De grantangi — Yehovah Mesiyas kownukondre e tiri

„Wi e taigi yu tangi, Yehovah Gado, na Almaktiwan, . . . fu di yu teki yu bigi makti èn bigin fu tiri leki kownu.” — OPENBARING 11:17.

1. San na presidenti fu na Wachttorengenootschap ben fruklari baka di a ben waka lontu na ini Europa ini 1911?

FRUKU ini 1911 na presidenti fu na Wachttoren Genootschap, C. T. Russell, ben hori wan lo beibrilezing na ini prenspari foto fu Europa. Ini wan kommentaar tapu na rèis dati Russell ben skrifi na sani disi na ini The Watchtower fu 15 mei 1911: „Wi ben fruwondru fu miti someni buweisi fu fa sani e waka bun na alasei . . . Wi leisiman sabi taki wantu yari kba wi e fruwakti taki na pisiten disi sa kon a wan kba ini wan tumusi ogri ten fu muilekheid, èn wi e fruwakti taki na ten disi sa kon wantronso èn nanga krakti no langa baka oktober 1914, san, fu so fara wi kan frustan den Buku, de na datum di den ten fu den heiden — na pisiten di den tirimakti fu grontapu gi ini anu fu den heiden — sa kon na wan kba; na ten, fu dati-ede te na kownukondre fu na Mesiyas sa bigin fu sori a makti fu en.” Na fruwakti disi ben kon tru?

2. Fa a vrede ben pori krinkrin ini 1914 èn nanga sortu sari bakapisi?

² Ini na fosi afu fu 1914 a ben gersi taki na grontapu ben de wan presi fu seikerfasi èn fri fu orloku. Ma na vrede wantronso ben pori di 28 yuni 1914 wan Serviaman ben kiri na erfgenaam fu a kownusturu fu Oostenrijk. Heri esi Oostenrijk-Hongaria ben fruklari orloku na Servia. Rusiakondre ben teki na sei fu Servia èn dati-ede Doisrikondre ben fruklari orloku na Rusia tapu 1 augustus. Dan Doisrikondre ben fruklari orloku na Fransikondre tapu 3 augustus; 4 augustus Ingrisikondre na Doisrikondre; 7 augustus Montenegro teige Oostenrijk-Hongaria. 23 augustus Yapan teige Doisrikondre; 28 augustus Oostenrijk-Hongaria teige België. Furu sma ben bribi taki na orloku ben sa psa heri esi. Ma na presi fu dati, a ben kon tron na moro ogri orloku fu na historiya te na a ten dati, pe ete 19 tra kondre ben teki wan sei ini wan internationaal trowe fu brudu di ben kostu na libi fu moro leki 13.000.000 srudati nanga borgru, aladi moro leki 21.000.000 libisma ben kon malengri èn ben kisi mankeri.

3, 4. San ben psa na a edekantoro fu na Genootschap freida mamanten 2 oktober 1914?

³ Freida mamanten 2 oktober 1914 Russell ben meki bekenti gi den konpewrokoman fu na edekantoro fu na Wachttorengenootschap na ini Brooklyn (New York): „Den ten fu den heiden kon na wan kba; den kownu fu den ben abi den dei.” Na famiri na Bethel, „na oso fu Gado” ben ontfanga disi nanga wan prisiri klop na ini anu.

⁴ Sortu bun reide C. T. Russell nanga den konpe fu en ben abi fu de so prisiri na a oktober mamanten dati? Pe den wortu „ten fu den heiden” komoto? Sortu buweisi de taki den ten fu den heiden ben kon na wan kba ini oktober 1914? Èn fa disi musu abi krakti na yu tapu?

