’Wan opziener moesoe e dwengi ensrefi’
’Wan opziener moesoe e dwengi ensrefi.’ — TITUS 1:7, 8.
1, 2. Sortoe eksempel foe dwengi ensrefi Willem foe Oranje ben gi, èn nanga sortoe boen bakapisi?
NA HISTORIA e gi wan toemoesi aparti eksempel di abi foe doe nanga a basi di sma e basi den firi. Na mindri foe na di foe 16 jarihondro, na jongoe prins foe Bakrakondre, Willem foe Oranje, ben go onti nanga Kownoe Hendrik II foe Fransikondre. Na kownoe ben tjari kon a krin gi Willem a plan di en nanga na kownoe foe Spanjorokondre ben abi foe kiri ala den anitrisma na ini Fransikondre èn na ini Bakrakondre — ija, ini na heri krestenhèit. Kownoe Hendrik ben prakseri taki na jongoe Willem ben de wan fajafaja katholieksma leki ensrefi èn foe dati-ede a ben tjari ala den finifini tori foe na komplot kon a krin gi en. San prins Willem ben jere, ben seki en srefisrefi foe di foeroe foe den moro boen mati foe en ben de anitrisma, ma a no ben sori san a ben firi; na presi foe dati, a ben sori bigi belangstelling gi ala den finifini tori di na kownoe ben froeteri en.
2 Ma so esi leki Willem ben kan, a ben bigin meki plan wroko, foe gens na komplot, èn disi te foe kaba ben meki taki Bakrakondre ben kon fri foe na basi di den Spanjoro katholiek ben basi den. Foe di Willem ben man foe dwengi ensrefi di a ben jere foe na komplot foe na fosi leisi, meki sma ben kon sabi en leki „Willem na Tantiriman”. Sani ben waka so boen nanga Willem foe Oranje taki den e froeteri wi san e kon now: „Na en ben de troetroe na sma di ben tjari na srefidensi kon èn a bigi di na republiek foe Bakrakondre bigi.”
3. Sortoe sma e kisi wini te kresten owroeman e dwengi densrefi?
3 Willem na Tantiriman ben tjari wini kon gi ensrefi nanga en pipel, foe di a ben dwengi ensrefi. Na a srefi fasi, kresten owroeman, noso opziener, moesoe sori a dwengi foe densrefi leki wan foe den froktoe foe na jeje (Galasiasma 5:22, 23). Te den dwengi densrefi den sa tjari wini kon gi densrefi nanga den gemeente. Na a tra sei, efoe den misi foe dwengi densrefi, dan dati kan tjari kefarlek foeroe ogri kon.
Dwengi joesrefi — Wan sani di den e aksi foe owroeman
4. Sortoe rai foe na apostel Paulus e poti krakti tapoe na fanowdoe foe owroeman dwengi densrefi?
4 Paulus, di ben de srefi wan owroeman, ben warderi na prensparifasi foe a dwengi di sma moesoe dwengi densrefi. Di a ben gi rai na den owroeman di ben komoto na Efeise kon na en, a ben taigi den: „Poti prakseri na oensrefi èn na a heri ipi.” Foe poti prakseri na densrefi ben wani taki so srefi na fanowdoe foe den ben dwengi densrefi, foe den ben loekoe fa den ben tjari densrefi. Di Paulus ben skrifi gi Timoteus, a ben poti krakti tapoe na srefi sani. A ben skrifi: „Poti prakseri ala ten na joesrefi èn na joe leri.” Na sortoe rai disi ben sori taki Paulus ben sabi na libisma firi foe a sei foe sonwan foe abi moro broko-ede nanga na preikiwroko leki foe den doe san den ben preiki. Foe dati-ede a ben poti krakti fosi tapoe na fanowdoe foe den loekoe densrefi. — Tori foe den Apostel 20:28; 1 Timoteus 4:16.
