1914 — A jari di ben seki grontapoe

„A Bigi Orlokoe foe 1914-1918 e didon leki pisi kondre di bron, èn di e prati a ten dati foe wi ten. Di a feti ben figi someni libi poeroe . . . , ben pori someni bribi, ben kenki idea èn ben libi soro di sma no man dresi moro foe di prakseri no kon troe, a ben meki wan dipi olo kon na skin fasi èn na psychologis fasi na mindri toe pisi ten.” — Foe Na toren di bigi srefisrefi — Wan prenki foe grontapoe bifo a Feti foe 1890-1914, di Barbara Tuchman skrifi.

„A de pikinmoro — ma no dorodoro ete — wan pisi foe historia, foe di foeroe doesoendoesoen sma di ben jongoe na a bigin foe a prenspari di foe twenti jarihondro disi de a libi ete.” — Foe a boekoe 1914, di Lyn MacDonald ben tjari kon a doro na ini 1987.

FOE san ede wi moesoe abi belangstelling gi a jari 1914? ’Na a dei foe tamara di mi e broko mi ede nanga en’, joe sa taki kande, ’no a ten di pasa’. Nanga problema so leki a doti di den e doti a heri grontapoe, a fadon panja foe na osofamiri libi, a kon moro foeroe foe ogridoe, a siki di sma siki na den ede, èn a feni di sma no man feni wroko, dan a tamara foe libisma kan loekoe takroe. Ma, foeroe sma di ben ondrosoekoe a prenspari fasi foe 1914, ben feni wan fondamenti foe howpoe gi wan moro boen tamara.

Tintin jari langa Na Waktitoren froeklari taki ini 1914 libisma famiri ben ondrofeni san den e kari „a bigin foe pen foe banawtoe”. Den wortoe dati na wan pisi foe Jesus Krestes en bigi profeititori di ben abi foe doe nanga sani di ben o pasa bifo a kaba foe na ogri seti foe sani foe libisma. — Mateus 24:7, 8.

Ini a ten disi, wan pikin pisi foe a libisma famiri kan memre ete den sani di ben pasa na ini 1914 èn di ben de wan rampoe. Na owroe geslakti dati sa pasa gowe bifo Gado e kibri grontapoe foe no go pori? No so leki fa bijbel profeititori e taki. „Te oenoe e si ala den sani disi”, Jesus ben pramisi, „sabi dan taki a de na a dromofo. Foe troe mi e taigi oenoe, taki a geslakti disi no sa pasa gowe kwetikweti te leki ala den sani disi pasa”. — Mateus 24:33, 34.

Foe man froestan foe san ede a jari 1914 wani taki so wan prenspari sani ini historia, dan prakseri fa a situwâsi ben de na grontapoe te na a mindribere foe 1914. Bifo a ten dati, kownoe so leki Tsar Nikolas foe Rosiakondre, Keisri Willem foe Doisrikondre nanga Keisri Frans Josef foe Oostenrijk-Hongaria ben abi bigi makti. Ibriwan foe den man disi ben kan tjari moro leki fo miljoen fetiman kon na wán èn seni den go na feti. Ma den afo foe den ben teken, san den ben kari a Santa Froebontoe, di ben taki, dati Gado ben poti den man disi foe tiri tapoe difrenti pisi foe wan bigi „kresten nâsi”.

So leki fa The Encyclopædia Britannica e taki, dan a boeweisi disi na tapoe papira „ben abi bigi krakti tapoe a politiek fasi foe handri na ini Europa ini a di foe tinaneigi jarihondro”. Den ben gebroiki a boeweisi na tapoe papira, foe gens den demokrasia groepoe èn foe horibaka gi a sokari reti foe tiri di kownoe kisi foe Gado. „Wi kresten kownoe”, na so Keisri Willem ben skrifi Tsar Nikolas, „abi wan santa wroko, di Hemel gi wi, dati wani taki foe hori a gronprakseri foe a reti foe tiri hei di den kownoe kisi foe Gado”. Disi ben wani taki, dati den kownoe foe Europa ben abi, na wan noso tra fasi, foe doe nanga a Kownoekondre foe Gado? (Teki gersi 1 Korentesma 4:8.) Èn san de foe taki foe den kerki di ben horibaka gi den kownoe dati? A libi di den ben libi leki wan kresten ben de opregti? A piki tapoe den aksi disi ben kon a krin ini den jari di ben kon wantewante baka 1914.

Onfroewakti, ini augustus

„A mofojari èn dreiten foe 1914 ben abi leki marki ini Europa wan aparti tirifasi”, na Ingrisi tiriman Winston Churchill ben skrifi. Sma ben si a tamara moro foeroe foe wan toemoesi boen sei. „Grontapoe foe 1914 ben foeroe nanga howpoe èn pramisi”, na so Louis Snyder ben taki ini en boekoe Grontapoe Feti I.

