Tan krosibei foe Jehovah

„Horidoro ini begi.” — ROMESMA 12:12.

1. San na a wani foe Jehovah ini e tori foe begi, èn sortoe deki-ati na apostel Paulus ben gi ini a tori foe begi?

JEHOVAH na „a Gado di e gi howpoe” na a heri pipel foe en di de getrow. Leki „Arkiman foe begi”, a e arki den tranga begi foe den foe jepi, foe kisi a prisiri howpoe di a e poti a den fesi (Romesma 15:13; Psalm 65:2). Èn nanga jepi foe en Wortoe, bijbel, a e gi ala en foetoeboi deki-ati foe kon na en iniwan ten di den e winsi dati. A de ala ten drape, foe di a wani foe ontfanga den moro dipi broko-ede foe den. Foe taki en leti, a e gi den na deki-ati foe „horidoro ini begi” èn foe „begi sondro foe tapoe”a (Romesma 12:12; 1 Tesalonikasma 5:17). A de a wani foe Jehovah taki ala kresten doronomo e kari en na ini begi, èn foe taigi en san de na den ati èn foe doe dati ini a nen foe en lobi Manpikin, Jesus Krestes. — Johanes 14:6, 13, 14.

2, 3. (a) Foe san-ede Paulus ben froemane foe wi „horidoro ini begi”? (b) Sortoe seikerfasi wi abi taki Gado wani dati wi e begi?

² Foe san-ede Gado e gi wi na deki-ati disi? Foe di a kwinsi èn den frantiwortoe foe a libi kan de so hebi a wi tapoe taki wi kan frigiti foe begi. Noso problema kan de so foeroe èn meki wi tapoe foe de nanga prisiri ini a howpoe èn meki wi tapoe foe begi. Nanga ala den sani disi ini prakseri, wi abi wan jepisani gi na memre fanowdoe di e gi wi deki-ati foe begi èn foe kon krosibei srefisrefi foe na fonten foe jepi èn trowstoe, Jehovah wi Gado.

³ A disipel Jakobus ben skrifi: „Kon krosibei foe Gado, èn a sa kon krosibei foe joe” (Jakobus 4:8). Ija, Gado no de toemoesi hei èn no de toemoesi fara foe wi foe jere san wi e taigi en, ala di wi de ini wan onvolmaakti libisma kondisi (Tori foe den Apostel 17:27). Moro fara, a no de so taki a abi mi-no-ke fasi èn a no e broko en ede nanga wi. Na psalm-singiman e taki: „Den ai foe Jehovah e loekoe go na den reti-atiwan èn den jesi foe en na a babari foe den foe kisi jepi.” — Psalm 34:15; 1 Petrus 3:12.

4. Fa wi kan agersi na poti di Jehovah e poti prakseri tapoe begi?

⁴ Jehovah e gi wi deki-ati foe begi en. Wi kan teki disi gersi nanga wan takimakandra pe wan toe sma e taki nanga makandra. Joe de drape èn e arki a taki foe den trawan. A ròl foe joe na a di foe wan sma di e loekoe sani nomo. Ma ne wan sma e drai loekoe joe, e kari joe nen, èn e bigin taki nanga joe. Disi e aksi joe prakseri na wan spesroetoe fasi. Na a srefi fasi, Gado ala ten e poti en prakseri na tapoe en pipel, awansi pe den mag de (2 Kroniki 16:9; Odo 15:3). A e jere den wortoe foe wi so boen, èn a e loekoe sani nomo foe di a e kibri wi èn abi belangstelling gi wi, foe taki en so. Ma, te wi e kari Gado nen ini begi, dan wi e hori en prakseri èn a e poti en prakseri now na wi tapoe na wan spesroetoe fasi. Nanga en krakti, Jehovah kan soekoe èn froestan srefi na tiri begi foe wan sma di taki na ini den moro kibripresi foe en ati èn prakseri. Gado e gi wi a seikerfasi taki a sa kon krosibei na ala den sma di e kari en nen fajafaja èn e soekoe foe tan krosibei na en. — Psalm 145:18.

