Soema sa lon gi a „ten foe banawtoe”?
„Ibri wan sma di e kari a nen foe Jehovah sa lon komoto boen.” — JOÈL 2:32.
1. San na den eigifasi foe den sma di sa kisi kibri ini a „ten foe banawtoe” di e kon, so leki fa Danièl nanga Maleaki e taki?
DI A profeiti Danièl ben loekoe go a fesi na a dei foe wi, a ben skrifi: „Seiker wan ten foe banawtoe sa sori ensrefi so leki no ben kon foe sensi wan nâsi ben doe kon te a ten dati. Èn na ini a ten dati oen pipel sa lon, ibri wan sma di den ben feni skrifi ini a boekoe” (Danièl 12:1). Den wortoe disi e gi trowstoe foe troe! Jehovah sa memre a pipel foe en di a ben feni boen, neleki fa Maleaki 3:16 e froeklari toe: „Ini a ten dati den sma di ben frede Jehovah ben taki nanga makandra, ibri wan nanga en kompe èn Jehovah ben tan poti prakserei èn ben tan arki. Èn den ben bigin foe skrifi wan memreboekoe na en fesi gi den sma di e frede Jehovah èn den sma di e prakseri a nen foe en.”
2. San de a bakapisi foe a prakseri di wan sma e prakseri Jehovah nen?
2 A prakseri di sma e prakseri a nen foe Jehovah e meki sma kisi soifri sabi di abi foe doe nanga en, a Krestes foe en, èn ala den moi Kownoekondre prakseri foe en. Na so fasi, a pipel foe en e leri foe abi lespeki gi en, foe kon na ini wan krosibei matifasi nanga en pe den gi densrefi abra, èn foe lobi en ’nanga den heri ati èn nanga den heri froestan èn nanga den heri krakti’ (Markus 12:33; Openbaring 4:11). Jehovah ben sorgoe gi a toemoesi boen sani, nanga jepi foe na ofrandi foe Jesus Krestes, foe meki den safri-atiwan foe grontapoe feni têgo libi. Foe dati ede, nanga froetrow den sma disi kan taki den wortoe baka foe a hemel legre di ben prèise Gado na a ten di Jesus mama ben meki en, den ben taki: „Glori ini den moro hei presi na Gado èn na tapoe grontapoe vrede na mindri sma foe boen wani.” — Lukas 2:14.
3. Bifo vrede kan kon na a grontapoe disi, dan sortoe doe foe Jehovah moesoe feni presi?
3 A vrede dati de moro krosibei leki moro foeroe sma e denki. Ma a tjari di Jehovah o tjari kroetoe kon tapoe wan kroektoe grontapoe, moesoe kon fosi. Sefania, a profeiti foe En, e meki bekènti: „A bigi dei foe Jehovah de krosibei. A de krosibei, èn a e meki esi srefisrefi.” Sortoe dei na a dei dati? A profeititori e go doro: „A babari foe a dei foe Jehovah bita. Drape wan tranga man e meki sma jere wan babari. A dei dati na wan dei foe atibron, wan dei foe banawtoe èn foe broeja frede, wan dei foe bigi winti èn foe pori, wan dei foe doengroe èn foe blaka, wan dei foe wolkoe èn foe bigi blaka, wan dei foe babari foe toetoe èn foe nowtoe-babari, kontrari den foto di ben meki kon tranga èn kontrari den hei oekoe-toren. Èn mi wani tjari den sma ini banawtoe, èn den sa waka seiker leki brenisma; bika na Jehovah den doe sondoe” — Sefania 1:14-17; loekoe toe Habakuk 2:3; 3:1-6, 16-19.
