Meki sani bekènti na poebliki foe kan kisi froeloesoe
„Ibriwan sma di e kari a nen foe Jehovah, sa kisi froeloesoe.” — ROMESMA 10:13.
1. Sortoe warskow ben de foe jere na ini a heri historia?
A HISTORIA e taki foe difrenti ’dei foe Jehovah’. A Froedoe na ini a ten foe Noa, a pori foe Sodom nanga Gomora, nanga den pori foe Jerusalem na ini 607 b.G.T. èn na ini 70 G.T. ben de bigi dei foe Jehovah di ben gi sma frede. Den dei disi ben de dei pe refensi ben teki teige den sma di ben meki oproeroe kontrari Jehovah (Maleaki 4:5; Lukas 21:22). Na ini den dei dati, foeroe sma ben dede foe di den ben de godelowsoe. Ma son sma ben tan na libi. Jehovah ben meki sma gi warskow, foe meki den godelowsoe sma kon sabi taki wan rampoe ben de na pasi e kon èn foe gi reti-ati sma wan okasi foe feni froeloesoe.
2, 3. (a) Foe sortoe warskow di ben gi na ini wan profeititori, den ben taki na a Pinksterfesa? (b) San ben de fanowdoe, sensi a Pinksterfesa foe 33 G.T., te wan sma ben kari a nen foe Jehovah?
2 A pori foe Jerusalem na ini 70 G.T. na wan toemoesi moi eksempre foe dati. A profeiti Joèl, di ben taki na fesi foe a sani dati pikinmoro 900 jari bifo a pasa troetroe, ben skrifi: „Mi sa sori wondroe sani na hemel èn na grontapoe, broedoe nanga faja nanga smoko di e opo go na loktoe. Srefi son sa kenki kon tron doengroe, èn moen sa tron broedoe, bifo a bigi èn frede dei foe Jehovah e kon.” Fa wan sma ben kan pasa so wan frede ten libilibi? Joèl ben skrifi na ondro a krakti foe santa jeje: „A moesoe pasa, taki ibriwan sma di e kari a nen foe Jehovah, sa kisi kibri; bika na tapoe a bergi Sion èn na Jerusalem, sma di lowe sa de, neleki fa Jehovah taki, èn na mindri den sma di ben tan na libi, di Jehovah e kari.” — Joèl 2:30-32.
3 Na a Pinksterfesa foe 33 G.T., na apostel Petrus ben taki nanga wan ipi djoe nanga proselietsma na ini Jerusalem èn a ben taki den wortoe foe a profeititori foe Joèl foe sori taki den arkiman foe en ben kan froewakti wan kontroe na ini a ten foe den: „Mi sa gi wondroe na hemel na tapoesei èn marki na grontapoe na ondro, broedoe nanga faja nanga smoko; son sa kon doengroe èn moenkenki sa tron broedoe bifo a bigi èn barinen dei foe Jehovah doro. Èn ibriwan sma di e kari a nen foe Jehovah, sa kisi froeloesoe” (Tori foe den Apostel 2:16-21). A heri ipi sma di ben e arki Petrus ben de na ondro a Wet foe Moses, èn foe dati ede den ben sabi a nen foe Jehovah. Petrus ben tjari kon na krin taki foe bigin nanga a ten dati, a kari di wan sma e kari a nen foe Jehovah ben o wani taki moro. A ben de toemoesi moi foe si, taki disi ben wani taki dati sma ben moesoe teki dopoe na ini a nen foe Jesus, a sma di trawan ben kiri èn di baka dati ben kisi wan opobaka foe go libi na hemel sondro foe man dede oiti. — Tori foe den Apostel 2:37, 38.