Piki akroederi na prakseri foe Gado

5. (a) San na rai „horidoro ini begi” wani taki ini a tori foe begi? (b) Fa Gado e gi piki tapoe begi?

⁵ Na rai foe horidoro ini begi e sori taki ten na ten Jehovah kan gi pasi foe wi tan begi foe wan afersi foe wan pisiten bifo a piki foe en e kon a krin. A ben sa kan de so srefi taki wi lobi foe kon weri foe aksi Gado wan boen noso en lobi boen-atifasi di kan gersi taki a de tranga fanowdoe ma di e tan langa foe sma kisi en. Foe dati-ede, Jehovah Gado e aksi wi tranga foe meki wi no gi abra na so wan firi, ma foe tan begi. Wi moesoe go doro foe aksi en foe den afersi foe wi, foe di wi e froetrow a tapoe taki a e lespeki den begi foe wi èn sa sorgoe foe den sani di wi abi troetroe fanowdoe, no soso san wi ben taki-go-taki-kon gi wisrefi. Sondro degedege Jehovah Gado e wegi den aksi foe wi go-kon akroederi den prakseri foe en. Foe eksempel, a aksi foe wi kan abi krakti tapoe trawan. Wi kan agersi na afersi nanga di foe wan papa di a boi foe en e aksi en wan baisigri. A papa sabi taki efoe a e bai a baisigri gi a boi dati, a tra boi foe en ben sa wani wan toe. Foe di a wan boi de kande toemoesi jongoe gi wan baisigri, a papa kan teki a bosroiti foe no bai no wan baisigri na a spesroetoe ten dati. Na a srefi fasi, nanga den sani di a poti foe doe na prakseri èn a seti foe en ten foe doe en afersi, wi hemel Tata e bosroiti san de troetroe moro boen gi wi èn gi trawan. — Psalm 84:8, 11; teki gersi Habakuk 2:3.

6. Sortoe agersitori Jesus ben gi ini a tori foe begi, èn san horidoro ini begi e sori?

⁶ Wan moi sani foe si na a agersitori di Jesus ben gi di ben abi foe doe nanga a fanowdoe foe den disipel foe en foe „begi ala ten èn foe no lasi-ati.” Wan weduwe, di no ben man kisi geregteghèit, ben horidoro ini a begi foe en na wan libisma kroetoeman te leki a ben kisi geregteghèit te foe kaba. Jesus ben taki moro fara: „Gado seiker no sa meki den sma di a ben wani kisi reti?” (Lukas 18:1-7) A hori di wi e horidoro ini begi e sori a bribi foe wi, wi froetrow ini Jehovah, a de di wi de klariklari foe tan krosibei foe en èn e aksi en san wi wani aksi, ala di wi e libi na bakapisi na ini en anoe. — Hebrewsma 11:6.

Eksempel foe tan krosibei na Jehovah

7. Fa wi kan waka baka na bribi foe Abel ini a tan di a ben tan krosibei foe Jehovah?

⁷ Bijbel lai nanga tori foe begi di foetoeboi foe Gado ben taki. Den disi „ben skrifi foe leri wi, so taki nanga jepi foe wi horidoro èn nanga jepi foe na trowstoe foe den Boekoe wi ben sa abi howpoe” (Romesma 15:4). A howpoe foe wi e kon tranga te wi e prakseri foe wan toe eksempel foe den wan di ben tan krosibei na Jehovah. Abel ben pristeri Gado wan boen ofrandi, èn ala di den no ben skrifi foe no wan begi, dan sondro degedege a ben aksi Jehovah ini begi foe a teki en ofrandi. Hebrewsma 11:4 e taki: „Nanga bribi Abel ben òfer Gado wan ofrandi di ben abi moro waarde leki di foe Kain, nanga jepi foe dati a ben gi kotoigi foe en taki a ben de regtfardiki.” Abel ben sabi foe na pramisi foe Gado na ini Genesis 3:15, ma te joe teki en gersi nanga san wi sabi now, a ben sabi pikinso nomo. Ma tokoe Abel ben doe sani akroederi a sabi di a ben abi. Na so son sma na ini a ten disi di no so langa pasa ete kisi belangstelling gi Gado waarheid, no abi foeroe sabi ete, ma den e begi èn e doe someni leki den kan nanga a sabi foe den, neleki fa Abel ben doe dati. Ija, den e handri nanga bribi.

