Froeloesoe — San a wani taki troetroe

’JOE kisi froeloesoe?’ Foeroetron, den sma di e poti na aksi disi, e denki taki den kisi froeloesoe foe di den ’teki Jesus leki a persoonlijk Froeloesoeman foe den’. Tra sma e denki taki difrenti fasi de foe kisi froeloesoe, èn taki so langa ’Jesus de na ini joe ati’, a no abi trobi san joe e bribi noso srefi foe sortoe kerki joe de.

Bijbel e taki dati a de a wani foe Gado taki „ala sortoe sma moesoe kisi froeloesoe” (1 Timoteus 2:3, 4). So boen, froeloesoe de gi ala sma di wani teki en. Ma san a wani taki foe kisi froeloesoe? A de troetroe wan sani di joe e ondrofeni sondro taki joe e doe foeroe moeiti noso sondro taki joe e doe wan moeiti foe joe sei?

A wortoe „froeloesoe” wani taki dati wan sma e kon „fri foe kefar noso pori”. So boen, troetroe froeloesoe abi foe doe nanga moro leki wan serjoesoe fasi fa wan sma e denki. A wani taki dati wan sma e kisi froeloesoe foe a pori di a ogri seti foe sani disi sa kisi èn te foe kaba, foe dede srefi! Ma soema na den sma di Gado sa froeloesoe? Foe piki na aksi dati, meki wi ondrosoekoe san Jesus Krestes ben leri sma foe a tori disi. Den sani di wi sa leri foe na ondrosoekoe disi kan froewondroe joe.

Froeloesoe — A de foe feni na ini ala relisi?

Na wan okasi, Jesus ben abi wan takimakandra nanga wan Samaria oema. Ala di na oema no ben de wan djoe, tokoe a ben bribi boen taki a Mesias, „di nen Krestes”, ben sa kon (Johanes 4:25). A bribi disi ben nofo gi en foe kisi froeloesoe? Nôno, bika na wan krakti fasi Jesus ben taigi na oema: „Oenoe e anbegi san oenoe no sabi.” Jesus ben sabi taki efoe na oema disi ben moesoe kisi froeloesoe, dan a ben sa moesoe kenki a fasi fa a ben anbegi. Foe dati ede Jesus ben froeklari: „Ma, a joeroe e kon, èn de now, taki den troe anbegiman sa anbegi a Tata nanga jeje èn nanga waarheid, bika foe troe, a Tata e soekoe den sortoe sma disi foe anbegi en.” — Johanes 4:22, 23.

Wan tra okasi pe Jesus ben tjari kon na krin fa a e denki foe froeloesoe, ben abi foe doe nanga den Fariseiman, wan prenspari relisi sekte foe a djoe bribi. Den Fariseiman ben meki wan sistema foe anbegi èn ben bribi taki Gado ben feni dati boen. Ma jere san Jesus ben taigi den Fariseiman: „Oen hoigriman! Jesaja ben abi reti di a ben profeteri foe oenoe: ’Den sma disi e gi mi grani nanga den mofoboeba, ma den ati de fara foe mi. Na foe soso den e anbegi mi; den leri foe den na soso wet di sma e leri.’” — Mateus 15:7-9, New International Version.

Fa a de nanga den foeroe relisi groepoe na ini a ten disi di e froeklari taki den e bribi na ini Krestes? Jesus ben sa feni den alamala boen leki den joisti fasi foe kisi froeloesoe? Wi no abi foe denki foe a tori disi, bika Jesus ben taki krinkrin: „A no ala sma di e taigi mi: ’Masra, Masra’, sa go na ini a kownoekondre foe hemel, ma na a sma di e doe a wani foe mi Tata, di de na hemel. Foeroe sma sa taigi mi na a dei dati: ’Masra, Masra, a no na ini joe nen wi ben taki profeititori, èn a no na ini joe nen wi ben poeroe ogri jeje na sma tapoe, èn a no na ini joe nen wi ben doe foeroe krakti wroko?’ Èn tokoe mi sa taigi den na poebliki: Mi no ben sabi oenoe noiti! Oen komoto na mi fesi, oen wrokoman foe kroektoedoe.” — Mateus 7:21-23.

Soifri sabi foe Jesus de toemoesi prenspari foe kisi froeloesoe

Den wortoe disi foe Jesus abi bodoi na ini di e meki sma prakseri na wan serjoesoe fasi. Den e sori taki foeroe opregti sma no ’e doe a wani foe a Tata’. So boen, fa wan sma kan kisi troetroe froeloesoe? Wán Timoteus 2:3, 4 e piki: „[A de a wani foe Gado] taki ala sortoe sma moesoe kisi froeloesoe èn kon kisi wan soifri sabi foe waarheid.” — Teki gersi Kolosesma 1:9, 10.

