A dei di wi moesoe memre

„Den sani disi mi taigi joe, so dati oenoe sa abi vrede nanga jepi foe mi. Ini grontapoe oenoe abi tesi, ma abi deki-ati! mi wini grontapoe.” — JOHANES 16:33.

1, 2. Sortoe dei wawan ini a historia de moro prenspari moro ala tra dei, èn foe san ede?

GRONTAPOE foe tide e taki foeroe foe vrede. Na a kaba foe a di foe Toe Grontapoe Feti, den ben tjari vrede tapoe wan lin nanga V-E Dei èn V-J Dei.a Ibri jari na Kresneti ten sma e denki foe vrede na grontapoe (Lukas 2:14). Ma wan dei de ini na heri libisma historia di de difrenti foe ala trawan. A de na dei di Jesus Krestes ben taki den wortoe disi, di skrifi na tapoesei. Foe den, moro leki toe miljoen dei di libisma ben e libi na grontapoe, a de na wan enkri dei di kenki na libi foe a libisma famiri dorodoro foe na têgo boen foe den.

² A dei dati di warti foe memre ben de 14 Nisan tapoe a djoe kalender. Na ini a jari 33 foe wi gewoon teri, dan 14 Nisan ben bigin nanga a dongo foe a son tapoe 1 april. Meki wi go loekoe den sani di ben feni presi na a moro prenspari dei dati.

14 Nisan!

3. Fa Jesus ben meki gebroiki foe den lasti joeroe disi?

³ Te doengroe e bigin fadon, wan moi foeroe moen kande ben e skèin leki wan memre dati Jehovah e poti den ten èn pisi ten (Tori foe den Apostel 1:7). Èn san e pasa na a tapoesodro kamra pe Jesus nanga den 12 apostel foe en ben kon na wan foe njan foe a Paskafesa di den djoe ben hori ibri jari? Te Jesus e sreka ensrefi ’foe gowe libi a grontapoe disi foe go na a Tata, a e sori en lobi te na a kaba gi den wan foe en’ (Johanes 13:1). Fa a e doe disi? Nanga wortoe di a e taki èn nanga eksempel di a e gi, dan Jesus e tan kweki den eigifasi na ini den disipel foe en, di sa jepi den foe wini grontapoe.

Weri sakafasi èn lobi

4. (a) Fa Jesus ben demo wan prenspari eigifasi gi den disipel foe en? (b) Fa wi sabi dati Petrus ben leri a prenspari fasi foe sakafasi?

⁴ Den apostel moesoe poeroe pikinso foe a djaroesoe strei nanga heimemre fasi na ini den eigifasi. Na so Jesus e tai wan doekoe lontoe en bere èn e bigin wasi den foetoe. Disi no de wan sori foe wan sakafasi di no de opregti, so leki fa ibri jari a pawsoe foe Krestenhèit e prei dati na ini Rome. Nôno, kwetikweti! Troetroe sakafasi na wan gi di joe e gi joesrefi, di e kon foe wan ’sakafasi foe denki di e si trawan moro hei’ (Filipisma 2:2-5). Biginbigin, Petrus no e froestan a tori èn a e weigri foe meki Jesus wasi en foetoe. Te Jesus e froemane en, a e aksi Jesus foe wasi en heri skin (Johanes 13:1-10) Ma, Petrus ben moesoe foe leri a les. Jari na baka, wi e si taki a e froemane trawan na wan joisti fasi (1 Petrus 3:8, 9; 5:5). O prenspari a de ini a ten disi dati wi alamala e wroko nanga sakafasi leki srafoe foe Krestes! — Loekoe so srefi Odo 22:4; Mateus 23:8-12.