4. Soema ini a ten disi e doe wan sani tapoe a kari foe sabi èn foe dini Gado?
4 Kolokoe taki miljoenmiljoen sma ini a ten disi e piki boen tapoe a kari foe sabi èn foe dini Gado. Foe salfoe kresten, di den ben teki ini a njoen froebontoe, den ben taki a fesi: „’Den alamala sa sabi mi, foe a moro mendriwan foe den te go kisi srefi a moro bigiwan foe den’, na so Jehovah e taki” (Jeremia 31:34). Den wan disi teki fesi ini a disi ten kotoigiwroko. Èn now di moro nanga moro sma foe a salfoe fikapisi e doro a kaba foe a libi foe den a grontapoe, na „bigi ipi” foe „tra skapoe” pristeri densrefi foe ‘doe santa dienst gi Gado dei nanga neti’ ini a seti foe en di gersi a seti foe a tempel (Openbaring 7:9, 15; Johanes 10:16). Joe na wan sma di e njanboen foe a grani disi di abi bigi waarde srefisrefi?
Fa „den sani di sma wani sote” e kon na ini
5, 6. Sortoe wroko di e gi kibri e feni presi, bifo ala nâsi sa seki go na pori?
5 Meki wi go now na Hagai 2:7, pe Jehovah e taki sani na fesi di abi foe doe nanga en oso foe anbegi na jeje fasi. A e taki: „Mi sa seki ala nâsi èn den sani foe ala nâsi di sma wani sote moesoe kon na ini; èn mi wani foeroe na oso disi nanga glori.” Bijbel profeititori e sori taki a ’seki disi foe den nâsi’ e sori go na a tjari di Jehovah o tjari kroetoe kon tapoe den nâsi (Nahum 1:5, 6; Openbaring 6:12-17). Foe dati ede, na sani di Jehovah sa doe, so leki fa Hagai 2:7 e froeteri a fesi, sa abi leki heimarki a seki di den sa seki den nâsi te leki den no de moro — den e pori den. Ma san wi kan taki foe „den sani foe ala den nâsi di sma wani sote”? Den abi foe wakti tapoe a lasti seki disi di e pori sani, foe meki dati tjari den kon na ini? Kwetikweti.
6 Joèl 2:32 e taki „ibri wan sma di e kari a nen foe Jehovah sa lon komoto boen; bika na tapoe a bergi Sion èn na Jerusalem a sa kon na krin taki den sma de di lon komoto joisti so leki fa Jehovah ben taki, èn na mindri den sma di pasa libilibi, di Jehovah e kari.” Jehovah e teki den poeroe èn den e kari a nen foe en nanga bribi ini na ofrandi foe Jesus bifo a seki foe a bigi banawtoe, di e go na wan heimarki. (Teki gersi Johanes 6:44; Tori foe den Apostel 2:38, 39.) Kolokoe taki na bigi ipi di abi waarde, di e teri now moro leki fo miljoen sma, ’e kon na ini’ Jehovah en oso foe anbegi ala di den e wakti a seki di a o ’seki ala den nâsi’ na Armagedon. — Openbaring 7:9, 10, 14.
7. San de ini a tori ’foe a kari di joe e kari a nen foe Jehovah’?
7 Fa den sma disi di pasa libilibi e kari a nen foe Jehovah? Jakobus 4:8 e gi wi wan idea, te a e taki: „Kon krosibei na Gado èn en sa kon krosibei na oenoe. Krin oen anoe, oen sondoeman, èn meki oen ati kon soifri, oen wan di no man teki wan bosroiti.” So leki fa a de nanga a salfoe fikapisi di e sori a pasi, dan den sma di e howpoe foe de foe a bigi ipi sma di pasa Armagedon libilibi, moesoe handri nanga fasti bosroiti. Efoe joe e howpoe foe pasa libilibi, joe moesoe dringi foeroe foe Jehovah Wortoe di e soifri sani èn gebroiki den regtfardiki markitiki foe en ini joe libi. Joe moesoe teki wan fasti bosroiti foe di joe e gi joe libi abra na Jehovah, èn e simbôliseer disi nanga jepi foe a dopoe nanga watra. A kari di joe e kari Jehovah ini bribi abi so srefi na ini toe, foe kotoigi foe en. Foe dati ede Paulus e skrifi na Romesma kapitel 10, den vers 9 nanga 10: „Efoe na poebliki oenoe e meki a ’wortoe dati ini oen eigi mofo bekènti’, taki Jesus na Masra èn efoe oenoe e bribi ini oen ati, taki Gado ben wiki en foe dede, dan oen sa kisi kibri. Bikasi nanga na ati wan sma e sori bribi foe kisi regtfardikifasi, ma nanga a mofo wan sma e meki wan poebliki bekènti foe kisi froeloesoe.” Baka dati na apostel e teki den wortoe foe a profeititori foe Joèl poti na ini vers 13, foe di a e poti krakti na tapoe taki „ibri wan sma di e bari kari a nen foe Jehovah sa kisi kibri.”