8. Foe san-ede wi kan de seiker taki Abraham ben tan krosibei foe Jehovah, èn sortoe aksi wi moesoe poti gi wisrefi?

⁸ Wan tra getrow foetoeboi foe Gado ben de Abraham, „na papa foe ala den sma di abi bribi” (Romesma 4:11). Na ini a ten disi, moro leki oiti wan ten, wi abi tranga bribi fanowdoe, èn wi moesoe begi nanga bribi, neleki fa Abraham ben doe dati. Genesis 12:8 e taki, dati a ben bow wan altari „gi Jehovah èn ben bigin kari a nen foe Jehovah.” Abraham ben sabi a nen foe Gado èn ben gebroiki en ini begi. Ibri tron baka a ben horidoro fajafaja ini begi, èn ben kari „a nen foe Jehovah na Gado di e tan te ten di no abi marki” (Genesis 13:4; 21:33). Abraham ben kari Gado nanga a bribi foe san a ben kisi bigi-nen (Hebrewsma 11:17-19). Begi ben jepi Abraham foe tan de nanga bigi prisiri ini a Kownoekondre howpoe. Wi e waka baka na eksempel foe Abraham foe horidoro ini begi?

9. (a) Foe san-ede den begi foe David abi foeroe boen gi Gado pipel na ini a ten disi? (b) San kan de a bakapisi te wi e begi so leki David ben doe foe tan krosibei foe Jehovah?

⁹ David ben horidoro ini begi na wan toemoesi aparti fasi, èn den psalm foe en e sori san begi moesoe abi na ini. Foe eksempel, den foetoeboi foe Gado kan begi na wan joisti fasi foe den sani leki foe kisi kibri èn froeloesoe (3:7, 8; 60:5), tiri (25:4, 5), kibri (17:8), pardon foe sondoe (25:7, 11, 18), èn wan soifri ati (51:10). Di David ben de ini banawtoe a ben begi: „Meki na sili foe joe foetoeboi de nanga prisiri” (86:4). Wi kan begi na a srefi fasi foe abi prisiri ini wi ati, foe di wi sabi taki Jehovah wani taki wi e prisiri ini a howpoe foe wi. David ben tan krosibei foe Jehovah èn ben begi: „Mi sili waka krosibei na joe baka; a reti anoe foe joe e hori mi steifi” (63:8). Wi sa tan krosibei foe Jehovah, so leki fa David ben doe? Efoe wi e doe dati, dan a sa hori wi tanapoe na a srefi fasi.