Yerusalen èn den ten fu den heiden

5. Pe den wortu „ten fu den heiden” komoto?

⁵ Den wortu „ten fu den heiden”, ofu „fasti ten fu den nâsi”, kon fu na bigi profeititori fu Yeises di abi fu du nanga na pori fu Yerusalen (Lukas 21:5-36, Statenvertaling). Tu dei bifo Yeises ben taki na profeititori disi, a ben pristeri en srefi na den sma di ben libi na ini Yerusalen leki na Mesiyas fu den. Aladi a ben rèi na wan sakafasi na tapu wan buriki go na a sei fu na foto, dan ipi-ipi dyu ben bari na wan fiktori fasi, neleki fa Sakaria 9:9 ben taki a fesi. „Blesi na Sma de di e kon leki Kownu ini Yehovah nen!”, den ben bari tranga. — Lukas 19:28-40.

6, 7. Sortu kofarlek takru brudu paiman den fosi yarihondro Yudea sma ben tyari kon na den srefi tapu, èn nanga sortu bakapisi?

⁶ Ma Yeises ben sabi taki fu na bita-atifasi fu kiri en fu a sei fu den kerkitiriman di ben de ondro na krakti fu a tata fu den, Didibri, meki na denki fu a publiki ben sa kenki heri-esi (Genesis 3:15; Yohanes 8:44). Syatu baka dati, na 14 Nisan, wan ipi dyu ben aksi tranga nanga wan krakti sten fu den kiri Yeises. „En brudu musu kon na wi tapu èn na wi pikin tapu”, den ben bari gi na granman fu Rome di ben degedege (Mateyus 27:24, 25). Na presi fu teki Yeises leki Mesiyas Kownu, den edepristri ben fruklari: „Wi no abi no wan tra kownu leki keisri” (Yohanes 19:15). Dan den ben spikri na tru Mesiyas na wan pina-udu fu a dede, baka na falsi kragi taki a de wan opruruman kontrari Rome èn wan sma di ben de wan leiman di e pori a nen fu na Gado fu den dyu. — Markus 14:61-64; Lukas 23:2; Yohanes 18:36; 19:7.

⁷ Na refensi fu Gado ben sa kon seiker na tapu den sma di ben libi na ini Yudea fu na kofarlek bigi brudu-paiman fu den. Yerusalen, nanga en tumusi moi tenpri, den no ben kan kari en moro langa „na foto fu na bigi Kownu”, Yehovah (Mateyus 5:35; Lukas 13:33-35). Wantu dei bifo na dede fu Yeises, den disipri fu en ben prèise den oso fu na tenpri fu na foto dati. Leki piki tapu disi Yeises ben taki na fesi: „Fu den sani disi di unu e si, dei sa kon te nowan ston sa libi dyaso na tapu a trawan di no sa broko puru.” — Lukas 21:5, 6.

8. Di Yeises ben gi „na marki” fu den sani di ben sa tyari na pori fu Yerusalen kon, dan san ben de moro ini na tori?

⁸ Nanga fruwondru Yeises disipri ben aksi: „Leriman, oten den sani disi sa kon trutru, èn san sa de na marki te den sani disi sa psa?” (Lukas 21:7). Leki piki tapu disi Yeises ben taki soifri a fesi fu den sani di ben sa tyari na pori fu Yerusalen kon, èn a ben poti na prenspari wortu disi a tapu tu: „Den heiden sa trapu Yerusalen na ondro den futu, te leki den ten fu den heiden sa kisi” (Lukas 21:8-24, SV). Na so wan fasi Yeises ben sori go na fesi, na wan sani di ben de moro fara leki na pori fu Yerusalen — wan sani di ben musu wakti „te leki den ten fu den heiden [ben sa] kisi”. Ini na tori fu na „marki” Yeises ben taki: „Te unu e si den sani disi e psa, sabi dan taki na kownukondre fu Gado de krosibei” (Lukas 21:31). Fu dati-ede na marki ben sa abi wan kontru na tu fasi. Na fosi kontru, ofu a kontru na wan pikin fasi, ben sa sori taki ’na pori fu Yerusalen ben kon krosibei’ (Lukas 21:20). Na di fu tu èn moro bigi kontru ben sa kon te den ten fu den heiden ben kba, èn a ben sa sori taki „a kownukondre fu Gado de krosibei”. — Teki gersi Mateyus 24:3.

