Bari Gado njoen grontapoe foe fri wan switikon
„[Gado] sa figi ala watra ai poeroe na den ai foe den, èn dede no sa de moro, no wan sari, no wan babari noso no wan skin-ati no sa de moro.” — OPENBARING 21:4.
1, 2. Soema wawan kan tjari troe fri èn san wi kan leri foe En na bijbel?
HISTORIA ben boeweisi a troe fasi foe san a profeiti Jeremia ben taki: „A no de na wan libisma foe grontapoe foe poti en foetoe na pasi. A no de na wan man di e koiri srefi foe taki fa foe poti en foetoe na pasi.” Soema wawan kan poti a foetoe foe libisma a pasi na wan joisti fasi? Jeremia e taki moro fara: „Sori mi tapoe mi fowtoe o Jehovah” (Jeremia 10:23, 24). Ija, Jehovah wawan kan tjari troe fri foe den problema di e tanteri a libisma famiri.
2 Bijbel abi foeroe eksempel foe a man di Jehovah man tjari fri gi den sma di e dini en. „Ala den sani di ben skrifi fositen ben skrifi foe leri wi, taki nanga jepi foe wi horidoro èn nanga jepi foe a trowstoe foe den Boekoe wi ben sa abi howpoe” (Romesma 15:4). Den kroetoe foe Jehovah gi falsi anbegi ben skrifi toe èn disi ben dini leki „wan warskow gi wi, den sma di a kaba foe a seti foe sani doro na den.” — 1 Korentesma 10:11.
Fri a pipel foe en
3. Fa Jehovah ben sori taki a man fri en pipel na Egipti?
3 Wan eksempel foe a man di Gado man foe tjari strafoe kon gi falsi anbegi èn foe fri den sma di e doe en wani, ben feni presi di a pipel foe en foe owroeten ben de srafoe na Egipti. Exodus 2:23-25 e taki: „Den kari foe den foe jepi ben tan opo go na a troe Gado foe a katibo ede. Na wan joisti ten Gado ben jere den geme foe den.” Foe di na Almakti Gado ben sori en makti, na wan fasi di e naki sma ati, tapoe den falsi gado foe Egipti a ben tjari tin plaag na tapoe a nâsi dati. Ibriwan foe den plaag ben de foe lagi wan gado foe Egipti, foe sori taki den ben de falsi èn den no ben man jepi den Egiptisma di ben anbegi den. Na so fasi, Gado ben fri a pipel foe en èn ben kiri Farao nanga den legre foe en na ini a Redi Se. — Exodus, kapitel 7 te nanga 14.
4. San ede a no ben de wan onregtfardiki foe a sei foe Gado foe tjari en kroetoe kon a tapoe den Kanansma?
4 Di Gado ben tjari Israèl go na ini Kanan, a ben pori den sma di ben libi drape èn di ben anbegi ogri jeje èn ben gi en pipel a kondre. Leki na Universeel Soeverein, Jehovah abi a reti foe tjari en kroetoe kon abra falsi relisi (Genesis 15:16). Èn Halley’s Bible Handbook di e taki foe a relisi foe Kanan e taki: „Na anbegi foe . . . Kanan gado ben abi na ini a hori foe boen bigi fesa na wan jajo fasi; den tempel foe den ben de konmakandra presi foe jajo libi. . . . Kanansma ben anbegi, nanga jepi foe a doe foe hoeroedoe sondro skotoe, leki wan relisi gwenti, a fesi foe den gado foe den; èn dan, nanga jepi foe a kiri foe den fosi gebore pikin foe den, leki wan srakti-ofrandi gi den sèm gado disi. A ben gersi, na wan bigi marki, taki a kondre foe Kanan ben kon tron wan sortoe Sodom nanga Gomora na ala sei foe a kondre.” A e taki moro fara: „Wan libimakandra nanga so wan takroe pori fasi èn ogri-ati fasi abi a reti foe de moro langa? . . . Den archeoloog di e diki ini san tan abra foe den Kanan foto e froewondroe taki Gado no ben pori den fosi a ten dati.”
5. Fa a fri di Gado fri en pipel foe owroeten de leki wan model gi a ten disi foe wi?
5 A tori disi foe den sani di Gado doe kontrari falsi anbegi, foe fri a pipel foe a froebontoe foe en èn foe gi den wan pramisi kondre, e dini leki wan model foe san di o pasa ete. A e sori na wan ten di de krosibei te Gado sa masi den falsi relisi foe a grontapoe disi èn den bakaman foe den èn sa tjari en disi ten foetoeboi go na ini wan njoen grontapoe foe regtfardikifasi. — Openbaring 7:9, 10, 13, 14; 2 Petrus 3:10-13.