10. Sortoe fowtoe prakseri na psalm-singiman Asaf ben abi na wan momenti, ma san a ben kon froestan?

¹⁰ Efoe wi wani foe tan krosibei na Jehovah, dan wi moesoe tan farawe foe djaroesoe tapoe den ogri-atiwan, foe di den e libi wan onborsoe libi èn foe di den abi foeroe sani na skinfasi. Na psalm-singiman Asaf ben abi na firi na wan momenti taki a no ben abi waarde foe dini Gado, foe di den ogri-atiwan „te ten di no abi marki no e broko den ede nanga sani.” Tokoe a ben kon si taki a fasi fa a ben taki sani go-kon ben de fowtoe èn taki den ogri-atiwan ben de „tapoe grati gron.” A ben kon froestan, taki noti de moro betre leki foe tan krosibei foe Jehovah, èn a ben taigi Gado sani na a fasi disi: „Mi de doronomo nanga joe; joe ben hori mi reti anoe steifi; Bika loekoe! joisti den di e tan farawe foe joe sa lasi gowe. . . . Ma foe mi sei, a de boen gi mi foe go krosibei na Gado. Na a Soeverein Masra Jehovah mi poti mi froetrow foe meki ala joe wroko bekènti” (Psalm 73:12, 13, 18, 23, 27 ,28). Na presi foe djaroesoe tapoe na onborsoe libi foe den ogri-atiwan, sma di de sondro howpoe, meki wi waka baka Asaf ini a tan di wi e tan krosibei foe Jehovah.

11. Foe san-ede Danièl de wan boen eksempel ini a tan di a ben tan krosibei foe Jehovah èn fa wi kan waka na en baka?

¹¹ Nanga fasti bosroiti Danièl ben horidoro ini begi, srefi di a ben tanapoe a fesi a kefar foe kon ini a lew-olo, foe di a no ben gi jesi na a officieel wet di ben tapoe sma foe begi. Ma Jehovah „ben seni en engel èn ben tapoe den mofo foe den lew”, èn ben froeloesoe Danièl (Danièl 6:7-10, 22, 27). Danièl ben kisi foeroe blesi, foe di a ben horidoro ini begi. Wi e horidoro so srefi ini begi, spesroetoe te wi tanapoe a fesi gens kontrari wi Kownoekondre preikiwroko?

Jesus, wi Eksempel

12. (a) Sortoe eksempel Jesus ben gi ini a tori foe begi, na a bigin foe en diniwroko èn fa disi kan abi wini gi kresten? (b) San a Model begi foe Jesus e tjari kon a krin ini a tori foe begi?

¹² Foe sensi a bigin foe en diniwroko na grontapoe, sma ben si Jesus e begi. A fasi foe en foe begi, ala di den ben e dopoe en, na wan moi eksempel gi den wan di den e dopoe nanga watra na ini a ten disi (Lukas 3:21, 22). Wan sma kan begi foe na jepi foe Gado foe man tan doe sani, di dopoe nanga watra de wan agersi foe den. Jesus ben jepi trawan toe foe kon krosibei na Jehovah ini begi. Na wan okasi di Jesus ben e begi na wan seiker presi, wan foe en disipel ben taigi en baka ten: „Masra, leri wi fa foe begi”. Ne Jesus ben gi den san sma sabi moro foeroe leki na Model begi, pe a e sori a wan baka a trawan taki a nen èn prakseri foe Gado moesoe kon fosi (Lukas 11:1-4). Ini wi begi so boen wi moesoe tan si sani na a joisti fasi èn moesoe tan ini balansi, èn wi no moesoe frigiti „den moro prenspari sani” (Filipisma 1:9, 10). A no de foe taki, dati ten de taki wi abi spesroetoe sani fanowdoe noso te wan spesroetoe problema moesoe kisi prakseri. Neleki Jesus, kresten kan go na Gado ini begi foe soekoe krakti foe doe bepaalde wroko noso foe kaka foetoe gi aparti tesi noso kefar (Mateus 26:36-44). Foe taki en leti, dan persoonlijk begi kan abi na ini pikinmoro ibri pisi foe na libi.

13. Fa Jesus ben sori taki a prenspari foe begi gi trawan?

¹³ Nanga en moi eksempel, Jesus ben sori na prensparifasi foe begi gi trawan. A ben sabi taki sma no ben sa wani si den disipel foe en na ai èn den sa froefolgoe den, neleki fa den ben froefolgoe en (Johanes 15:18-20; 1 Petrus 5:9). Foe dati-ede a ben aksi Gado „foe loekoe den foe na ogri-atiwan ede” (Johanes 17:9, 11, 15, 20). Èn foe di a ben sabi na spesroetoe tesi di ben tanapoe e wakti Petrus, a ben taigi en: „Mi ben begi fajafaja gi oenoe foe oenoe no lasi bribi” (Lukas 22:32). O boen a de, taki wi toe e horidoro ini begi gi wi brada, prakseri foe trawan èn no soso foe wi eigi problema èn afersi! — Filipisma 2:4; Kolosesma 1:9, 10.

