Kresneti — A de a fasi foe bari Jesus wan switikon?

A GEBORTE foe a Froeloesoeman, a Mesias di sma ben froewakti someni langa kaba, ben de troetroe wan ten foe prisiri. „Loekoe!” wan engel ben bariwroko na skapoeman na a kontren foe Betlehem, „Mi e meki joe boen njoensoe bekènti foe wan bigi prisiri, di heri na pipel sa abi, bika nownow de, wan Froeloesoeman gebore gi joe, di de Krestes, [na] Masra.” Wan heri ipi engel ben moksi densrefi ini a prèise foe Gado: „Glori ini den moro hei presi na Gado, èn na grontapoe vrede a mindri sma foe boen wani” (Lukas 2:10-14). Son sma kan kon na a bosroiti taki kresten moesoe waka baka den engel ini a sori foe prisiri, foe di Krestes ben kon na grontapoe na a ten dati.

Disi no ben de a fosi leisi di bijbel e taki foe engel di ben bari prèisesingi. Di na fondamenti foe grontapoe ben poti, „den mamanten stari ben opo makandra wan prisiri babari, èn ala den manpikin foe Gado bigin bari nanga wán mofo foe di den ben breiti” (Job 38:4-7). Na soifri dei foe a sani disi di ben feni presi, no skrifi a bijbel (Genesis 1:1, 14-18). Ma o prisiri na okasi ben de kande, tokoe kresten no ben taki-go-taki-kon dati di den engel ben bari foe di den ben breiti, ibri jari den moesoe hori wan fesa foe na meki di grontapoe meki èn kande moesoe teki wan heiden fesa abra foe memre na okasi disi.

Tokoe, dati na joisti san sma di e hori Kresneti e doe nanga a geborte foe Jesus Krestes. Te joe e loekoe ini pikin moro iniwan encyclopedia di joe kan bow a tapoe, na ondro na edewortoe „Kresneti” a e taki troe dati sma no sabi na dei foe Jesus geborte. Bijbel no e taki noti foe na dei dati.

„Efoe na toetoe e gi wan babari di no de krin”

„Gado no de wan Gado foe broeja, ma foe vrede”, na apostel Paulus ben skrifi, di a ben poti na broejafasi foe na gemeente foe Korente foe owroeten kon reti. Ini a srefi kontekst a ben aksi: „Efoe na trompet e gi wan babari di no de krin, soema sa sreka ensrefi foe go na feti?” (1 Korentesma 14:8, 33). We, efoe wan Gado foe ordefasi ben abi na prakseri foe kresten hori na fesa foe na geborte foe en Manpikin, na grontapoe, dan A ben sa libi en abra gi onvolmaakti sma foe teki wan dei foe den heiden fesa èn foe teki ogri-ati wroko abra?

A ondrosoekoe di den ondrosoekoe wan toe bijbel eksempel tjari kon a krin taki Jehovah Gado no e handri na a fasi dati nanga en pipel. Di a ben taigi den Israèlsma foe hori fesa ibri jari ondro a Wet foe Moses, Gado ben poti spesroetoe dei èn ben taigi den fa den ben kan hori den prisiri fesa okasi dati (Exodus 23:14-17; Levitikus 23:34-43). Ala di Jesus Krestes noiti ben gi na komando taki sma moesoe memre a geborte foe en, a ben komanderi den disipel foe en foe hori wán spesroetoe dei. „A neti di den ben o gi en abra, 14 Nisan 33 G.T.”, Jesus ben poti a fesa foe na Avondmaal foe Masra, ala di a ben e gebroiki brede sondro sroedeki èn win. A ben komanderi: „Tan doe disi leki wan memre na mi” (1 Korentesma 11:23, 24). Na babari foe na toetoe foe oten èn fa na Avondmaal foe Masra moesoe hori, de krin èn sma e froestan en boen. We, san de foe taki foe Kresneti dan? No wan presi na ini bijbel wi e feni wan komando foe hori fesa gi a geborte foe Krestes, èn a no e froeteri wi toe oten èn fa.

’Foe wini sma’

„Oh, a no de foe taki, dati mi sabi taki Kresneti feni en bigin na den heidensma”, wan kerki fesiman foe wan Zion Kerki na Tokio ben taki, „ma so langa gewoon sma abi belangstelling gi a krestenbribi foe 25 december èn e kon foe leri den leri foe na Respeki Jesus, dan Kresneti abi en presi ini a krestenbribi.” Foeroe sma e agri nanga a prakseri disi foe en. Joe e bribi taki a meki foe den sortoe kroederi disi de joisti?