5. Fa den e poti kresten owroeman a wroko, èn pe na ini den Boekoe den fanowdoe eigifasi foe den e skrifi?
5 Ini den jari di pasa, a ròl foe den owroeman, akroederi den Boekoe, ben kon moro nanga moro a krin. Ini a ten disi wi e froestan taki foe abi na wroko foe wan owroeman na wan posisi di sma kisi foe di den poti en a wroko. Na Tiri Skin foe Jehovah Kotoigi, noso den sma di langalanga e teki presi gi den, e poti owroeman a wroko. Na skin dati foe en sei, e teki presi gi „na kotrow èn koni srafoe” (Mateus 24:45-47). Na ini 1 Timoteus 3:1-7 nanga Titus 1:5-9 na apostel Paulus e taki moro foeroe foe den eigifasi di de fanowdoe foe wan sma tron wan kresten opziener, noso owroeman.
6, 7. Sortoe aparti eigifasi di de fanowdoe gi owroeman e aksi foe den dwengi densrefi?
6 Paulus e taki na ini 1 Timoteus 3:2, 3 taki wan opziener no moesoe de pasa marki ini gwenti. Disi, nanga na fanowdoe foe wan owroeman de nanga ordefasi, e aksi foe a dwengi ensrefi. Wan man di de bekwaam foe de wan opziener no de wan sma di e naki èn no de wan sma di lobi foe feti. Den fanowdoe eigifasi disi e aksi so srefi foe wan owroeman dwengi ensrefi. Moro fara, foe wan owroeman no de wan droengoe trobiman, wan sma di e gi ensrefi abra na a dringi foe foeroe win, dan a moesoe dwengi ensrefi. — Loekoe den foetoewortoe gi 1 Timoteus 3:2, 3.
7 Na ini Titus 1:7, 8 Paulus ben skrifi spesroetoe taki wan owroeman moesoe dwengi ensrefi. Ma loekoe omeni foe den tra sani di den aksi èn di den kari na ini den vers disi, abi foe doe nanga dwengi joesrefi. Foe eksempel, na opziener moesoe de fri foe na kragi di sma e kragi en, ija, sondro fowtoe. Wan owroeman seiker no ben sa kan doro den marki dati di den aksi foe en, efoe a no ben e dwengi ensrefi.
Te a e handri nanga tra sma
8. Sortoe eigifasi di owroeman abi fanowdoe foe gi rai, e poti krakti a tapoe na fanowdoe foe den dwengi densrefi?
8 Wan opziener so srefi moesoe abi pasensi nanga langa-pasensi te a e handri nanga kompe bribiman, èn disi e aksi foe a dwengi ensrefi. Foe eksempel wi e leisi na ini Galasiasma 6:1: „Brada, srefi efoe wan sma meki wan fowtoe bifo a kisi ensrefi, dan oenoe di abi jeje eigifasi [ini na fosi presi den owroeman], e proeberi foe meki so wan sma kon boen baka ini wan jeje foe safri-ati, ala di ibriwan foe oenoe e poti ai na ensrefi tapoe, foe tesi no moesoe miti oenoe toe.” Foe sori wan jeje foe safri-ati e aksi foe wan sma dwengi ensrefi. Ini a tori disi, a de fanowdoe so srefi foe wan sma dwengi ensrefi foe a poti ai na ensrefi tapoe. Na a srefi fasi, te wan sma di abi problema e kari wan owroeman foe kisi jepi, a de toemoesi prenspari foe na owroeman dwengi ensrefi. Awansi san na owroeman kan prakseri foe na sma, a moesoe de nanga switifasi, abi pasensi èn man foe froestan na sma. Na presi foe na owroeman de esi foe gi rai, a moesoe de klari foe arki èn foe tjari a sma go so fara foe taki san troetroe e gersi taki e trobi en.
9. Sortoe rai owroeman moesoe abi ini prakseri te den abi foe doe nanga brada nanga sisa di broeja?
9 Spesroetoe te wan owroeman abi foe doe nanga sma di broeja, dan na rai disi na ini Jakobus 1:19 fiti: „Sabi disi, mi lobi brada. Ibri sma moesoe de esi foe arki, no moesoe de esi foe taki, èn moesoe e teki langa foe kisi atibron.” Ija, spesroetoe te wan owroeman e kisi foe doe nanga atibron piki noso firi di a sma no man basi, dan a moesoe loekoe boen foe a no piki na a srefi fasi. A e aksi foe joe dwengi joesrefi foe no piki den wortoe di lai nanga wan sma firi nanga wortoe di lai nanga joe firi, so boen foe no ’pai ogri foe ogri’ (Romesma 12:17). Foe piki baka na a srefi fasi e meki na afersi kon soso moro takroe. So boen so srefi ini a tori disi na Wortoe foe Gado e gi den owroeman boen rai, foe di a e memre den taki ’wan safri piki e drai atibron poeroe’. — Odo 15:1.