5. Sortoe komando di Jesus gi, ben e sori a prenspari fasi foe wan tra prenspari eigifasi?

⁵ Wan foe den twarfoe no e njanboen foe na rai di Jesus e gi. Disi na Judas Iskariot. Ala di a Paska njanjan e go doro, Jesus ben kon troeboe ini jeje, a e meki sma sabi Judas leki a sma di o tori en èn e seni en gowe. Ma baka disi, ne Jesus e froeteri den erfoe getrow disipel foe en: „Mi e gi joe wan njoen gebod, dati oenoe lobi makandra; neleki fa mi ben lobi joe, dati oenoe so srefi lobi makandra. Na disi ala sma sa sabi dati oenoe na mi disipel, efoe lobi de na mindri oenoe” (Johanes 13:34, 35). Disi na foe troe wan njoen komando, di Jesus en eigi toemoesi boen eksempel ben agersi! Ala di a joeroe foe en eigi ofrandi dede e kon krosibei, Jesus e sori lobi pasa marki. A e gebroiki ibri warti miniti, foe gi den disipel dati leri nanga deki-ati. Baka ten, a e poti krakti tapoe na prenspari fasi foe lobi, foe di a e taki: „Disi na mi komando, taki oenoe lobi makandra neleki fa mi ben lobi joe. No wan sma ben abi moro bigi lobi leki disi, dati wan sma moesoe gi en sili abra gi na boen foe en mati” — Johanes 15:12, 13.

„A pasi èn a waarheid èn a libi”

6. Sortoe marki Jesus e poti a fesi foe den krosibei disipel foe en?

⁶ Jesus e froeteri den erfoe getrow disipel: „No meki joe ati kon troeboe. Poti bribi ini Gado, poti bribi so srefi ini mi. Ini na oso foe mi Tata, foeroe presi de foe libi. Noso mi ben o taigi joe, bika mi e go foe sreka wan presi gi joe” (Johanes 14:1, 2). A presi disi o de na ini „a kownoekondre foe hemel” (Mateus 7:21). Jesus e froeklari fa a loyaal groepoe disipel disi, di de ini wan krosibei matifasi nanga en, kan doro na marki foe den. A e taki: „Mi na a pasi èn a waarheid èn a libi. No wan sma e kon na a Tata, boiti nanga jepi foe mi” (Johanes 14:6). Disi de so toe gi den wan foe a libisma famiri di e kisi têgo libi na grontapoe. — Openbaring 7:9, 10; 21:1-4.

7-9. Foe san ede Jesus ben taki foe ensrefi leki „a pasi èn a waarheid èn a libi?”

⁷ Jesus na „a pasi”. Na wan èn wan enkri fasi foe soekoe Gado ini begi, de nanga jepi foe Jesus Krestes. Jesus srefi e gi den disipel foe en a seikerfasi taki a Tata sa gi den awasi san den e aksi toe ini a nen foe Jesus (Johanes 15:16). Begi di den e seni go na den gado prenki noso den „santawan” foe a relisi noso begi di lai nanga ave Maria nanga singi di den e singi ibritron baka — no wan foe den disi a Tata e jere noso e feni boen (Mateus 6:5-8). Moro fara, ini a tori foe Jesus, wi e leisi ini Tori foe den apostel 4:12: „No wan enkri tra nen de ondro hemel di den ben gi na mindri libisma di den moesoe kisi froeloesoe nanga en.”

⁸ Jesus na a „waarheid.” Na apostel Johanes ben taki foe en: „Na wortoe. . . ben tron libisma skin èn ben tan na wi mindri, èn wi ben man si en glori pikinso, wan glori so leki di foe wan wàn enkri gebore manpikin foe wan papa; èn a ben foeroe nanga no-froedini boenfasi nanga waarheid” (Johanes 1:14). Jesus ben meki hondrohondro foe den profeititori di skrifi ini den Hebrew Boekoe tron waarheid, foe di a ben meki den kon troe (2 Korentesma 1:20; Openbaring 19:10). A ben meki a waarheid bekènti foe di a ben e taki nanga den disipel foe en èn den ipi sma di ben arki, foe di a ben kroetoe nanga den hoigri-atifasi kerkifesiman èn nanga jepi foe a fasi fa a ben e libi.

⁹ Jesus na a „libi”. Leki na Manpikin foe Gado, Jesus ben taki: „En di e poti bribi ini a Manpikin abi têgo libi; en di e tranga jesi a Manpikin no sa si a libi, ma a kroetoe foe Gado e tan tapoe en” (Johanes 3:36). Bribi di sma e poti ini na ofrandi foe Jesus e tjari sma go na têgo libi — têgo libi na hemel gi wan „pikin ipi” foe salfoe Kresten èn têgo libi na wan paradijs grontapoe gi wan bigi ipi foe „tra skapoe”. — Lukas 12:32; 23:43; Johanes 10:16.