Son sma e taki, dati srefi Paulus ben e meki skeki foe wini sma gi a bribi. „Mi e meki misrefi leki wan srafoe foe ibriwan sma”, a ben skrifi, „so taki mi kan wini so foeroe sma leki mi man. . . Te mi e wroko nanga heidensma, mi e libi leki wan heidensma sondro a djoe wet, so taki mi kan wini den heidensma, . . . Mi e doe ala den sani disi gi na boen foe na boen njoensoe, so taki mi kan abi prati ini den blesi foe en” (1 Korentesma 9:19-23, Todays English Version). Den wortoe disi e gi sma reti foe teki heiden fesa abra foe kan hari heidensma kon ini a kresten bribi?

Prakseri finifini foe na kontekst di Paulus ben taki foe en. Na ini vers 21 a ben taki: „Disi no wani taki, dati mi no e gi jesi na Gado wet; mi de troetroe na ondro a wet foe Krestes” (TEV). So boen, a no ben meki skeki ini tori di ben pasa na wet foe Krestes, ma a ’ben libi leki wan heidensma’, foe di a ben abi respeki gi den gwenti èn maniri foe na kontren drape, so langa den sani disi no ben de kontrari den kresten gebod.a

Nanga disi na prakseri, denki fa na teki di den e teki heiden fesa abra ini „a krestenbribi” ondro na nen foe Kresneti, ben sori, te joe e loekoe en ini a leti foe na bijbel komando di e kon now: „No kon ondro wan tjatjari nanga sma di no e bribi. Bika sortoe prati regtfardikifasi abi nanga kroektoedoe? . . . Noso sortoe prati wan getrow sma abi nanga wan sma di no e bribi? . . . Komoto foe dati ede na den mindri èn hari joesrefi poeroe, ’Jehovah e taki, ’èn tapoe foe fasi wan sani ete di no krin’; ’èn mi wani teki joe’” (2 Korentesma 6:14-17). Awinsi sortoe ekskuus sma e tjari kon toe a fesi, foe moksi na krestenbribi nanga heiden fesa, no de a fasi foe bari Jesus leki wan Froeloesoeman wan switikon. A no ben sa fiti ini a fosi jarihondro di Jesus ben kon nanga wan skin foe meti, èn netso a no e fiti ini a ten disi noso ini a ten di e kon, te Krestes e kon leki Kownoe foe tjari den kroetoe foe Gado na sma tapoe (Openbaring 19:11-16). Foe taki en leti, dan den sma di lobi foe hori den heiden fesa di kibri a baka wan ”kresten” lei, kande densrefi no wani foe erken Jesus Krestes.

„Den kibri Kresten” no ben drai go baka na a krestendom

Leri wan lès foe san ben pasa nanga lomsoesma na Japan ini a ten di sroedati tiriman ben tiri (1192-1867, den sokari sjogun jarihondro). Di na kwinsi foe lomsoesma ben bigin ini 1614, dan so wan 300.000 Japansi lomsoe ben man doe dri sani: tron wan martelaar [sma di e teki hebi skin-ati], libi a bribi foe den, noso foe go doro na ondrogron (na kibrifasi). Den wan di ben go doro ondrogron, sma ben kari kibri kresten. Foe kibri a bribi foe den, den ben teki difrenti Boedist nanga Sjinto gwenti. Ini a liturgie [den singi nanga begi di den ben gebroiki na den santa dienst] foe den, den ben gebroiki Maria Kannon, di ben de Maria di ben kibri leki wan boedist bodhisattva [wan sma di foe na lobi gi a libisma famiri ede e gi en libi na ini a nirwana] ini a skin foe wan mama di e hori wan pikin. Den fesa foe den ben moksi boedist, lomsoe èn sjinto kerkigwenti. Ma di den ben dwengi den foe go na Boedist beri, den ben kari kresten begi èn ben doe modoshi, wan ceremonie foe meki na boedist kerkidienst tron noti. San ben pasa nanga den „kresten” disi?