4. Sortoe boskopoe den kresten ben meki bekènti na ala sei?
4 Sensi a Pinksterfesa, den kresten ben panja a wortoe foe Jesus di ben kisi wan opobaka (1 Korentesma 1:23). Den ben meki bekènti taki libisma ben kan tron jeje kweki-manpikin foe Jehovah Gado èn ben kan kon tron wan pisi foe wan njoen „Israèl foe Gado”, wan jeje nâsi di ben o ’meki den moi sani foe Jehovah bekènti na ala sei’ (Galasiasma 6:16; 1 Petrus 2:9). Den sma di ben tan getrow te na dede ben o kisi libi na hemel sondro foe man dede oiti, leki kompe erfgenaam nanga Jesus na ini en hemel Kownoekondre (Mateus 24:13; Romesma 8:15, 16; 1 Korentesma 15:50-54). Boiti dati, den kresten disi ben moesoe meki bekènti taki Jehovah en bigi dei di e gi sma frede ben de na pasi. Den ben moesoe warskow a djoe libimakandra taki den ben o ondrofeni wan banawtoe di ben o de moro ogri leki iniwan sani di ben pasa nanga Jerusalem èn nanga den sma di ben taki dati den ben de Gado pipel te na a ten dati. Ma sma ben o tan na libi. Soema? Den sma di ben kari a nen foe Jehovah.
„Na ini den lasti dei”
5. Fa profeititori kon troe na ini a ten disi?
5 Na someni fasi, a situwâsi foe a ten dati ben prenki den sani di wi e si na ini a ten disi. Sensi 1914, a libisma famiri libi na ini wan spesroetoe ten di bijbel e taki foe en leki „a ten foe a kaba”, „a bosroiti foe a seti foe sani”, èn „den lasti dei” (Danièl 12:1, 4; Mateus 24:3-8; 2 Timoteus 3:1-5, 13). Na ini a jarihondro foe wi, ogri feti, ogri di e doe nanga tranga sondro foe sma e dwengi densrefi, a pori di sma e pori a libimakandra nanga a kontren pe wi e libi na ini, de wan moi kontroe foe bijbel profeititori. Ala den sani disi na wan pisi foe a marki di Jesus ben froeteri leki wan profeititori, èn di e sori taki a libisma famiri de foe ondrofeni a lasti dei foe Jehovah di e gi sma frede pe sma ben o sabi soema ben sa wini a strei. Disi e kon na wan kaba na ini a feti foe Armagedon, a heimarki foe wan „bigi banawtoe . . . soleki noiti no ben feni presi ete foe sensi a bigin foe grontapoe te now, nôno, èn no sa kon moro toe”. — Mateus 24:21; Openbaring 16:16.
6. (a) San Jehovah doe foe froeloesoe safri-atisma? (b) Pe wi e feni a rai foe Paulus fa wi kan kisi froeloesoe?
6 Ala di a dei foe a pori e kon moro krosibei, Jehovah e doe wan sani foe froeloesoe den safri-atisma. Na ini a „ten [disi] foe a kaba” a tjari den lastiwan foe a jeje Israèl foe Gado kon na wán èn ben poti a prakseri foe den foetoeboi foe en na grontapoe, sensi 1930, na tapoe a tjari di „wan bigi ipi, di no wan sma man teri, di komoto na ala nâsi nanga lo nanga pipel nanga tongo” moesoe tjari kon na wán. Leki groepoe, den „komoto na a bigi banawtoe” libilibi (Openbaring 7:9, 14). Ma fa ibriwan sma kan de seiker taki a sa tan na libi? Na apostel Paulus e gi piki tapoe na aksi dati. Na ini Romesma 10, a e gi moi rai fa sma kan tan na libi — rai di ben fiti na ini a ten foe en èn di e fiti baka na ini a ten foe wi.
Wan begi foe kisi froeloesoe
7. (a) Sortoe howpoe de foe si na ini Romesma 10:1, 2? (b) Foe san ede Jehovah ben kan meki sma bariwroko gi a „boen njoensoe” na wan moro bigi fasi?