A sortoe sabi disi de toemoesi prenspari foe man kisi froeloesoe. Di wan Rome waktiman foe wan strafoe-oso ben aksi na apostel Paulus nanga en kompe, Silas, „San mi moesoe doe foe kisi froeloesoe?”, den ben piki: „Bribi na ini Masra Jesus èn joe sa kisi froeloesoe, joe nanga joe osofamiri” (Tori foe den Apostel 16:30, 31). Disi ben wani taki dati a wan-enkri sani di a waktiman disi nanga en osofamiri ben moesoe doe, na foe abi wan sortoe firi na ini den ati foe den? Nôno, wán reide na taki den no ben kan „bribi [troetroe] na ini Masra Jesus” sondro taki den ben abi pikinso sabi foe soema Jesus ben de, san a ben doe, èn san a ben leri sma.

Foe eksempre, Jesus ben leri taki wan hemel tirimakti ben seti — „a kownoekondre foe Gado” (Lukas 4:43). A ben poti so srefi den gronprakseri foe kresten moreelfasi èn a fasi fa den moesoe tjari densrefi (Mateus, kapitel 5-7). A ben kari so srefi a fasi fa en disipel ben moesoe handri na ini politiek afersi (Johanes 15:19). A ben seti wan leriprograma di ben sa doe na heri grontapoe èn a ben gi en bakaman a komando foe abi wan prati na dati (Mateus 24:14; Tori foe den Apostel 1:8). Ija, foe ’bribi na ini Jesus’ ben wani taki dati den ben moesoe froestan foeroe sani! A no de foe froewondroe dan, taki Paulus nanga Silas „ben taki a wortoe foe Jehovah gi [a waktiman foe a strafoe-oso] makandra nanga ala den wan na ini en oso” bifo den njoen sma disi di ben e bribi, ben teki dopoe. — Tori foe den Apostel 16:32, 33.

Soifri sabi foe Gado de toemoesi prenspari toe

Wan prenspari pisi foe bribi troetroe na ini Jesus, abi foe doe nanga na anbegi foe a Gado di Jesus srefi e anbegi. Jesus ben begi: „Disi wani taki têgo libi, foe den e teki sabi na ini den foe joe, a wan-enkri troe Gado èn foe en di joe seni kon, Jesus Krestes.” — Johanes 17:3.

Na a ten foe en diniwroko na grontapoe, ala ten a Manpikin foe Gado ben poti prakseri na tapoe en Tata èn no na tapoe ensrefi. Noiti a ben froeklari taki en na a Almakti Gado (Johanes 12:49, 50). Na foeroe okasi Jesus ben tjari kon na krin sortoe posisi a abi na ini a seti foe Gado, foe di a ben taki dati en de moro lagi leki en Tata (Lukas 22:41, 42; Johanes 5:19). Ija, Jesus ben froeklari: „A Tata bigi moro mi” (Johanes 14:28). Joe kerki leri joe a troetroe matifasi di de na mindri Gado nanga Krestes? Noso den meki joe bribi taki Jesus srefi na a Almakti Gado? A froeloesoe foe joe abi foe doe nanga a abi di joe abi a joisti sabi.

Na ini a Begi foe Masra, Jesus ben gi den disipel foe en a deki-ati foe begi: „Meki joe nen kon santa” (Mateus 6:9). Moro foeroe vertaling foe bijbel kibri a nen foe Gado, foe di den vertaal en nanga „Masra”. Ma na ini owroeten eksemplaar foe na „Owroe Testament”, a nen foe Gado ben de moro leki siksi doesoen tron! Foe dati ede Psalm 83:18 e taki: „So taki sma kan sabi taki joe, di nen na Jehovah, joe wawan na a Moro Heiwan na heri grontapoe.” Joe leri foe gebroiki a nen foe Gado, Jehovah? Efoe dati no de so, dan a froeloesoe foe joe de na ini kefar, bika „ibriwan sma di e kari a nen foe Jehovah, sa kisi froeloesoe”! — Tori foe den Apostel 2:21; teki gersi Joèl 2:32.

Nanga jeje èn nanga waarheid

Jesus Krestes ben poti prakseri toe na tapoe a Wortoe foe Gado, bijbel. Te a ben e taki fa Gado e prakseri foe son afersi, foeroetron a ben e taki: „A skrifi na Boekoe” (Mateus 4:4, 7, 10; 11:10; 21:13). A neti bifo a ben dede, Jesus ben begi gi den disipel foe en: „Santa den nanga jepi foe waarheid; joe wortoe na waarheid.” — Johanes 17:17.

So boen, foe froestan den leri foe a Wortoe foe Gado, bijbel, na wan tra sani di de fanowdoe foe kisi froeloesoe (2 Timoteus 3:16). Bijbel wawan e gi piki na tapoe den aksi disi soleki: San a libi wani taki? Foe san ede Gado gi pasi meki ogridoe tan so langa? San e pasa nanga wan sma te a dede? Gado e pina sma troetroe na ini wan faja hèl? San Gado abi na prakseri nanga a grontapoe?a Wan sma no kan anbegi Gado na wan boen fasi sondro foe abi wan joisti sabi foe den penti disi, bika Jesus ben taki: „Troe anbegiman sa anbegi a Tata nanga jeje èn nanga waarheid.” — Johanes 4:23.