Dwengi joesrefi na den konmakandra foe owroeman nanga kroetoe konmakandra
10, 11. San ben pasa na den konmakandra foe owroeman, san e sori taki a de fanowdoe foe den dwengi densrefi na den sortoe okasi dati?
10 Wan tra kontren pe kresten opziener moesoe loekoe boen foe den dwengi densrefi, na te konmakandra foe owroeman e hori. Foe opo taki na wan bedarifasi foe na boen foe na waarheid nanga geregteghèit, e aksi son leisi foe wan sma dwengi ensrefi foeroe. A e aksi toe foe wan sma dwengi en srefi foe tan farawe foe proeberi foe meki en sten de moro foeroe foe jere ini wan takimakandra. Te wan owroeman abi so wan lostoe, dan a ben sa de switifasi foe na sei foe wan tra owroeman foe gi en rai. — Teki gersi 3 Johanes 9.
11 So srefi wan owroeman di de toemoesi serjoesoe, ben sa kan kon ini tesi foe meki den firi foe en basi en, ija, foe opo en sten srefi. Fa den sortoe doe disi e sori srefisrefi a misi di wan sma e misi foe dwengi ensrefi! Den doe dati, foe taki en leti, e gens densrefi na toe fasi. Na a wan sei, a de so, taki ini a marki di wan sma no man dwengi ensrefi, taki ini a marki dati a e meki en eigi taki-go-taki-kon kon swaki, foe di a e gi pasi foe den firi foe en basi en froestan. Na a tra sei, a de so, taki ini a marki di wan sma e meki en firi prei en basi, na so a e meki en kompe owroeman kon broeja kande noso tergi den srefi. Boiti dati, efoe owroeman no loekoe boen, dan bigi difrenti ini san den e denki foe wan tori kan meki pratifasi kon a den mindri. Disi e doe ogri na densrefi èn na a gemeente. — Teki gersi Tori foe den Apostel 15:36-40.
12. Te owroeman abi foe doe nanga sortoe situwâsi den moesoe loekoe boen foe den dwengi densrefi?
12 A de tranga fanowdoe foe owroeman dwengi densrefi foe den tan farawe foe teki partèi noso foe gebroiki na makti foe den na wan fowtoe fasi. A de makriki foe broko kindi gi tesi, foe meki onvolmaakti libisma fasi foe si sani abi krakti tapoe san wan sma e taki noso e doe! Foeroe tron baka, owroeman ben misi foe handri nanga wan fasti bosroiti te wan foe den pikin foe den noso wan tra famiri ben tjari ensrefi na wan fowtoe fasi. Ini den sortoe situwâsi disi a e aksi foe den dwengi densrefi foe no meki famiri banti hendri den foe handri na wan regtfardiki fasi. — Deuteronomium 10:17.
13. Foe san-ede owroeman moesoe dwengi densrefi spesroetoe na den kroetoe konmakandra?
13 Wan tra situwâsi pe a de toemoesi prenspari foe den dwengi densrefi, na te wan kroetoe konmakandra e hori. Owroeman moesoe dwengi densrefi foeroe, so taki a fasi fa sma e firi no abi toemoesi foeroe krakti tapoe den. Den no moesoe meki watra-ai foe sma meki den tweifri toemoesi makriki. Na a srefi ten, wan owroeman moesoe loekoe boen taki a no lasi en balansi te sma e gi makandra porinen èn kande e taki leisani foe en, san ben sa kan pasa te den abi foe doe nanga sma di fadon komoto na bribi. Djaso den wortoe foe Paulus e fiti heri boen: „Wan srafoe foe Masra no abi foe strei, ma moesoe de nanga safoefasi gi ala sma.” A e aksi foe wan sma dwengi ensrefi foe a de nanga safoefasi te a de ondro druk. Paulus e go doro foe sori taki „wan srafoe foe Masra” moesoe „tan dwengi ensrefi na ondro ogridoe, èn gi leri nanga safri-ati na den sma di no e sori wan boen jejefasi.” Foe sori safri-ati èn foe wan sma dwengi ensrefi te a abi foe doe nanga gens e aksi foe a dwengi ensrefi foeroe. — 2 Timoteus 2:24, 25.