Wan moro betre foto teki na presi fu na Yerusalen fu grontapu

9. Oten a grontapu Yerusalen ben lasi na bun presi fu en èn san ben teki na presi fu en?

⁹ A de so taki, nanga den wortu „den nâsi sa trapu Yerusalen na ondro den futu te leki den fasti ten fu den nâsi kisi”, Yeises ben wani taki taki na foto na grontapu te fu kba ben sa kon bun baka èn abi na bun ati fu Gado? Nono. Baka na kiri di den kiri na lobi Manpikin fu Gado, dan na grontapu Yerusalen ben lasi en spesrutu presi fu alaten èn wan moro betre „foto fu na libi Gado, na hemel Yerusalen”, kon na a presi fu en. — Hebrew sma 12:22; Mateyus 23:37, 38; 27:50, 51.

10. San den wani taki nanga den wortu „na hemel Yerusalen”?

¹⁰ Den wortu „na hemel Yerusalen” e kobroiki na ini beibri leki wan fruklari fu na hemel kownukondre di no kan pori èn di den ben kari salfu kresten kon na en (Hebrew sma 11:10; 12:22, 28).a Di na apostru Paulus ben skrifi disi, dan den dyu ben prèise na grontapu foto nanga en tenpri srefisrefi . Fu dati-ede meki Paulus ben memre den Hebrew kresten taki: „Wi no abi dyaso wan foto di e tan, ma wi e suku seryusu na wan di e kon.” — Hebrew sma 13:14.

Fu san-ede den e kari en na hemel Yerusalen

11. San na grontapu Yerusalen ben prenki teleki na foto disi ben lasi na bun-ati fu Yehovah?

¹¹ Wan langa ten Yerusalen ben de na mamafoto fu na nâsi Israèl, èn fu den kownu fu en den ben taki taki den ’ben sidon na tapu Yehovah kownusturu’ (1 Kronieken 29:23). So srefi, Yehovah ben meki wan frubontu nanga David taki na kownuwroko ben sa tan fu têgo na ini en famiri. Neleki fa den e kobroiki den mamafoto so leki Washington, Moskou, Canberra nanga Pretoria, fu meki sma kon sabi den aparti tiri fu den, na so den e kobroiki Yerusalen na ini a beibri leki wan prenki fu na kownukondre fu David. — 2 Samuwèl 7:16; Lukas 1:32.

12. Fa wi musu frustan den wortu „ten fu den heiden”?

¹² David kownukondre ben abi wan kontren di ben skotu èn ben langa en srefi go soso te na den skotu di Gado ben poti gi na Israèl fu owruten. Na grontapu Yerusalen ben de fu dati-ede soso wan prenki fu na trutru Mesiyas kownukondre, di ben sa tiri komoto fu hemel èn ben sa abi na heri grontapu leki en kontren (Psalm 2:2, 7, 8; Danièl 7:13, 14; 2 Timoteyus 4:18). So a buku The Time Is At Hand, di na Wachttorengenootschap ben tyari kon na doro ini 1889, ben fruklari krin: „Den wortu ’ten fu den heiden’ wi Masra ben kobroiki gi na pisiten fu na historiya fu grontapu di didon a mindri a puru fu na kownukondre fu Gado di ben de leki wan prenki, a kownukondre fu Israèl (Eseikièl 21:25-27), èn na tyari kon èn opo fu na trutru kownukondre fu Gado di a e prenki.”

Den ten fu den heiden — olanga den de?