Troe fri ini Gado njoen grontapoe
6. San na wan toe foe den toemoesi aparti fri di Gado sa gi ini a njoen grontapoe?
6 Ini a njoen grontapoe, Gado sa blesi en pipel nanga ala den toemoesi boen fasi foe a fri di a ben abi na prakseri gi na libisma famiri. Wi sa de fri foe a kwinsi di den politiek, ekonomia, nanga falsi relisi elementi e kwinsi sma. Wi sa de fri foe sondoe nanga dede, èn sma sa abi a froewakti foe libi foe têgo na grontapoe. „Den regtfardikiwan, na den sa kisi na grontapoe èn den sa tan foe têgo na en tapoe.” — Psalm 37:29; Mateus 5:5.
7, 8. San sma sa ondrofeni te den e kisi wan volmaakti gesontoe baka ini a njoen grontapoe?
7 Heri esi, baka te a njoen grontapoe dati seti, dan den sma di sa libi na en tapoe sa kisi wan volmaakti gosontoe baka na wan wondroe fasi. Job 33:25 e taki: „En meti moesoe kon moro moi leki ini en jongoe jari; meki a drai go baka na den dei foe a krakti foe en jongoe jari.” Jesaja 35:5, 6 e pramisi: „Na a ten dati den ai foe den breniwan sa opo èn srefi den jesi foe den dofoewan sa opo. Na a ten dati a lanwan sa kren leki wan dia èn a tongo foe a babaw-wan sa bari foe prisiri.”
8 Den wan foe oenoe di abi mankeri na skin fasi foe di oen owroe noso abi wan swaki gesontoe, prakseri taki joe de ini a njoen grontapoe, e wiki ala mamanten gesontoe èn foeroe nanga libikrakti. Den ploiploi foe joe e meki presi gi wan grati gesontoe skin — skin lotion no de fanowdoe moro. Den doengroe noso breni ai foe joe meki kon boen baka, so taki joe kan si sani krin — a no de fanowdoe moro foe weri bril. Joe man jere boen baka dorodoro — trowe den jepisani foe man jere. Den lan anoe nanga foetoe tranga èn boen now — trowe den wakatiki, krokoe nanga ròlstoeroe. Siki no de moro — trowe ala den dresi. Na so Jesaja 33:24 e taki a fesi: „No wan sma di e libi drape sa taki: ’Mi siki’”. A e taki toe: „Èn den sa prisiri èn breiti pasa marki èn sari nanga djeme moesoe lon gowe.” — Jesaja 35:10.
9. Fa orlokoe sa kon foe têgo na wan kaba?
9 Den no sa òfer wan sma moro na orlokoe. „A e meki orlokoe kon na wan kaba te na a moro fara presi na grontapoe. A bo a e broko èn a e koti a lansri troetroe na pisipisi; den wagi a e bron ini faja” (Psalm 46:9). Noiti moro a Tiriman foe Gado Kownoekondre, Krestes Jesus, di Jesaja 9:6 ben kari: „Kownoe foe vrede”, sa gi pasi foe sma abi fetisani. Vers 7 e taki moro fara: „Na a gro pasa marki foe a kownoe tirimakti èn na vrede wan kaba no sa de.”
10, 11. San dorodoro vrede sa wani taki gi grontapoe?
10 Fa a o de wan blesi gi a libisma famiri èn a grontapoe disi, foe de fri foe fetisani foe orlokoe! We, ini a ten disi fetisani di den ben gebroiki na orlokoe a fesi, e kiri sma te now ete. Ini wán kondre, Fransikondre, moro leki 600 koniman di sabi foe poeroe bom a pasi, ben dede sensi 1945, ala di den ben poeroe bom di ben tan abra foe den orlokoe a fesi. Na edeman foe a kantoro drape di e poeroe bom a pasi ben taki: „Wi e feni koegroe foe kanoe di kan panja ete, foe na Orlokoe foe 1870 na mindri Fransikondre nanga Pruisen. Bigi swampoe de, di foeroe nanga kefarlek granaat foe a Fosi Grontapoefeti. Ten na ten wan gronman e rèi abra wan anti-tank mijn, di de drape foe sensi a di foe Toe Grontapoefeti èn badam! a dede. Den sani disi de na ala sei.” Toe jari pasa The New York Times ben taki: „Na ini den 45 jari sensi a kaba foe a di foe Toe Grontapoefeti, [organisâsi di e poeroe bom a pasi] ben froeloesoe [Fransikondre] gron foe 16 miljoen raket di abi sani na ini foe kan soetoe panja, 490.000 bom èn 600.000 ondrowatra-mijn. . . . Den ben libi skotoe lontoe miljoenmiljoen pisi foe pranigron di lai nanga fetisani di beri dipi te na joe kindi. Lontoe den pranigron den ben anga plakati di e warskow: ’No fasi noti. A o kiri joe!’”
