Pe na waarheid de di kan meki wi kon fri?
„Jezus taki moro fara . . . ’Oenoe sa sabi na waarheid èn na waarheid sa meki oenoe kon fri.’” — JOH. 8:31, 32.
1. San de wantoe foe den sani foe san sma wani kon fri foe san sma e winsi foe kisi ini a grontapoe disi?
FRI! A wortoe dati e kari hondro hondro jari kaba tranga firi kon na ini na memre nanga na froestan foe libisma! Feti ben feti gi na afersi foe fri. Miljoenmiljoen sma ben feti foe dati. Foeroe sma ben prakseri na a srefi fasi foe en leki na Amerkan tiriman Patrick Henry moro leki toe hondro jari psa kaba ben taki: „Gi mi fri ofoe gi mi dede.” Na ini a ten foe na di foe toe Grontapoefeti na Amerkan president Franklin D. Roosevelt ben aksi foe den „fo fri”: fri foe taki, fri foe anbegi, fri foe mankeri foe sani èn fri foe frede, foe moe kon.
2, 3. San troe fri wani taki moro ete?
2 Tog moro de fanowdoe gi troetroe fri te wi loekoe en moro dipi. Den fri disi kan gi wi foe eksempre fri foe libisma onvolmaaktifasi? Den kan gi oen fri foe siki? Èn disi e kon ete awansi sortoe gesontoe wan sma abi, a e kon tenapoe na fesi na troe tori dati froekoe ofoe lati, a e kon owroe èn e dede. Foe san wan sma kan njanboen foe en na ini na grebi? Na bijbel e piki: „Foe na sé foe den dedewan den no sabi noti kwetkweti.” Foe dat’ede meki a bijbel e taki toe: „Wan libi dagoe moro boen leki wan dede lew.” — Pred. 9:4, 5.
3 Te wi wani de fri dorodoro leki fa na wortoe e taki, dan wi moe kon fri foe na katibo foe onvolmaaktifasi, siki nanga dede. Ija, na a srefi ten wi moe kon fri foe pina, kwinsi, kiri nanga feti — ogri sani pe na historia foeroe nanga den. Ma soema kan gi wi den sortoe fri disi? Wan datra de di kan gi wi na djaranti foe kon betre foe kanker, ati siki nanga ala tra siki? Wan sabiman de toe di kan meki dati wi no kan owroe èn e dede ofoe di kan meki wi kon baka na libi baka te wi dede? Wan politiek tiriman de di kan gi na djaranti foe vréde na grontapoe èn kan gi na djaranti dati noiti moro feti sa de? Wan districtkommissaris de ofoe wan hé politiek man de na ini sortoe foto foe na grontapoe toe di kan tjari fri kon foe kiri? Sortoe ekonomia sistema kan meki dati den libisma kon fri dorodoro foe pina, a no abi di sma no e abi wroko, ofoe a kon diri foe sani, èn dati ibriwan sma sa kan prisiri ensrefi foe alaten na ini troetroe tan-boen?
4. Na tapoe san troe fri moesoe abi en fundamenti?
4 Efoe howpoe moe de dati den foeroe takroe toestand di e wasi abra libisma, kan wai poeroe, dan na piki moe de na tapoe na fundamenti foe waarheid. Troetroe fri no kan de na tapoe na fundamenti foe kori ofoe lé. Efoe wan sma foe dat’ede — ofoe a de now wan grontapoe tiriman ofoe wan natuurgeleerde, wan ekonoom, wan kerki-fesiman toe — e ferteri san en prakseri foe na sani di sa meki den fri di sma sa wani abi sote kon, dan na aksi moe aksi: A e taki na waarheid? Èn na libisma lo ben kisi wan boen langa ten kaba foe si ofoe den prakseri, pramisi foe libisma ben kroederi nanga na waarheid.
