en fasti bosroiti ini a tori foe broedoe. Na a tra sei, te wan jongoe sma no man foe froeklari den sani di a e bribi na wan krin fasi èn na wan lepi fasi, dan wan kroetoebangi kan denki taki a moesoe bosroiti san sori moro boen, leki fa a ben sa doe dati kande gi wan beibi.

¹⁶ Wan jongoe man ben studeri na bijbel jari langa, ala di a ben stòp wan toe leisi, ma a no ben teki dopoe. Ala di soso seibi wiki ben libi ete foe a ben sa doro na jari pe a ben sa kisi na ’reti foe weigri datra sorgoe gi ensrefi”, dan tokoe wan ati-oso di ben dresi en foe kanker ben soekoe na horibaka foe wan kroetoebangi, foe gi en wan transfusie kontrari den winsi foe en èn di foe en papa nanga mama. Na kroetoeman di loekoe sani finifini ben aksi en foe den sani di a e bribi ini a tori foe broedoe èn ben poti fondamenti aksi gi en, so leki den nen foe den fosi feifi boekoe foe na bijbel. Na jongoe man no ben kan taki den, èn a no ben kan gi kotoigi nanga overtoigi taki a ben froestan foe san-ede a ben weigri broedoe. Na sari bakapisi ben de taki na kroetoeman ben gi na makti foe den gi en broedoetransfusie, ala di a ben taki: „(E)n weigri foe teki broedoetransfusie no de tapoe a gron foe wan lepi froestan foe sani foe en eigi relisi bribi.”

17. Sortoe posisi wan oemapikin, di ben abi 14 jari, ben teki ini a tori foe a kisi foe broedoe, èn nanga sortoe bakapisi?

¹⁷ Sani kan go heri tra fasi gi wan mendri-jari pikin di kisi boen leri foe den pasi foe Gado èn di e waka fajafaja ini En waarheid. Wan moro jongoe kresten ben abi na srefi sortoe kanker di joe no e si foeroe tron. Na oemapikin èn en papa nanga mama ben froestan èn ben teki foe wan specialist wan chemotherapie, di den ben kenki pikinso, na ini wan bari-nen ati-oso. Tokoe den ben tjari na afersi go na kroetoe. Na kroetoeman ben skrifi: „D.P. ben gi kotoigi taki a ben sa kakafoetoe gi wan broedoetransfusie na ala fasi di a ben sa kan. A ben si wan broedoetransfusie leki na kon na en skin sondro foe abi a reti foe dati èn ben gersi disi nanga te wan man e didon na wan oema nanga tranga. A ben aksi na Kroetoebangi foe respeki na bosroiti di a ben teki èn foe gi en pasi foe tan na ini [na ati-oso] sondro taki Kroetoebangi gi komando foe gi en broedoe.” Na kresten leri di a ben kisi ben jepi en na a moeilek ten disi. — Loekoe faki.

18. (a) Sortoe krakti posisi wan oemapikin di ben abi wan serjoesoe siki, ben teki ini a tori foe kisi broedoe? (b) San na kroetoeman ben bosroiti ini a tori foe na fasi foe dresi en?

¹⁸ Den ben behandel wan oemapikin di ben abi twarfoe jari, foe leukemie (broedoe-kanker). Wan organisâsi di e sorgoe foe na tanboen foe pikin, ben go na kroetoebangi nanga na afersi, so taki den ben kan dwengi en foe teki broedoe. Na kroetoeman ben bosroiti: „L. ben taigi na kroetoebangi disi krinkrin èn sondro draidrai taki, efoe den proeberi foe gi en wan broedoetransfusie, a sa kakafoetoe gi na transfusie dati nanga ala en krakti di a kan kisi. A ben taki, èn mi e bribi en, taki a sa bari èn feti èn taki a sa poeroe na nanai komoto foe en anoe èn a sa proeberi foe pori na broedoe ini a saka a tapoesei foe en bedi. Mi e weigri foe gi wan komando di ben sa meki a pikin disi ondrofeni so wan tesi . . . Nanga a siki sma disi, dan na fasi foe dresi di na ati-oso ben gi leki rai foe gi en e sorgoe soso gi na siki na skinfasi. A no e sorgoe gi den fanowdoe foe den firi foe en èn den relisi bribi foe en.”