A troe, taki foeroe jari wan bigi strei ben de na mindri Doisrikondre èn Ingrisikondre. Ma tokoe, so leki historiaman G. P. Gooch e froeklari ini en boekoe Under Six Reigns (Na ondro siksi tiri): „A no ben gersi taki wan trobi ben o kon na ini Europa ini 1914, neleki fa disi no ben gersi ini 1911, 1912, 1913 . . . A matifasi a mindri den toe lanti ben de moro boen leki dati ben de jari langa kaba. So leki fa Winston Churchill, wan memre foe a kabinet foe Ingrisikondre ini 1914, ben taki: „A ben gersi taki Doisrikondre ben abi a srefi leki wi, dati na, abi na prakseri foe meki vrede kon.”

Ma, nanga a kiri, tapoe 28 juni 1914 na Sarajevo, foe a kownoepikin foe a Tiri foe Oostenrijk-Hongaria, di ben moesoe go tapoe kownoestoeroe, wan doengroe wolkoe ben kon de foe si. Wan moen a baka, Keisri Frans Josef ben froeklari Servia na orlokoe èn ben gi komando baka dati foe den legre foe en go fadon na tapoe a kownoekondre dati. Na a pisi ten dati, na a neti foe 3 augustus 1914, wan bigi Doisri legre ben fadon onfroewakti na tapoe a kownoekondre foe België èn ben feti te a ben doro Fransikondre, foe di Keisri Willem ben gi a komando foe disi. A dei a baka, Ingisikondre ben froeklari Doisrikondre na orlokoe. Èn ini a tori foe Tsar Nikolas, en ben gi a komando foe tjari a boen bigi Rosia legre kon na wán foe feti nanga Doisrikondre èn Oostenrijk-Hongaria. A Santa Froebontoe ben misi foe tapoe den kownoe foe Europa foe meki a pisi dati foe grontapoe go fadon na ini a kiri di den ben kiri makandra na ini wan ten. Ma den bigi sani di ben o seki sma ben moesoe kon ete.

Kaba na Kresneti ten?

A broko foe na orlokoe no ben tèmper a fasi fa sma ben si sani foe wan toemoesi boen sei. Foeroe sma ben bribi taki na orlokoe ben sa tjari wan moro betre grontapoe kon, èn bigi ipi sma ben kon makandra na ini heri Europa foe sori taki den ben horibaka gi na orlokoe. „No wan sma ini 1914”, na so A. J. P. Taylor ben skrifi ini en boekoe The Struggle for Mastery in Europe—1848-1918 (A feti foe kisi makti ini Europa — 1848-1918), „ben teki den kefar foe orlokoe serjoesoe boiti ini a tori foe sroedati afersi. . . . No wan sma ben froewakti wan sociaal rampoe”. Na presi foe dati, foeroe sma ben froeteri na fesi taki na orlokoe ben sa kaba na ini wan toe moen.

Ma tokoe, langa ten bifo den sma foe Europa ben man njan prisiri foe a kresneti foe den, foe 1914, dan wan situwâsi pe foeroe broedoe ben fadon èn pe sma no ben man komoto moro, ben kon foe si na sei wan lin foe gotro, di ben langa 700 km foe Switserland na zuidsei te na a sjoro foe België na noordsei. Den ben kari disi a Front foe Westsei, èn Doisri skrifiman Herbert Sulzbach ben taki foe en ini wan artikel na ini a deiboekoe foe en, di a ben skrifi na a lasti dei foe 1914. Na artikel e froeteri: „A ogri orlokoe disi e go doro nomonomo, èn te wan sma ben denki na a bigin taki a ben sa tapoe ini wan toe wiki, dan now no wan kaba de foe si.” Na a pisi ten dati, na ini tra pisi foe Europa, faja feti pe foeroe broedoe ben fadon ben de na mindri den legre foe Rosiakondre, Doisrikondre, Oostenrijk-Hongaria, èn Servia. A feti heri esi ben panja ensrefi dorosei foe Europa, èn feti ben feti na den se èn na Afrika, a Mindri-Owstoe, èn den eilanti foe a Zuid Se.