11 Fa a njoen grontapoe sa de tra fasi! Ibriwan sma sa abi boen oso, nofo njanjan èn a wroko foe meki a heri grontapoe kon tron wan paradijs sa gi satisfaksi èn a sa pai (Psalm 72:16; Jesaja 25:6; 65:17-25). Noiti moro den sa iti miljoenmiljoen bom panja na tapoe sma èn grontapoe srefi. Jesus ben abi so wan njoen grontapoe na prakseri, di a ben taigi wan man di ben sori bribi ini en: „Joe sa de nanga mi na ini a paradijs.” — Lukas 23:43.
Leri di e gi na heri grontapoe foe sma kisi libi
12, 13. Foe sortoe leriwroko na a heri grontapoe Jesus nanga Jesaja ben froeteri a fesi gi wi ten?
12 Te wan sma e leri foe Gado njoen grontapoe, a e leri toe taki ini a ten foe wi Jehovah abi wan gemeente na a heri grontapoe di orga gi troe anbegi. A sa de a moro prenspari pisi foe a njoen grontapoe, èn Gado e gebroiki en now foe gi trawan leri foe den prakseri foe en. A kresten organisâsi disi e doe wan wroko na a heri grontapoe foe gi leri na wan fasi èn bigi di sma noiti ben si ete. Jesus ben froeteri a fesi taki disi ben sa doe. A ben taki: „A boen njoensoe disi foe a kownoekondre sa preiki na a heri grontapoe pe sma e libi leki wan kotoigi gi ala nâsi èn dan a kaba sa kon.” — Mateus 24:14.
13 Jesaja ben taki toe foe a wroko disi foe gi sma leri na a heri grontapoe: „Èn a moesoe pasa ini den lasti pisi foe den dei [ini a ten foe wi] taki a bergi foe na oso foe Jehovah [a hei troe anbegi foe en] sa poti steifi . . . èn drape ala nâsi moesoe lon go. Èn foeroe sma seiker sa go drape èn taki: ’Oen kon, èn meki wi go na a bergi foe Jehovah, . . . èn a sa skoro wi foe den pasi foe en, èn wi sa waka den foetoe pasi foe en.’” — Jesaja 2:2, 3.
14. Fa wi kan kon sabi Gado pipel ini a ten disi?
14 Foe dati ede a wroko foe gi kotoigi foe Gado Kownoekondre na a heri grontapoe, de wan tranga boeweisi taki wi de troetroe krosibei foe a kaba foe na ogri-ati seti foe sani disi èn taki troe fri de krosibei. Foe den wan di e fisiti sma nanga a boskopoe di e gi sma a howpoe foe a njoen grontapoe foe Gado den e taki, na Tori foe den Apostel 15:14, leki „wan pipel gi [Gado] nen.” Soema e tjari Jehovah nen èn e gi kotoigi foe Jehovah nanga en Kownoekondre na a heri grontapoe? A historia raport foe a di foe twenti jarihondro e piki: soso Jehovah Kotoigi. Ini a ten disi a nomroe foe den de moro leki fo miljoen ini moro leki 66.000 gemeente na a heri grontapoe. — Jesaja 43:10-12; Tori foe den Apostel 2:21.
15. Fa wi kan kon sabi Gado troe foetoeboi ini a tori foe politiek afersi?
15 Wan tra boeweisi taki Jehovah Kotoigi e meki den profeititori foe a Kownoekondre preikiwroko kon troe, ben skrifi na Jesaja 2:4: „Den sa smeti den feti-owroe tron proegoe èn den lansri tron kron-nefi. Nâsi no sa opo den feti-owroe kontrari nâsi, so srefi den no sa leri orlokoe moro.” So boen, den sma di e doe a preikiwroko foe a tiri foe Gado Kownoekondre na a heri grontapoe no moesoe ’leri orlokoe moro.’ Jesus ben taki, den no moesoe de „wan pisi moro foe grontapoe” (Johanes 17:16). Disi wani taki, den moesoe de neutraal ini politiek afersi, san wani taki den no moesoe teki prati ini no wan kesekese èn orlokoe foe den nâsi. Soema no de wan pisi foe grontapoe èn no e leri orlokoe moro? A historia raport foe na di foe twenti jarihondro e boeweisi agen: soso Jehovah Kotoigi.