Papa nanga mama — Gi boen leri

19. Sortoe spesroetoe frantiwortoe papa nanga mama moesoe tjari ini a tori foe den pikin?

¹⁹ Den sortoe ondrofeni disi e abi wan krakti boskopoe gi papa nanga mama di abi na winsi taki ala sma ini a famiri foe den e libi akroederi Gado wet ini a tori foe broedoe. Wán reide foe san-ede Abraham ben de Gado mati, ben de foe di A ben sabi taki na famiri-edeman ben sa ’komanderi en manpikin èn en osofamiri baka en, so taki den [ben sa] hori Jehovah pasi foe doe regtfardikifasi’ (Genesis 18:19). A no de so taki disi moesoe de so toe nanga kresten papa nanga mama ini a ten disi? Efoe joe na wan papa noso mama, joe e leri joe lobi pikin foe waka ini Jehovah pasi so taki ala ten den sa de ’klari foe opo taki gi densrefi na fesi ibri sma di e aksi wan reide foe na howpoe di de ini den, ma doe disi nanga safrifasi èn nanga dipi respeki’? — 1 Petrus 3:15.

20. San ini a fosi presi wi wani taki wi pikin moesoe sabi èn bribi ini a tori foe broedoe? (Danièl 1:3-14)

²⁰ Ala di a sa de boen taki wi pikin sabi den kefar foe siki èn tra risiko ini a tori foe broedoetransfusie, dan tokoe a gi leri na wi pikin foe Gado volmaakti wet ini a tori foe broedoe no wani taki na a fosi presi, taki wi e proeberi foe poti frede ini den gi broedoe. Efoe foe eksempel wan kroetoeman ben aksi wan pikin-oema foe san-ede a no ben wani foe den gi en broedoe èn na piki foe en moro foeroe ben de taki a ben feni broedoe wan toemoesi bigi risiko noso wan frede sani, dan san ben sa de na bakapisi? Na kroetoeman ben sa kan bosroiti taki eenvoudig a no ben de lepi èn taki a ben frede pasa marki, neleki fa a ben sa kan de so frede toe gi wan operâsi foe na blindedarm taki a ben sa krei èn kakafoetoe gi na operâsi disi, di srefi en papa nanga mama ben firi taki a ben de foe na boen foe en. Moro fara, wi ben taki kaba taki na fondamenti reide foe san-ede kresten no wani transfusie no de taki na broedoe doti ma taki a de wan diri sani gi wi Gado èn Giman foe libi. Den pikin foe wi moesoe sabi dati, èn so srefi taki den kefar di broedoe kan tjari gi na gesontoe e poti moro krakti a tapoe wi relisi posisi.

21. (a) San papa nanga mama moesoe kon sabi ini a tori foe den pikin foe den èn na fasi fa bijbel e si broedoe? (b) Fa papa nanga mama kan jepi den pikin foe den ini a tori foe broedoe?

²¹ Efoe joe abi pikin, joe de seiker dan taki den e agri nanga na fasi foe si sani, di abi en gron tapoe bijbel, ini a tori foe transfusie èn taki den kan tjari dati kon a krin? Den e bribi troetroe taki na fasi disi foe si sani na Gado wani? Den abi na overtoigi taki foe pasa Gado wet ben sa de so serjoesoe taki a ben sa kan meki wan kresten lasi en howpoe tapoe têgo libi? Koni papa nanga mama sa taki foe den afersi disi nanga den pikin, efoe den de toemoesi jongoe noso pikinmoro de bigisma kaba. Papa nanga mama kan teki ten foe oefen, pe ibri jongoewan e kisi aksi so leki wan kroetoeman noso wan ati-osoman ben sa kan aksi dati. Na marki no de foe wan jongoewan taki na ede spesroetoe troetori noso piki ete wantron. A moro prenspari taki den sabi san den e bribi, èn foe san-ede. A e taki foe ensrefi, taki te wan kroetoe e hori, den papa nanga mama noso tra sma di de drape kan tjari tori kon a fesi di abi foe doe nanga den risiko foe broedoe èn a de di tra fasi foe therapie de. Ma san wan kroetoeman noso wan lantiman moro foeroe ben sa wani kon sabi kande foe wan takimakandra nanga wi pikin, de efoe na wan lepi fasi den e froestan na situwâsi foe den èn den sani di den sa man teki èn so srefi efoe den abi den eigi waarde èn fasti overtoigi. — Teki gersi 2 Kownoe 5:1-4.