’Soekoe, soekoe, soekoe’
8. (a) San Jehovah e aksi foe wi efoe wi wani kisi froeloesoe, so leki fa a profeiti Sefania e taki? (b) Sortoe warskow a wortoe „kande”, na Sefania 2:3, e gi wi?
8 Te wi e go na a bijbelboekoe Sefania, kapitel 2, vers 2 èn 3, dan wi e leisi san Jehovah e aksi foe wi efoe wi wani kisi froeloesoe: „Bifo a faja atibron foe Jehovah e kon na oenoe tapoe, bifo a dei foe Jehovah faja ati e kon na joe tapoe, soekoe Jehovah ala oen safri-atiwan foe grontapoe, di ben doe en kroetoe bosroiti. Soekoe regtfardikifasi, soekoe safri-atifasi. Kande den kan kibri joe na a dei foe Jehovah atibron.” Loekoe a wortoe „kande”. Disi no de wan kefal foe te joe kisi kibri wan leisi, dan joe kisi kibri foe ala ten. A kisi di wi sa kisi kibri na a dei dati e anga foe a go di wi e go doro foe doe den dri sani dati. Wi moesoe soekoe Jehovah, soekoe regtfardikifasi èn soekoe safri-atifasi.
9. Fa den sma di e soekoe safri-atifasi e kisi pai?
9 Ija, a pai di sma e kisi di e soekoe safri-atifasi, de wan toemoesi moi sani. Ini Psalm 37, vers 9 te go miti vers 11, wi e leisi: „Den wan di e howpoe tapoe Jehovah na den wan di sa kisi grontapoe. Wan pikin ten libi ete, èn a gadolowsoewan no sa de moro . . . Ma den safri-ati wan sa kisi grontapoe leki a porsi foe den], èn den sa feni troetroe den switi prisiri ini vrede pasa marki.” Èn fa a de nanga a soekoe foe regtfardikifasi? Vers 29 e taki: „Den regtfardikiwan sa kisi grontapoe èn sa tan na tapoe foe têgo.” Ini a tori foe a soekoe di wi moesoe soekoe Jehovah, vers 39 èn 40 e froeteri wi: „A froeloesoe foe den regtfardikiwan e kon foe Jehovah; en de a fortresi foe den, ini a ten foe banawtoe. Èn Jehovah sa jepi den èn meki den eskèip. A sa meki den eskèip foe den ogri sma èn froeloesoe den, foe di den soekoe kibri na en.”
10. Soema ben weigri na wan aparti fasi foe soekoe Jehovah èn foe soekoe safri-ati fasi?
10 Den sekte foe a krestenhèit misi foe soekoe Jehovah. Den kerki fesiman foe den no e erken srefi a warti nen foe en, foe di na wan asranti fasi den poeroe a nen na ini den bijbelvertaling foe den. Den e froekisi foe anbegi wan Masra noso Gado di no abi nen èn den e gi grani na wan hèiden Driwanfasi. Boiti dati, a krestenhèit no e soekoe regtfardikifasi. Foeroe foe den bakaman foe en teki noso e horibaka gi wan fasi foe libi di no e loekoe so fini nanga a moraal. Na presi foe soekoe a safri-atifasi so leki Jesus ben doe, dan nanga foeroe pranpran den e meki sma si, foe eksempel na televisi, wan diri èn nofotron hoeroe fasi foe libi di den abi. Den kerki fesiman e meki densrefi kon fatoe nanga a moni foe na ipi foe den. Foe taki en nanga den wortoe foe Jakobus 5:5, den ben „libi ini goedoe na grontapoe èn [den] gi [densrefi] abra na prisiri pasa marki”. Ala di a dei foe Jehovah e kon moro krosibei, den sa ondrofeni seiker taki den wortoe disi di ben skrifi nanga jepi foe santa jeje, fiti den: „Sani di abi waarde no sa jepi tapoe a dei foe atibron.” — Odo 11:4.