Horidoro ondro tesi

10. Foe san ede wi moesoe ’wini a grontapoe,’ èn sortoe deki-ati Jesus ben gi ini a tori disi?

¹⁰ Den wan di e howpoe foe libi ini Jehovah en njoen seti foe sani moesoe feti nanga wan grontapoe di ’e didon ini a makti foe na ogriwan’, Satan Didibri (1 Johanes 5:19). Fa den wortoe foe Jesus di skrifi na Johanes 15:17-19 e gi deki-ati dan! A e froeklari: „Den sani disi mi e komanderi joe, dati oenoe moesoe lobi makandra. Efoe a grontapoe no wani si joe na ai, oenoe sabi dati a no ben wani si mi na ai bifo a no ben wani si joe na ai. Efoe oenoe ben sa de wan pisi foe grontapoe, dan grontapoe ben o lobi srefisrefi san ben de foe en. Bika now, oenoe no de wan pisi foe grontapoe, ma mi ben piki joe poeroe ini grontapoe, dati ede a grontapoe no wani si joe na ai.” Teleki ini a jari disi, 1992, sma no ben wani si troe kresten na ai, èn fa wi e prisiri nanga a toemoesi boen eksempel foe den wan di ben tan tanapoe fasti, èn di nanga sakafasi e feni krakti ondro a makti anoe foe Gado! (1 Petrus 5:6-10) Wi alamala kan horidoro ondro tesi efoe wi e poti bribi ini Jesus, di e bosroiti a preiki foe en nanga den wortoe disi di e waran joe ati: „Ini grontapoe oenoe abi banawtoe, ma abi deki-ati! Mi ben wini grontapoe.” — Johanes 16:33.

Poti wan njoen froebontoe

11. San Jeremia ben taki a fesi foe a njoen froebontoe?

¹¹ A neti dati, baka di a Paska fesa ben de foe kaba, Jesus e taki foe wan njoen froebontoe. A profeiti Jeremia ben froeteri disi someni jarihondro na fesi, èn a ben taki: „’Loekoe! Dei e kon’, Jehovah e taki, ’èn seiker mi sa sroto wan njoen froebontoe nanga a oso foe Israèl èn nanga a oso foe Juda . . . Mi wani poti mi wet na ini den inisei pisi foe den, èn ini den ati mi sa skrifi en. Èn mi wani tron den Gado èn den sa tron mi pipel. . . . Bika mi sa gi den pardon foe den sondoe, èn mi no sa prakseri den sondoe foe den moro’” (Jeremia 31:31-34). Tapoe 14 Nisan 33 G.T., den o tjari na ofrandi di e meki a njoen froebontoe disi kon kisi krakti!

12. Fa Jesus ben seti a njoen froebontoe, èn san a froebontoe e doe?

¹² Jesus e froeteri den erfoe getrow disipel dati a ben angri sote foe njan a Paska disi nanga den. Dan a e teki wan brede, e taki tangi foe disi ini begi, e broko en, e gi den èn e taki: „Disi wani taki mi skin di mi o gi foe na boen foe oenoe. Tan doe disi foe memre mi.” Na a srefi fasi a e langa wan beker nanga redi win gi den èn e taki: „A beker disi wani taki wan njoen froebontoe nanga jepi foe na broedoe foe mi, di sa trowe foe na boen foe joe” (Lukas 22:15, 19, 20). A njoen froebontoe kan wroko nanga jepi foe a „diri broedoe foe Jesus,” di abi krinkrin moro bigi waarde leki a broedoe foe den meti di den ben dropoe foe meki a Wet froebontoe foe Israèl ben kan bigin wroko! (1 Petrus 1:19; Hebrewsma 9:13, 14) Den wan di den ben teki ini a njoen froebontoe abi na grani foe kisi dorodoro pardon foe sondoe. Ma, den ben feni den boen foe de foe na 144.000, di leki na Israèl na jejefasi e erf wan goedoe foe têgo. — Galasiasma 6:16; Hebrewsma 9:15-18; 13:20; Openbaring 14:1.

„Foe memre mi”

13. (a) Tapoe san wi moesoe poti wi denki na a ten foe na Memrefesa? (b) Soema wawan moesoe gebroiki foe den simbôl èn san ede?

