A geslakti foe 1914 — Foe san ede a de so prenspari?

„Den leisiman foe wi sabi taki foe wan toe jari kaba wi ben froewakti taki a Jarihondro disi o tapoe nanga wan toemoesi ogri ten foe problema, èn wi e froewakti taki a o broko na wan toemoesi onfroewakti èn krakti fasi no langa baka oktober 1914.” — Foe The Watch Tower and Herald of Christ’s Presence, foe 15 mei 1911.

SENSI 1879 a tijdschrift di sma ben sabi na a ten dati leki The Watch Tower and Herald of Christ’s Presence (sma sabi en now leki Na Waktitoren A e bariwroko gi Jehovah Kownoekondre) ben sori doronomo tapoe 1914 leki wan jari di marki ini bijbel profeititori. Di a jari ben kon moro krosibei, dan den ben memre leisiman taki den ben kan froewakti „wan toemoesi ogri ten foe problema”.

Den kresten di ben gi a bodoi disi tapoe fondamenti foe a fasi fa den ben froestan den „seibi ten” èn „a ten foe den hèiden” di kari ini bijbel, ben tjari den bodoi disi kon a doro na ala sei.a Den ben froestan taki a pisi ten disi di ben sa de 2520 jari — di ben e bigin nanga a meki fadon foe na owroeten kownoekondre foe David na Jerusalem èn ben e kaba ini oktober 1914.b — Danièl 4:16, 17; Lukas 21:24, King James Version.

Tapoe 2 oktober 1914, Charles Taze Russell, di ben de presidenti foe a Watch Tower Bible and Tract Society na a ten dati, ben meki bekènti fri èn sondro frede: „A Ten foe den Hèiden kon na wan kaba; den kownoe foe den ben abi den dei.” O troe den wortoe disi ben sori foe de! Ini oktober 1914 wan sani di ben o seki grontapoe, ben feni presi na hemel, ala di libisma no ben man si disi. Jesus Krestes na Erfgenaam di o tan foe ala ten na tapoe „a kownoestoeroe foe David”, ben bigin a tiri foe en leki Kownoe tapoe a heri libisma famiri. — Lukas 1:32, 33; Openbaring 11:15.

’Ma’, joe sa aksi kande, ’efoe Krestes ben bigin tiri ini 1914, foe san ede a situwâsi na grontapoe e kon moro takroe?’ Foe di a feanti foe libisma di sma no man si, de a libi ete. Te doro 1914 Satan ben man go na hemel ete. A situwâsi dati ben kenki nanga na opo foe a Kownoekondre foe Gado na ini 1914. „Orlokoe ben broko na hemel” (Openbaring 12:7). Satan nanga den ogri jeje foe en ben lasi èn den ben trowe den kon na grontapoe, nanga rampoe bakapisi gi a libisma famiri. Bijbel ben froeteri a fesi: „Heloe foe grontapoe èn na se, foe di Didibri ben saka kon na oenoe, èn a abi bigi atibron, foe di a sabi taki a abi wan sjatoe pisi ten.” — Openbaring 12:12.

Ini a fosi jarihondro G.T., Jesus ben taki, dati a denoja foe en leki a njoen Kownoe foe grontapoe èn di sma no man si, sma ben sa kon sabi nanga jepi foe wan marki di sma ben man si. Den ben aksi en: „San sa de a marki foe a denoja foe joe èn foe a bosroiti foe a seti foe sani?” A piki foe en? „Nâsi sa opo kontrari nâsi èn kownoekondre kontrari kownkoekondre, èn mankeri foe njanjan sa de èn gronseki na a wan presi baka a trawan. Ala den sani disi na wan bigin foe pen foe banawtoe.” — Mateus 24:3, 7, 8.

Ini akroederi nanga disi, na orlokoe di ben broko na ini 1914 ben go makandra nanga ogri mankeri foe njanjan, foe di a doronomo meki foe njanjan ben tapoe foe moro leki fo jari. San de foe taki foe „gronseki ini a wan presi baka a trawan”? Ini den tintin jari di ben kon baka 1914, no moro mendri leki tin gronseki di e pori sani, ben kiri moro leki 350.000 sma. (Loekoe a faki.) Ija, a geslakti foe 1914 ben ondrofeni „a bigin foe pen foe banawtoe”. Èn foe sensi a ten dati, a pen foe banawtoe ben kon doronomo na a fasi foe natuur rampoe, mankeri foe njanjan, èn foeroe, foeroe orlokoe.