Ferwakti di no abi waarheid leki fundementi
5. O fara na howpoe tapoe fri foe siki ben kon troe?
5 Wantoe tintin jari psa kaba dan foeroe sma foe eksempre ben prakseri dati na go na fesi tapoe na gebied foe datrawroko ben sa meki dati a libismalo ben sa kon fri foe siki. Ma den foe-roe go-na-fesi di ben kon na tapoe na kontren foe datrawroko, ben meki fri foe siki kon? Nono, bika krawasi soleki kanker nanga atisiki ben kon de leki wan pestsiki. Na so toe wan dé sma ben denki dati siki na a sjenpresi den ben sa wini nanga jepi foe njoen wondroe dresi. Tokoe na respeki Ingrisi datra tijdschrift The Lancet: „Na Grontapoe gesontoeorganisaatsi e kon na a bosroiti dati ala jari na ini na heri grontapoe sowan 250 miljoen njoen geval foe gonorrhoe nanga 50 miljoen njoen geval foe syfilis e kon. Tra siki di e kon foe seksueel kontakti kande e kon srefi moro algemeen ete.” — Teki gersi Odo 7:10, 21-23.
6. Foe san-ede wi kan taki dati na wetenscahp nanga na industrie no ben meki na ferwakti foe sma kon troe?
6 San kan taki boiti dati foe den bigi froewakti di na wetenschap nanga na industrie ben meki kon sowan toe hondro jari psa kaba? Foe kari wan eksempre soso: Oto del ben si leki wan bigi stap go na fesi, èn na son fasi disi den ben de so ook toe. Ma oto ben meki dati foto ben kon stek nanga verkeersopstopping, babari nanga doti (otosmoko). Na a heri grontapoe ibri jari moro leki toe hondro doesoen sma e dede leki wan bakapisi foe oto ongolokoe, ala di miljoenmiljoen sma e kisi menkeri. Den bakapisi di no switi foe na technologie Orville Wright, wan foe den uitvinder foe opolani ben si. Ini na di foe toe Grontapoefeti a ben skrifi gi Henry Ford: „Wilbur nanga mi ben prakseri dati opolangi ben sa meki grontapoe-vréde kon. Te nanga now a gersi soso dati a ben de na tra sé di ben kon. Mi e prakseri dati di wi ben tjari na systema kon foe massaproduktie — wan foe den moro bigi uitvinding foe ala ten — joe no ben sa prakseri srefsrefi . . . a ben sa gebroiki na a bow foe tanks foe grontapoe pori. A gersi leki no wan boen sani kan tjari kon sondro dati wan sma o gebroiki en na wan takroe fasi.”
7. Joe abi na ini na grontapoe disi economia sistema di kan tjari tanboen gi ala sma?
7 Na ini ala den hondrohondro jari pe sma ben proberi difrenti sortoe economia, wan systema ben kon di de stabiel èn e tjari tanboen di e tan gi ala sma? Nono, bika economia instabiliteit de nownow na tapoe talment. Jack Weldon, wan héleriman ini na economia na Montreal Mc Gill Universiteit ben ferklari ini a tori disi: „Ibri bevoegtoe nanga opregti econoom sa piki dati wi no sabi troetroe san wi moe doe nanga den bigi problema di a moro bigi ipi foe den geïndustrialiseerde kondre abi now foe doe nanga den.” Na situwasi na ini den moro mendri ontwikkelde naatsi de srefi moro ogri. Ini wán foe den sortoe kondre dati, na so na tijdschrift Time e ferteri „joe abi moro leki toe miljoen pikin di den póti papa nanga mama gwe libi den èn ete tina-fo miljoen di e libi ini sowan pina, dati pikinmoro a ben sa moro boen foe besroiti foe libi den abra ooktoe na den lot”. Ini wan tra pini foe na grontapoe na Philippine Daily Express e ferteri: „Pikinmoro wan afoe miljard [500 miljoen] sma foe Asia den e teri na ondro na categorie foe ’troetroe pinaman’, èn na nomroe foe den leki fa den e schat sa kon moro bigi ete.”