11. Soema na a sma foe kroektoedoe, èn fa a ben meki a broedoe paiman foe en kon so kefarlek bigi?
11 Ini a fosi jarihondro G.T., so leki fa na apostel Paulus e froeteri ini en di foe toe brifi gi den Tesalonikasma, wan toe kresten ben kon de nanga span froewakti, foe di den ben prakseri taki na a ten dati a dei foe Jehovah ben o kon a tapoe den. Ma Paulus ben warskow taki fosi wan bigi fadon komoto a bribi ben moesoe kon èn dan den ben moesoe tjari „a sma foe kroektoedoe” kon a krin (2 Tesalonikasma 2:1-3). Now, ini a di foe twenti jarihondro disi, wi kan froestan o fara a fadon dati di sma fadon komoto a bribi e go èn o kroektoe den kerki fesiman foe a krestenhèit, di no e hori densrefi na wet, de ini Gado ai. Na ini den lasti dei disi foe sensi 1914, den kerki fesiman ben tjari wan kefarlek bigi broedoe paiman kon tapoe densrefi, foe di den ben horibaka gi a ’naki di sma ben naki den proegoe kon tron feti-owroe’ (Joèl 3:10). Den ben go doro toe foe leri sma falsi leri, so leki leri di roetoe na ini den ati taki a sili di libisma abi no e dede, vagevuur, a kisi foe skin-ati na ini helfaja, a dopoe foe pikin-nengre, a Driwanfasi èn den sortoe sani disi. Pe den sa tanapoe te Jehovah e tjari en kroetoe bosroiti kon? Odo 19:5 e taki: „A sma di e meki lei no sa èskèip.”
12. (a) San na den „hemel” èn „grontapoe”, di sa wai poeroe heri esi? (b) San wi e leri foe a pori foe na ogri grontapoe disi di de a pasi e kon?
12 Na 2 Petrus 3:10, wi e leisi: „A dei foe Jehovah sa kon leki wan foefoeroeman, te den hemel sa lasi gowe nanga bigi babari èn den elementi sa smeltri na ini boen tranga faja, so srefi grontapoe nanga ala den wroko di de na en tapoe sma sa kon sabi.” Kroektoe fasi foe tiri di tapoe sma dorodoro, neleki den e doe dati nanga wan tenti leki den hemel abra a libisma famiri, sa wai poeroe foe a grontapoe foe Gado, nanga ala den elementi di makandra de a disi ten libisma libimakandra di soengoe na moreel sei. Eiginari foe fabrik nanga baiman èn seriman foe fetisani di e pori sani krinkrin, bidrigiman, hoigri kerkisma nanga den kerki fesiman foe den, sma di e meki kroektoedoe, takroedoe nanga ogridoe go a fesi — den alamala sma no sa man feni den moro. Den sa smelter gowe nanga jepi foe a refensi foe Jehovah. Ma ini vers 11 nanga 12, Petrus e poti a warskow disi gi kresten: „Foe di ala den sani disi sa poeroe a pasi na a fasi disi, sortoe sma oenoe moesoe de dan ini waka nanga libi èn doe foe a gi di wi e gi wisrefi ini a dini foe Gado, e froewakti èn e hori boen na prakseri a denoja foe a dei foe Jehovah.”
Mikaèl e opo doe wan sani!
13, 14. Soema na a bigi Sma di e krin a tiri foe Jehovah, èn fa a ben doe sani foe sensi 1914?