13. Oten den ten fu den heiden ben bigin, èn fu san-ede yu e piki so?

¹³ Kownu Nebukadnezar fu Babilon di ben de leki wan prenki ini 607 bifo G. T. ben trowe na agersi kownukondre fu Gado. Kon miti na di fu seibi dyu mun, wan sani fu mindri oktober, na kondre ben kon de sondro sma na ini (2 Kownu 25:8, 9, 22, 25, 26).b Leki buweisi taki disi ben psa fu di Gado ben gi pasi fu disi, meki Yehovah Gado ben gi Nebukadnezar wan dren. Disi ben abi fu du nanga wan bon di den ben koti trowe èn di den ben gi pasi fu gro agen, baka wan pisiten fu „seibi ten”. Na dren ben abi wan fosi kontru di den ben poti Nebukadnezar baka na tapu en kownusturu, baka wan toestand pe a ben law fu wan pisiten. — Danièl 4:10-17, 28-36.

14. San ben de na moro prenspari penti fu na dren fu Nebukadnezar?

¹⁴ Ma, na thema fu na dren fu Nebukadnezar ben sori taki na moro prenspari kontru fu dati ben abi fu du nanga na agersi kownukondre fu Gado di na heiden kownu dati ben kisi primisi fu ’koti trowe’. Na dren ben tapu nanga den wortu disi, pe den ben fruklari nanga sortu prakseri disi ben psa: „So taki sma di de na libi kan sabi taki na Moro Heiwan de Tiriman na ini a kownukondre fu na libismafamiri èn taki a e gi dati na suma a wani èn a e poti srefi na moro lagiwan fu na libismafamiri na tapu dati. — Danièl 4:17.

15. Fa Yeises Krestes ben bun fu kisi na nen „na moro lagiwan fu na libismafamiri”? (Mateyus 11:29)

¹⁵ Soso wán sma ben bun fu den kari en „na moro lagiwan fu na libismafamiri”. Na wan enkri gebore Manpikin fu Gado ben sori taki a ben de a sma disi, fu di a ben wani libi en hemel glori fu kon gebore leki libisma, leki Yeises, di ben kisi na moro lagi èn ogri-ati dede fu a anu fu Satan (Filipi sma 2:3, 5-11). Baka di Yeises ben opo baka fu dede go baka na ini hemel glori, a ben musu wakti te leki na pisiten fu den seibi ten fu den heiden tiri ben kisi, bifosi den ben o poti en na tapu na kownusturu leki na Mesiyas Kownu tapu na libismafamiri. — Hebrew sma 10:12, 13.

16. Fa na buku Openbaring e yepi kresten fu teri oten den seibi ten ben kba?

¹⁶ Ma fa Yehovah Kotoigi ben kon frustan olanga den seibi ten ben de? Na beibri e tyari kon na krin taki „wan ten èn ten nanga wan afu ten”, ofu dri nanga wan afu ten, de a srefi leki 1260 dei (Openbaring 12:6, 14). Fu dati-ede meki tu tron na nomru dati, ofu seibi ten, ben sa de a srefi leki 2520 yari (Numeri 14:34; Eseikièl 4:6). Nanga yepi fu na teri disi, den ten fu den heiden, di ben bigin ini oktober 607 bifo G. T., ben kba 2520 yari na baka ini oktober 1914.

17. Sortu prisiri ben musu meki bekenti ini 1914?

¹⁷ Na ini oktober 1914, Yehovah Gado ben poti en lobi Manpikin, na Masra Yeises Krestes, na tapu a kownusturu na ini a hemel kownukondre. Te fu kba, na fisyun na ini na buku Openbaring di na kresten apostru Yohanes ben skrifi ben bigin tron wan tru sani, èn a ben kan meki na nyunsu bekenti: „Na kownukondre fu grontapu tron na kownukondre fu wi Masra [Yehovah] èn fu en Krestes, èn a [Yehovah] sa tiri leki kownu te fu têgo alaten” (Openbaring 1:10; 4:1; 11:15). Fa disi de wan glori nyunsu èn fa a de wan reide fu na moro bigi koloku fu na sei fu ala konpe-erfgenaam nanga onderdaan fu na kownukondre dati! — Openbaring 11:17.