14. Fa wi doe sabi taki Jesus ben tan troetroe krosibei foe Jehovah ini en heri diniwroko na grontapoe, èn fa wi kan waka na en baka?

¹⁴ Na ini en heri diniwroko, Jesus ben horidoro ini begi, èn a ben tan krosibei foe Jehovah (Hebrewsma 5:7-10). Na ini Tori foe den Apostel 2:25-28 na apostel Petrus ben taki foe Psalm 16:8 èn ben fiti en tapoe Masra Jesus Krestes: „Foe en David e taki: ’Mi ben abi Jehovah doronomo a mi fesi, bika a de a mi leti anoe, so taki mi noiti ben sa degedege.” Wi kan doe a srefi. Wi kan begi Gado foe tan krosibei na wi èn wi kan sori wi froetrow ini Jehovah, foe di wi e tan hori en doronomo na fesi wi ai na jeje fasi. (Teki gersi Psalm 110:5; Jesaja 41:10, 13.) Dan wi sa tan farawe foe ala sortoe problema, bika Jehovah sa jepi wi èn wi no sa degedege noiti.

15. (a) Ini a tori foe san wi noiti moesoe misi foe horidoro ini begi? (b) Sortoe warskow e gi dja ini a tori foe a firi di wi ati firi grantangi?

¹⁵ Meki wi noiti misi foe sori grantangi na Jehovah gi ala en boen-ati gi wi, ija, „Gado no-froedini boen-atifasi pasa marki” di abi na ini toe na presenti foe en Manpikin leki wan loesoe ofrandi gi wi sondoe (2 Korentesma 9:14, 15; Markus 10:45; Johanes 3:16; Romesma 8:32; 1 Johanes 4:9, 10). Ija, tan „gi wi Gado èn Tata tangi ala ten gi ala sani” na Jesus nen (Efeisesma 5:19, 20; Kolosesma 4:2; 1 Tesalonikasma 5:18). Wi moesoe loekoe boen foe no meki a firi di wi ati firi grantangi foe san wi abi kon pori foe di wi e broko wi ede so foeroe nanga san wi no abi noso nanga den persoonlijk problema foe wi.

Poti den lai foe wi tapoe Jehovah

16. San wi moesoe doe te wan noso tra hebi e trobi wi?

¹⁶ Horidoro ini begi e sori a dipi foe a gi di wi e gi wisrefi foe dini. Te wi e kari Gado, dan dati a abi wan boen bakapisi a wi tapoe kaba, srefi bifo wan piki e kon foe en. Efoe wan noso tra hebi e trobi wi prakseri, wi kan tan krosibei foe Jehovah foe di wi e waka baka na rai: „Iti joe hebi tapoe Jehovah, èn ensrefi sa jepi joe” (Psalm 55:22). Foe di wi e iti ala den hebi foe wi — sorgoe, broko-ede, froewakti di no kon troe, sani di e frede wi, èn so moro fara — na Gado tapoe, nanga dorodoro bribi ini en, wi e kisi wan korostoe firi ini wi ati, „na vrede foe Gado di e pasa ala prakseri.” — Filipisma 4:4, 7; Psalm 68:19; Markus 11:24; 1 Petrus 5:7.