7 Di Paulus ben skrifi a boekoe Romesma, dan Jehovah ben trowe Israèl kaba leki wan nâsi. Tokoe na apostel ben gi a djaranti: „A boen wani foe mi ati èn den tranga begi di mi e begi Gado gi den, de troetroe gi a froeloesoe foe den.” A howpoe foe en ben de taki aparti djoe ben sa kan kisi soifri sabi foe a wani foe Gado, san ben sa abi leki bakapisi taki den ben sa kisi froeloesoe (Romesma 10:1, 2). Boiti dati, Jehovah ben sa wani taki sma na heri grontapoe foe libisma di e sori bribi, ben o kisi froeloesoe soleki fa Johanes 3:16 ben sori: „Gado ben lobi grontapoe sote, taki a ben gi en wan-enkri gebore Manpikin, so taki ibriwan sma di e sori bribi na ini en, no ben sa kisi pori, ma ben sa abi têgo libi.” Jesus froeloesoe-ofrandi ben opo a pasi gi a bigi froeloesoe dati. Neleki fa a ben de na ini a ten foe Noa èn na ini tra kroetoedei di ben kon baka dati, na so Jehovah meki sma bariwroko gi „boen njoensoe”, èn e sori sma na so wan fasi a pasi foe kisi froeloesoe. — Markus 13:10, 19, 20.
8. Na soema, troe kresten e sori boen wani na ini a ten disi, akroederi na eksempre foe Paulus, èn fa?
8 Paulus, di ben sori djoe nanga heidensma en eigi boen wani, ben preiki na ibri okasi. A „ben overtoigi den djoe nanga den Grikisma”. A ben froeteri den owroeman foe Efeise: „Mi no ben draidrai foe froeteri oenoe ala san ben boen èn foe leri oenoe na poebliki èn oso foe oso toe. Ma mi ben gi kotoigi finifini na den djoe èn na den Grikisma foe a berow na Gado èn a bribi na ini wi Masra Jesus” (Tori foe den Apostel 18:4; 20:20, 21). Na a srefi fasi, Jehovah Kotoigi na ini a ten disi e gebroiki den ten foe preiki, no wawan gi sma di e taki dati den de kresten, ma gi ala sma, srefi gi sma di de na „den moro farawe pisi foe grontapoe”. — Tori foe den Apostel 1:8; 18:5.
Bekènti „a ’Wortoe’ foe bribi”
9. (a) Romesma 10:8, 9 e gi sma a deki-ati foe abi sortoe bribi? (b) O ten èn fa wi moesoe meki a bribi foe wi bekènti?
9 Efoe wan sma wani kisi froeloesoe, dan a moesoe abi wan bribi di e horidoro. Paulus di ben taki den wortoe foe Deuteronomium 30:14, ben froeklari: „’A wortoe de krosibei foe joe, na ini joe eigi mofo èn na ini joe eigi ati’, dati wani taki a ’wortoe’ foe bribi, di wi e preiki” (Romesma 10:8). Te wi e preiki a „’wortoe [dati] foe bribi”, dan a e kon dipi na ini wi ati moro nanga moro. Na so a ben de nanga Paulus, èn den wortoe di a e taki moro fara kan tranga a bosroiti di wi abi foe de leki en te wi e prati a bribi dati nanga trawan: „Efoe na poebliki joe e meki a ’wortoe na ini joe eigi mofo’ bekènti taki Jesus na Masra, èn e sori bribi na ini joe ati taki Gado opo en na dede, dan joe sa kisi froeloesoe” (Romesma 10:9). No wawan den e meki disi bekènti na fesi foe tra sma na a ten foe a dopoe, ma a moesoe de wan sani di den e meki bekènti doronomo, wan fajafaja poebliki kotoigi foe ala den toemoesi moi sei foe waarheid. So wan waarheid e poti prakseri na tapoe a warti nen foe a Soeverein Masra Jehovah; na tapoe wi Mesias Kownoe nanga Froeloesoeman, Masra Jesus Krestes; èn na tapoe den toemoesi moi Kownoekondre pramisi.