8. O fara na democratie ben tjari persoonlek veiligheid gi borgroe?
8 Na ini na Fosi Grontapoefeti den ben taki dati na feti ben feti ’foe meki na grontapoe kon boen gi demokratie’. Now pikinso kondre nomo de wan democratie. Èn o veilig den borgroe na ini den kondre dati de, pe democratie leki fa den e taki de? Na ini den Verenigde Staten (Amerkankondre) dan wan foe den dri osofamiri de wan sma di wan ofoe tra ogri e kisi den. Grankroetoeman Warren Burger foe na Amerkan hékroetoe ben ferklari: „Wi e go na wan toestand foe wan maatschappij di no abi makti. Wan maatschappij pe na makti foe hori den elementaire sékerfasi na ini den strati, na ini den skoro èn na ini den oso foe wi sma, de na degedege”. A taki moro fara: „Ini den tin jari di psa, dan foeroe foe den nationaal tiriman, èn sosrefi toe den tiriman foe tra kondre, ben taki foe internationaal terrorisme. Ma na ongolokoe cijfer leki wan bakapisi foe aladé terrorisme di e kon alaten baka na ini bijna ibri bigi foto foe Verenigde Staten psa na nomroe foe dedesma nanga sma di kisi mankeri leki wan bakapisi foe den doe foe ala „internationaal terrorist” di den sma sabi ini ibri willekeurig jari. — Teki gersi Prekiman 8:11.
9. San psa na ini na jarhondro disi na ini na tori foe a taki na fesi dati wan kaba ben sa kon na feti?
9 Na Fosi Grontapoefeti den ben taki foe en toe leki „na feti di sa meki ala feti stop”. Na Encyclopedie Americana ben taki: „Dati na ten foe na feti, politiekman nanga skrifiman ben taki foe na reti foe folkoe foe den ogridé di ben sa kon, te feti, na kisi foe moro fetisani èn stré na mindri naatsi no ben sa de moro. Ma na waarheid ben de precies na tra sé foe na tori. Na ini wan Zuid-afrikan boekoe Natal Mercury, no langa psa kaba den ben taki: „President Woodrow Wilson ben taki foe na Fosi Grontapoefeti leki ’na feti di sa meki ala tra feti kon na wan kaba’. En taki na fesi foe sani di boo kon ben sa de moro soifri efoe na feti disi ben kari ’na feti di meki vréde kon na wan kaba.’ Moro fara na artikel ben taki: „Sensi 1914 na grontapoe kande séker ben si moro ogridoe nanga djoegoedjoegoe leki oiti wan ten sensi na ten dati historia e skrifi poti na boekoe.” Na kostoe foe sroedati na heri grontapoe de now moro leki 500 miljard dala ini wan jari. Now den naatsi abi nofo kernfet’sani foe wai poeroe moro leki wan miljoen bigi foto foe na grontapoe, foeroe moro foto leki de now.
10. San de na waarheid foe na go-na-fesi foe difrenti kontren foe libisma moeiti?
10 Nono, na waarheid de dati awinsi sortoe go-na-fesi kan de na tapoe ala sortoe kontren, na libismalo no ben kon fri nanga dati foe gridifasi, skin-ati, pina, kiri, feti, frede, siki nanga dede. Den sani di taki, pramisi nanga prakseri foe den tiriman foe disi grontapoe foe dat”ede e kon na krin dati den no abi den fundamenn na ini waarheid, soleki den bewijsi ben sori na ini den hondrohondro jari di psa. A de precies soleki na bijbel e taki, na ini 2 Petr. 2:19: „Aladi den e pramisi den fri, den de densrefi srafoe foe pori.”