Fo jari a baka Europa ben pori. Doisrikondre, Rosiakondre èn Oostenrijk-Hongarije ibri wan foe den ben lasi na mindri wan èn toe miljoen sroedati. Rosiakondre ben lasi srefi a kownoekondre foe en ini a Bolsjewistis revo foe 1917. Fa disi ben de wan sani di ben seki den kownoe foe Europa èn den kerki fesiman foe den di ben hori baka gi den! Disi ten historiaman e sori te now ete taki disi e froewondroe den. Gordon Brook-Shepherd e aksi na ini en boekoe Royal Sunset (Sondongo foe den kownoe): „Fa a ben doe kon taki tiriman, di morofoeroe ben abi foe doe nanga makandra, foe di den ben de famiri noso foe di den ben trow nanga makandra èn alamala ben gi densrefi abra foe kibri a kownoewroko, ben gi densrefi pasi foe go kiri makandra, san ben meki taki wan lo foe den ben wai poeroe foe no de na libi moro èn ben libi ala den sma di ben tan a libi ala di den ben swaki?”

A Fransi Republiek ben lasi toe moro leki wan miljoen sroedati èn a Ingrisi Tiri, di a kownoekondre foe en ben kon swaki kaba langa bifo na orlokoe, ben lasi moro leki 900.000 sroedati. Ala nanga ala, moro leki 9 miljoen sroedati ben dede, èn wan tra 21 miljoen ben kisi mankeri. Ini a tori foe libi di ben lasi foe sma di no ben de sroedati, The World Book Encyclopedia e taki: „No wan sma sabi omeni borgroe dede foe siki ede, foe angri ede, èn foe tra reide ede di ben abi foe doe nanga na orlokoe. Son historiaman e bribi taki netso foeroe sroedati leki borgroe dede.” A Spanjoro agraboe foe 1918, di ben panja ensrefi na ala sei ben feni so wan 21.000.000 libi na a heri grontapoe.

Wan dorodoro kenki

Grontapoe noiti no ben de a srefi moro baka na Bigi Orlokoe, so leki fa den ben kari en na a ten dati. Foe di someni kerki foe a krestenhèit nanga faja ben abi prati na ini, meki foeroe sma di ben tan a libi èn di a froewakti foe den no ben kon troe, ben drai baka gi relisi foe go na atheïstbribi. Trawan ben drai go na a feti na baka den goedoe na skin fasi nanga a meki foe prisiri. So leki fa Professor Modris Eksteins ben skrifi ini en boekoe Rites of Spring, dan den jari 1920 „ben kotoigi foe wan heidenfasi foe libi èn a lobi di sma ben lobi densrefi na wan toemoesi aparti marki.”

„Na orlokoe”, professor Eksteins e froeklari, „ben tapoe moreel markitiki”. Relisi, sroedati nanga politiek tiriman, ben leri den man na ala toe sei, foe den si a kiri foe ipi-ipi sma leki wan boen sani na moreel sei. Disi, na so Eksteins e erken, „ben de soso a moro grofoe fasi foe tapoe wan moreel orde di ben taki dati a ben abi en roetoe ini na ethiek foe den djoe-kresten. „Na a Front foe Westsei”, a e taki moro fara, „motjo-oso ben de heri esi sani di ben de doronomo wan pisi foe den sroedati kampoe . . . Na oso-sei man nanga oema ben kon libi wan hoeroedoe fasi foe libi. Motjolibi ben kon moro foeroe na wan toemoesi aparti fasi”.

Ija, 1914 ben kenki foeroe. A no ben tjari wan moro boen grontapoe kon, èn na orlokoe no ben sori taki a de „na orlokoe di ben o kaba ala orlokoe”, so leki foeroe sma ben howpoe. Na presi foe dati so leki oema-historiaman Barbara Tuchman e skrifi: „Bigi prakseri èn faja kande te leki 1914, safrisafri ben soengoe na ini wan se foe bigi broeja.”

Ma den sani di ben pasa ini 1914, no ben froewondroe wan toe sma di ben de kotoigi foe a rampoe foe a jari dati. Foe taki en leti, dan bifo na orlokoe ben broko, dan den ben froewakti „wan ogri ten foe problema.” Soema ben de den sma disi? Èn san den ben sabi di tra sma no ben sabi?

[Faki na tapoe bladzijde 5]

Ingrisiman ben froewakti taki sani ben sa waka boen ini 1914

„Foe wan sani foe wan jarihondro no wan feanti ben sori ensrefi na den se lontoe na eilanti foe wi . . . A ben de moeilek srefi foe tjari na ini joe prakseri a man di wan sani ben man tjari den eilanti disi foe vrede kon na ini kefar. . . . Noiti Londen ben sori moro prisiri èn taki sani ben waka moro boen. Noiti someni sani ben de di ben de warti foe doe, èn foe si èn foe jere. No den owroewan, no den jongoewan ben man prakseri srefi taki den sani di den ben de kotoigi foe en, na ini a pisi ten dati foe 1914, di joe no man teki gersi nanga trawan, ben de, foe taki en leti, a kaba foe wan pisi ten.” — Before the Lamps Went Out (Bifo den lampoe ben dede), di Geoffrey Marcus skrifi.