10. San wi moesoe doe nanga a „’wortoe’ [disi] foe bribi”, akroederi Romesma 10:10, 11?
10 Froeloesoe no de gi wan sma di no e teki a „’wortoe’ [disi] foe bribi” èn e gebroiki dati na ini den libi, soleki fa na apostel e taki moro fara: „Nanga na ati wan sma e sori bribi foe regtfardikifasi, ma nanga a mofo wan sma e meki sani bekènti na poebliki foe kan kisi froeloesoe. Bika Boekoe e taki: ’No wan sma di e poti en bribi na en tapoe, a sa meki en fesi fadon’” (Romesma 10:10, 11). Wi moesoe kisi soifri sabi foe a „’wortoe’ [disi] foe bribi” èn go doro foe meki a gro na ini wi ati so taki disi e poesoe wi foe froeteri en na trawan. Jesus srefi e memre wi: „A sma di e sjen gi mi èn gi den wortoe foe mi, ini a sondoe geslakti disi di e doe soetadoe, a Manpikin foe libisma sa sjen gi en toe te a doro ini a glori foe en Tata makandra nanga den santa engel.” — Markus 8:38.
11. Te o fara a boen njoensoe moesoe meki bekènti, èn foe san ede?
11 Soleki fa a profeiti Danièl ben taki na fesi, dan na ini a ten disi foe a kaba, sma e si taki „den wan di abi inzicht” e skèin „leki a krin leti na loktoe”, foe di a Kownoekondre kotoigiwroko e panja go te na den kabapisi foe grontapoe. Den „e tjari den foeroe sma kon na regtfardikifasi”, èn a no de foe taki, dati a troe sabi e kon de pasa marki, bika Jehovah e trowe wan moro krin leti na tapoe den profeititori di abi foe doe nanga a ten disi foe a kaba (Danièl 12:3, 4). Djaso wan boskopoe foe froeloesoe de di de toemoesi prenspari foe meki ala den sma di lobi waarheid nanga regtfardikifasi, tan na libi.
12. Fa Romesma 10:12 e fiti nanga a wroko di na engel kisi foe doe soleki fa dati skrifi na ini Openbaring 14:6?
12 Na apostel Paulus e go doro: „Wan difrenti no de na mindri djoe nanga Grikisma, bika a srefi Masra de na den alamala tapoe, di goedoe gi ala den wan di e kari en” (Romesma 10:12). Na ini a ten disi, a „boen njoensoe” moesoe preiki na wan moro bigi fasi na heri grontapoe — gi ala sma, te na den moro farawe presi foe grontapoe. Na engel foe Openbaring 14:6 e tan frei na mindrisei foe hemel, èn a e gi wi a „têgo boen njoensoe foe meki bekènti leki prisiri njoensoe gi den sma di e libi na grontapoe, èn gi ibri nâsi nanga lo nanga tongo nanga pipel”. Fa disi sa tjari wini kon gi den sma di e gi jesi?
Kari a nen foe Jehovah
13. (a) San na wi jaritekst foe 1998? (b) Foe san ede a jaritekst disi e fiti srefisrefi na ini a ten disi?
13 Paulus di e taki den wortoe foe Joèl 2:32, e froeklari: „Ibriwan sma di e kari a nen foe Jehovah, sa kisi froeloesoe” (Romesma 10:13). A e fiti troetroe taki den teki den wortoe disi leki jaritekst foe Jehovah Kotoigi gi 1998! Noiti ete a ben de so prenspari foe go na fesi ala di wi e froetrow na tapoe Jehovah, èn e meki en nen bekènti èn den toemoesi moi prakseri di a nen dati e prenki! Neleki fa a ben de na ini a fosi jarihondro, na so a tranga babari: „Kisi froeloesoe komoto na mindri a kroektoe geslakti disi”, de foe jere toe na ini den lasti dei foe a disiten pori seti foe sani (Tori foe den Apostel 2:40). A de neleki wan tronpeti e kari ala den sma na heri grontapoe di e frede Gado foe kari Jehovah foe gi den froeloesoe èn so srefi den wan di e arki a boen njoensoe di den e meki bekènti na poebliki. — 1 Timoteus 4:16.