Ma tokoe a njoensoe foe na opo foe Gado Kownoekondre ini 1914 de boen njoensoe foe di a Kownoekondre dati sa kibri a grontapoe disi foe a kisi pori? Fa so? A sa poeroe ala falsi, hoigri relisi, kroektoe tiri, èn na ogri krakti di Satan abi tapoe sma (Danièl 2:44; Romensma 16:20; Openbaring 11:18; 18:4-8, 24). Boiti dati, a sa kari kon na ini wan njoen grontapoe pe „regtfardikifasi sa de” na ini. — 2 Petrus 3:13.

Heri esi baka a Fosi Grontapoefeti, serjoesoe Bijbel Studenti, so leki sma ben sabi Jehovah Kotoigi na a ten dati, ben bigin foe si a grani foe den di ben abi foe doe nanga wan tra pisi foe a marki foe a denoja foe Jesus leki Kownoe. Jesus Krestes ben froeteri a fesi: „A boen njoensoe disi foe a kownoekondre sa preiki na a heri grontapoe pe sma e libi leki wan kotoigi gi ala nâsi; èn dan a kaba sa kon.” — Mateus 24:14.

Foe den pikin bigin na ini 1919, Jehovah Kotoigi go doro sondro foe tapoe nanga a panja foe „a boen njoensoe disi”. Leki bakapisi, miljoenmiljoen sma foe moro leki 200 kondre e kon makandra now leki sma di saka densrefi na ondro a Kownoekondre foe Gado. Èn sortoe blesi e wakti den sma disi di saka densrefi na ondro Gado Kownoekondre! A Kownoekondre sa tjari wan kaba kon na orlokoe, mankeri foe njanjan, ogridoe, nanga a kwinsi di sma e kwinsi trawan. A sa wini siki nanga dede srefi. — Psalm 46:9; 72:7, 12-14, 16; Odo 2:21, 22; Openbaring 21:3, 4.

Bifo a geslakti foe 1914 pasa gowe, a Kownoekondre preikiwroko sa doe san de a marki foe en. „Dan”, Jesus ben e froeteri a fesi, „wan bigi banawtoe sa de, so leki sensi a bigin foe grontapoe te now no ben feni presi, nôno èn no sa feni presi moro toe. Efoe foe dati ede den dei no ben koti sjatoe, dan no wan skin no ben sa kisi froeloesoe; ma foe den sma di Gado ben froekisi ede, meki a sa koti den dei dati sjatoe”. — Mateus 24:21, 22.

No meki a fowtoe di a geslakti di ben libi bifo 1914, ben meki. Sani no sa go doro ala ten leki fa den de now. Kenki di e froewondroe sma de a wi fesi. Ma gi den wan di e handri na wan koni fasi, toemoesi moi froewakti de.

Foe dati ede, arki den wortoe foe a profeiti foe owroeten: „Soekoe Jehovah, ala oen safri-atiwan foe grontapoe . . . Soekoe regtfardikifasi, soekoe safri-atifasi. Kande joe sa kisi kibri na a dei foe Jehovah en atibron” (Sefania 2:3). Fa wi kan waka baka a rai disi? Den artikel di e kon now sa jepi wi foe piki tapoe na aksi dati.

[Foetoewortoe]

[Schema/Faki na tapu bladzijde 7 di e tyari sani kon na krin]

Gronseki ini den tin jari di ben kon baka 1914

Dei: Presi: Dedewan:

13 januari 1915 Avezzano, Italiakondre 32.600

21 januari 1917 Bali, Indonesia 15.000

13 februari 1918 Provinsie Kwangtoeng, China 10.000

11 oktober 1918 Puerto Rico (westsei) 116

3 januari 1920 Veracruz, Meksikow 648

7 september 1920 Regio di Calabria, Italiakondre 1400

16 december 1920 Provinsie Ningsia, China 200.000

24 maart 1923 Provinsie Sekwan, China 5.000

26 mei 1923 Iran (noordowstoe sei) 2.200

1 september 1923 Tokio-Jokohama, Japan 99.300

Foe a tabel „Prenspari gronseki foe grontapoe” ini a boekoe Terra Non Firma, di James M. Gere èn Haresh C. Shah, skrifi.