16. O finifini a leriwroko foe Gado sa de, di e doe na a heri grontapoe?
16 A leriwroko foe Jehovah Kotoigi na a heri grontapoe, sa go doro srefi baka di Gado tjari a disi ten ogri-ati grontapoe kon na en kaba. Jesaja 54:13 e taki: „Ala joe manpikin sa de sma di e kisi leri foe Jehovah.” A leri disi sa de so finifini, taki Jesaja 11:9 e taki na fesi: „Grontapoe sa foeroe troetroe nanga a sabi foe Jehovah neleki fa den watra e tapoe a se srefi.” Wan doronomo leri sa de fanowdoe, no wawan gi den sma di pasa a kaba foe a grontapoe disi libilibi, èn gi pikin di sa gebore kande ini a njoen grontapoe, ma so srefi gi den miljardmiljard sma di sa kon baka na libi ini a opobaka. Te foe kaba ibri sma di e libi na grontapoe sa kisi leri foe oefen a friwani foe en na wan joistifasi na ini den skotoe foe a wet foe Gado. A bakapisi? „Den safoe-atiwan foe sa abi grontapoe èn den sa abi prisiri troetroe ini vrede di o de pasa marki”. — Psalm 37:11.
Bigi fri srefi nownow kaba
17. San Moses ben taigi Gado pipel foe owroeten foe doe?
17 Di den Israèlsma foe owroeten ben de na a dromofo foe go ini a Pramisi Kondre, Moses ben taigi den: „Mi ben leri oenoe den komando nanga den reti bosroiti, joisti so leki Jehovah, mi Gado, ben taigi mi, so taki joe e doe na a fasi dati na mindri a kondre pe joe e go foe teki en abra. Èn joe moesoe ondrow den èn doe den bika disi na koni èn froestan foe joe sei na fesi den ai foe den nâsi di sa jere foe ala den komando disi, èn den sa taki troetroe: ’A bigi nâsi disi sondro foe tweifri na wan pipel di abi koni èn froestan foe sani’. Bika sortoe bigi nâsi de di abi gado di de so krosibei foe en leki fa Jehovah, wi Gado, de so meni tron di wi e kari en?” — Deuteronomium 4:5-7.
18. Sortoe bigi fri de now gi den wan di e dini Gado?
18 Ini a ten disi den miljoenmiljoen sma di e anbegi Jehovah de toe na a dromofo foe go ini a pramisi kondre — a njoen grontapoe. Foe di den e gi jesi na den wet foe Gado, a de krosibei foe den èn den de aparti foe ala tra pipel. Gado fri den kaba foe idea foe falsi relisi, prakseri taki a wan ras hei moro a trawan, gebroiki foe takroe tabaka, a lobi di sma lobi den eigi nâsi, orlokoe èn na krawasi foe siki di e panja nanga jepi foe seks. Moro fara a tai den kon na wán ini wan internationaal bradafasi foe lobi di no man broko (Johanes 13:35). Den no e broko den ede nanga a ten di o kon, ma den e „bari nanga prisiri foe a boen kondisi foe na ati foe den” (Jesaja 65:14). Fa den e njanboen foe bigi fri srefi nownow kaba foe di den e dini Gado leki Tiriman! — Tori foe den Apostel 5:29, 32; 2 Korentesma 4:7; 1 Johanes 5:3.
Fri trawan foe falsi bribi
19, 20. Fa sma kon fri nanga jepi foe bijbelleri di e taki foe a kondisi foe den dedewan?