14. Sortoe Klepston wi moesoe kari foe kisi froeloesoe?
14 San sa pasa te a bigi dei foe Jehovah e bigin wantronso na tapoe a grontapoe disi? Moro foeroe sma no sa soekoe a jepi foe Jehovah foe kisi froeloesoe. A moro bigi pisi foe a libisma famiri sa „tan taigi den bergi èn den klepston: ’Fadon kon na wi tapoe èn kibri wi gi a fesi foe a Sma di e sidon na tapoe a kownoestoeroe èn gi na atibron foe a Pikin Skapoe’” (Openbaring 6:15, 16). Den sa poti a howpoe foe den na tapoe den organisâsi nanga instituut foe a seti foe sani disi, di gersi bergi. Ma o moro betre a ben o de te den ben o froetrow na tapoe a moro bigi Klepston foe alamala, Jehovah Gado! (Deuteronomium 32:3, 4) Kownoe David ben taki foe en: „Jehovah na mi klepston di e tanapoe leti-opo èn mi fortresi èn a Sma di e sorgoe taki mi feni kibri.” Jehovah na „wi Klepston foe froeloesoe” (Psalm 18:2; 95:1). En nen na „wan tranga toren”, a wan-enkri „toren” di tranga nofo foe kibri wi na ini a moeilek ten di e kon (Odo 18:10). Foe dati ede, a de toemoesi prenspari taki someni leki a kan foe den pikinmoro siksi miljard sma di e libi na ini a ten disi, e leri foe kari a nen foe Jehovah na wan getrow fasi èn na wan opregti fasi.
15. San Romesma 10:14 e sori ini a tori foe bribi?
15 A fiti taki na apostel Paulus e go doro foe aksi: „Ma fa den sa kari en efoe den no e bribi na ini en?” (Romesma 10:14) Ipi-ipi sma de di kan kisi jepi ete foe meki „a ’wortoe’ foe bribi” de wan pisi foe densrefi, so taki den kan kari Jehovah foe kisi froeloesoe. Bribi de toemoesi prenspari. Paulus e taki na ini wan tra brifi: „Sondro bribi wan sma no man plisi [Gado] na wan boen fasi, bika a sma di e kon na Gado, moesoe bribi taki a de èn taki a e tron a sma di e pai den wan di e soekoe en serjoesoe” (Hebrewsma 11:6). Ma fa miljoenmiljoen sma moro sa poti bribi na ini Gado? Na ini a brifi gi den Romesma, Paulus e aksi: „Ma fa den sa bribi na ini en efoe den no jere foe en?” (Romesma 10:14) Jehovah e gi den a wrokosani foe kan jere? A de seiker taki a e doe dati! Arki den wortoe di Paulus e taki moro fara: „Ma fa den sa jere sondro foe wan sma e preiki?”
16. Foe san ede preikiman de prenspari na ini a seti foe Gado?
16 Na den wortoe di Paulus e taki, joe kan si krin taki preikiman de fanowdoe. Jesus ben sori taki disi ben o de so, „te na a bosroiti foe a seti foe sani” (Mateus 24:14; 28:18-20). A preikiwroko na wan toemoesi prenspari pisi foe a sani di Gado seti foe jepi sma foe kari a nen foe Jehovah so taki den kan kisi froeloesoe. Srefi a moro bigi pisi foe krestenhèit no e doe noti foe gi grani na a warti nen foe Gado. Foeroe sma e broeja Jehovah nanga Jesus nanga a santa jeje na ini a wan Dri-wánfasi leri di sma no man froeklari. So srefi, foeroe sma de foe feni na ini a groepoe di Psalm 14:1 nanga 53:1 e taki foe den: „A sma sondro froestan taki na ini en ati: ’No wan Jehovah no de.’” Den moesoe sabi taki Jehovah na a libi Gado, èn den moesoe froestan ala sani di abi foe doe nanga en nen, efoe den wani kisi froeloesoe na ini wan bigi banawtoe di de na pasi e kon.
Den ’switi foetoe’ foe den preikiman
17. (a) Foe san ede a de wan joisti sani taki Paulus e taki den wortoe foe wan profeititori di abi foe doe nanga a meki di sani e meki kon njoen baka? (b) San a wani taki foe abi ’switi foetoe’?