22. San kan de na bakapisi di e tan foe ala ten, te wi kisi leri foe Gado ini a tori foe broedoe?

²² Wi alamala moesoe warderi èn hori fasti na Gado fasi foe si sani ini a tori foe broedoe. Openbaring 1:5 e taki foe Krestes leki na sma di „lobi wi èn di e froeloesoe wi foe wi sondoe nanga jepi foe en eigi broedoe”. Soso efoe wi e teki na waarde foe Jesus broedoe wi kan kisi pardon foe wi sondoe dorodoro èn foe ala ten. Rome sma 5:9 e taki krinkrin: „Moro srefisrefi foe dati-ede, foedi den froeklari wi regtfardiki now nanga jepi foe en broedoe, wi sa kisi kibri foe atibron nanga jepi foe en.” O koni a de dan gi wi èn gi wi pikin, foe kisi leri foe Jehovah ini a tori disi èn foe abi na fasti bosroiti foe waka ini en pasi foe têgo!

[Foetoewortoe]

Edepenti foe na leri

◻ Sortoe fasi foe si sani wi moesoe abi ini a tori foe kisi leri foe Jehovah?

◻ Foe san-ede a de so prenspari foe gi jesi na Gado wet ini a tori foe broedoe?

◻ Foe san-ede a de prenspari srefisrefi taki jongoewan man foe taki krinkrin èn stanfaste foe den overtoigi foe den ini a tori foe broedoe?

◻ Fa kresten papa nanga mama kan jepi den pikin foe den foe kisi boen leri foe Jehovah wet ini a tori foe broedoe?

[Faki na tapoe bladzijde 31]

A BEN NAKI NA ATI FOE NA KROETOEBANGI

San den ben taki ini na bosroiti foe na kroetoebangi foe D.P., di den taki foe en na ini paragraaf 17?

„Na konifasi, bedarifasi, wartifasi èn kraktifasi foe na 14¹/₂ jari jongoewan disi ben naki na ati foe na Kroetoebangi. Foe kon sabi taki a ben abi wan sortoe foe kanker di kan tjari dede kon, ben kan moro en . . . Tokoe a ben de wan lepi jongoe sma di ben kon a fesi na Kroetoebangi foe gi kotoigi. Leki fa a sori a ben hori ai srapoe tapoe na moeilek wroko di ben de na en fesi. A ben fisiti ala den programa foe kisi rai, ben agri foe teki wan plan foe kisi sorgoe, ben kweki wan krinkrin fasi foe denki ini a tori foe fa en leki wan libisma ben sa tanapoe na fesi na datra tjalensi disi èn a ben kon na a kroetoebangi nanga na aksi di ben doro sma ati: respeki mi bosroiti . . .

Boiti taki a abi lepifasi, dan D.P. sori nofo gron gi na bosroiti foe en foe na Kroetoebangi respeki dati. Wan plan foe sorgoe en nanga broedoetransfusie ben sa gi en mankeri na jeje fasi, na froestan sei, na moreel sei èn na a sei foe en firi. Na Kroetoebangi sa respeki na programa foe kisi sorgoe di a e teki.

[Prenki na tapoe bladzijde 30]

Wan kroetoeman noso datra na ini wan ati-oso kande sa wani sabi san wan kresten jongoewan e bribi troetroe, èn foe san-ede?