17. Fa wi kan kisi na vrede foe Gado?

¹⁷ Na vrede disi foe Gado e kon wantewante? Ala di wi kan kisi pikinso froelekti wantewante, san Jesus ben taki foe begi foe santa jeje de troe dja so srefi: „Tan aksi, èn oenoe sa kisi; tan soekoe èn oenoe sa feni; tan naki doro èn den sa opo en gi oenoe” (Lukas 11:9-13). Foe di santa jeje na a sani nanga san wi e kisi froelekti foe sorgoe, wi moesoe horidoro ini aksi foe na vrede foe Gado èn a jepi foe en di abi foe doe nanga den hebi foe wi. Wi kan de seiker, taki foe di wi e horidoro ini begi, wi sa kisi a froelekti di wi ben wani èn na korostoe firi ini wi ati.

18. San Jehovah e doe gi wi efoe wi no sabi finifini foe sortoe sani wi moesoe begi ini wan seiker situwâsi?

¹⁸ Ma san efoe wi no sabi finifini san wi moesoe begi gi? A inisei banawtoe foe wi nofotron e tan sondro foe wi man taki foe en bika wi no e froestan a situwâsi foe wi dorodoro, noso wi no sabi san foe doe ini a tori foe san wi moesoe pristeri na Jehovah. A de dja taki na santa jeje man taki foe wi ede. Paulus ben skrifi: „Wi no sabi foe sortoe sani wi moesoe begi gi so leki a fanowdoe de, ma na jeje srefi e taki gi wi nanga geme di joe no man jere” (Romesma 8:26). Fa so? Ini a Wortoe foe Gado joe abi profeititori di skrifi na ondro krakti foe santa jeje èn begi di abi foe doe nanga a situwâsi foe wi. Gado e meki den disi taki gi wi, foe taki en so. A e teki den disi neleki na wi ben sa begi gi dati efoe nomo wi ben sabi san den wani taki ini a kefal foe wi, èn akroederi dati a e meki den kon troe.

Begi èn howpoe sa go doro

19. Foe san-ede begi nanga howpoe sa go doro foe têgo?

¹⁹ Begi wi hemel Tata sa tan go doro foe têgo, spesroetoe ini a tori foe a firi di wi ati firi grantangi gi a njoen grontapoe èn ala den blesi foe en (Jesaja 65:24; Openbaring 21:5). Wi sa go doro toe foe prisiri ini howpoe, bika wan sortoe fasi foe howpoe sa tan foe têgo. (Teki gersi 1 Korentesma 13:13.) Sortoe njoen sani Jehovah sa tjari kon te a no de moro langa na ondro a Sabatdei rostoe foe grontapoe, di a ben poti gi ensrefi, wi no kan tjari kon ini wi prakseri srefi (Genesis 2:2, 3). Te foe ala ten, a sa abi moi onfroewakti prisiri ini en prakseri gi en pipel, èn na dei foe tamara sa tjari moro bigi sani ini a tori foe a doe foe en wani.

20. San moesoe de wi fasti bosroiti èn foe san-ede?

²⁰ Meki wi alamala tan krosibei foe Jehovah nanga so wan span howpoe a wi fesi, foe di wi e horidoro ini begi. Meki wi no tapoe noiti foe taki wi hemel Tata tangi gi ala blesi. Na wan seiker ten den froewakti foe wi sa kon troe na wan prisiri fasi, srefi moro leki san wi ben kan prakseri foe noso froewakti, bika Jehovah kan „doe toemoesi moro foeroe leki ala den sani di wi kan aksi noso memre” (Efeisesma 3:20). Nanga ala disi na prakseri, dan meki wi gi ala prèise èn glori èn tangi foe têgo ala ten na Jehovah wi Gado, na „Arkiman foe begi”!

[Foetoewortoe]

Fa joe ben sa piki?

◻ Foe san-ede wi moesoe foe horidoro ini begi?

◻ San wi e leri foe den eksempel foe begi bifo kresten ten?

◻ San na eksempel foe Jesus e leri wi foe begi?

◻ Fa wi kan poti den hebi foe wi tapoe Jehovah èn nanga sortoe bakapisi?

[Prenki na tapoe bladzijde 30]

Danièl ben horidoro ini begi awansi a kefar ben de foe den trowe en na ini a lew-olo