19 Foeroe sma gi soema Jehovah Kotoigi e preiki, e kon kisi den fri disi toe. Foe eksempel, ini kondre pe den e anbegi den afo foe den, Jehovah Kotoigi e meki trawan kon sabi taki den dedewan no de na libi a no wan presi èn den no kan doe ogri na den wan di de a libi. Den Kotoigi e sori go na Preikiman 9:5 pe tanapoe taki „den wan di de a libi sabi taki den o dede; ma foe a sei foe den dedewan, den no sabi notinoti.” Den e sori go toe na Psalm 146:4, pe skrifi taki te wan sma e dede, „a e go baka na en gron; foe troe, na srefi dei dati ala en prakseri e lasi gowe.” So boen bijbel e sori taki no wan spoekoe jeje noso wan sili di no man dede de foe doe wroko foe dresi sma noso foe frede den wan di de a libi. A no de fanowdoe foe dati ede foe trowe joe moni, di joe wroko tranga foe en, foe pai obiaman noso bonoeman.
20 So wan soifri sabi foe bijbel e fri sma foe den falsi leri foe hèlfaja nanga vagevuur. Te sma e leri foe bijbel, taki den dedewan no sabi noti, neleki te den de na ini wan dipi sribi, den no e broko den ede moro nanga san pasa nanga den lobiwan foe den di dede. Na presi foe dati den e loekoe go na a toemoesi moi ten di na apostel Paulus ben taki foe en: „Wan opobaka sa de gi den regtfardikiwan, so boen leki den onregtfardikiwan.” — Tori foe den Apostel 24:15.
21. Soema sa de sondro degedege a mindri den wan di opobaka èn san kande sa de a fasi fa den o doe na tapoe dati?
21 Na a opobaka den dedewan sa kon na libi baka na wan grontapoe di sa kon fri foe têgo foe dede di wi kisi foe Adam. Degedege no de taki a mindri den wan di sa opo baka foe dede den pikin sa de toe di den ben òfer na den gado foe Kanan, so leki Molèk, den jonkoewan di den ben òfer na den Asteka gado èn miljoenmiljoen sma di no de foe teri di den ben òfer na a gado foe orlokoe. Fa den fosi srafoe foe falsi anbegi sa de nanga froewondroe èn nanga prisiri! Den sortoe sma disi di opobaka sa man taki nanga prisiri: „Pe joe maka de, o Dede? Pe joe krakti foe pori sani de, o Sjeool?” — Hosea 13:14.
Soekoe Jehovah
22. Efoe wi wani foe libi ini Gado njoen grontapoe, dan san wi moesoe hori na prakseri?
22 Joe wani foe libi na ini Gado regtfardiki njoen grontapoe, pe troe fri sa de? Efoe dati de so, dan doe san den wortoe na 2 Kroniki 15:2 e taki: „Jehovah de nanga joe so langa joe e sori taki joe de nanga en; èn efoe joe e soekoe en, a sa meki joe feni en, ma efoe joe e gowe libi en, a sa gowe libi joe.” Èn hori na prakseri taki den opregti moeiti foe joe foe leri foe Gado èn foe plisi en, no sa de sondro foe a si dati. Hebrewsma 11:6 e taki, dati Gado na „a sma di e pai den wan di troetroe e soekoe en.” Romesma 10:11, 13 e taki, dati „no wan sma di e poti bribi na en, a sa meki den froewakti foe en no kon troe.”
23. Foe san ede wi moesoe bari Gado njoen grontapoe wan switikon?
23 Gado njoen grontapoe foe troe fri de krosibei. Drape „na mekisani srefi sa meki kon fri foe a katibo foe pori èn sa abi na glori fri foe den pikin foe Gado.” Èn „[Gado] sa figi ala watra ai poeroe na den ai èn dede no sa de moro, no wan sari, noso no wan skin-ati no sa de moro” (Romesma 8:21; Openbaring 21:4). Dan ala den foetoeboi foe Jehovah sa man foe opo den ede èn nanga prisiri o bari Gado en njoen grontapoe foe fri wan switikon foe di den o bari taki: „Grantangi foe joe o Jehovah, foe di te foe kaba wi abi troe fri!
Fa joe ben sa piki?
◻ Fa Jehovah ben sori taki a man foe fri en pipel?
◻ Sortoe toemoesi aparti fri sa de ini Gado njoen grontapoe?
◻ Fa Jehovah e gi leri foe sma kisi libi?
◻ San na wan toe foe den fri di Gado pipel e njanboen foe den nownow foe di den e dini Jehovah?
[Prenki na tapoe bladzijde 10]
Jehovah ben sori en makti abra den falsi gado foe Egipti, di a ben fri den anbegiman foe en
[Prenki na tapoe bladzijde 12, 13]
Ini a ten disi, sma kan kon sabi Gado troe foetoeboi, foe di den e doe a leriwroko na a heri grontapoe èn foe di den e tjari en nen