Bribi e boeweigi wan sma foe handri

Froeloesoe abi foe doe nanga moro leki nomo foe teki bodoi na ini wi. A soifri sabi foe Gado abi bribi leki bakapisi na ini wan ati di e teki sani esi (Romesma 10:10, 17; Hebrewsma 11:6). So wan bribi e boeweigi wan sma foe handri. Foe eksempre, bijbel e froemane: „Abi berow foe dati ede èn drai baka, so taki den sondoe foe oenoe kan figi poeroe, so taki ten di e gi kowroe-ati kan kon foe Jehovah.” — Tori foe den Apostel 3:19.

Ija, froeloesoe wani taki toe taki wan sma moesoe fiti ensrefi akroederi den markitiki foe Gado, foe a fasi fa wan sma e tjari ensrefi èn foe moreel afersi. Na ondro a krakti di a Wortoe foe Gado abi foe kenki sma, den gwenti di wan sma ben abi en heri libi langa kaba foe lei nanga foe bidrigi, e meki presi gi eerlijkfasi èn getrowfasi (Titus 2:10). Sani di de teige boen gwenti nanga wet, soleki homo-sekslibi, soetadoe, èn hoeroedoe, e libi na baka èn e meki presi gi krin moreel fasi fa wan sma e tjari densrefi (1 Korentesma 6:9-11). Disi no de a tapoe di sma e tapoe gi wan sjatoe pisi ten nomo foe doe den sani disi, di abi en gron na tapoe den firi foe den. Ma a de wan kenki di e tan dorodoro, di de leki bakapisi foe a studeri di a sma e studeri Gado Wortoe finifini èn e gebroiki en. — Efeisesma 4:22-24.

Baka ten, lobi nanga warderi gi Gado e boeweigi wan opregti sma foe gi ensrefi abra na Gado dorodoro èn foe teki dopoe na ini watra leki wan simbôl foe dati (Mateus 28:19, 20; Romesma 12:1). Kresten di teki dopoe, kisi froeloesoe na ini na ai foe Gado (1 Petrus 3:21). Te a godelowsoe grontapoe disi sa pori na ini a ten di e kon, dan Gado sa froeloesoe den krinkrin foe di a sa meki den pasa a banawtoe dati. — Openbaring 7:9, 14.

San froeloesoe kan wani taki gi joe

A de krin foe si na ini a sjatoe takimakandra disi, taki foe kisi froeloesoe abi foe doe nanga moro leki nomo foe ’abi Masra Jesus na ini joe ati’. A wani taki dati wan sma moesoe teki soifri sabi foe Jehovah Gado èn Jesus Krestes èn tjari kenki di de fanowdoe kon na ini en libi. A kan gersi toemoesi bigi gi joe foe doe disi, ma Jehovah Kotoigi wani jepi joe foe doe a moeiti disi. Nanga jepi foe wan fri oso-bijbelstudie den kan jepi joe foe bigin waka na tapoe a pasi di e gi troetroe froeloesoe.b

Foe di a dei foe Gado foe tjari kroetoe kon de heri krosibei, a de moro tranga fanowdoe leki oiti bifo foe waka na tapoe a pasi di e gi troetroe froeloesoe! Now na a ten foe gi jesi na den wortoe foe a profeiti: „Bifo a dei foe Jehovah en atibron e kon na oen tapoe, soekoe Jehovah, ala oen safri-atisma foe grontapoe, di doe den kroetoe bosroiti foe En. Soekoe regtfardikifasi, soekoe safrifasi. Kande oenoe sa kisi kibri tapoe a dei foe Jehovah en atibron.” — Sefanja 2:2, 3.

[Foetoewortoe]

[Faki na tapoe bladzijde 6]

Froeloesoe na wan bakapisi foe . . .

◻ A teki di wan sma e teki soifri sabi foe Gado nanga Jesus. — Johanes 17:3.

◻ A sori di wan sma e sori bribi. — Romesma 10:17; Hebrewsma 11:6.

◻ A abi di wan sma abi berow èn e kenki. — Tori foe den Apostel 3:19; Efeisesma 4:22-24.

◻ A gi di wan sma e gi ensrefi abra na Gado èn e teki dopoe. — Mateus 16:24; 28:19, 20.

◻ A go di wan sma e tan go doro foe meki sani bekènti na poebliki. — Mateus 24:14; Romesma 10:10.

[Prenki na tapoe bladzijde 7]

A studeri di joe e studeri bijbel, a doe di joe e doe san joe leri, a gi di joe e gi joesrefi abra na Gado èn e teki dopoe, na sani di e tjari froeloesoe kon