18. Fu san-ede sari toestand kwinsi na libismafamiri fu sensi 1914?

¹⁸ A tru, taki gi a moro bigi pisi fu na libismafamiri furu koloku no ben de na grontapu fu sensi 1914. Ma den sari toestand na grontapu de na buweisi taki heri esi wan kba sa kon na a tirimakti fu Satan. Fa wi du sabi disi? Na buku Openbaring ben sori taki a opo di den ben sa opo Gado kownukondre ben sa tyari wan orloku kon na ini hemel. Den ben sa iti Satan nanga en ogri yeye komoto fu hemel èn skotu den fu de soso na a kontren fu wi grontapu. Na baka di Yohanes ben si na wini disi na ini wan profeiti fisyun, dan a ben yere wan tranga sten e taki: „Prisiri fu disi, unu hemel èn unu di e tan na ini den! Helu fu grontapu nanga na se, bika Didibri saka kon na unu, èn a abi bigi atibron fu di a sabi taki a abi soso wan syatu pisiten.” — Openbaring 12:1-12.

19. Fu san-ede tru kresten sma de so grantangi fu de na libi na ini na ten disi?

¹⁹ Grontapu toestand di e kon moro ogri sensi 1914 e buweisi taki na fisyun fu Yohanes tron wan tru sani èn taki na kba fu ala libisma di e weigri fu saka den srefi na ondro Gado soevereiniteit, e kon kofarlek krosibei (Lukas 21:10, 11, 25-32). Fa a de wan span sani fu de na libi ini a tumusi moi ten disi te Yehovah Gado, na Almaktiwan, sa seti na bigi strei-tori fu na soevereiniteit fu en na grontapu! Dan na grontapu sa kenki kon tron wan tumusi moi paradèis, èn regtfardiki sma di psa libilibi den sa opo go kisi volmaaktifasi. Srefi den dedewan den sa wiki baka èn gi den na okasi taki den de warti fu kisi na têgo libi. — Openbaring 20:1-3, 12, 13; 21:3-5.

Wan disiten fanowdu fu kenki na fasi fu si sani

20. (a) Bifo 1914 dan suma dyaso na grontapu ben sori taki den de tru futuboi fu Yehovah? (b) Sortu kenki salfu kresten, di ben de kotrow, ben wani fu tyari kon?

²⁰ Den 38 yari bifo 1914 den Beibri-ondrosukuman, so leki den ben kari Yehovah Kotoigi ini na ten dati, ben sori go na a datum dati leki na yari pe den ten fu den heiden ben sa kba.c Fa disi de wan krin buweisi taki den ben de tru futuboi fu Yehovah! Toku, neleki fosi yarihondro futuboi fu Gado, na so den ben abi so srefi wantu fowtu fruwakti. Fu eksenpre, den ben fruwakti taki na heri nomru fu salfu kresten ben sa kisi wan hemel opobaka ini oktober 1914. Den ben prakseri so srefi taki na orloku di ben bigin ini 1914, ben sa tyari wantewante na kba kon fu a grontapu fu Satan.

21. Sortu tranga leri tru kresten ben miti ini na Fosi Grontapufeti?

²¹ Ma salfu kresten ben kon frustan baka wan pisiten taki den ben abi furu wroko fu du na grontapu. Fu a hori di den ben hori doro ini na publiki preikiwroko ini na Fosi Grontapufeti, meki den ben ondrofeni ogri-ati frufolgu fu na sei fu den politiek tiriman, di den kerki leriman fu na krestenheid ben gi deki-ati fu du dati (Psalm 2:1-6). Ini 1918 na aktiviteit fu tru kresten ben kisi wan hebi slag tapu 21 yuni di tapu falsi kragi den ben leisi 20 yari dungru-oso strafu gi tiriman fu na Wachttorengenootschap na ini Verenigde Staten.

22, 23. (a) San salfu kresten di ben de kotrow du sensi 1919, èn nanga sortu tu bakapisi? (b) San na a disiten kontra-prenki fu a Yerusalen di no de kotrow?