Tesi na kerki „waarheid”
11. Fa wi kan tesi den wortoe foe kerki sistema, dati den leri foe den de na waarheid?
11 Wi no moe kon fri wawan foe den sari toestand di de so algemeen, ma wi moe kon fri toe foe katibo foe na froestan di de a bakapisi foe falsi kerki leri. Tokoe den kerki foe na kristenheid nanga foe na tra pisi foe na grontapoe disi e taki dati na leri foe den de na waarheid. Na sani disi makriki joe kan taki, ma san den troe tori e sori? Hori na ini prakseri dati na Wortoe foe Gado e taki: „Bribi sondro wroko dede” (Jak. 2:26). Boiti dati Jezus ben ferklari: „Loekoe boen nanga den falsi proféti, di na ini skapoe-boeba e kon na oenoe, ma na inisé den de krasi wolfoe. Na den froktoe joe sa sabi den.” Ija, kerki sistema joe kan kon sabi leki troe ofoe falsi no wawan nanga san den e taki, ma ook toe nanga san di den e tjari kon. Ini a tori foe de falsi sistema Jezus ben warskow: „Ibri bon di no e meki toemsi boen froktoe e koti trowe èn iti go na ini faja.” — Matt. 7:15-20.
12. San na toestand foe den kerki na ini disi grontapoe e tjari kon na krin?
12 Efoe wan kerki e taki dati a abi na waarheid, dan na froktoe di séker a sa meki sa de wan krakti foe bondroe sani kon na wan gi den sma di e waka na en baka. Jezus ben taki dati den sma di abi na waarheid „ben moe de alamala wán” (Joh. 17:21). A Wortoe foe Gado e taki foe dat’ede: ’Oen alamala moe taki na ini akroederi nanga makandra.’ ’Pratifasi no moe de na oen mindri.’ ’De wan nanga makandra na ini na srefi geest èn na ini na srefi fasi foe denki’ (1 Kor. 1:10). Pisi moe de so na ini na geval foe den sma di troetroe e teki presi foe Gado, bika „Gado no de wan Gado foe broeja, ma foe vréde” (1 Kor. 14:33). Tog den kerki foe na grontapoe disi prati na ini doesoendoesoen sekte nanga culte, nanga leri èn doe di de kontrari makandra èn di no de wawan na ini den difrenti kerki, ma nofotron na inisé foe na srefi kerki. So wan sortoe broeja nanga dwaling Gado no sa meki kon. Na ini Leaders’ Vision, wan kerki koranti ini Australië, den e piki: ’Foe libi na ini wan toestand foe pratifasi, wani taki dati wan sma de ini wan toestand foe bijbel sondoe. Wi di e bow na sani di sma kan si èn di e sori dati den no de na wroko foe na santa jeje.’
13. (a) San na pratifasi foe den falsi kerki ben tjari kon? (b) Pe den falsi kerki bigin foe da’ede?
13 Wan tra bewijsi de dati den sortoe kerki disi no kan abi na waarheid èn dati den no kan komoto foe Gado, wi e kisi foe den bakapisi foe a pratifasi foe den. Efoe wan kerki e leri a waarheid, dan séker ai de gi den memre foe en wan elementair marki dati a moro mendri sani de dati den no kiri makandra. Sortoe waarheid, sortoe bradafasi dati ben kan de dan? Tog na historia e sori dati libisma di na ini na grontapoe disi de foe na srefi kerki, ben srakti makandra na ini ten foe feti geregeld, nanga miljoenmiljoen sma makandra, èn dati soso foe di den ben e libi na ini difrenti kondre. Na ini borgroe-feti ofoe revo, dan sma foe na srefi bribi e srakti makandra foeroetron na ini na srefi kontren. Na ini 1 Johannes 3:10-12 a bijbel e taki dati „den pikin foe Didibri” e kiri den ’brada’. (Teki gersi Genesis 4:8.) Den pikin foe Gado no e doe disi. Ma na presi foe dati den e sori wan lobi gi makandra di no kan broko. Jezus ben taki krin : „Nanga dati ala sma sa sabi dati oen de mi discipel, efoe oen lobi makandra.” — Joh. 13:35.