Dwengi joesrefi nanga oemasma
14. Na sortoe toemoesi moi rai owroeman moesoe gi jesi te den abi foe doe nanga oemasma?
14 Owroeman moesoe de na ai srefisrefi foe dwengi densrefi te den abi foe doe nanga oemasma. A no de wan froestan sani foe wan owroeman en wawan tjari wan herder fisiti na wan sisa. Wan tra owroeman noso wan dinari ini na diniwroko moesoe go makandra nanga na owroeman. Paulus, di leki fa a sori, ben froestan na problema disi, ben gi na owroeman Timoteus na rai: „Taki nanga . . . oema, di moro owroe, leki mama, jongoe oema leki sisa nanga ala krinfasi” (1 Timoteus 5:1, 2). Sma ben si taki son owroeman ben poti den anoe na tapoe wan sisa leki fa wan papa ben sa doe dati. Ma den ben kan kori densrefi, bikasi a ben kan de so heri boen taki wan lobi firi na presi foe kresten brada lobi e boeweigi so wan doe. — Teki gersi 1 Korentesma 7:1.
15. Fa wan bepaalde tori e tjari kon a krin sortoe sjen a kan abi leki bakapisi gi Jehovah nen, te wan owroeman no e dwengi ensrefi?
15 Fa foeroe ogri ben doe na a waarheid foe di son owroeman no ben dwengi densrefi ini a handri di den ben handri nanga sisa ini na gemeente! Wan toe jari pasa kaba, den ben sluit wan owroeman uit foe di a ben doe soetadoe nanga wan kresten sisa di en masra no ben de wan Kotoigi. Na srefi neti di den ben meki bekenti taki a fositen owroeman ben sluit uit, na trowmasra, di a sani ben ati en, ben lon kon nanga wan gon na ini a Kownoekondrezaal èn ben soetoe tapoe den toe sma di ben abi fowtoe. No wan foe den no ben dede, èn wantewante den ben poeroe a gon na en anoe, ma a tra dei, na a fesisei bladzijde foe wan foe den prenspari koranti, na njoensoe ben kon de foe ’wan soetoe na ini wan kerki’. Fa na mankeri di na owroeman ben mankeri foe dwengi ensrefi ben tjari sjen kon gi na gemeente èn gi a nen foe Jehovah!
Dwengi joesrefi tapoe tra kontren
16. Foe san-ede owroeman moesoe loekoe boen foe den dwengi densrefi te den e gi poebliki taki?
16 A de fanowdoe so srefi foe wan owroeman dwengi ensrefi te a e gi wan poebliki taki. Wan poebliki takiman moesoe de wan model foe foetrow nanga foe hori ensrefi. Sonwan e proeberi foe prisiri den arkiman foe den nanga foeroe lafoe tori, di den e taki soso foe meki sma lafoe. Disi kan sori a tapoe taki den takiman e broko kindi gi na tesi foe plisi den arkiman foe den. A e taki foe ensrefi, taki ala broko kindi gi tesi na wan mankeri foe sma dwengi densrefi. Wi kan taki srefi, taki te wan sma e pasa na ten te a e gi wan taki e sori tapoe wan misi di a e misi foe dwengi ensrefi, èn so srefi taki a no ben sreka ensrefi nofo.
17, 18. Sortoe ròl a dwengi foe ensrefi e prei te wan owroeman wani foe balansi den difrenti frantiwortoe foe en?
17 Ibri owroeman di e wroko tranga moesoe kakafoetoe gi na tjalensi foe balansi den difrenti frantiwortoe di e aksi en ten nanga krakti. A e aksi foe den dwengi densrefi foe no doe sani pasa marki. Son owroeman ben abi so foeroe broko-ede gi den frantiwortoe foe na gemeente taki den no ben sorgoe boen gi den famiri foe den. So boen, di wan sisa ben froeteri na wefi foe wan owroeman foe na heri moi herder fisiti di a ben tjari na en, na wefi foe na owroeman ben bari taki: „Mi e winsi taki a ben sa tjari wan herder fisiti na mi wan leisi!” — 1 Timoteus 3:2, 4, 5.