²² Na Fosi Grontapufeti wantronso ben kon na wan kba ini november 1918. Ne tapu 25 maart 1919 den ben puru den tiriman fu na Wachttorengenootschap na ini dungru-oso. Bakaten den ben soifri den nen fu ala flaka. Wan onfruwakti pisiten fu vrede, ben opo en srefi gi den salfu kresten dati di ben de kotrow, neleki den okasi di ben de gi Krestes fosi disipri bakadi den ben kisi makti nanga yepi fu santa yeye ini 33 G. T. fu du wroko. — Tori fu den Apostru 2:17-21, 41.

²³ Fu sensi 1919, dan salfu kresten di ben de kotrow leki wan grupu ben gi yesi fayafaya na a kobòt di abi fu du nanga Yeises wortu na ini Mateyus 24:14: „Na bun nyunsu disi fu na kownukondre sa preiki na ini a heri grontapu pe libisma e libi leki wan kotoigi gi ala nâsi; èn dan na kba sa kon.” Leki wan bakapisi, dan pikinso moro fo milyun fu Krestes „tra skapu” gi den libi fu dini Yehovah ini wánfasi nanga na salfu fikapisi (Yohanes 10:16). Na ondro na krakti fu den kerki leriman fu den, na krestenheid e tan weigri na Kownukondre boskopu. A lobi di a e lobi libisma politiek programa èn a frufolgu di a e frufolgu Yehovah Kotoigi e kruderi nanga na behandeling di e seki sma, èn di Krestes ben kisi fu den fosi yarihondro sma fu Yudea. Neleki fa Yehovah ben tyari en krutustrafu kon na tapu Yerusalen, na so a sa du tu nanga a disiten kontra prenki fu a Yerusalen di no ben de kotrow, dati wani taki na krestenheid. Èn neleki na geslakti di ben yere den krutu boskopu fu Krestes ben ondrofeni na pori di a ben taki fu en na fesi, na so na disiten geslakti fu sensi 1914 „no sa psa kwetikweti” bifo na „bigi banawtu”, di den ben taki na fesi fu en, kon. — Mateyus 24:21, 22, 34.

24. San wi musu du fu psa libilibi go na ini Gado nyun grontapu?

²⁴ San wi musu du fu psa na bigi banawtu libilibi èn libi go doro na ini Gado nyun grontapu? Awansi sonwan fu wi ben abi kande wan fowtu fruwakti, wi musu luku bun fu no fadon na sribi ini na tori fu wi kresten frantiwortu (Habakuk 2:3; 1 Tesalonika sma 5:1-6). Na nomru fu den wan di kan memre den sani fu 1914, e kon moro pikinso. So bun wi musu de na ai; ten no de fu lasi (Mateyus 24:42). Ala sma di wani psa na kba fu Satan gadolowsu grontapu libilibi, musu handri now na wan fasi di e kruderi nanga den wortu di skrifi ondro krakti fu santa yeye: „Wi e taigi yu tangi, Yehovah Gado, na Almaktiwan, . . . bika yu teki yu bigi makti èn bigin fu tiri leki kownu.” — Openbaring 11:17.

[Foetoewortoe]

San yu ben sa piki?

◻ Fu san na Yerusalen fu owruten ben teki presi gi, ma fa a ben lasi en grani presi?

◻ Oten den ten fu den heiden ben bigin èn ben kba, èn nanga sortu bakapisi di den ben taki a fesi fu en?

◻ San na pori fu na Yerusalen di no ben de kotrow ben prenki?

◻ Fa wi du sabi taki na bigi banawtu de krosibei, èn san wi musu du fu psa dati libilibi?

[Prenki na tapoe bladzijde 28]

Yerusalen nanga en tenpri ben lasi na grani presi fu den, ma Gado ben tan blesi en Manpikin, na Mesiyas èn ben taki srefi langalanga nanga en komoto fu hemel