14. San de na waarheid foe den grontapoe kerki leki fa na regel foe Jezus taki namkoe „na den froktoe joe sa sabi den sma”?
14 Nanga den takroe froktoe, den pratifasi, den feti, sosrefi toe na hoeroedoe nanga hoigrifasi di de psa marki èn di de so algemeen na ini den kerki foe grontapoe, dan den e so ri dati den de organisaatsi di no abi na waarheid, den no e teki na presi foe Gado. Den de troetroe takroe bon di e meki takroe froktoe èn di de na a punt foe „koti trowe èn iti go na ini faja”.
Poti fertrow na ini na Gado foe waarheid
15. Na ini soema wi moe poti wi fertrow dorodoro èn foe san-ede?
15 Na makti di libisma no abi foe tjari fri kon na tapoe den prenspari kontren foe na libi, e poti krakti tapoe san na bijbel e taki ini Jeremia 10:23: „A no de na wan libisma foe grontapoe . . . foe sabi san en pasi moe de. A no de na wan man di e waka foe poti srefi en foetoe na pasi.” Nono, Gado no ben meki libisma nanga na makti nanga na grani foe no anga na en tiri èn tog ete abi winimarki. Wan réde foe san Gado ben gi pasi someni doesoedoesoen jari, dati libisma ben tiri sondro foe anga na en, na foe den sori foe ala ten dati sowan sortoe tiri no kan tjari troetroe fri nanga troetroe kolokoe kon. Foe dat’ede meki Psalm 146:2 e gi na koni rai: „No poti joe fertrow na ini gransoema, no na tapoe na manpikin foe libisma na grontapoe, di no abi jepi.” Na ini soema wi kan poti fertrow dan? Na bijbel e piki: „Fertrow na Jehovah nanga joe heri ati èn no anga na joe égi ferstan. Poti prakseri na tapoe en na ini ala joe pasi èn en sa meki joe pasi reti.” — Odo 3:5, 6.
16. Sortoe fertrow wi kan poti ini Jehovah?
16 Foe san-ede wi kan poti sowan fertrow na ini Jehovah dorodoro? Foe di Jehovah, soleki na ini Psalm 33:14 tanapoe, „de na Gado foe na waarheid”. Efoe wi wani sabi troetroe na waarheid foe ala prenspari afersi, èn wani abi piki na tapoe aksi di grontapoe tiriman no kan gi na piki, dan wi moe go na Gado, bika en abi ala piki. Foe di „Gado no kan lé noiti”, meki dati san a taki kan psa. „Jehovah foe den Tiriman ben sweri, taki: ’Foe troe, joisti soleki mi ben prakseri, joisti so a sa psa, èn joisti soleki mi ben denki, dati sa kon.’” — Hebr. 6:18; Jes. 14:24.
17. Fa Jehovah sorgoe foe wan fonten foe waarheid gi sma di e soekoe opregti na waarheid?
17 A ben de séker wan sani foe ferwakti dati Gado ben sa meki en waarheid bekenti na opregti sma, di e soekoe waarheid bika na ini Johannes 8:32 Jezus ben taki: „Oenoe sa sabi na waarheid èn na waarheid sa meki oenoe kon fri.” Di a ben begi na Gado a ben taki toe: „Joe Wortoe de na waarheid” (Joh. 17:17). Pe a „wortoe” foe Gado, en waarheid e tjari kon na krin? Na apostel Paulus e piki: „Ala den boekoe Gado ben meki den skrifi na ondro krakti foe en santa jeje” (2 Tim. 3:16). Na almakti Mekiman foe na universum abi na reti foe dat’ede foe de na skrifiman foe na bijbel. Nanga jepi foe en makti wroko krakti, ofoe santa jeje, a ben bewégi getrow man foe skrifi en prakseri. Te wi e lési den boekoe soboen, a de leki Gado e taki nanga wi. — 1 Thes. 2:13; 2 Petr. 1:20, 21.