¹³ Na di foe wan doesoen neigi hondro siksi tenti tron foe na ibri jari Memre foe na dede foe Jesus, e fadon tapoe 17 april 1992. Ala di a dei dati e kon krosibei, wi e doe boen foe denki foe ala sani di Jesus en volmaakti ofrandi e doe gi sma. A seti disi e hei a koni foe Jehovah nanga en dipi lobi gi a libisma famiri. A volmaakti soifri retifasi foe Jesus, srefi te na en dede nanga foeroe skin-ati, e regtfardiki Jehovah foe a tjalansi foe Satan, dati den libisma di Jehovah ben meki no boen èn dati den no sa man horidoro ondro tesi (Job 1:8-11; Odo 27:11). Nanga a broedoe foe en di a ben òfer, dan Jesus de leki a mindriman foe a njoen froebontoe, a wrokosani foe Jehovah foe piki „wan nâsi di den ben teki poeroe na mindri trawan, wan kownoe priesterwroko, wan santa nâsi, wan pipel leki en spesroetoe goedoe.” Ala di den de na grontapoe ete, den disi e ’meki den toemoesi boen sani bekènti na ala sei’ foe a Gado foe den, Jehovah, di ben kari den foe na doengroe kon na a toemoesi moi leti’ (1 Petrus 2:9; teki gersi Exodus 19:5, 6.) A e fiti foe dati ede taki den wawan e teki prati ibri jari na den simbôl foe a Memrefesa.

14. Fa den miljoenmiljoen sma di e loekoe nomo e kisi blesi?

¹⁴ Na a Memrefesa a jari di pasa, so wan 10.650.158 fisitiman ben kon na wan na a heri grontapoe, ma soso 8.850 ben gebroiki foe den simbôl — moro mendri leki wan di foe tin pisi foe 1 prosent. Sortoe boen a fesa disi e tjari dan gi den miljoenmiljoen sma di e loekoe nomo? Foeroe boen! Awasi den no e teki prati, den e kon goedoe na jejefasi foe di den de makandra ini wan bigi bradafasi na a heri grontapoe, ala di den e jere foe ala den toemoesi moi sani di Jehovah e doe nanga jepi foe na ofrandi foe en Manpikin.

15. Fa trawan di no de salfoewan, e njanboen foe a ofrandi foe Jesus?

¹⁵ Morofara, na apostel e gi wi a bodoi na 1 Johanes 2:1, 2: „Wi abi wan jepiman na a Tata, Jesus Krestes, wan regtfardikiwan. Èn en na wan soen-ofrandi gi wi sondoe, ma no gi di foe oenoe wawan, ma so srefi gi di foe a heri grontapoe.” Ija, na ofrandi foe Jesus, ala di a e doe boen gi a Johanes groepoe di a teki na ini a njoen froebontoe, e sorgoe so srefi gi pardon foe „den sondoe foe a heri grontapoe”. A de „wan soen-ofrandi” gi den sondoe foe ala den trawan foe a grontapoe foe a libisma famiri di ben poti bribi ini a broedoe foe Jesus di ben trowe, di e opo a kolokoe pramisi foe têgo libi na wan paradijs grontapoe gi den. — Mateus 20:28.

„Ini a kownoekondre foe mi Tata”

16. (a) So leki fa a sori, dan san Jesus nanga den medeërfgenaam foe en e prati now? (b) San den e aksi now foe a salfoe fikapisi èn so srefi foe a bigi ipi?