13 Fa wan sma sa lon gowe ini Jehovah en „ten foe banawtoe”? A Fesiman foe Gado di e sorgoe taki sma man èskèip na a gran engel Mikaèl, di a nen foe en wani taki „Soema de leki Gado?” Foe dati ede a e fiti taki a de a Sma di e regtfardiki a tiriwroko foe Jehovah, foe di a e hori Jehovah hei leki a wan enkri troe Gado èn Soeverein Masra di abi a reti foe tiri na heri universum.
14 Fa Openbaring kapitel 12, vers 7 te go miti vers 17, e froeteri foe toemoesi aparti sani di e pasa, ini a tori foe „a dei foe Masra” sensi 1914! (Openbaring 1:10) A gran engel Mikaèl e trowe na oproeroeman Satan poeroe foe hemel kon na grontapoe. Baka ten, so leki fa skrifi na Openbaring kapitel 19, vers 11 te go miti vers 16, dan wan sma di den kari „Getrow èn Troe” ’e trapoe a winpersbaki foe na atibron foe a refensi foe Gado na Almaktiwan’. A makti hemel fetiman disi nen „Kownoe foe den kownoe èn Masra foe den masra”. Te foe kaba, Openbaring kapitel 20, vers 1 èn 2, e froeteri foe wan bigi engel di e trowe Satan na ini a dipi peti èn e sroto en drape doesoen jari langa. A de krin, taki ala den tekst disi e sori go na a wan Sma di e krin a soevereiniteit foe Jehovah, Masra Jesus Krestes, di Jehovah ben poti tapoe en glori hemel kownoestoeroe ini 1914.
15. Na sortoe spesroetoe fasi Mikaèl „sa opo tanapoe” heri esi?
15 Mikaèl ben „tanapoe”, so leki fa skrifi na Danièl 12:1, foe a boen foe Jehovah pipel sensi di den poti en leki Kownoe na ini 1914. Ma heri esi Mikaèl sa „opo tanapoe” na wan spesroetoe fasi — leki a Fesiman foe Jehovah di e poeroe ala ogridoe foe grontapoe èn leki a Froeloesoeman foe a libimakandra foe Gado pipel na a heri grontapoe. O kefarlek moi a „ten [dati] foe banawtoe” sa de, den wortoe foe Jesus na Mateus 24:21, 22 e sori: „Wan bigi banawtoe sa de so leki sensi a bigin foe grontapoe te now no ben feni presi, nôno èn no sa feni presi moro toe. Efoe foe dati ede den dei no ben koti sjatoe, dan no wan skin no ben sa kisi froeloesoe; ma foe den sma di Gado ben froekisi ede, a sa koti den dei dati sjatoe.”
16. Sortoe skin sa kisi kibri na ini a ten foe a bigi banawtoe?
16 Fa wi kan de kolokoe taki son skin sa kisi kibri na a ten dati! Nôno, no so leki di foe den oproeroe djoe di ben kon ini wan trapoe na Jerusalem ini 70 G. T., di den ben tjari wan toe foe den gowe leki srafoe na Rome. Na presi foe dati, dan den sma di e èskèip ini „a ten dati foe a kaba” sa de neleki a kresten gemeente di ben lowe kaba foe Jerusalem di den ben tapoe a foto lontoe nanga legre foe na lasti tron. Den de sa Gado en eigi pipel, den miljoenmiljoen sma foe a bigi ipi makandra nanga wan toe salfoewan di ben kan de ete na grontapoe (Danièl 12:4). Na bigi ipi e „komoto na a bigi banawtoe”. Foe san ede? Foe di „den ben wasi den langa krosi foe den èn meki den kon weti na ini a broedoe foe a Pikin Skapoe”. Den e sori bribi na ini a krakti foe a froeloesoe ofrandi foe Jesus broedoe di ben trowe èn den e sori a bribi dati foe di den e dini Gado na wan loyaalfasi. Srefi now, Jehovah „a Sma di sidon tapoe a kownoestoeroe”, e bradi en tenti, di e kibri sma, abra den, ala di a Pikin Skapoe, Krestes Jesus, e loekoe èn e tjari den na den fonten foe watra foe libi. — Openbaring 7:14, 15.