18 Wan owroeman moesoe dwengi ensrefi toe foe balansi na ten di a e gebroiki foe studeri nanga ensrefi nanga a ten di a e gebroiki ini na velddienst noso na herder fisiti. Foe di na libisma ati kan kori wan sma, meki a de makriki srefisrefi foe wan owroeman gebroiki moro ten leki san a moesoe gi, san a e feni a moro prisiri sani. Efoe a lobi boekoe, a ben sa kan taki a e gebroiki moro ten foe studeri nanga ensrefi leki san a ben sa moesoe gebroiki. Efoe a e feni na oso-foe-oso diniwroko pikinso moeilek, dan a kan taki a e feni wan pardon foe poti dati a wan sei, foe na boen foe a tjari foe herder fisiti.
19. Sortoe froeplekti owroeman abi di e poti krakti tapoe na fanowdoe foe den dwengi densrefi?
19 Na froeplekti foe hori sani na wan froetrowfasi so srefi e aksi foe wan owroeman tan na ai foe sori taki a e dwengi ensrefi na wan krakti fasi. Djaso a rai disi e fiti: „No meki na froetrow takimakandra foe wan trawan kon a krin” (Odo 25:9). Ondrofeni e sori taki disi kande de wan foe den wet di owroeman e pasa moro foeroe. Efoe wan owroeman abi wan koni èn lobi wefi di a abi boen komunikâsi nanga en, a kan, taki a lostoe de foe en sei foe abi wan takimakandra, noso soso foe kari afersi na nen di de froetrow sani. Ma disi no de joisti èn no de wan koni sani kwetikweti. Ini a fosi presi, a e broko wan froetrowfasi. Brada nanga sisa na jejefasi e kon na owroeman èn e froeteri den san de tapoe den ati, foe di den abi na fasti overtoigi taki den sa hori na afersi boen na wan froetrow fasi. Foe meki en wefi kon sabi froetrow afersi, na wan fowtoe sani, a no wan koni sani èn a no wan lobi sani toe, foe di disi e poti wan hebi tapoe en di no de fanowdoe. — Odo 10:19; 11:13.
20. Foe san-ede a de so prenspari foe owroeman dwengi densrefi?
20 Sondro tweifri, a dwengi di wan sma moesoe dwengi ensrefi de so prenspari, èn spesroetoe gi owroeman! Foe di den kisi na grani foe teki fesi a mindri na pipel foe Jehovah, meki den abi moro bigi frantiwortoe. Foe di den kisi foeroe sani, meki den sa aksi den moro (Lukas 12:48; 16:10; teki gersi Jakobus 3:1). A de na grani nanga plekti foe owroeman foe gi wan toemoesi boen eksempel na trawan. Moro leki dati, owroeman di den poti a wroko de ini na posisi foe doe moro boen noso moro ogri leki tra sma, san foeroe tron e anga foe a dwengi di den e dwengi densrefi noso no e dwengi densrefi. A no de wan froewondroe sani taki Paulus ben taki: ’Wan opziener moesoe dwengi ensrefi.’
Joe e memre?
◻ Sortoe sani di de ini akroederi nanga den Boekoe èn di den aksi foe owroeman e sori taki den moesoe dwengi densrefi?
◻ Foe san-ede owroeman moesoe dwengi densrefi te den abi foe doe nanga kompe bribiman?
◻ Fa sma ben sa moesoe dwengi densrefi na den konmakandra foe owroeman?
◻ A fanowdoe taki owroeman moesoe hori sani na wan froetrow fasi e tjari sortoe tjalensi kon?
[Prenki na tapoe bladzijde 29]
A de prenspari srefisrefi taki owroeman dwengi densrefi na den konmakandra foe den
[Prenki na tapoe bladzijde 32]
Kresten owroeman moesoe dwengi densrefi èn hori sani na wan froetrow fasi