¹⁶ Ala di a e go doro foe gi den apostel foe en deki-ati, Jesus e sori tapoe a dei, te, na wan simbôlis fasi a sa dringi njoen foe a froktoe foe a win ini a Kownoekondre foe en Tata (Mateus 26:29). A e taigi den: „Ma oenoe na den wan di ben tan na mi ini a ten foe mi banawtoe; èn mi e sroto wan froebontoe nanga oenoe, neleki fa mi Tata ben sroto wan froebontoe nanga mi, gi wan kownoekondre, so dati joe kan njan èn dringi na mi tafra ini mi kownoekondre èn sidon tapoe kownoestoeroe foe kroetoe den twarfoe lo foe Israèl” (Lukas 22:28-30). Foe di Jesus ben teki Kownoekondre makti na ini den hemel ini 1914, wi kan kon na a bosroiti dati na moro bigi pisi foe den medeërfgenaam foe Jesus, di ben tjari kon a wan, ini den hondrohondro jari di pasa, ben kisi wan opobaka kaba, foe sidon ’tapoe kownoestoeroe nanga en’ (1 Tesalonikasma 4:15, 16). A dei, di den fo engel o loesoe den „fo winti” foe „a bigi banawtoe”, e kon krosibei esi-esi”! Na a ten dati, a poti foe wan lakstampoe gi den 144.000 foe a jeje Israel èn a tjari kon na wan foe den miljoenmiljoen sma foe a bigi ipi sa kon na en kaba. Ala den sma disi moesoe hori den soifri retifasi, so leki fa Jesus ben doe dati, so taki den kan kisi a prijs foe têgo libi. — Openbaring 2:10; 7:1-4, 9.

17 nanga faki. (a) Efoe den moesoe poti wan salfoewan na doro leki wan sma di no de loyaal, soema so leki a fiti, e kon ini en presi? (b) Sortoe toemoesi moi leti den Waktitoren artikel ini a jari 1938 ben panja tapoe a bow èn baka ten a kon moro bigi foe a theokratis organisâsi a grontapoe?

¹⁷ San e pasa efoe wan toe foe a salfoe groepoe e misi foe hori den soifri retifasi? Na a lati joeroe disi, a nomroe foe den wan disi di de loyaal, sondro degedege no sa de foeroe. So leki a fiti, dan a sma di ben sa kon na a presi foe wan foe den, no ben sa komopo foe den wan di dopoe njoen, ma foe den wan di ben tan nanga Jesus ini den tesi foe en ini foeroe jari foe getrow dienst. Den toemoesi moi faja di e koti foe na leti a jejefasi di ben kon nanga jepi foe Na Waktitoren ini den jari foe 1920 èn 1930, ben sori taki a tjari kon na wan foe a fikapisi foe den salfoewan pikinmoro ben kon so boen na wan kaba ini a ten dati. Foe bigin foe a ten dati, dan den wan di ’e wasi den krosi èn e meki den kon weti ini a broedoe foe a Pikinskapoe’, abi, wan tra prisiri howpoe. Nanga jepi foe Krestes, a jeje foe Jehovah e tiri den go na „fonten foe watra foe libi” ini a Paradijs grontapoe. — Openbaring 7:10, 14, 17.

Wan moro faja begi

18. Sortoe krakti les wi e leri foe a begi foe Jesus na Johanes kapitel 17?

¹⁸ Jesus e tapoe na Memrefesa konmakandra nanga den disipel foe en, foe di a e begi na faja begi di skrifi na Johanes 17:1-26. A e begi fosi efoe en Tata kan gi en glori te a e hori en soifri retifasi te na a kaba. Na a fasi disi Jehovah sa kisi glori toe, ala di en nen e santa — e krin foe ala pori nen. Bika, foe troe, a volmaakti man Jesus e boeweisi dati den libisma di Gado meki kan de sondro fowtoe, srefi ondro a moro hebi tesi (Deuteronomium 32:4, 5; Hebrewsma 4:15). Morofara, na ofrandi dede foe Jesus e opo wan bigi okasi gi den bakapikin foe Adam. Jesus ben taki foe disi: „Disi wani taki têgo libi, dati den e teki doronomo sabi ini den foe joe, a wan enkri troe Gado, èn foe en di joe ben seni kon, Jesus Krestes.” O prenspari a de foe teki soifri sabi foe Jehovah Gado èn foe en Manpikin, a Pikinskapoe foe Gado, di ben gi en libi foe a kisi di Jehovah moesoe kisi reti èn foe froeloesoe di a libisma famiri moesoe kisi froeloesoe! (Johanes 1:29; 1 Petrus 2:22-25). Joe e warderi a moro lobi ofrandi dati foe go so fara foe gi joesrefi krinkrin na Jehovah èn a warti dienst foe en?