18. Foe san-ede a de wan onredelek sani foe denki dati Gado no de na skrifiman foe na bijbel?
18 Son sma e taki dati Gado no de a skrifiman foe na bijbel. Tog sma kan skrifi boekoe, èn Gado ben meki libisma. Na Mekiman foe libisma, di de sondro kaba, moro hé leki libisma, no ben sa man foe doe san libisma di de moro lagi leki en man foe doe? Koniman e seni nanga jepi foe elektronis apparatuur komando go na sateliet na ini loktoe foe tiri den na ini wan pasi di den moe waka. Wan radio-omroeper e taki ini wan microfoon èn den boskopoe joe kan jere doesoendoesoen kilometer moro fara. Srefi komoto foe na moenkenki televisie prenki foe sani di psa ben tjari go abra na joe oso. Ma Jehovah ben meki na jesi, na ai, elektriciteit nanga babari. A no ben sa man dan, nanga jepi foe en „dynamis krakti” ferteri en prakseri na en getrow dienstknegti na grontapoe? Na Mekiman foe na moi universum séker ben kan meki wan boekoe. — Jes. 40:26.
19. Foe san-ede meki Gado meki den skrifi a bijbel so, dati son sani de moeilek foe ferstan?
19 ’Ma’, tra sma e taki, ’na bijbel de moeilek foe froestan.’ Ija, son pisi wel (2 Petr. 3:16). Foe san-ede Gado ben meki den skrifi na bijbel na a fasi dati? Foe di en e bepaal dan soema sa kisi na waarheid. Na apostel Paulus ben taki foe den waarheid foe Gado: „Mi ben prani, Appollos ben nati, ma Gado ben meki a gro” (1 Kor. 3:6). Paulus ben ferklari toe foe a koni foe Gado èn a santa kibritori: „Gi wi Gado ben tjari en kon na krin nanga jepi foe en jeje” (1 Kor. 2:10). Gado e hori gi ensrefi na sofasi na reti foe tjari en waarheid kon na krin gi den sma di abi troetroe belangstelling èn di de klari foe libi akroederi nanga en foe dini Gado getrow: „Na Masra Jehovah no sa doe noti efoe a no ben tjari en fertrow afersi kon na krin gi en knegti.” — Amos 3:7; Dan. 2:28, 47.
20. Pe na waarheid de di kan meki wi fri?
20 Ija, wan Gado foe waarheid de. Wi e feni en waarheid na ini en Wortoe di skrifi na ondro santa jeje na bijbel. A de gi en sakafasi dienstknegti di de na ini wánfasi nanga makandra wan froestan foe den Santa Boekoe. We, sortoe toemsi prenspari waarheid di de na ini en Wortoe, Gado e tjari spesroetoe kon na krin ini wi ten gi sma di e soekoe na waarheid? Na tra artikel sa ondrosoekoe wantoe foe den.
Joe kan memre den punt di e kon now?
□ Sortoe fri libisma abi troetroe fanowdoe?
□ Fa den ferwakti foe na grontapoe disi no meki na howpoe foe sma kon troe? Foe san-ede?
□ Fa wi kan si na difrenti na mindri na troe bribi èn na falsi bribi?
□ Sortoe réde de foe poti fertrow dorodoro na ini Jehovah?
□ Jehovah e tjari en waarheid kon na krin gi soema?
[Prenki na tapoe bladzijde 3]
Na libisma-lo abi tranga fanowdoe foe kon fri foe foeroe sari toestand
[Prenki na tapoe bladzijde 6]
Jezus ben warskow foe falsi religie taki: „Ibri bon di no e meki boen froktoe sa koti trowe èn iti go na ini faja”