17. Fa a bigi ipi e kisi spesroetoe deki-ati foe doe sani so taki den kan kisi kibri na ini a dei foe banawtoe di e kon?
17 Te den miljoenmiljoen sma foe na bigi ipi e soekoe Jehovah, en regtfardikifasi èn en safri-atifasi, dan noiti den no moesoe meki na fosi lobi foe den gi a waarheid kon kowroe! Efoe joe na wan foe den sma disi, di gersi skapoe, dan san joe moesoe doe dan? So leki fa skrifi na Kolosesma kapitel 3, vers 5 te go miti vers 14, joe moesoe „poeroe na owroe sma di joe de nanga ala en doe” dorodoro. Te joe e soekoe a jepi foe Gado, dan meki moeiti foe ’weri gi joesrefi a njoen sma di joe moesoe de, di abi en fondamenti tapoe soifri sabi’. Ini safri-atifasi, bow èn tan hori a faja ini a prèise foe Jehovah èn ini a meki di joe e meki den toemoesi moi prakseri foe en bekènti . Na so fasi, joe kan kisi kibri ini a „ten foe banawtoe”, a dei foe „Jehovah en faja atibron”.
18, 19. Na sortoe fasi horidoro kon de prenspari foe kisi froeloesoe?
18 A dei dati de krosibei! A e lon kon na wi. A tjari kon makandra foe den sma foe na bigi ipi doe now so wan 57 jari kaba. Wan nomroe foe den disi dede èn den e wakti na opobaka foe den. Ma wi kisi a djaranti nanga jepi foe a profeititori foe Openbaring, taki leki wan groepoe na bigi ipi sa komoto na a bigi banawtoe, leki a fondamenti foe „a njoen grontapoe” libimakandra (Openbaring 21:1). Joe sa de drape? Dati man, foe di Jesus e taki na Mateus 24:13: „A sma di horidoro te na a kaba na a sma di sa kisi kibri.”
19 Den kwinsi di, a pipel foe Jehovah e ondrofeni ini na owroe seti foe sani disi kan kon moro foeroe. Èn te a bigi banawtoe, di e gi brokoskin, doro, joe kan njan pina. Ma tan krosibei na Jehovah èn en organisâsi. Tan na ai! „’Tan froewakti mi’, Jehovah e taki, ’te a dei te mi e opo lon graboe san mi man feni, bika a kroetoe bosroiti foe mi de, foe tjari nâsi konmakandra, foe mi tjari kownoekondre kon na wán, foe mi kanti kroetoe kon a den tapoe, heri mi faja atibron; bikasi nanga a faja foe mi faja foe doe wroko, heri grontapoe sa pori.’” — Sefania 3:8.
20. San wi moesoe doe ala di a „ten foe banawtoe” di e go na wan heimarki e kon krosibei moro nanga moro?
20 Gi a kibri èn a deki-ati foe wi, Jehovah ben gi a pipel foe en na wan moi fasi „wan soifri tongo”, di abi na ini a moi boskopoe foe a Kownoekondre foe en di ben bigin foe tiri „foe den alamala kari a nen foe Jehovah, foe dini en skowroe na skowroe” (Sefania 3:9). Ala di a „ten foe a banawtoe” di e go na wan heimarki, esi-esi e kon moro krosibei, meki wi tan dini nanga a faja foe a tranga wroko foe mi, foe di wi e jepi tra safri-ati sma foe ’kari a nen foe Jehovah’ foe kisi froeloesoe.
Joe e memre disi?
◻ Sortoe sani di Jehovah sa opo doe, sa meki a vrede kon na grontapoe?
◻ San wan sma moesoe doe so taki a kan kisi kibri, so leki fa Joèl e taki?
◻ Fa safri-atisma e feni kibri foe Jehovah en faja atibron no kisi den, so leki fa Sefania e taki?
◻ Soema na „a sma foe kroektoedoe”, èn fa a ben meki a broedoe paiman kon so bigi?
◻ O prenspari a de foe horidoro ini a tori foe kisi froeloesoe?