19. Fa a fikapisi nanga a bigi ipi e njanboen foe wan toemoesi warti wánfasi?

¹⁹ Morofara, Jesus e begi en Santa Tata foe loekoe den disipel foe en boen ala di den e sori taki den no de wan pisi foe grontapoe, e tan hori getrow na En wortoe leki waarheid, èn e tan hori wan diri wánfasi nanga a Tata èn a Manpikin. A begi disi no ben kisi piki na wan toemoesi moi fasi teleki a dei foe now, ala di a salfoe fikapisi nanga a bigi ipi e dini makandra ini wánfasi ini banti foe lobi, nanga ala di den e tan aparti foe no e moksi densrefi nanga grontapoe afersi, en ogridoe, èn en gadolowsoefasi? O warti den lasti wortoe foe Jesus de di a e taigi en Tata, Jehovah! „Mi ben meki den kon sabi joe nen, èn sa meki den kon sabi en,” Jesus ben taki, „so taki a lobi nanga san joe ben lobi mi, sa de na ini den èn mi ini wánfasi nanga den.” — Johanes 17:14, 16, 26.

20. Foe san ede 14 Nisan 33 G.T. na foe troe a dei di wi moesoe memre?

²⁰ Ala di Jesus de na pasi e go na a djari foe Getseimanei, a abi tra sjatoe demakandra nanga den disipel foe en, di e bow den. Dan den feanti doro! Wortoe no de foe froeteri foe Jesus en tesi na skinfasi, en toemoesi hebi sari di e naki ati foe a sjen di sma ben tjari tapoe Jehovah, èn a moi eksempel foe en foe hori en soifri retifasi ini ala den sani disi. Jesus e horidoro te na a kaba, a heri neti èn na a moro bigi pisi foe den mamanten joeroe foe a dei dati. Na wan krinfasi a e sori taki en Kownoekondre no de wan pisi foe grontapoe. Èn nanga en lasti bro a e bari taki: „A kaba!” (Johanes 18:36, 37; 19:30) A wini di a wini grontapoe de dorodoro. A dei foe 14 Nisan 33 G.T., na foe troe a dei di wi moesoe memre!

[Foetoewortoe]

Fa joe ben sa piki?

◻ San Jesus ben leri sma ini a tori foe sakafasi nanga lobi?

◻ Fa Jesus ben tron „a pasi èn a waarheid èn a libi?”

◻ San na a marki foe a njoen froebontoe?

◻ Sortoe wánfasi èn lobi de a mindri a salfoe fikapisi nanga a bigi ipi?

[Faki na tapoe bladzijde 16]

A koni foe na Moro Bigi Salomo

Den artikel di ben abi leki titel „Organisâsi”, ini den uitgave foe 1 nanga 15 juni foe Na Waktitoren foe 1938 (Ingrisitongo), ben taki foe den gron theokratis seti baka san Jehovah Kotoigi e waka teleki ini a ten disi. Den e marki wan toemoesi prenspari ten, di ben bigin ini 1919, foe a meki kon njoen foe son fasti gron leri nanga organisâsi seti (Jesaja 60:17). Efoe joe teki a ten dati foe 20 jari gersi nanga den 20 jari di Salomo ben bow na tempel nanga a kownoe oso ini Jerusalem, dan, na so Na Waktitoren ben taki: „Den Boekoe e sori dati, baka den twenti jari foe na bow programa foe Salomo. . . , a ben teki prati ini wan bow programa foe na heri nâsi (1 Kow. 9:10, 17-23; 2 Kron. 8:1-10). Dan na oemakownoe foe Sheba ben kon ’foe na moro farawe presi foe grontapoe foe kon arki na koni foe Salomo’ (Mat. 12:42; 1 Kow. 10:1-10; 2 Kron. 9:1-9, 12). Disi e meki na aksi kon: San a ten di de leti na wi fesi, e tjari gi Jehovah en pipel na grontapoe? Nanga dorodoro froetrow wi sa wakti, èn wi sa si.” Na froetrow dati no ben fowtoe. Ondro na theokratis orga wan toemoesi bigi jeje bow programa na a heri grontapoe ben tjari moro leki fo miljoen sma foe na bigi ipi kon na wan. Neleki na oemakownoe foe Sheba, den ben kon foe den moro farawe presi foe grontapoe foe kon arki na koni foe na Moro Bigi Salomo, Krestes Jesus — di abi komunikâsi nanga den nanga jepi foe „na getrow èn koni srafoe.” — Mateus 24:45-47.