17 Na apostel Paulus abi ete wan toemoesi prenspari aksi: „Ma fa den sa preiki efoe wan sma no seni den go? Neleki fa a skrifi: ’O switi den foetoe foe den wan de di e meki boen njoensoe foe boen sani bekènti!’” (Romesma 10:15) Djaso Paulus e taki den wortoe foe Jesaja 52:7, san de wan pisi foe wan profeititori, di e taki fa sani sa kon boen baka èn di e fiti sensi 1919. Na ini a ten disi baka, Jehovah e seni „a sma di e tjari boen njoensoe kon foe wan moro boen sani, a sma di e meki froeloesoe bekènti”. Den salfoe „waktiman” foe Gado di e gi jesi èn den kompe foe den e tan bari foe prisiri (Jesaja 52:7, 8). Den foetoe foe den sma di e meki froeloesoe bekènti na ini a ten disi kan kon weri, kisi doti srefi, te den e waka oso foe oso, ma a fesi foe den e brenki troetroe foe prisiri ede! Den sabi taki Jehovah gi den a wroko foe meki boen njoensoe foe vrede bekènti èn foe trowstoe den sma di e sari, èn e jepi den sma disi foe kari a nen foe Jehovah foe kan kisi froeloesoe na ini a ten di de na den fesi.
18. San Romesma 10:16-18 e taki ini a tori foe a lasti bakapisi foe a boen njoensoe di sma e meki bekènti?
18 Efoe sma „e bribi a sani di [den] jere” noso efoe den e bosroiti foe no gi jesi na en, den wortoe foe Paulus troe: „Den no jere disi kande? Ija, seiker; te joe loekoe en boen, dan ’na heri grontapoe a babari foe den ben go, èn den wortoe foe den, te na den moro farawe presi foe grontapoe’” (Romesma 10:16-18). Neleki fa „den hemel e meki a glori foe Gado bekènti”, soleki fa dati de foe si na ini den moi wroko foe en di ensrefi meki, na so en Kotoigi na grontapoe moesoe meki „a jari foe boen wani bekènti foe a sei foe Jehovah èn a dei foe teki refensi foe a sei foe wi Gado . . . foe trowstoe ala den wan di e sari”. — Psalm 19:1-4; Jesaja 61:2.
19. San na den bakapisi di den sma sa kisi di ’e kari a nen foe Jehovah’ na ini a ten disi?
19 Jehovah en bigi dei di e gi sma frede e kon krosibei moro nanga moro. „Ke foe a dei; bika a dei foe Jehovah de krosibei, èn leki na ogri pori di e kon foe na Almaktiwan, a sa kon!” (Joèl 1:15; 2:31) Wi e begi taki ipi-ipi sma moro sa gi jesi na a boen njoensoe na wan toemoesi serjoesoe fasi, èn kon ipi-ipi na Jehovah en organisâsi (Jesaja 60:8; Habakuk 2:3). Memre taki den tra dei foe Jehovah ben tjari pori kon gi den godelowsoe sma — na ini a ten foe Noa, na ini a ten foe Lot, èn na ini a ten foe Israèl nanga Juda di ben fadon komoto na bribi. Now wi de na a dromofo foe a moro bigi banawtoe di oiti ben de, te a bigi winti foe Jehovah sa wai godelowsoefasi poeroe foe a grontapoe disi, èn sa opo a pasi na so wan fasi gi wan paradijs foe têgo vrede. Joe sa de wan sma di „e kari a nen foe Jehovah” na wan getrow fasi? Efoe dati de so, dan prisiri! Joe kisi a pramisi foe Gado srefi taki joe sa kisi froeloesoe. — Romesma 10:13.
San joe ben sa piki?
◻ Sortoe njoen sani sma ben meki bekènti baka a Pinksterfesa foe 33 G.T.?
◻ Fa kresten moesoe poti prakseri na tapoe „a ’wortoe’ foe bribi”?
◻ San a wani taki foe ’kari a nen foe Jehovah’?
◻ Na sortoe fasi Kownoekondre boskopoeman abi ’switi foetoe’?
[Prenki na tapoe bladzijde 18]
A pipel foe Gado e meki den moi sani foe en bekènti na Porto Riko, Senegal, Peroe, Papoewa Njoen Ginea — ija, na heri grontapoe