„Ini a tori foe a moro bigi pisi foe den Kirishitans [kresten]”, na so a boekoe The Hidden Christians (Den kibri kresten) e froeteri, dan „wan kerki firi ben gro ini den di ben meki en moeilek foe den drai baka gi na anbegi foe Sjinto èn Boedist gado.” Di den ben poeroe na verbod èn lomsoe zendeling ben drai go baka na Japan, a moro bigi pisi foe den „kibri kresten disi” ben tan hori tranga na a sortoe moksi relisi foe den.

Ma, a ben sa de reidelek foe lomsoe kerki kan kroetoe den „kibri kresten disi” di ben weigri foe teki na lomsoe bribi baka? Na lomsoe kerki ben teki foeroe foe den heiden leri èn fesa, so srefi Kresneti. Efoe lomsoe nanga anitri, ala di den e taki, dati den de kresten, ben meki a „krestenbribi” foe den kon tron wan heidenbribi nanga jepi foe den heiden fesa, dan a no ben kan de so, taki den e draibaka gi Jesus Krestes toe?

Drai kon baka na a troe krestenbribi

Setsoeko, wan lomsoesma di 36 jari langa ben de nanga en heri-ati gi na kerki, te foe kaba ben kon froestan dati. Baka na di foe toe Grontapoe Feti, a ben proeberi foe foeroe a leigi firi di a ben abi na jeje fasi, foe di a ben tron wan memre foe wan lomsoe kerki. ’Fa disi e satisferi mi!’ a ben prakseri di a ben go na wan Kresneti konmakandra èn ben si den bigi Kresneti bon inisei èn dorosei foe na kerki foe en. „Mi ede ben bigi foe den moi pranpran di wi ben abi, di ben pasa den wan di den tra kerki ini a birti ben abi”, a ben taki. Ma, tokoe Setsoeko troetroe no ben abi froestan foe lomsoe leri, ala di a ben gi leri na Sonde skoro foe wan pisi ten. So boen, di a ben wani abi moro foe doe nanga kerkiwroko, a ben poti wan toe aksi gi na priester foe en. Na presi foe piki den aksi foe en, a priester ben lafoe en. Foe di en froewakti no ben kon troe, a ben teki a bosroiti foe studeri bijbel ensrefi. Toe wiki a baka, Jehovah Kotoigi ben fisiti en, èn a ben teki wan oso-bijbelstudie.

A e froeklari: „A ben hati mi foe kon si den bijbel waarheid di ben kotoigi kontrari den bribi foe mi, di mi ben bribi fosi. Mi ben kisi srefi alopecia neurotica, a lasi foe edewiwiri, bikasi mi ben broeja srefisrefi. Ma te foe kaba, pikinso pikinso na leti foe waarheid ben skèin kon ini mi ati. Mi ben froewondroe foe leri taki Jesus no ben kan gebore na ini wan kowroe alenten ini december, te skapoeman no ben sa tjari den skapoe foe den go njan grasi ini a sabana te neti (Lukas 2:8-12). A ben broko na prenki di mi ben abi ini mi prakseri foe a geborte foe Krestes krinkrin, bika wi ben gebroiki katoen leki snew foe moimoi den prenki foe skapoe nanga skapoeman.”

Baka di a ben overtoigi ensrefi foe san bijbel e leri troetroe, Setsoeko ben bosroiti foe stòp hori Kresneti. A no abi „na Kresneti jeje” moro langa wan tron wan jari, ma a e sori na jeje foe na krestenfasi foe gi ibri dei nanga prisiri.

Efoe joe e bribi opregti na ini Krestes, no atibron te joe e si fa heidensma e pori na santafasi foe Kresneti. Den e doe nomo baka san a ben de ini a bigin — wan heiden fesa. Kresneti no e meki sma bari Jesus Krestes wan switikon, di kon baka leki wan hemel Kownoe sondro foe sma si en (Mateus kapitel 24 èn 25; Markus kapitel 13; Lukas kapitel 21). Na presi foe dati, troe kresten e sori wan kresten jeje a heri jari doro èn den e meki na boen njoensoe foe na Kownoekondre bekènti, foe san Jesus ben tron Kownoe. Dati na fa Gado wani taki wi moesoe bari Jesus Krestes wan switikon leki wi Froeloesoeman èn Kownoe foe na Kownoekondre. — Psalm 2:6-12.

[Foetoewortoe]

[Prenki na tapoe bladzijde 7]

Troe kresten e gi Jesus grani a heri jari doro